أختي سلطانه


لا أنا ولا أعضاء المنتدى ولا أمكِ ولا أبوكِ ولا أحد من عايلتكم راح يضرر من استمرار زوجك في الشرب إلا أنتي يا سلطانه ، وانتي اللي راح تدفعين الثمن ، واتوقع إنك راح تدفعين حياتك


يا سلطانه أنا اعرف ناس يشربون الخمر ، وللأسف يقربون لي ، صدق إن فيهم صفات زينة وحلوة ، لكن والله العظيم يا سلطانة إن فيهم صفات شينة بسبب شربهم كذلك ، وهالصفات الشينة ما راح راح تظهر لك إلا بعد تحتكين فيه اكثر . واسألي مجرب

إنتي لا تتوقعين يا سلطانة إن الامر بيستمر كذا بس ، الرجال بكرة إذا دخل عليكِ وتورطتي معه ما راح تقدرين تتخلصين منه ، لأنه صار متزوج ولا يرضى يطلق ، ويكون في علمك ، ترا صعب صعب صعب جداً إنك تثبتين عليه إنه يسكر عند القاضي إذا جاء بيطلقي ، ترا فيه زوجات كثااااااار متعذبات مع أزواجهن ويبن الطلاق وما يقدرن عليه ، لأن الطلاق بيد الزوج والزوج مهو مطلق .


سطانة ، أنتِ بيقدمين على خطوة مافيها تراجع أبد ، وإنتي الخسرانة إذا تراجعتي


بعدين شوفي يا سلطانه الزوج عادة في مرحلة الخطوبة يحاول يبين لزوجته احسن اخلاقه وإنه كامل الصفات ،


الآن وإنتي في مرحلة الخطوبة اكتشفتي إنه يشرب هذا وأنتي ما تحتكين معها إلا قليل ، اجل وشلون لو صرتي تقابلينه 24 ساعة ، وش الامور اللي بتكتشفينها



أختي سلطانة ، الآن أنتي بيدك الحل ، لكن زوجك ذكي يبي يمشي الأمر إلى الزواج ، وإذا تزوجتي صار أمركِ بيده ، وساعتها بيتحكم فيكِ على كيفه ، ويمكن يطلب مبالغ مالية ضخمة علشان يطلقكِ ، وأقلها إنه يدخل عليك سكران ويضربك ، ويحبسكِ بالحمام إلى الصبح ( هذي التصرفات يسويها واحد سكران يحبس زوجته بالحمام إلى الصبح بعدما بصحى من سكرته ، للأسف أعرفه شخصيا )


سطانه أنتي الآن حايرة وتايهة وتعبانة ومترددة وماتقدرين تفكرين ، كل هذا وانتي مخطوبة ، اجل وشلون لو صرتي متزوجة وانتقلتي لبيته ، وش راح تكون حالتكِ ، وش الامراض النفسية راح تجيكِ ؟ وإذا جاكِ شي الناس راح يقولون إنها مريضة ، بس ما راح يقولون عن زوجك إنه مريض ، وأنتي تعرفين في مجتمعنا إنه يوقف بصف الرجال أكثر من المرأة للأسف.


سطانه يمكن اللي مصعب الامر عليكِ أنكِ إنتِ اللي توجهين الأمر ، وإنتِ لحالكِ ، لكن اتوقع لو علمتي أبوك بالوضع أتوقع أنكِ راح ترتاحين شوي ، واتمنى إنك تعلمين أبوكِ بالوضع اللي صاير ، ولا تزودين ولا تنقصين ، وهو راح يتصرف إن كان بيعطيه مهلة أو بيشوف له حل مناسب



وتذكري دايم إن أكبر شي يخلي الرجال يترك الشرب هو الزواج ، فإذا تزوج صعب جداً إنه يتركه ، زواج وتزوج وشوله يتركه



سطانه ، طيعيني وطيعي أعضاء المنتدى وطيعي عقلكِ واستخيري وأطلبي الانفصال .




والله يكتب لكِ الخير

__________________