المشاركة الأصلية كتبت بواسطة apple-green

اخي العزيز اقدر فيك اهتمامك وحبك لخطيبتك ... لكن لي بعض التعليقات في موضوعك وان شاء الله اصيب ..
اول شي اي عروس وعروسه في بداية زواجهم لازم يدخلهم شوي شك لانكم ماتعرفون بعض .. وهذا الكلام بشهادة زوجي وبتفكيري انا .... يعني اول ماتزوجت زوجي كنت دايما اشك يمكن يكلم ... يمكن يعرف احد واحنا ملكتنا ماكانت طويله شهر بس لكن بعد الزواج كنت افتش جواله بدون مايدري اشوف رسايله احيان اتجرا واساله من هالرقم ؟؟؟ مع انه هو كان اذكى مني ولاعمره حسسني بهالشي لكنه كان بعد يدقق ويشوف من وراي ... والحمدلله اللحين وصلنا لمرحله اننا نثق في بعض ثقه عمياء احس لواحد جا قاللي عنه شي استحاله اصدق ...
بالنسبه للكالمات والجوال ... اخوي والله انا متزوجه وبحكم دوام زوجي انه شفتات تعودت على السهر وصرت اكلم صديقاتي كثير بليل وكثير منهم مومتزوجات وبنات ونعم الاخلاق وسوالفنا عاديه مافيها اي شي مريب لكن مجرد مااشوف مكالمة من زواجي استحاله اخليه على الانتظار لازم ارد وهذا موخوف منه لكن احترام له ولاني ابديه عن الكل ...
فخطيبتك يمكن فرحانه بالجوال تكلم صديقاتها ... بس الغريب انها تسهر لهالوقت وعندها مدرسه بكرا ... بس انت غلطان لانك كنت لازم تكون حازم من البدايه وتوضح لها ان هذا التصرف غلط وان هالشي انت ماترضاه حتى لو اهلها راضيين ... لانك زوجك وهذا من حقك عليها ...
بالنسبه للاسواق لازم تعودها من الملكه انها تستاذن منك لكل مكان بتروحه وتقدر تمنعها لكن لاتنسى انها تجهز يعني
لازم تروح كثير .. لكن بعد لاتنتقدها لان اخوها ماينزل معها ممكن انت تفضي نفسك وتروح معهم غصبا عنها لانها مسؤوله منك ... تدري اخوي انا اعرف بنات من اهلي ازواجهم يمنعونهم من اسواق معينه حتى لوراحوها مع اهلهم وعادي تعودوا على الموضوع مع انهم قبل الزواج كانوا يروحون... يعني باختصار روحة هالاماكن موعيب ولاحرام بس هي زوجتك ولماتجي بيتك اوقبل ماتجي ممكن تملي عليها شروطك وتبين وجهة نظرك وانا اقول من الملكه احسن وشوف ردة فعلها ...
بالنسبه للعبايه غريبه انك ماتعرف طريقة لبسها للعبايه كل هالفترة وغريبه اهلك مايعرفون وله انت قصدك انها تلبس كذا من ورى ابوها واخوانها...اذا اهلها يدرون عن لبسها وانت موراضي بكل سهوله امنعها وقولها انا ماارضى زوجتي تلبس كذا وانا اغار عليكي ...بس اذا لبسها من ورى اهلها هنا لازم يكون موقفك حازم اكثر ولازم ترفض وبقوة ...وترى اللبس اخوي مايعطي طابع عن البنت الا ان كانت زايده في الميك اب وضحك بصوت عالي وكذا ... هنا لازم تحترم نفسها قبل لاتحترمك وانت لازم توضح لها انك شفتها ذاك اليوم وان تصرفها ماعجبك لاتسكت ابد ... يعني اليوم بالكثير لازم ترفع سماعه عليها وتقولها كل اللي بخاطرك وتوضح لها الشي اللي ترضاه واللي ماترضاه وقولها انك فكرت بالطلاق اذا هي بتعاندك او تقوي راسها لانك تتكلم عن امور تحكمها شريعتك وعاداتك وتقاليدك واسمحلي ادخل العادات والتقاليد لان الاسلام ماحرم مكالمات بليل ولا الروحه للسوق بدون محرم بس لازم تحترم عاداتك لانها من نفس مجتمعك وهذا الاردى يعني هي عارفه عاداتك مولسه بتتعود عليها ...
صدقني بعد ماتكلمها وتوضح لها اللي في خاطرك وتقولها انك شفتها وانك فكرت بالطلاق يمكن تزعل شوي في البدايه بس خليها لين ترد عليك وان شاء الله بتتفقون ...
والله اخوي بكرا يمكن تضحك على تفكيرك وشكوك وتعرف ان الشيطان داخل بينكم ... انت يحق لك تتعرض على تصرفاتها لكن تعوذ بالله من الشك (( ان بعض الظن اثم))...
اتمنى كلامي افادك واتمنى ماطولت عليك..