سابرينا انا ممكن ارد على سؤالك
القاهرة تبعد عن الاسكندرية بـ 200 كيلو
و مارينا تبعد عن الاسكندرية بـ 80 كيلو
و مرسى مطروح تبعد عن الاسكندرية بـ 295 كيلو

بس فى طريق مختصر من نصف طريق مصر الاسكندرية الصحراوى (طريق العالمين) تبقطع المسافة كلها اسرع فتكون مرسى مطروح تبعد عن القاهرة حوالى 400 كيلو و فى فى الطريق بين مارينا و مرسى مطروح منطقة العالمين و هى فيها متحف الحرب العالمية الثانية و مقابر الالمان مكان لطيف و موجود هناك فندق سيدى عبد الرحمن مياه البحر فيه اكثر من رائعة بس هو فندق هاااااااااااادئ جدا

ام جمانة احب اوضحلك بعض الامور عن مرسى مطروح و الفيوم:
1- مرسى مطروح
أ - فيه هناك شاطئ اسمه شاطئ روميل هو شاطئ بالنسبة لى مش لطيف لانه مش نظيف و انا احسه شاطئ شعبى جدا بس المهم فى هذا الشاطئ هو متحف روميل به مقتنيات لروميل و هو قائد الجيش الالمانى فى العالمين و هو متحف فى قلب الجبل لطيف جدا للزيارة
ب - فى بين شاطئ الابيض و شاطئ عجيبة مجموعة من الفلل اكثر من رائعة اذا كنتى بتدورى على مكان انتى نفسك تنزلى فيه من غير حجاب حتى مكان هادئ جدا و نظيف و مش حقولك مش زحمة فاضضضضضضىىىىىىىىىى جدا ممكن من كتر بعد الشماسى عن بعضها متفسريش الناس اللى تحت الشمسية كأنك عندك البحر لوحدك و هناك فى فيلا جميلة جدا اسمها فيلة كريازى صاحب ماركة كريازى للادوات الكهربائية و بعدها فيه قرية سياحية بتاعة قدورة بتاع السمك انا مدخلتش الفلل دى من الداخل بس هى عبارة عن فيلا دور واحد ارضى و على البحر مباشرة

و اذا كملتو شوية على واحة سيوة كنتو برضو حتتبسطو قوى و هى اللى اتصور فيها فيلم ابو على لكريم عبد العزيز اذا كنتى شفتيه

2- الفيوم
أ - انتى ذى مبتقولى على الفيوم هى كمان مش مصيف بالنسبة للمصرين هى داى يوز يعنى بنروح نقضى يوم هادئ و نرجع فى نفس اليوم
ب - قرية هلنان من احلى الاماكن اللى فى الفيوم بس فى قرية هناك برضو ملاصقة لهلنان اسمها قرية شكشوك دى برضو لطيفة قوى احنا كنا بنروحها و نركب من هناك مركب فى البحيرة و نذهب على الضفة الثانية للبحيرة لجزيرة جميلة جدا و يستقبلك هناك اهلها ناس لطاف جدا و تشربى الشاى الفلاحى اللى معمول على الفحم و ممكن تخدى صنارة و تصتادوا هناك بصراحة لطيفة جدا
ج - فى فالفيوم مكان السبع سواقى و هو موجود فى الفيوم نفسها و فيها كمان كافيتريا مش بطالة ممكن تقعدوا تخدوا فيها حاجة
د - طواحين الهوا دى برضو مكان لطيف جدا تتفرجو عليها انا مش فاكرة مكانه بالظبط حاجات كتيييييير قوى و لطيفة (بس لازم الفصال طبعا اذا كنا احنا المصرين بيغلو الحاجة علينا و انصحك دائما ودى نصيحى امى اذا قالك 40 جنيه قوليلو 15 اقل من النصف و اذا تحبى كمان 10 يبقى ممتاز)
ه - و دى اهم حاجة و احلى حاجة وادى الريان (الشلالات اللى بتقولى عليها) و سبحان الله اسمه وادى الريان مكان اكثر من رائع اكثر من رائع و شوفى سبحان الله من المكان اللى خوفك ده ربنا يخلق فيه وادى الريان مكان جميل جدا و هو اللى صور فيه يوسف شاهين فيلم المهاجر اذا كنتى شفتيه مكان جميل جدا انصحك انك تغامرى المرة القادمة و تكملى و تروحيه

و ان شاء الله اكون وضحتلك بعض الامور و انا فى الخدمة لاى استفسار عن اى مكان فى مصر

نورتونا

__________________
ربنا يحفظلى اولادى من كل سؤ
فَأَنْبَتْنَا فِيهَا مِنْ كُلِّ زَوْجٍ كَرِيمٍ /اللهم ارزق اخواتى بالذرية الصالحة