ipod ..
نعـــــومه ..
الحب المستحيل2 ..
سما دبي ..
لحن السعاده ..
جزاكم الله خير على الرد ..
انا ماسبق وكلمت احد في مشاكلي مع خطيبي ..
لكن ردودكم نبهتني لأمر كبير وهو اني صار لازم اسمع اراء محايده في مشاكلي ..
لأني انا وخطيبي جالسين نلت ونعجن فيها لوحدنا من دون مانسمع اراء اشخاص اخرين ..
حتى اهلنا مايدروا عن مشاكلنا ..
المشكله بيني وبين خطيبي ماتنحصر فقط في موضوع المكالمات ..
انا مرت عليا معاه ثلاث سنوات استجدت فيها امور لخبطتني تماما لدرجة اني فقدت قدرتي على تمييز المقبول من غير المقبول ..
وانا لأني اثق فيكم وفي اراءكم قررت اكتب ..
مشكلتي تبدء من احساسي الدائم بأن خطوبتنا محكوم عليها بالفشل ..
خطيبي مافيه شئ ينعاب .. وانا احبه فعلا وماتخيل حياتي بدونه ..
لكن ظروفي على ظروفه تخليني افكر اننا احنا الاثنين ماكان لازم نرتبط .. واننا ماننفع بعض ..
لكني اتعوذ من الشيطان واذكر نفسي اني وافقت عليه بعد استخاره وكنت وقتها في قمة الارتياح ..
عشان تتضح الصوره قدامكم وتفهموا سبب شعوري هذا لازم اوضح لكم امرين وهم السبب وراء احساسي هذا ..
اول مشكله بيننا هي طول فترة الخطوبه ..
المشكله هذه انا لي يد كبيره فيها ..
انا وخطيبي كل واحد منا عايش ببلد ..
هو بسبب وظيفته وانا بسبب دراستي ..
انا مقيمه من اربع سنوات في بلد اوروبي عشان احضر ماجستير وانا الحين في سنتي الاخيره فيه ..
وراجعه الصيف هذا بشكل نهائي لبلدي ..
طبعا الزواج تأخر بسبب اني لسه ماخلصت دراسه ..
لكن التأجيل هذا في السنتين الأولين كان يناسب خطيبي لأنه هو كان مو جاهز ماديا ..
ثانيا بالنسبه لموضوع غربته بعد الزواج هذا الأمر ماكنت انا ادري عنه في بداية الخطوبه ..
هو كان اتفاقه معايا ومع ابوي انه يظل في وظيفته هذه في الغربه لمدة سنه او سنتين يكون فيها نفسه ماديا ويرجع بلدنا عشان يفتح مشروع خاص فيه ..
اكون انا خلصت فيهم دراستي ونرجع الاثنين نتزوج ونستقر ..
لكن من سنه تقريبا صار يقول لي انه ماوده يرجع لأنه خلاص استقر في البلد هذا وصعب عليه يرجع بلدنا ويبدء من الصفر ..
وصار يطلب مني اكون معاه في الغربه هذه ..
لكن الأمر مستحيل بالنسبه لي ..
اولا لأني رافضه نبعد عن اهلنا ونتغرب احنا الاثنين خصوصا اني جربت الغربه وتعبها ..
وثانيا لان الموضوع راح يسبب لي مشاكل كبيره في وظيفتي ..
انا مثل ماتعرفون معيده في الجامعه ومسافره ببعثه من جامعتي عشان اكمل ماجستير ..
وهم عطوني المنحه هذه مو عشان سواد عيوني وأنما عشان ارجع واشتغل معاهم ..
وانا موقعه معاهم عقد احتكار ..
واذا بطلت من الوظيفه هذه راح اضطر ارجع كل المبالغ اللي صرفوها عليا في السنوات الماضيه ..
وهذه مبالغ لأنا ولا خطيبي نقدر عليها ..
يعني بالمختصر غصب عني مقدر اسيب الوظيفه والحق خطيبي في البلد اللي عايش فيه ..
اتمني تكون الصوره وضحت قدامكم ..
التعديل الأخير تم بواسطة مشاعر مرهفه ; 26-04-2007 الساعة 05:55 PM