ليش خوفتك موقصدي اني اخوفك
ياخوي انت مو اول واحد يتزوج على حرمته ولا يعني خلاص هي من ذهب مخلوقه غير الناس ومحرم على زوجها انه يتزوج عليها
الكل شبعان ورويان من الازواج وحتى الزوجات
يعني ماراح تلقى بيت الا وفيه اعوجاج من احد الزوجين
المعلومة اللي ابغى اوصلها لك
ابغاك تاخذ الامور عادية جدا وخاصة بهالفترة لاتحسسها انك متضايق او ندمان ولا تحسسها انك راح تجيب وحدة غيرها
لاكذا ولا كذا
شف انا حرمة وتزوج علي مرتين
زوجي يحوم كبدي اذا شفته يطاير وراي مثل المجنون واذا شفته صادا عني حوم كبدي اكثر واكثر
لكن مجرد مااحس انه رجل عادي مايهزه زواج ولا طلاق وبنفس الوقت معطيني حقوقي كاملة كاملة كاملة وبشكل غير متكلف فيه
ويكلمني باحترام
وقام على رجله الطويلة يساعدني على هالعيال الله يصلحهم
والله انه يكبر بعيني واصير اكثر احترام له
واحاول بقدر استطاعتي اني اعطيه حقوقه كامله حتى لو نفسي صادة
وابقولك شي يمكن ماتعرفه عن الحريم
اذا شفنا الرجال يلاحقنا قلنا يتعبر فينا لان حرمته الثانية عليها عذر ولا تعبانه يعني حنا استبنه
واذا شفناه صاد قلنا0000 ايه انتهت مدة صلاحيتنا عنده
يعني اسلم من هذي وهذي وخلك عادي جدا جدا لحد ماتروح هالسحابة اللي ماخلت بيت الا مرت عليه قبلكم
بس غرق منها اللي تخبط وغلط واستفاد من مطرها اللي عرف كيف يستفيد منها
وقولتي انه قلبي مات مو معناته اني خلاص مااطيقه لا ياخوي بالعكس
لكن قصدي اني صرت احكم عقلي اكثر من عواطفي وما استخدم عواطفي الا في وقتها
اللي مات ياخوي فيني هو غيرة الحريم وهبالهن
يعني لو يتزوج كل يوم بس محافظ على حقوقي واحترامي ومعاوني على بيته مايهمني
وتبقى غلاوته عندي وادعيله ان الله يوفقه معي ومع غيري
ارجو انك فهمتني فتش عن نفسك وش انت مقصر فيه لكن بدون ماتحسسها حاول انك تعدل بتقصيرك معها
في جميع شئون حياتكم وعيالكم وبيتكم
صدقني اذا لاحظت التحسن فيك بشكل غير متكلف راح ترجعلك وتسويلك كل اللي تبيه انت بدون ماتطلبه
في نقطه مهمة جدا
حاول دايما تذكرها بالاحتساب
وش رايك ياام فلان نحتسب الاجر نزور امي ولا خالتي
اشتكت عليك من عيالها قلها انشاءالله انك ماجورة
علشان مع الوقت تبدا تتعامل هي مع رب العالمين وتعطيك حققك اللي ربي فرضه عليها
معليش اسلوبي راح تلاقيه غريب شوي لكن صدقني كل كلمة كتبتها والله العظيم انها عن تجربه
و بالتوفيق ان شاءالله
ملاحظة0000اسمك خبير اعشاب صحيح انت خبير بالاعشاب
مو وقت السؤال
بس يالله صارت هالمشاكل عندنا زي الخبز ناكله عادي:20:
ومن زمان ادورلي على اخصائي اعشاب بس مولاقيه
ان شاءالله تكون انت اخصائي اعشاب