إنخطبت..وكأنها تُساق إلى نهايتها...!!!!
قلت لها مبروك انخطبتي ... وجاوبتني تبكي قلت لها فيه شي ؟ قالت فيه اشياء
خير وش فيه ..وبدأت تحكي ...
والآن راح انقل لكم اللي قالته لي وانتم إذا تكرمتم أفيدوني بما أنقله لها إذا كان هناك ماينقل ...
قالت لي: خليني أحكي لك من الأول ..
أنا درست الجامعه وكنت اسكن مع جدتي فقط .. ومن خلال النت تعرفت على شاب كان في نفس المدينه ويدرس بالجامعه هو بعد .. وكان جديد على المدينه بينما انا لي فيها 4 سنوات ..
كان رافض الحياه في هذه المدينه ومنعزل عن الكثير احسست باحتياجه لوجود احد معه مع الايام كنت انا صديقة واخت لهالشاب من خلال اللقاء اليومي على النت..
تطورت العلاقة وصار يعرف بيتي وكان يوصل لي حتى العشا لبيتي والضروريات بعد..
وكنت انا اسوي له بحوثه واحاول اساعده واحاول اكون معه قد مااقدر ..(معه بشكل معنوي فقط)
طلب مره يشوفني ورفضت وبعدها على انه لحوح في كل شي والإلحاح يعتبر من سمات شخصيته إلا انه احترم رغبتي لمعرفته بصعوبة هالشي في عاداتنا وديننا وقال : انا كل اللي ابيه احس بوجود شخص معي بكل وقت وبكل حال ...ولا ابي منك شي مهما كانت رغبتي فيه..بس ابي وجودك..
مع الايام وبعد سنتين حسيت تعلقه فيني زاد وبدأت كلماته تلمح انه يفكر بالارتباط فيني بشكل جدي ...
انا هنا خفت ... بالرغم من اقتناعي فيه وحبي له
سألتها ليش خفتي ؟ قالت لأني كنت اكذب في كل شي يخصني !!!
قلت كيف ؟
قالت انا كأي بنت تعرفت عليه لمجرد التعارف ولأني كنت اخاف على نفسي كذبت فيما يخص اسمي واهلي ومن اكون واستمريت اكذب رغم اني عرفت صدقه لأنه في يوم حكى لي عن بنت تعرف عليها وخدعته وتعب نفسيا كثير وكانت اول تجربة في حياته وتعلق فيها بس حس انها كانت تستغفله لما كشفت عن كذبها ....
سألته لو انا كذبت عليك وش تسوي ؟ قال اقتلك لأن مافيني وقلبي ماعاد فيه
وانتي تعلقت فيك بقوه ولا اتخيل راح اتقبل فكرة انك تكوني كذابه
واستمر كذبي بس هو مازال يبي يرتبط فيني ويتقدم ... خفت وألفت قصة اني مخطوبة لولد عمي من زمان وان ملكتي راح تصير قريب ...
جا الوقت اللي قلت له تملكت .. فقد الامل في الزواج بي ... راح خطب بنت خالته ..وصارت ملكته
خفت يسألني عن زواجي متى لأن مدة ملكتي طالت ..... ألفت كذبه ثانيه وكذبه تجر كذبه وقلت له ولد عمي صار عليه حادث ومات ...
تزوج هو وكنت فرحانه له قدامه بس وإلا في داخلي كنت اشوف عنده قلب تنحسد عليه اي بنت وسافر اوروبا شهر عسل وابتعدت انا من حياته بس ماابتعد هو كان يدق علي وكان يشكي من اشياء ماانبسط مع زوجته فيها
وقالت لي : يعلم الله اني كنت اوقف مع زوجته ضده بالرغم اني في نفسي اقول لا وربي الحق معك وهي غبيه سعادتها قدامها ومو شايفتها ..
بعد فترة 6 او 7 شهور طلق زوجته لكثرة المشاكل بينهم ...
ومن جديد رجع يخطبني ويطلبني للزواج ...وكنا وقتها كملنا 4 سنوات تعارف
هنا صارحته بالحقيقه اني انا مش انا لاني حسيت ان هالانسان يبيني وانه نصيبي وان الاقدار تردنا لبعض ..
وتخيلي الحب الكبير اللي لي بداخله خلاه ينسى هالكذبه الكبيره اللي دامت 4 سنوات ...
والآن انا صارحت اختي وهو صارح امه وتجاوبت الاطراف في الوقوف معنا ليتم الزواج ...
ولكني انخطبت من شخص آخر فيه كل المواصفات اللي تتمناها اي بنت لزوج المستقبل وزياده على ذلك هو من نفس قبيلتي ..
واهلي بالإجماع وافقوا عليه لأنه خالي من العيوب وبقي الدور علي انا
انا رفضته ورفضت قبله للأمانه 15 واحد وتقبلوا اهلي اسباب رفضي للـ15 جميعهم إلا هذا ..لأنه للأمانه ماكان به عيب ظاهر على العكس كان فيه نقاط قوه ترجحه ( صلاة المسجد وصيام تطوع وكرم وخدوم وطيب ووسيم ومن نفس القبيله )
وهذا سبب بكائي !!! لأني احب غير خطيبي ولا اتوقع اني اقدر اسعده لان غيره في بالي
في البدايه اقول رأيي انا إذا تفضلتم بقراءته وبعدين انتظر آرائكم ..
سألتها عن مدى رغبة الشاب في الارتباط بها حاليا ( اجابتني بجملة انه على استعداد ان ينتظر سنه سنتان ليتأكد من سعادتها مع هذا الرجل وان لم تكن سعيده سينتظر طلاقها ويتزوج بها )
وانه يلح يوميا على ان ترسل رساله لخطيبها تطلب منه تركها لانها لاتشعر بارتياح له
وانه على استعداد ان يفعل كل مايمكنه حتى وان كان يبدو مستحيلا من اجل الارتباط بها ..
وسألتها هي عن صدق رغبتها في الارتباط به ( أجابتني بأنها تبكي اغلب وقتها لأنها تفكر فيه دائما ولا تتخيل الحياة مع غيره لأنهم تكلموا حتى عن أدق التفاصيل بالحياة ..وحتى الأطفال وأسمائهم وأحلامهم وطموحهم وحتى أثاث منزلهم هي والشاب الذي تحب )
ولكن مالفائده ومالحل ؟ هي مرتبطه عاطفيا بهذا الشاب وستتزوج رجلا آخر
حقيقة انا اتعاطف كثيرا معه اكثر منها ... لأنها وإن تعبت في حياتها فهذا ماجنته على نفسها من الكذب منذ البدايه
وكل مايؤلمني هو ذلك الشاب اللذي صورته لي وكأنه ملاك لصدقه وطيبته وشفافيته
واقول لنفسي إذا كان زواجه منها هو راحته فكيف السبيل ..؟؟
وانظر في الطرف الآخر لذلك العريس ذو الحظ التعيس الذي ليس له في ذلك إلا خسارة المال حاليا .. وقد تكون خساة كل شيء غدا ..
انتظركــــم هنا