مساك الله بالخير اخي ابو الوئام بصراحة اختيارك لمواضيعك مرة رائع والاروع انك تجيبها عى الجرح. وانا بصراحة ابغى رايك وراي الاخوان المتزوجين في المنتدى في السيناريو تبعي.

1. طبعا هو من معارضي استخدام الفرشاة والمعجون يقول السواك. انا معاه في ان السواك مطهرة للفم ومرضاة للرب. بس ان ما يزيل الروائح ولا الجير. ف قلت له ( اسنانك مرة حلوة ماشاء الله , تجنن لما تبتسم حرام عليك تهملها, شرايك اخذ لك موعد عند طبيب الاسنان عشان ينظف السوس ويزيل الجير) .
التعليق( ماله داعي السواك يكفي ولا اذا فضيت رحت انا ). وطبعا ريحة الفم تطرح الطير من السما.

2. ما عمره يلمحلي انه يطلبني ويرضي غروري كأنثى بأني مرغوبة . الجملة المعتادة ( يلا الغرفة ).

3. لما اجلس معاه في المجلس بعد الغداء او في الليل اصير مثل القطوة اتقرب منه والمسه واتغنج عليه. ما تعليقه ( اعقلي لا يشوفوك العيال ) .
4. وطبعا في غرفة النوم لا يوجد لا مقبلات ولا حلويات. بالعربي ( خذوه فغلوه ).

5.احيانا احسه يستهبل لما ابيه يوديني سوق يطلع بجلابية البيت ولما نوصل يقول وقفي بوقف السيارة وبنزل السوق. التفت عليه وطارت عيوني وقلت ( هاه )؟! شقال ( ليه خايفة افشلك ).


6. عجزت وانا اطلبه انه نغير جو ونحجز سويت في فندق لو يوم واحد . يعلق يقول ( ما احب الفنادق ).

7. ما عمره علق على مكياجي او لبس او عطري او اي شي اسويه.


اعتذر ع الاطالة. بس من النار اللي احسها في قلبي. وما خفي كان اعظم . لا تقولون لي يمكن يتغير .بالعربي هو مع مقولة ( لا تبين للحرمة غلاتها بعيدين تركب فوق راسك)

بس بصراحة تعبت احس حياتي بلا معنى وانا بصراحة أومن بأن الزوج هو جنة المرأة ونارها.