السلام عليكم و رحمة الله و بركاته
جزاك الله خيرا اخي السيف المهند
اسمح لي ان اناقش معك اساليب التربية التي ذكرتها
أولا اسلوب الشدة و الضرب
احب اضيف على العيوب اللي حضرتك ذكرتها ان الشدة مغريه لأنها تمثل حل سريع للمشكله يعني مثلا انت بتضرب ابنك عشان ميلعبش الكرة في البيت فهو حيبطل في ساعتها و لكن في اول فرصه انت تنام فيها او تخرج و تسيبه حيبهدل الدنيا فهو حل سريع صحيح و مغري و لكن زي المريض اللي بياخد مسكن بدل علاج و احب اضيف كمان انه بيعلم الكذب و دي نتيجه انا اضمنها بنسبة 100% لأصحاب الأسلوب دا
المشكله في الأسلوب دا ان ساعات بيفرض علينا فرض لأن مش احنا اللي بنربي بس لأ دا المدرسه و النادي و الصحاب يعني انت تكون معتدل و تتعب في اختيار مدرسة ابنك و تلاقي المعلمه هناك بتصرخ في الولاد و الغريب يا أخي انها تربويه انا شخصيا رحت اكلمها بلطف و ابتسامه على امل اني ارقق قلبها ردت و قالتلي اصلهم مخلولناش حاجه الضرب ممنوع و الشتيمه ممنوع فاضل ايه ( و زودت اصلي معنديش نادي اقوله مش حوديك النادي لو مكتبتش) كارثه و حتأثر في ابني و في غيره كتتتتتتتتتتتتتتتتتتتتتييييييييير للأسف و دي مدرسه في حي من ارقى احياء مصر و لو سألت عليها يقولولك ايه الجمال دا دي مدرسه روعه
الأسلوب دا كمان مشكله للي اتربى بيه بمعني انت بتربي زي ما تحب و زي ما تخطط لكن ساعة الغضب او العصبيه للأسف بتربي زي ما اتربيت يعني لو انت مش عاوز تضرب ولادك ممكن ساعة الغضب الشديد تلاقي نفسك ضربتهم عشان انت اتربيت كده و دا مش عذر طبعا بس بيحتاج تدريب و تحكم عالي عشان ربنا يعينك على نفسك و تبطله و احيانا لو انت اتربيت كده بتتبع اسلوب التدليل تماما كرد فعل لتربيتك و دي مشكله تانيه نتكلم عنها في وقتها ان شاء الله
الغريب اللي كان بيحيرني ان جدودنا كانو احسن منا وكانو اكثر ادبا و اكثر برا و زمنهم الزمن الجميل اللي كله خير و محبه أغلبهم اتربى بالأسلوب دا بس بعد تفكير تنبهت للمقوله ( لا تؤدبوا اولادكم بأخلاقكم لأنهم خلقوا لزمان غير زمانكم) اعتقد ( و لست متأكدة ) انها كانت لسيدنا على ابن ابي طالب رضي الله عنه فقلت بيني و بين نفسي فعلا الزمن غير الزمن دلوقتي بيربي معاك التليفزيون و الإنترنت و الأصدقاء على اختلاف بيئتهم و المدرسين و الغزو الثقافي زمان كانو بيضربو صحيح بس كل اللي كانو بيعلموه لولادهم صلي و متكذبش و الحاجات الأساسيه البديهيه اللي في فطرة الإنسان لكن دلوقتي المشاكل كترت و الممنوعات كترت و اكيد لو كانو في زمانا و لسه بيضربو مكنوش حيلاحقو على الولاد
طولت عليكم سامحوني و لا تملو مني
ربنا يبارك لنا جميعا في احبابنا و اولادنا و يرحم جدودنا بحنانهم و طيبة قلبهم