اكثر من مره اكتب وامسح ردي لك .. موضوعك فعلا شاغلني من يوم شفته .. احسه مرتبط فيني وبواقعي اللي احاول اني
انساه كأنك تتكلم عن حالي وحال زوجي مع بعض الاختلافات مع نفس الاعمار وبعض الظروف .. ما ادري اذا كلامي بيغير
من وضعك او لا بس حابه اقوله ولا لي غرض من قوله بس حابه اوصلك حالي كزوجه ثانيه عندها نفس الظروف اللي عندك
تقريبا بحكي لك عن حالنا وانت خذ اللي يعنيك واترك الباقي لكن مقصدي الاساسي هو اني اعيشك في المستقبل
من خلال حياتي وبحاول اختصر لك فيها
من يوم تزوجت وانا افكر بالطلاق الى يومك هذا ما ادري ليه احس ان هالحياه مو لي ممكن يجي على بالك اني فاقده
اشياء في هالزواج بس العكس صحيح انا محصله كل شئ ولله الحمد والشكر معنويا وماديا و الحب مالي حياتي
احيان كثيره احس اننا عشاق مو زوجين والحمدلله ... ماديا مرتاحه من قبل زواجي عند اهلي ويوم تزوجت زاد والحمدلله
كل اللي ابغاه احصله..... ورزقني الله طفله هي اجمل ماحصلت عليه من الزواج وهي اللي تنسيني معاناتي
وبأختصار كل اسباب السعاده عندي بس انا مو سعييييييييده ولا بالي مرتاح وهذا الشئ قلته لزوجي قبل اقوله هنا
دايم افكر في الرجوع لو ما ارجع لله واستهديه واستغفره واجلس افكر واهدي نفسي
ممكن تقول الغيره او انها اقل من الاولى في اشياء بس على العكس مافيه ادنى مقارنه بيني وبينها كلن له حسناته
وسيئاته وهي في حالها وانا كمان وهي مو مشكلتي ابدااا
احساسي تاعبني ونظرات المجتمع واللي القاهم دايم نظرتهم اني مغتصبة حق مو لي واني المفروض اخاف الله في
زوجته الاولى واولاده بالرغم انه تحسن وضعهم وكان لي دور في اشياء تعدلت في حياتهم وكله من فضل الله
اخذت عن كاهل زوجته امور كثيره تتعلق فيه ومافيه احد يرضى بهذا الشئ والقى نقد من اهلي واهله بس انا راضيه
ومقتنعه انه لقي في تحمل للمسئوليه . كمان دايم القى تساؤل من كل اللي القاهم من لحظة مايعرفون اني زوجه ثانيه
ليه انتي ايش فيك ومنهم من يتوقع اني مغصوبه ومن هالاشياء اللي تخنق الواحد زياده فعلا وضع صرت ماعاد اتحمله
ودايم اصارح زوجي فيه وهو مخفف عني ومتحمل معاي نفسيتي وانهياري احيانا .
غير نظرات اولاده اللي لما القاهم يهربون مني وانا اللي مافي طفل يرفض لعبي له او حملي له وغير مشاكل زوجته
بسببي ما اعرف ليه مع انها ماتشوفني ابدا ولاتدري عن اخباري ...
عن جد تعبانه من وضعي كزوجه ثانيه ولو الرجوع سهل كان رجعت وجلست بدون زواج افضل قبل زوجي كنت مرتاحة البال
الحين حتى النوم ليالي كثيره يجافيني وزاد الامر سوء انه اهلي بمدينه ثانيه غير مدينة زوجي .. تعرف اني انعزلت عن
الناس وصرت بس اروح لاهله وانا الاجتماعيه المرحه .. كل هذا راح وهذا بسبب اختياري وماكان بمحض ارادتي
كان بضغط غير مباشر من اهلي وكلمة وش تنتظرين مع صفاته ومميزاته اللي تتقارب من صفاتك الى حد كبير
وكلام اخوي الكبير اللي هو وش تبغين احسن منه مافيه .. تبغين رجل في الستين واو لاد بعمرك والا رجل بعمر ابوك
ما انكر اني تعلقت فيه بس لاجل راحة بالي وسعادتي النفسيه صرت افكر بالطلاق بالرغم من عمري ,اللي اني ابغى لي
رجل لي لوحدي ولا يشاركني فيه احد واالي تاعبني اكثر اني اكتم تصرفات كثيره يرفضها عقلي اظن لو خرجتها ممكن
اني اهدي من حالي بس راح انتقد من مجتمعي وراح تتغير فكرتهم عني وعن عقليتي .. صرااااع بين العقل والعاطفه..
سامحني طولت عليك بس يمكن قلت اللي قلته عشان اوضح لك انه الواقع غيييير عن التوقع ومهما حاولت تجمل الصوره
ماراح تجي مثل ما انت تبغى ..
كل انسان يسعى للافضل وحريص كل الحرص على تحقيق احلامه بس لما يصدم بالواقع ماراح يلقى ولا حلم تحقق
والامل في الله سبحانه وتعالى
ما ادري اللي كتبته بفيدك اما راح تعتبرها فضفضه مو بمكانها بس فكر انه يمكن لسان حالها بكره راح يقول نفس الشئ
اسأل الله لك التوفيق والسداد وان يوجهك الوجهه الصحيحه لما يحبه ويرضاه
تحياتي لك
ملاحظه ... زوجي له اسباب كثيررره دفعته للزواج هذا واللي هي واضحه للجميع
وهذا الاختلاف بينكم
التعديل الأخير تم بواسطة رقة ; 24-12-2007 الساعة 05:02 PM