منتدى عالم الأسرة والمجتمع

منتدى عالم الأسرة والمجتمع (http://www.66n.com/forums/index.php)
-   التوجيهات الزوجية (أرشيف) (http://www.66n.com/forums/forumdisplay.php?f=4)
-   -   ام زوجي ...........اكرهها (http://www.66n.com/forums/showthread.php?t=93267)

ريميةنجد 12-07-2006 06:30 PM

ام زوجي ...........اكرهها
 
لا تلوموني انا تزوجت من سنتين ومن اول ماتزوجت واحس ان ام زوجي تكرهني تغار مني مدري ماني فاهمه بعد زواجي بسنه كانت تتهزا علي بمجالس النساء لاني ماحملت ودايما تتكرر بهالموضوع وانا مااتكلم نهائيا اسوي نفسي مااسمعها تخيلوا مجلس مليان حريم وتجريح منها علني امام الناس المهم سكت وتحملت ورزقني ربي بعد سنه وشهرين من زواجي بالحمل والله اني زرتها وانا حامل وكان عندها مجموعة نساء يعني البيت مليان والله والله ماقالت مبروك حملك ولاقالت وشلونك دخلت وقامت تناظر للتلفزيون ولاكني موجوده علما انها بمنطقه تبعدعننا 5ساعات يعني نعتبر ضيوف عندها المهم سكت وتحملت ولعلمكم غير موضوع الحمل دايما تنصحني وتقول يابنتي الحريم اللي مايخافون الله يستخدمون السحروالسحركبيرة من الكبائر ودايما هالموضوع يعني اني ساحره ولدها الله لايوفقها المهم عقب ماولدت وجبت بنتي عسى الله يحفظها لي قولوا ااااااااامين:15: صار موقف كنت انا وزوجي وامه وطبعا بنتي النونو صار ت سالفه طويله ماابي اطول عليكم المهم معناها ان ام زوجي خلاص سنه وهي تعاير بعدم الحمل وحملت وسنتين تلمح للسحروطنشت اخرتها قالت سالفه بمعناها ان الحضر بناتهم فاسدات وان البدو كلهم شريفات طبعا حنا اقارب بس هم بدو وحناعايشين بمدينه من ولادتناالمهم كلامها قذف صريح قلت يا عمه حتى البدويات فيهم خيرهم قالت لا ابداااا المهم ماسكت قلت ابدا عندنا وعندكم خير والفسادوالصلاح بكل مكان واحتدينا شوي بالكلام وزوجي يسمع وساكت المهم زعلت ومشيت يعني تخيلوا حسبي الله ونعم الوكيل حتى الشرف بدت تتكلم فيه المهم انا طبعا ماقلت الموضوع لاحد وهي راحت وقلبت الموضوع علي وقلت لبناتها وحريم اعيالها وعيالها اني اقول انهم كلهم فاسدات وقلبت الموضوع علي طبعا لاحظت ان المجموعه كلها متغيرين علي قلت لزوجي قال طنشيهم لاتقولين شي قلت وش اقول اقولهم العجوز كذابه انا لله وانا اليه راجعون بصراحه قااااااااااااااااااااااااهرتني تكرهني مدري تغار مني مدري شقصتها تخيلوا حتى الحين اذا شافتني معاي طفل من عيال حماتي تتهزا وتقول يوه صارت تعرف لاطفال الحين تتهزا المهم مشاكلهامعاي اتحملها وصارت تسبب مشاكل مع المجموعه كله وتسوي سوالف ماقلتها وانا ساااااااااااااااكته وش الحل ؟ زوجي طبعا عارف انها ماتحبني بس انا خايفه من كثر ما تزن على راسه يتغير علي

مــريم 12-07-2006 07:14 PM

لا حول ولا قوة إلا بالله..
سامحيني حبيبتي ماعندي لك حل.. بس أدعي لك إن الله يهديها ويفكك من شرها..
ومهما سوت فيك خلك أنتي الأحسن..

أم البنين4 12-07-2006 07:22 PM

أختي .. لا عليك مادام زوجك يعلم بما يحصل فبإذن الله لن يتغير عليك ..

أسأل الله لكما الهداية ..
ولكن انتبهي من تكرار مثل هذه الألفاظ أو ما شابهها
اقتباس:

قلت وش اقول اقولهم العجوز كذابه
لأنها مهما كانت أمه .. وهذه الكلمه ممكن أن تغيره عليك ..

شوبارد 12-07-2006 07:23 PM

أختي ريمية كان الله بعونك

بس شوفي عزيزتي ترى بعض الحريم اذا شافت اغلى ماعندها بيد حرمة ثانية تتضايق مرة وتحس ان ولدها لها لحالها

حاولي تكسبينها.. طنشيها ااذ تكلمت وهالشي لاحظته عليك ماشالله

اهديها هدايا >> والله لها مفعولها السحري

احشميها قدريها اعزميها في بيتك.. اذا جا عندها حريم قومي صبي معها وشيلي وحطي.. اكسبي اخوات زوجك

امدحيهم دايم .. احرجي ام زوجك بكرمك ولطافتك يمكن تستحي من نفسها

ادعي ربي دايم ان يحنن قلبها عليك.. قولي لزوجك يكلمها يصارحها

والله مسألتك مهي هينة بس انصحك لاتخرب علاقتك معها لأن هذي ام زوجك وجدة عيالك يعني علاقتك معها طول عمرك

عازف الحزن 12-07-2006 07:29 PM

الله يعينك ه على خالتك
بس انت سارحي زوجك وقولي لة ان يحاول يقنها حتا تتغير لانة هو يعرف كيف يقنعها ويعرف طبايعها والله ان العجايز هذي مشكلة كبير
واللة الموفق


عفوا: لفظ الجلالة الله

يكتب بالهاء وليس بالتاء

mnmn&nfnf 12-07-2006 07:40 PM

اقتباس:

المشاركة الأصلية كتبت بواسطة شوبارد
أختي ريمية كان الله بعونك

بس شوفي عزيزتي ترى بعض الحريم اذا شافت اغلى ماعندها بيد حرمة ثانية تتضايق مرة وتحس ان ولدها لها لحالها

حاولي تكسبينها.. طنشيها ااذ تكلمت وهالشي لاحظته عليك ماشالله

اهديها هدايا >> والله لها مفعولها السحري

احشميها قدريها اعزميها في بيتك.. اذا جا عندها حريم قومي صبي معها وشيلي وحطي.. اكسبي اخوات زوجك

امدحيهم دايم .. احرجي ام زوجك بكرمك ولطافتك يمكن تستحي من نفسها

ادعي ربي دايم ان يحنن قلبها عليك.. قولي لزوجك يكلمها يصارحها

والله مسألتك مهي هينة بس انصحك لاتخرب علاقتك معها لأن هذي ام زوجك وجدة عيالك يعني علاقتك معها طول عمرك

انا مع كلام اختي شوبارد ..
واضيف ان اذا صارت مشكله معها وانتي خايفة من كثر الزن يتغير عليك زوجك قولي له انا مقدرتها ومحترمتها وماابي ارد عليها اولا لانها حرمة كبيرة وثانيا حشمة لك لانها امك ..
واهم شي لاتردين عليها مهما قالت ولاكانك تسمعين وصدقين بالاخير بتمل ...

ريميةنجد 12-07-2006 08:08 PM

صدقوني انا مااتكلم واسوي نفسي مااسمعت كلامها الاطبعا بموقف واحداللي قلت لكم لانه قذف واضح وكنت بسكت لكن ماتحملت واللي قالت الهدايا ذكرتني بوقف كنت طبعا دايما كل مارحنا لها لانهافي منطقه وحنا بمنطقه اخذ لها هديه واعطيها فلوس المهم مره رحنا وانا حامل ولااقالت لي حتى شلونك المهم رجعت الشقه اللي انا فيها وكلمت امي قلت يمه تخيلي حتى ماقالت لي مبروك خلاص ماني معطتها الهديه اللي جبتها لها قالت امي لايابنتي عطيها المهم رتبت هديتها وارسلتها لها مااخذت عشر دقايق الا جت تسلم وتهلي وترحب كنها توها تشوفني وتياني عن اهلي وعن حملي وتبارك بس ماينفع رجع مثل ماكانت وصدقوني صرت اتحسف اعطيها شي ماتستاهل وياليتكم تشوفون وش تهدي لي او لبنتي والله حتى الشغالات مايلبسونه الله المستعان

Reemona 12-07-2006 08:20 PM

ينقل الموضوع لعالم الثقافة و التوجيهات الزوجية

شوبارد 12-07-2006 08:23 PM

مايخالف ياريمية..بس لاحظي فرحت بالهدية وتغيرت بمعاملتها شوي.. وبعدين ليه تتضايقين من هديتها؟؟

أنا امي ماتهدي حريم اخواني أبدا الا اذا ولدو وبس!!

وتعالي شوفيهم وحدة منهم مغرقة امي بالهدايا

انت تماسكي واصبري وبقولك شي بعد.. اذا صار زوجك وامك بنفس المكان جالسين لاتحاولين تضحكين مع زوجك كثير وتجلسين جنبه مرة مراعاة لمشاعرها

ادري زوجك ومن حقك بس ولو كأم ومتعودة ولدها قدام عيونها مربيته وفجأة راح منها غصب عليها والحريم يختلفون في مشاعرهم وتصرفاتهم

اول ماتجينهم سلمي عليهم وسوي نفسك مشتاقة لها وحبي راسها << حتى لو مو من قلبك والله مع الوقت يتحول الكره لحب

وكل شوي شيلي بنتك وجيبيها عندها وقولي ياجدة تبي تسلم عليك وان شالله تطلع بنتي عليك ياخالة << كبري راسها

اهم شي قدريها حسسيها بمثابة أمك.. صدقيني الحريم الكبار من السهل التأثير عليهم.. اهم شي اختي ولاتزعلين علي

راجعي نفسك وحساباتك ونظراتك لها حاولي بقدر الأمكان تحسسينها ان هي الأساس وانها عمود حياتكم

اذا كنت عند اهل زوجك قولي له وش رايك نطلع نتمشى مع اهلك؟ وروحي اعرضي الفكرة عليها

وشوفي شلون تنبسط منك.. لاتدخلين بيتهم الا معك شي حلا- فطاير - اي شي

اذا كنتو بعزيمة امدحيها عند الحريم << ترى الحريم مايصدقون يسمعون كلمة حلوة صح؟

اذا صار عندهم عزيمة ساعديهم وافزعي معهم بكل شي اعتبريهم اهلك << اصلا بتكبرين بعين زوجك

نصيحتي ياريمية ترى انا عندي اخوان متزوجين وعارفة كل هالسوالف وفاهمتها زيييييييييين!! اكسبي اهل زوجك

احشميهم قدريهم يقدرونك محد يرفع راسك عند عايلة زوجك غير حمولتك.

soso lover 12-07-2006 08:23 PM

السلام عليكم ورحمة الله وبركاته

أختي الحبيبة .. مشكلتي مثل مشكلتك وأكثر .. فأنا أعيش مع حماتي في منزل واحد مفروض علي .. وأعاني منها الأمرين وصابرة إن شاء الله .. عزيزتي .. بعد 4 سنين من المعاناة تأثر زوجي كثيراً بكلام أمه وصار يكرهني .. وعاملني معاملة قاسية جداً جداً ومازال حتى الآن .. ولكن والحمد لله ثقتي بربي كبيرة جداً جداً جداً جداً..

أفضل طريقة اتبعتها أخيراً مع حماتي هي عدم الرد عليها مهما كان كلامها وتجريحها لأنها تقصد من كلامها أن تردي عليها وفي النهاية تقعي أنت في الخطأ وتلامين لأنك رددت على ست كبيرة وهي أم زوجك التي وجب عليك احترامها

لما بديت أطنشها بأن أبادر دائماً بالخير تجاهها ولا أجيبها على كلامها القاسي واتهماتها .. زاد غيظها وبدأت تقول لزوجي بأن زوجتك تحاربني حرباً نفسياً

لا حول ولا قوة إلا بالله العلي العظيم

يعني لا هيك خالصين ولا هيك خالصين .. و لكن أنام وأنا مرتاحة بأنني لم أخطأ بحقها أفضل من أن أكون أنا المخطأة دون أن أشعر .. وفي النهاية كل ظلمها لي والحمدلله هو أجر لي ..

زوجي وصل إلى مرحلة اقتناعه بكلامها وأراد أن يطلقني رغم أن لدي طفل منه .. وأن تبحث له هي عن زوجة وقد بدأت ذلك فعلاً .. فهل هناك مصيبة أكبر من هذه المصيبة .. ولكن والحمد لله نصرني الله عليها

لقد أطلت عليك أختي العزيزة .. ولكن سلاحي الوحيد لمواجهة حماتي والتي ما زلت أعاني منها حتى يومنا هذا هو الدعاء دوماً إلى الله بحسبي الله ونعم الوكيل ولاحول ولا قوة إلا بالله .. واللهم اجعل كيدهم في نحورهم .. اللهم اجعل كيدهم في نحورهم .. واللهم اكفنيهم بما شئت

كرري هذه الأدعية كثيراً .. وأكثري من الاستغفار لأنه مفتاح الفرج

والسلام عليكم ورحمة الله وبركاته


الساعة الآن 08:22 PM.

Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©