موضوع مهم وقيم
بالفعل في نساء يعتمدن اعتماد كلي على الشغالة
وهذا خطأ ..

ومتفقة معاك في هذه النقطة ..

لكن احب انبهك لنقطة مهمة اخرى
الزوجة في وجود الشغالة تكون هي المديرة اللي تراقب سير العمل ومو بعيد تكون هي اللي مدربتها على الاتقان دا كله عشان ترتاح وتتفرغ لعيالها وزوجها ولا تحسب هذا التفرغ بالسهل

الزواج والاهتمام بالزوج مو مجرد خدمة في مطبخ ولا كوي ولا غسيل

اكلمك عن وضعي
انا اتربيت على انه الحرمة الصح اللي تخلي بيتها زي المرايا ولمن يجي زوجها تتفرغ له
وما تشتغل في البيت في وجوده
كنت اجي من العمل والاقيها مقطعة كل شي زي ما قلت لها واقوم انا اكمل الطبخة_ بالرغم من انهاكي بعد دوام التعليم ووقفته والشمس وروحي طالعة وابى براد مو حر المطبخ _
ولمن انهيها اروح ارتب نفسي ولا ارتاح و انبه عليها : اول ما يستوي الاكل اغرفيه

فزوجي اش يشوف دحين ؟

شايفها هي اللي حايسة في المطبخ !

جاه منه يوم يقول الشغالة احسن منك
كله عشانه ما يشوفني وانا اتابعها ولا اعلمها ولا شي

شي جدا مؤلم ..
لمن تحس المرأة ...انه الزوج ما يرضى عليها الا عشان خدمته
بالفعل اش الفرق بينها وبين الشغالة

في دي الحالة ...

افضلكم اتزوجوا شغالات !
وصدقني وقتها الشغالة دي .... ما ح تظل شغالة بعد ما تصير زوجة !