أولاً : أشكركم فردا فردا على إبداء رأيكم ، ويعلم الله إني استفدت من أراءكم ، الله لا يحرمكم الأجر ، والله إني كنت خايف إن محد يعطيني وجه ، بس الحمد لله رايتكم بيضا وما قصرتوا


بحريني أعزب

كلامك اللي قلته هو اللي أنا خايف منه بالضبط ، اخاف ما ينجح الزواج ثم أخسرهم كلهم ، يعني أخاف أطمع بـ(ـالربح) ثم أخسر (راس المال)


عزوبي بس رجل

جزاك الله خير يا أخي ، كلامك ريحني مرة ، أحس إن كلامك كلام واحد متزوج ومجرب ، بس اللي واضح إنك عزوبي
الله يوفقك ويرزقك الرزق الحلال ، ويسعدك في الدنيا والآخرة ، قل آمين


شاطئ المحبة

هلا بمشرفنا ، أنا ما راح أجامل أحد علشان زواج ، ولا معنى كلامي إني بناسبهم مجاملة لهم ، لا والله ، صحيح إني في أشياء كثيرة أجامل وأضغط على روحي ، لكن في الزواج ما أتوقع إني بجامل أحد ، لكن بناتهم فيهم صفات مرغوبة عندي ، وأهمها صفة التدين ، لأن أهلي ماهم متدينين ، وهم ناس متدينين وأعرفهم ، لكن ما أقول إلا الله ييسر الأمر ويكتب ما كان فيه خير ، أشكرك أخي على هذه المداخلة


العرووووس

شوفي يا أختي ، مافيه رجال ما يهمه الجمال ، الجمال شي مطلوب خاصة في هالوقت ، لأن الزواج مرة وحدة ، مهو سيارة ولا جهاز جوال إذا ما عجبني كبيته ، لكن انا ما أدقق على الجمال مرة ، تدرين ليه ؟ لأننا حنا في مجتمعنا ما نشوف حريم أبد (وما يخفاكِ هالشي) وعلشان كذا أي حرمة أبشوفها بتصير بعيني جميلة ، خاصة مع المكياج والشغلات هذي ، فلذلك أنا ما أدقق على هالشي ، ولا وش رايك بكلامي ؟
أشكرك على مشاركتك


متوهق بعمره

هلا أخوي ، هين انا ما راح أجامل أحد ، وأنا ما رغبت فيهم إلا لأن فيهم صفات جيدة وتهمني ، شكراً لك


غـاليــة

هلا بمشرفتنا ، بيني وبينك كلامك صحيح ، مشكلتي نوعا ما في الجمال ، أنا أدري إن البنات جمالهم غير جمال العيال ، لكن يبقى إنهم قريبين من بعض ، والمشكلة إن البنت اللي أنا حاط عيني عليها خوالها من نفس العايلة يعني ما راح يجيها جمال من برا ، لكن زي ما يقولون الجمال جمال الروح وانا هذا اللي يهمني ، الله يوفقكِ في الدنيا والآخرة


منوووووله

هلا بك أختي ، زي ما قلت سابقا فيه أشياء كثيرة تخليني أقتنع بهم ، وبعض الأشياء تردني ، وعلشان تكونين بالصورة اللي يردني هو الجمال ، عموما الله ييسر ، وما قصرتِ على هالمداخلة


00لحظة 00

أختي لحضة ، أنتي تكلمتي عن النقطة اللي أنا أبي آخذ رأيكم فيها ، نقطة المقارنة بينهم وبين عوائل ثانية ، الله يجزاكِ خير على هالرد ، والله إنه فككتِ عندي شفرات كنت محتاج إن أحد يفككها لي ، ما قصرتي يا أختي


على امل اللقاء

والله يا اختي أنا هذا اللي بحاول أسويه ، أبخلي أختي تعزمهم ، وبالنسبة للملح أنا أحب المملوحة أكثر من الجميلة ، ألاحظ نفسي أنهبل على البنوتات المملوحات الصغيرات في عايلتنا أكثر من الجميلات، (والناس فيما يعشقون مذاهب) ما قصرت اختي على هالرد ، بارك الله فيكِ

__________________