السلام عليكم ..

جيت متاخرة وما كنت برد لأن الأخوة زالأخوات يكفون ما قصروا ...بس انقهرت عليك وحبيت اقولك كم نقطة ...



1- الله يجزى أخوك خير اللي لما شاف ان فيه رجال يبي يعف نفسه قاله تعال هذي اختي ....قليل اخوان يسوونها ...

لكن اللي حصل ان فراسة اخوك في الرجال خابت والكل معرض للخطأ والحمدلله انكم لسه على البر.. لأن اللي هذا أوله ينعاف تاليه ..

2- مو كل رجال يستاهل من يقال له تعال هذي اختي .. ولا كل رجال يبين فيه هالمعروف ...

فيه رجال والله تصير لهم ويقدرونها لأبو أو أخو البنت ويحطون البنت في عينهم ..

وفيه رجال لا والله ... يسترخصها ويقول هذي جتني باردة مبردة ..واهلها ما صدقوا يفتكون ....يصير يبيع فيها ويشتري ..


3- انتي تقولين انه يقول انا اسايس اخوك وبعدين اسوي اللي ابي ..

اختي ..

هذه علامة خطيرة .. والحمدلله ان الله انطقه بها امامك قبل ما تتوهقين ... يعني حتى ما استحى يقولها لك ... يظن انك ميتة عليه وانقطعت الدنيا من الرجال الا هو ..

وشكله مكبر راسه لأنه مطلوب مو طالب ...

غير انه قلل من قدر اخوك قدامك وانتم على البر ... بكرة بعد الزواج وش يبي يسوي .. ما ابي اؤكد لك لأني ما اعرف الغيب ..

ولكن وكاني بي اراه يقولك بعد الزواج في اسخفها مشكلة بينكم ..

( اصلا انتم اللي طلبتوني انا ما طلبتكم )

( اصلا اخوك كان يبي يفتك منك )

وخذي من هالكلام اللي يرخصك ويرخص اهلك ..ولا له من يحوشه لأنك ما اتخذتي موقف من شكل هالكلام قبل الزواج ..

واحتمال كبير يدخل ابليس بينك وبين اخوك لأنك بتلومينه بعدين ..

طبيعي بعد ما تطيح الفاس في الراس بتدورين احد تلومينه .. والمتسبب الطبيعي في الموضوع راح يكون اخوك ...

مع ان واضح ان نيته الخوف عليك من باب اخطب لبنتك ولا تخطب لابنك ....

بس زي ما قلت من قبل ... مهوب اي واحد يستاهل ويقدر هالحركة ..



بعدين انتي تقولين تركتي خطاب علشانه ....

معليش اختي ... بس وش تعرفين عنه علشان تتركين خطاب علشانه ...

استخيري .. استخيري ... استخيري ...

ربك أدرى بخيرتك من نفسك ..


وعلشان لما تاخذين قرار تكونين مرتاحة ان ربك معك ينصرك ويدلك على الطريق الصح ..


وعلى فكرة اذا كان من الآن يحطك قدام الأمر الواقع ويتعلق بحجج واهية ...فانتي ما شفتي شي ...

استني لبعد الزواج ... وشوفي وش بيسوي ... لأن عينه بتكون اقوى ..


واذا على كان على كلام الحب .. سهلة .. مافيه رجال مهما كان سيء ما يقولها لخطيبته ايام الملكة ...

ليس دليلا على الحب ..


الأفعال ابلغ من الأقوال يا عزيزتي ..

والكلام ببلاش ....والأفعال واضح انها مكلفة بالنسبة له ..


الله يوفقك ويقدم لك اللي فيه الخير والصالح


دمتي في حفظ الرحمن ,,