|
معامله سيئه
السلام عليكم
كيفكم اخواني واخوتي بصراحه فيني ضيقه وارق مو طبيعي ومقهور ومتفشل وكل شي ولله احس نفسي مولع من داخل نار الموضوع ياجماعه يخص خواتي حنا متعودين كل خميس نجتمع عند أمي اخواني وخواتي الكبار الي متزوجات طبعا بحكم أن ابوي متوفي الله يرحمه انا يوميا عند أمي اروح لها اشوف تبي شي اجيب لها وزورها كل يوم طبعا اخواني نذلين واحد ما يجي الا بالاسبوع مره كنه ضيف والثاني دايم مسافر بكم طبيعه عمله طبعا يوم شريت بيت شريت بنفس الحي الي ساكنه فيه مرغم غصب عني قلت لها شوفي خلينا نبيع البيت وابني انا ونتي فلل جنب بعض هي اقتنعت بعد شوي قلت لا منب طالعه طبعا بعد ما قعدو يلعبون براسها اخماس في اسداس قلت خلاص بشتري بيت عنك ودور لين لقيت المهم انا اعاني من خواتي طريقتهم في معامله زوجتي مع ان زوجتي ما تزورهم الا بالاسبوعين مره مو عن شي بس ما يبونها تضايقم بجمعتهم قلت خلاص كل اسبوعين او ثلاثه روحي قالت خلاص المهم بعد طبعا هي تجي يوم سبت او احد المهم غير وقت يوم الخميس جت المسكينه اليوم قالت مدام خواتك مجتمعين عند امك خلني اروح اسلم عليهم بعدين اطلع ودني عند اهلي قلت خلاص مع العلم ان لها اكثر من شهر ماشافت خواتي رحنا بعد صلاة المغرب جلسنا وقمة السخافه مايكلمونها يتكلمون مع بعض وتاركينها وهي يا بعد عمري جالسه على نياتها ماتدري وش السالفه حتى القهوه يالموت يصبون لها مسوين دائره وجالسن يسولفون بصوت خفيف وهي على جنب ونا مغير ارقع الموضوع فشلوني قامت بتسلم على امي بتروح عند اهلها سلمت على امي والباقين قالت لهم يلا يابنات مع السلامه نظرا لكثرهم محد رد عليها وعادتها ثاني مره ومحد رد عليها ولله فشلوني شين وقوايت عين يجون ويقلبون راس امي وهي عارفه محد يداريها غيري بس امي ولله فشلوني وقهروني يعني جيتها اقل من ساعه ليش كذا وهذي حركاتهم من تزوجتها تراني منقهر يا جماعه حتى اخواني ما يشاركوني بمسؤلية بيت أمي يعني انا يوميا عندها وبيت طويل عريض محد مقابله غيري فواتير ومقاضي وكل شي علي انا وهم ما لي شغل حنا مشغولين ولله ان دوامي اصعب منهم وشفتات وطريق طويل تخيلو انا اشتغل بالمطار وبعض الايام يصير دوامي الفجر تدرون ليش انا منقهر كل الي اسويه واخر شي بنظرهم ما سويت ولا شي وقلة الادب الي يعاملون فيها زوجتي انا خلطت الامور في بعض بس ولله منقهر |
ماشاء الله عليك اخي نايف
ونعم زوج الي يحس بزوجتة وهذه الامور تحصل دايما مع زوج اخ ولا يهمك اهم شي انت تشوف الي يحصل في رجال يشوفون ولا يهتم مشاء الله عليك احترمي لك وعن امك انت الي كسبان عند الله ما يضيع شي وقال ربك امك وثم امك وثم امك وثم ابوك والله يرزقك انشاء الله |
الله يعينك أخوي نايف ......
لايضيق خاطرك ولاتنكد علي نفسك ....ولاتحسس زوجتك أنهم يقصدون يتجاهلونها وخلها علي نيتها أحسن ....والله سبحانة وتعالي يعطي كل أنسان علي نيته .....وأنت أجرك وثوابك علي الله .... وبعدين تقدر تسوي أجتماع في بيت أحد أخوانك وتناقشهم باللي مضايق خاطرك وتبين لهم ظروفك الصعبة وتقسم أيام الاسبوع كل واحد جم يوم يدير باله علي الولده ويشوف طلباتها ....أهي بعد أمهم ...مو بس أمك ...وأما الفواتير كل شهر يدفعها واحد .... الله يعطيك علي قد نيتك ... خالص تحياتي |
مرحبا اختي بنت شام
الحق حق شي قدام عيوني شكلي بقطعها عن خواتي ولله ما مودي مثل ها الحركات بس الله اقوى وهي ما قالت شي بس واضح من شكلها حاسه بشي ونا اعرف تعابير وجهها |
|
مرحبا اخوي مهد
انا ماهمني الفواتير والمصروف الخير واجد بس ليش الواحد يجحد عيني عينك وبصراحه الي يبي يساهم كان من اول مو الحين هذا دليل انهم مابيون ولا ابي امي اخر حياتها تنذل ولا تتمرمط يجون ياكلون ويشربون ويقطعون جلدي من السب واخرتها ينفضون يديهم ويتوكلون على الله ما راح اجتمع فيهم ولا شي امي معززه مكرمه بدونهم ونا شهريا اعطيها مبلغ وقدره ولا اخلي عليها قاصر غير تقاعد ابوي الله يرحمه ولا تدفع شي كل شي علي انا انا الي قاهرني تصرفاتهم يعني انا متحمل كل شي واخرتها كذا ليش ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ |
اختي ريم المدينه
جزاك الله خير انا مابي منهم شي ونا اسوي كل هذا عشان امي بس بعد ما بي يفشلوني عند زوجتي بدون سبب مهما كان هي حاسه بهذا الشي ونا ما ودي صورت اهلي تتشوه عند زوجتي |
أخي جزاك الله الف خير على معاملتك الطيبة لأمك وبرك بها ... وأنت قمت بما تقوم به لوجهه تعالى .. وليس قربة لأخوتك وأخواتك ... واعلم يأخي الكريم أن الله لا يضيع أجر من أحسن عملا ...
أخي الكريم أحيي فيك مشاعرك النبيلة التي تحيط بها زوجتك ... ونصيحتي لك ... أن تستمر في ما أنت عليه يعني تجعلها تزورهم كل أسبوعين الى ثلاثة أسابيع ... في منزل والدتك .. تسلم عليهم ... فإن ردوا عليها كتب للجميع الأجر وإن لم يردوا فأن أجرها محفوظ عند الله ( أحمل أخاك على سبعين محمل من الخير ) يعني اجعل لأخواتك أعذارا لما يفعلونه ليس من أجلهم هم ولكن من أجلك أنت حتى لا تحرق في أعصابك .. ويبدو ان زوجتك تشابههك في أخلاقك ... فلا اعتقد ابدا ان تتأسف على شئ فعلته لله تعالى ... هدئ أعصابك .. وابتسم ..وأسأل الله الهداية للجميع .. وفقك الله لما فيه الخير والصلاح ... أختك أم البنين |
كان الله في عونك وزوجتك
ذكرتني بموقف كان انسان عزيز يشكي لي من قسوه اخوته و نكرانهم لافضاله فهو من رباهم و احسن اليهم لضعف ذات اليد لوالدهم و بالرغم من زواجهم و انجابهم البنين و البنات و قد وصل ابنائهم لمرحه الزواج الا ان هذا الاخ الكبير لازال يمد لهم يد المساعده و البر حتى بعد انتقال والدته ووالده للرفيق الاعلى من زمن بعيد اكثر من 15 سنه ومع هذا يقابلون الاحسان بالتذمر و التثاقل منه وهذا ما يحز في نفس هذا الاخ الكبير لم اشاء ان اقطع سبيل المعروف بين الاخوه ولكن ذكرته بالايه الكريمه ا ن اللّه عز وجل يقول : (،،،،،،آبَآؤُكُمْ وَأَبناؤُكُمْ لاَ تَدْرُونَ أَيُّهُمْ أَقْرَبُ لَكُمْ نَفْعاً فَرِيضَةً مِّنَ اللّهِ إِنَّ اللّهَ كَانَ عَلِيما حَكِيماً ) 11 سوره النساء ولم يقل اخوانكم و ابنائكم المهم انك وزوجتك والدتك راضيه عليكم و تبرون بها فرضا الله من رضا الوالدين اما الاخوه فلا اعرف بما انصحك لاني نفسي لم اعد اعرف كيفيه حل هذه المعادله الصعبه الله يصلح اموركم كلها |
شوف اخوي نايف
انا بصراحه استغرب لما تكتب مشكله احس انك ما شاء الله رايق ومتزن في كل شي زوجي كان هو الوحيد اللي ساكن مع امه وابوه الله يرحمهم واخوه الكبير كان بس يجي ضيف مع انه ساكن قريب المهم جت زوجة الكبير وفرت راسه تصدق انها اقنعت زوجها انه ياخذ السيكشن حقي اللي كنت ساكنه فيه مع اخوه في بيت اهله احنا كنا ساكنين عندهم وبحكم عمل زوجي انتقلنا وفضي هذاك المكان وصار مكان زوجي بعيد ب 120 كيلو يعني سفر وهي بكل وقاحه تقول خلاص ما دام انهم طلعوا....ناخذ مكانهم الى الان اكرهها بسبب تفكيرها مع انها ما اخذت المكان بس كفايه انها اقنعت زوجها بالفكره مع ان بيتهم ما يبعد اكثر من خمس دقايق اقنعت زوجها اننا عايشين على الاكل اللي هو يجيبه لبيت اهله والله ثم والله ثم والله ان زوجي كان يجيب للثلاجه من الى كان يساهم وياما سدد فواتير كهربا وتلفون وما كان يقول لأخوه لانه مو معقوله يشتري لابوه ويروح يعلم اخوه واحنا والله ما كنا نكمل نص دجاجه يا الله لك الحمد وكنت انا انزل واسوي معجنات وشغلات للبيت كله وهي اللي عاشت بينهم تقريبا سنتين اول ما تزوجت ما يتذكرون منها الا التشكي وقلة الحيا جا زوجها ومسك زوجي....اخوان تناشبوا..... قال الاخ .....انت انسان موظف وما عليك قصور ولا عاد تاكل من اللي اجيبه حتى علبة الصلصه لك ان تتخيل الصدمه اشترينا ثلاجه فوق عندنا وخلص صرنا ما نتدخل في اكلهم ولا ناخذ منه شي مع اننا في نفس البيت والوالد والوالده زعلوا علينا قالوا انتم خلص ما تحبونا ويوم فهمهم زوجي على الكلام سكتوا بس ما كانوا راضيين على هالخرابيط مالك بالطويله اجلس معهم واتفق معاهم وفهم خواتك ان احترامهم لزوجتك من احترامهم لك وذكرهم بأزواجهم اذا يحبون انك تهينهم وقول لأخوانك يساهمون معاك ماديا وهذي مو بس امك لحالك بس كله باللين وممكن حتى تكلمهم بالتليفون فردا فردا وتكلمهم من باب ابداء ملاحظه مو انتقاد وانك تتمنى حركاتهم ما تتكرر واصر على اخوانك انهم يساهمون لااااااااااااااازم يساهمون مع انك لك الاجر وصدقني كل اللي تسويه حتلاقيه في رزقك والله زوجي تصير له شغلات ويستغرب وانا اقول له بحياتك ما قصرت على اهلك تفكر الله بيقصر عليك الطيب ماله الا الطيب لي عوده |
| الساعة الآن 12:26 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©