الاخت ام وداد باختصر مشكلتج بعدة نقاط
اولا انتي وريلج صغار في السن فأي مشاكل تنوجد في هذي اللحظه بتكون وليدة قلة الخبره وعدم وجود عشره كافيه وتعود بينج وبينه.

ثانيا عيشتج عند اهله سببلج المشاكل الكثيره والحل ان تأجرون شقه لين ما تقدرون تستقلون ببيت روحكم.

ثالثا المشكله الاكبر امج الله يهديها اللي مش قادره تستوعب وتهضم ان المشاكل تستوي في اي بيت والواحد يهدي الوضع عشان تمر سفينة الحياه, بصراحه اختي امج وايد عنيفه ومتسرعه في قراراتها وابصراحه تبغي تخرب عليج لمجرد انها تنتقم من زوجك واهله وهذا الشي غلط بالاضافه انها تحرض اخوج عليج اخذيها بالهداوه وسايسيها ودعي ان الله يهديها.

اختي اذا انتي من الامارات فلا تعتقدين ان المحاكم بتطلقج يسهوله لان في قسم مسئول عن حل مشاكل الزوجين وكل واحد او وحده مفكرين بالطلاق يحضرونهم ويحاولون فيهم الاصلاح قبل ما يوافقون على الطلاق.
نصيحتي اختي كلمي الاستاذه وداد لوتاه او عبدالسلام درويش المسئولين في المحكمه عن هذي القضايا وخبريهم مشكلتج قبل ما تسيرين المحكمه وان شاء الله يحاولون الاصلاح.

وصدقيني اختي ان كلام وتهديد امج او اخوج وليد انفعال وعصبيه وياما سمعنا اهل يهددون عيالهم انهم مالهم خص وانهم بيطردونهم ولا يبغون ايشوفونهم بس صدقيني الايام كفيله تحل المشاكل وتبات نار تصبح رماد شوفي نفسج واتخذي قرارج بروحج والله يعينج.

__________________
لا تحرص على إكتشاف الآخرين أكثر من اللازم ، الأفضل أن تكتفي بالخير الذي يظهرونه في وجهك دائماً ، واترك الخفايا لرب العباد .
لو اطْلَعَ الناس على مآ في قلوب البعض لمآ تصآفحوا إلا بالسيوف "