زوج اختي حالته الماديه ضعيفه جدا
 

السلام عليكم ورحمة الله وبركاته:
باختصار انا لي اخت متزوجه من خمس سنين وزوجها حالته الماديه ضعيفه جدا ومع ذلك هوضعيف الشخصيه وهو انسان مزاجي ومتذبذب كل شوي له حاله مره مبسوط ومره زعلان وشايل الدنيا على راسه ومع ذلك هي متحملته وصابره عليه وعلى فقره وكانت تاخذ من هذا وترقع في هذا عشان ماتحرجه وتطلب منه تمرض ومع ذلك ماتطلب منه يوديها للمستشفى عشان المصاريف ووظيفته مافيها تامين صحي صار بينها وبين اخو زوجها خلاف بسبب زوجته اللي معروف عنها سوء اخلاقها وحشت زوجها على اختي وجا وغلط عليها وتلفظ عليها بكلام قبيح وقذفها حسبي الله عليه وزوجها واقف زي اللوح ماتكلم ولادافع عنها واتصلت على اهلي وجو اخذوها ورفعوا عليه دعوى على اخوه وتنازلوا بعد ما جا واعتذر لهم ورجعوها لزوجها ورجعت معاناتها مع هالزوج المهم يوم جا رمضان هالسنه تراضى هوو اخوه واختي راجعه له بشرط انها ماتدخل بيت اخوه فيه ولما تراضى معه اجبرها ان تروح تسلم على امه واخوه عندها وهي رفضت وقالت لما يروح اخوك بروح واسلم على امك المهم هوزعل وشال بخاطره عليها لما العيد وجابها لبيت اهلي ومعاد كلمها ولا حتى اتصل على اهلي يهنيهم بالعيد ولا حتى كلمها هي وبدى يقول لاهله انه يبي يخطبويقول ادعوا لي القى حرمه صاحيه هي معاد كلمته وماتدري وش تسوي وتقول ان خاطرها انغسل من محبته خصوصا بعد ذا الانقلاب اللي بدون سبب ياليت اصحاب الخبره يشورون عليها والله يجزاكم خير :22:

الله يهديها هي كبرت الموضوع شوي.
يعني مهما كان المفروض انها راحت تسلم على امه وين ماكانت هي علاقتها باخوه منقطعة فمالها علاقة موجود او لا
المهم اللي صار صار مقدر ومكتوب..
بس اقول ليتها الن تصل على زوجها وتعتذر من اللي حصل لأني اللي فهمته من كلامك مش انقلاب مفاجيء اقصد له اسبابه!
فعشان كذا المفروض هي تبدا بالخير وصدقيني ما دامت في بيت اهلها فعلا راح يفكر بالزواج يعني هي راضية بانه يتزوج عليها؟!!!
اذا مي راضية لازم تسعى في كسب بيتها واعادته لها
عموما لي عودة للرد بس انصحها الآن تعقل وتفكر في مستقبلها واذا كانت تحبه من قبل فصدقيني راح ترجع مشاعرها وبقوة ولو تركته لانقهرت على نفسهال وندمت!
كل النساء اللي طلبوا الطلاق طلبوه في وقت كانوا كارهين ازواجهم بس بعد فترة تهدا النفوس وترجع الذكريات الحلوة الى ذاكرتها ويرجع الندم يحرقها..
ما اعتقد ان فيه امراة كانت تحب زوجها وفجأة وبسبب موقف تكرهه للأبد!
صدقيني هذي لحظة الصدمة ولحظة القهر لكن بعد فترة ترجع مشاعرها زي ماكانت!
فهي تفكر بعقلها والله يهديها ويوفقها

اتكاءة حرف والله العظيم كنت متحمسه لردك وبالفعل كنت الاوله في الرد والله يعطيك الف عافيه اختي كلمتني قبل شوي وهي منهاره هي ارسلت له رساله تطلب منه ملابسها حقت دوامها تبي تروح للبيت وتستاذنه لكنه قال لها تعالي شيلي ملابسك كلها عشان نخلص ونسلم الشقه ولما سالته ليش قال لها مدامني قلق وفقير وشتبين فيني والحل انقذوني ودي اشور عليها وماودي انها ترجع له هو بصراحه مهوب كفو باع سنين الصبر بهالسهوله معاد اتوقع منه اي شي طيب

على فكره هي كلمت امه واعتذرت لها انها مقصره معها وقالت لها بالحرف كله واحد ماتفرق عندي تجين او تروحين وقالت له عن كلام امه وقال لها معليش حرمه كبيره هذا الكلام قبل مايجيبها لبيت اهلي باسبوع :(

وهو قبل فتره اخذ قرض من البنك وبعد هالقرض تغير ونفش ريشه وصار ينفخ وهو ماكان كذاابد ويقول لها تبين والا صكي براسك الجدار

الله يعينها اختي..
اذا هو مصر على الطلاق فلا حيلة لها
لكن اذا كان في المسألة حل يعني فيه مجال للمناقشة فيمكنها الاتصال به ومحاولة تهدئته وتخبره بأنه تقبله فقيرا كان ام غنيا قلقا أم هادئا.. فإذا أصر على الطلاق فعليها ان توكل أمرها الى الله
هي لن تجبره على نفسها .. فتصبر وتحتسب وسيعوضها الله خيرا منه
ولكن تستخير مرة واثنيتن وثلاث وتلح في الدعاء كثيرا ان يهيء اللهلها خير الأمور
فهي لا تعلم ما هو الصالح ولكن الله يعلم لذلك تدعو الله بإلحاح أن يختار لها خير الأمور وتدعو ان يشكف عنها الغمة

ولكن ارجو ان لا تنصحيها بما يضرها صدقيني لو كانت مقتنعة هي بالطلاق لما انتظرت رأي احد لكن لو كانت مقتنعة به ومستعدة تتحمله ونصحتيها بالطلاق ومر زمن وندمت عليه ستعتبرك انت من اختار لها هذا المصير وستلومك ولو بشكل غير مباشر مثلا لو ذكرت لها انت اي مشكلة راح تقولي ليش تصبرين ليش مما تطلقين زيي؟ ليش عادي اتطلق انا بس انت رفضت ليش ليش ليش!! صدقيني اعرف نساء كثير كذا لما تصير لها مشكلة تبدأ تحاسب الناس هم اللي قالوا هم اللي نصحوا هم هم هم هم !!! فلا تضعي نفسك في هذا الموضع فضلا على انك بالتأكيد تريدين لأختك الخير
وفي المقابل لو نصحتيها بالصبر فلن تلومك ابدا
أكرر لو كانت ترى ان في الطلاق نهاية مشكلتها لما انتظرت رأي أحد! ولكن هي تعرف يقينا انها غير قادرة على قبل وضعها كمطلقة! وبالتالي نصيحها بذلك تدمير لحياتها
اعلم انك ذلك من حرصك عليها ولكن ثقي ان كل امرأة لا تحتاج الى نصيحة بالطلاق لأنها تطلبه لأتفه الاسباب فهل تتوقعين انها وصلت لمرحلته ولم تطلبه؟!! بالتاكيد لا اذا نقدم لها كافة الحلول المسبقة حتى نجعله الاخير
وفقها الله وهداها لما فيه خير الدنيا والآخر ولها مني الدعاء..

أنصحها تصبر وترى ماذا يحدث وعلى فكره هل عندهم أطفال

الله يوفقها للخير

السلام عليكم:
اختي اتكاءة حرف الله يعطيك العافيه كلامك زي العسل وكله حكم بس للاسف بعد ماكتبت الموضوع وقريت الرد الاول كلمتها وقلت لهاتكلمه وتتفاهم معه هل كلامه هذا نهائي مافيه رجعه ورد عليها ببرود الكلام نهائي وهو على الخط مسافر وقالها الورقه بتجيك اخر الاسبوع وشيلي عفشك اختي ماتقدر تتقبل وضعها كمطلقه وللحين تحس انها تحلم والاهم في هالسالفه اهلي ناس متشددين ومايعرفون يدارون الخاطر وتخاف بل متاكده من انه بيجي يوم ويعايرونها بانها مطلقه ارجو من كل شخص يدخل موضوعي ويقرا بدون مايبدي رايه فيه انه يدعي لاختي ودعوة الغيب مستجابه بان الله يقويها ويكون بعونها ويرزقها اللي يعوضها عن سنين عمرها اللي ضاعت هدر مع شخص مايستاهل وان الله يرزقها الذريه وهي على فكره متزوجه خمس سنين ومابعد انجبت لاسباب صحيه والله يجزاكم الف خير ونشالله انتوا خير سند لي بهالمشكله لاني انا واختي جسدين بروح وحده واللي يتعبها مره يتعبني الف مره يارب تخلف اختي وتقويها وتثبتها يااارب

وعلى فكره احب انبه اللي غير العنوان حق الموضوع غلط لانه الحاله الماديه مهيب اساس المشكله اتمنى انه يعدله بعنوان انسب واعذروني لاني في وضعي الحالي مخي مقفل ولااقدر افكر وشكرا لاهتمامكم

الله يعين أختك و يرزقها من حيث لا تحتسب
وأطلبي منها لزوم الاستغفار

جزاك الله الف خير اخوي والله يقبل دعوتك شكرا لاهتمامك