|
زوجي مسافر مع اصحابه وساحب ايش اسوي
السلام عليكم زوجي مسافر مع اصحابه لبالي وله الان خمس ايام ماتصل ولاشي والتواصل بيني وبينه واتس اب فقط ومجرد اهلين وش اخباركم ومع السلامه مايسولف ولايتكلم ولاشي حتى لما احاول انا اسولف معاه يسلك ويقول انا بروح انام بروح اطلع بروح البس مايعطيني مجال اصلا..متضايقه جدا من حركته هذي رابع مره يسافر فيها وقبل كان يتصل ويسال وكل شي،، لكن هالمره غير!!! تعذرت له اول ثلاث ايام قلت ممكن مشغول متلخبط وضعه لكن باليوم الثالث قلت له وينك؟ ماسمعنا صوتك مشتاقين ومن هالحكي قال لسا ماشريت شريحه ،، وسكت وبعد خمس ايام بدأت اتضايق فعلا وقلت له بكل هدوء وباسلوب دلع وينك عني ومن هالحكي ، قال ان ماشريت شريحه مابقى على سفرته شي ( علما بان باقي على سفرته خمس ايام ) انا صراحة حزت بخاطري ،، الوضع عادي ومازعلت قدامه واعلق على صوره بالسناب وطبيعي الوضع لكن ماني عارفه وش قصده بهالحركه،، وهل في شي مخليه بعيد عني لهالدرجه ، كأن ماعندي زوج!!!تخيلو حتى كلمه حلوه ..كلمه اشتقت لكم ماقالها ، انا افكر بيني وبين نفسي قلت حتى لو ماقدرت تكلم بالجوال ولو ماقدر يشتري شريحه ولو ماقدر يحمل برامج اتصال مجانيه وحتى لو ماقدر يتصل علي من واحد من جوالات اخوياه اللي معه اقلهاااا يحسسني انه معي واني على باله بالواتس اب يعني لو كان بينا مجرد كتابه اقلها احس بوجوده معي،، ويسولف ويعلمني باخباره ...!!!حتى اني تعبانه بالمستشفى لي يومين وتخيلو يقول لي الحمدلله على سلامتك بالواتس اب!! حتى لما درى اني تعبانه ماراح وقال بكلمها بسمع صوتها!! انا هنا حسيت انه مو زوجي اللي اعرفه ومتغير لدرجة غريبه وفيه شي ساحبه عني......... لدرجة اعوذ بالله بديت اشك انه مايبي اصلا يخلي مجال مفتوح للاتصالات عشان مااكلم بوقت مايبيه وياخذ راحته بامور غير لائقه وبنفس الوقت اتعوذ من الشيطان , لاني سمعت عن بلاوي هناك اعوذ بالله وهو رايح مع 3 من اصحابه وهو الرابع واحد منهم ماحبه ابدا ولا اثق فيها ابدا وراعي بلاوي وبنات وخرابيط وانا بصراحة ماني عارفه ايش طريقة التصرف الصحيحه! لاني جاني تبلد مو طبيعي تجاهه صرت اكلمه اقل من عادي لاني جربت اللين جربت اني اخزه بكلمه حتى قلته مع الكلام ولا فاد عجزت اعرف معنى السحبه!! وليه يقول مايسوى اكلمك dvf !!! ومع العلم انهم مغيرين سكنهم مرتين يوم مااعجبهم وماقال مايسوى مابقى على رجعتنا اربع ايام! dvf مادري عجزت اعذر له .... مااقنعني! هو رح يجي بعد خمس ايام ايش اسوي؟ هل اكلمه اللحين او اصبر لين يرجع من السفر لاني عجزت القى له تفسير لان فيه اكثر من حل وحل والموضوع مايقتصر على اني مابعد شريت شريحه!!! هل هو فعلا مستخصر يشتري شريحه يكلمني ويكلم امه فيها!! او في سبب ثاني ، انا بديت اوسوس واحس انه في امر اكبر من كذا وقلت يمكن الامر بسيط وهو لاهي وماله خلق ولا ادري انتو وش رايكم خصوصا الرجال هل تشوفون الصح انه يسوي كذا ويقصر بحقي؟ |
رد: زوجي مسافر مع اصحابه وساحب ايش اسوي
والله احسن ماتتواصلون مع بعض
اعتبريها إجازة زوجية لك وله حتى تشتاقون لبعض اذا رجع وتعوذي من ابليس ياما رجال يتواصلون طول الوقت ويكلمون زوجاتهم وهم برا والله العالم ايش يهببون هناك حجم التواصل مو مقياس ابدا للاخلاق الله يهدي بالك |
رد: زوجي مسافر مع اصحابه وساحب ايش اسوي
اقتباس:
ولا طلبت عشق وغرام وتلصق , بس هه على الاقل احس بشي انا بالبداية تصدقين اشتقت بس يوم شفت سحبته لا والله اشتياقي عادي جدا , اكلمك اللحين وانا لي يومين مدري عنه مجرد هلا وكيفكم ومدري وشو ومع السلامه بالواتس واناا زي ماهو ساحب ساحبه , بس مابعد بردت خاطري ليه هذا قدري عنده وش انا وش مسويه له وش شايف هناك مبعد مخه عني وش دعوه |
رد: زوجي مسافر مع اصحابه وساحب ايش اسوي
طيب ف العاده هو اذا سافر مع اصحابه كيف بيكون معاكم ؟؟
يعني هل كان يتصل اول مايسافر ويوصل ويطمنكم ويسأل عنكم كل يوم وكدا ؟؟ وهذي السفره غير ؟ |
رد: زوجي مسافر مع اصحابه وساحب ايش اسوي
اقتباس:
لكن اقلها كنت احس بوجوده وصوته وحرصه هالمره مجرد اني سويت الواجب وادري انكم بخير وعند اهلك |
رد: زوجي مسافر مع اصحابه وساحب ايش اسوي
اقتباس:
لاتربطي قدرك بمكالمات مالها معنى طبعا انتي اعرف بزوجك يمكن هو بطبعه قليل كلام مايحب البربره عالجوال ويمكن أصحابه ينتقصون اللي يكلم زوجته للأسف في أصدقاء همجيين احتمال زوجك متحاشي تعليقاتهم ويمكن ويمكن ويمكن في كذا احتمال غير اللي ببالك وانتي لو فعلا قلقانه عليه كان اكتفيتي بالواتس اب لانه طمنك واتطمن عليك لكن المشكلة انك شاكه فيه طلعي الشك من راسك وترتاحين دام مسافر والنفوس طيبة والرجال محترم ولا طلع منه العيب خلاص وسعي صدرك ولاتصيري المحقق كونان |
رد: زوجي مسافر مع اصحابه وساحب ايش اسوي
اقتباس:
بس هو اللي موصلني له ولا اعانني اني اتركه لانه مستمر لكن الله يعين بس ابحاول اتناسى مع ان هذا اللي انا جالسه اسويه الحين لكن ولو ما طاب خاطري !!! بعدين اصحابه عادي , ياما دقو وهو جنبي ويرد عادي , ويدق علي هو عندهم وعادي! فرقت يوم سافر معد سمعت عنه شي غير كلمات قليله جدا؟؟! |
رد: زوجي مسافر مع اصحابه وساحب ايش اسوي
كلها وساوس تعوذي من الشيطان 🌚
ماله غير خمس ايام اكيد منشغل مع اصحابه بالسفره و طالما يتواصل واتس ويتطمن عليكم فالحمد لله .. لاتسويين مشكله وتتعبين نفسك على لاشيء 🙂 |
رد: زوجي مسافر مع اصحابه وساحب ايش اسوي
اختي هو الان مسافر وماتقدري تتحكمي في تصرفاته..
ولا تربطي الاتصال بالي قاعد يسويه هناك.. لو عنده بلاوي تأكدي بيتصل عليك كذا مرة باليوم عشان يخليك مطمنة ومايدخلك الشك.. اراه عالأغلب بيتصرف بعفوية، ملتهي ومبسوط وبس، صحيح شي بيزعل ومش من الذوق انه ما يبين الاشتياق و مابيعطيك شوية وقت.. بس اهم شي انه مو ملتهي بشغلات سيئة... انت ابعثيله صور حلوة تخصك (وحدة أو اثنين). جربي يمكن ينشغل فيك أكثر.. |
رد: زوجي مسافر مع اصحابه وساحب ايش اسوي
وعليكم السلام ورحمة الله وبركاته
أختي .. السفر هو لراحه البال والبعد عن التفكير في المسؤوليات .. دامه يتواصل معك على الواتس وعلى كلامك اتوقع كل يومين يكون فيه تواصل ..فلا تعطين الموضوع أكبر من حجمه .. لم يتبقى إلا 5 أيام ويرد لكم بالسلامه إن شاء الله ... غالبا سفراتي تكون مدتها 15 يوم ولا أتواصل مع زوجتي خلالها إلا بأتصال أو أثنين .. والغالب أيضا لا أعطيها رقم الجوال .. تعرفين عاد وسوسه الحريم وينه وش جالس يسوي لا يكون متزوج ومن هالكلام ... أذا فيه أمر ضروري رسالة واتس تكفي بالتبليغ .. السفر راحه للنفس والعقل والجسد فلا تستكثرون على الزوج .. الله يريح بالك |
| الساعة الآن 01:19 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©