السلام عليكم ورحمة الله وبركاته ...

انا حزينه جدا واشعر بالتعاسة .. واحس ان زوجي صار كالحلم البعيد ..

امس .. امي اتصلت في الملازم الي اتكلمت عنه من قبل .. الي في قسم الجوازات والحمدلله ماحصلته .. وبينت لامي اني مستاءة جدا .. ومابي اروح للمحاكم ..
قمت من الصبح .. بعد نومة ساعتين بس.. عشان اطلع مع واخذ بنتي للعيادة عشان عندها تطعيم .. وبعدها صارت عندنا شغلة ضرورية فما ردينا البيت الا الساعة اربع العصر...

وطول هالفترة وانا اكلمها عن المحاكم وعدم رغبتي في الروحة .. وكانت تسمعني.. وحاولت ابين لها .. ان زوجي مو سيء لهالدرجة وان انا ماكرهه .. بعدني احترمه .. وعصبت وشاشت وصرخت .. وهديتها شوي.. وبعدين هي ردت فتحت الموضوع مرة ثانية .. وقلتلها بتغيرين رايك لو قلتلك الشقه موجودة .. وجواز بنتي موجود ودراستي بكملها ...
قالتلي هذا حقير.. وقاعد يلف ويدور.. لانه يدري انه ماراح يلقى احسن منك ..
وبعدين قالتلي ترا .. هو يبيك مو لانه يحبك بس لانه يدري ان بوجود امه هذي ماراح يلقى وحدة مثلك ترضى به .. حاولت اقتعنها ومافي فايدة ..
وبعدين اذن الظهر رحنا لمصلى وصلينا .. وقلتلها بصلي استخارة بموضوع الطلاق.. (عشان اتعرف اني مترددة مابي اطلق) وصدق صليت استخارة .. بخصوص الطلاق والمحاكم ..

تمينا شوي سولفنا عن مواضيع غير زواجي التعيس..

وبعدين امي ردت فتحت الموضوع مرة ثانية .. وقلتلها صدقيني يا يمه لو بعد الطلاق اكتشفت ان المراة بعد ما تتزوج للمرة الثانية من رجل اخر بنتها او ولدها بيروحون للزوج الاول.. تراني مااراح اتزوج بالمرة .. عشان اتعرف بس اني ابي بنتي وزوجي مع بعض..

ومافي فايدة ..

بعدين .. قالتلي والله والله والله (حلفت ثلاث مرات) لو رجعتي لزوجك مابيك لا انتي ولا زوجك الي مايتسمى ولا حتى بنتك ... مابي اشوفكم بالمرة .. وقالتلي ودي اروح الكويت (ديرتها) من بكره .. لان القعدة معاك تقمت القلب.. بس ماقدر والسبب امتحان التوفل الي عندك
اتحطمت انا وسكت .. وماتكلمت بعدها .. ودموعي بعيني.. وجسمي صار يعورني..

بعدين .. بالسيارة ... واحنا راجعين .. قالتلي ويييييع ماتوقعت بنتي بتصير ضعيفه جذي.. وقالت كلام يجرح ..

رديت البيت محطمة .. شايله بنتي .. وابكي عندها مسكينة .. وهي تتالم من الابرة .. وامي ماتكلمني.. وبنتي مو عارفة شسوي فيها بروحي ماقدر المسها ..

قعدت بالغرفة بروحي.. انا وبنتي.. وبعدين نومتها ... كنت بروح الصالة عشان اودي بنتي لفراشها الي في الغرفه الثانية .. سمعت امي اتكلم اخوي اتقول له .. قول لها اذا رحعتيله مانبي انشوفك لا انتي ولا بنتك .. ضاقت بي الدنيا مرة ثانية
ورديت للغرفه الي كنت فيها وطرشت مسج لاخوي قلتله لا تقول لي شي لاني سمعت كل شي...
طرش لي مسج .. وقالي طز فيك هذي مشكلتك ..

انصدمت .. ومارديت على مسجه ..

بعدها عطيت بنتي دواها الي كل ثمان ساعات.. وارتفعت حرارتها وصياع يعور القلب..

طليت على تلفوني ولقيت مسد كول من اخوي.. وبعدين ثاني.. وبعدين انا زهقت وغلقت تلقوني...

رحت نومت بنتي.. ومن الكآبه نمت انا بعد .. من الساعة 9 في الليل...

وقمت الساعة 5 الفجر ورضعت بنتي وعطيتها دواها وصليت ونمت ...

وكل ماقوم ارد انام وانوم بنتي معاي مسكينه .. لحد ماصار الظهر...

وفتحت تلفوني ورديت نمت ولما قمت لقيت ثلاث مسكول من رقم غريب ماعرفته.. قلت يمكن اخوي يتصل من دوامه مارديت اتصلت ..

كلمتني اخني قالتلي التلفون طول الوقت مغلق شو السالفة ..قلتلها كذا وكذا.. قالتلي بشو ماتقررين انا معاك.. اتمنيها معاي.. هي في الكويت .. عشان خالتي لازم اتسوي عملية وتبي اختي تقعد معاها ..
وقالتلي ان امي متضايقه ومتحطمة ومن هالكلام..
وان اخوي يتصل فيها مو عارف شو يسوي..

وبعدين جتني امي وقالتلي الملازم يتصل فيك .. قلتلها لا يتصل لاني ماااراح ارد ..
واتصل ومارديت .. مابي ارد على واحد ماله دخل في حياتي وان رحت للمحاكم اساسا هو ماراح يكون موجود .. يعني مافي داعي يقنعني اروح للمحاكم ..

والحين انا وامي مانتكلم ..



الكيسائي... مشكور يعطيك العافيه على الارقام .. اتصلت امس العصر على كل الارقام ومحد رد علي

بعدين رديت اتصلت ورد علي الشيخ بو اسامة .. وكلمته وصوتي مخنوق خلاص بصيح قالي لي كلميني بعد الصلاة .. لان عندي حالة الحين .. قلتله اوكي.. وصارت لي ظروف من امي واخوي .. وحسيت اني ماقدر اتكلم .. اخاف اصيح ... وماقدر اتكلم ..

فبرجع اتصل فيه انا مرة ثانية .. عقب الصلاة .. وان شاء الله يكون فاضي

__________________
ربنا هب لنا من أزواجنا و ذرياتنا قرة أعين واجعلنا للمتقين إماما

أرجوكم ادعو لي ..بإن ربي يجمع بيني وبين زوجي على خير

إلى زوجي ..إلى مقلتي.. إلى فؤادي...إلى بسمتي... إلى دمعتي... إلى حياتي وروحي... إلى عشيقي، حبيبي، فارسي، أميري، إلى القلب والكيان... والحب والهيام...

الـعزيـــــــــــــــز بو وداد..

أحبــــــــــــك ...