|
موقف محرج مضحك
حصل لي موقف لا أحسد عليه مااعرف كيف أقوله
أخويه عزمني ع قهوة في كافي في إحدى المولات ودايم يمدح القهوه التركيه عندهم يحلوها بالحليب المكثف وجالسين سواليف واخويه هذا لما نكون قدام الناس وحب يتكلم تحس انه بيقولك سر عظيم لازم يقرب منك ويتكلم بطريقه مشوقه المهم وأنا رايقه وأرتشف قهوتي اللذيذه ومحطيه يدي ع خدي أستمع لحكاوي أخي الصغير وكل عرق فيني بالكاد ينبض من شدة الهدوء والروقان إلا ورجال يجرني مع راسي من الخلف وانا كنت مظفره شعري 😅 ومسك ظفيرتي مع طرحتي بشكل جنوني وغاضب جداً جداً خرجني من الكرسي وكأني قطعة أثاث وأخويه من الفجعه قال هذي زوجتي ههههه لو قال أختي كان أشوى هههههه المهم انه أنا صرخت بصوت عالي وهو يقول يابنت ال،،،،، ويهز راسي وعيوني حسيتها دخلت في راسي من شدة جره لشعري والناس يمسكوه واخويه ياحياتي نحيف وصغير ماعرف يتصرف يصارخ عليه ويدفه كل هذا يمكن في أقل من دقيقه ولأني تعبانه مع رمضان ماآكل الدم عندي 7 حسيت بإرهاق وأنا أقاوم وفكيت نفسي وأنا شبه معلقه يعني الي يشوفني يعتقد إنه أٌغمى علي أخويه قام يصارخ فك أختي قتلتها يا يا يا يا يا وشكله إنفجع وأستوعب إني مش قريبته وفكني بقوه وأنا يوم حسيت إني رح أرتطم بالطاوله مديت يدي خففت من قوة الطيحه وأخويه راح يضارب معاه ورجل الأمن مادري حارس في المول يقول لأخويه روح شوف زوجتك ههههه وإحنا بنتصرف وأنا مسكوني الحريم وجلسوني وأعطوني مويه وقفلت عيوني وطولت وأنا مقفلتها بتأكد موجوده ولا أرتفعت مع الظفيره هههههه والحريم هدوني وقعدو يسبوه بالهمجي وقالو لي في واحد الله يجزاه خير قام يدف الناس الي تصور ويصارخ عليهم وسحب جوال واحد وماقدرت أقعد معاهم ذكروني بالتصوير وخرجت بسرعه برى المول ورحت للسياره وبعد عشر دقايق جاء زوجي الصغير هههه قصدي أخويه واحس أجهزة صدره بتطلع من الغضب ويسألني إنتي بخير قلت طيبه مافيني شيئ وأنا راسي بينفجر من الألم وقال أمشي بقول لفلان ( أخويه التاني ) يقابلني ويأخذك وأنا بشوف شغلي مع هذا لازم أمرمطه لما ركبنا السياره جاتني ضحكة جنوووووون اضحك ودموعي في عيني وأخويه يقول يحسبك بنته وخارجه مع ولد ( أخويه مربي لحيته لكن خفيفه وشقراء😂) قلت له ؛ بالله هذا وجه مطوع مااحد شايف لحيتك شيلها أحسن لك ههه وبعدين إيش تحس لما قلت زوجتي قال مادري شكلي متأثر بشغل الهيئه لانه اشتغل فترة معاهم كمحتسب الموقف هذا في قلبي يرفرف قلت لازم أخرجه وفضلت اخرجه هنا لا أفضح نفسي الحمدلله أخويه يقول متأكد إنه ماأحد صورني لما تبهذلت🙊 ياناس أول مره أحد يعنفني في حياتي عساها آخر مره ههههه حسيت اني في حلم أو فلم رعب 😅 اول مارجعت البيت أشيك ع المواقع يارب ماأحد صور يارب وأحلى شي إنه المكان الي كنا جالسين فيه مغلق مو مفتوح ع المول هل في أحد حصله موقف زييfdh |
رد: موقف محرج مضحك
ههههههههه توقعت تقولي واحد من رجال الهيئة و انفجعت ..
مسكين الرجال و الله حزنت عليه ، على قد ما قهررررررررررني |
رد: موقف محرج مضحك
لا حول ولا قوة إلا بالله. ما عليه يا متفائلة .. بهذلة تفوت ولا حد يموت. ;) |
رد: موقف محرج مضحك
ههههههههههه الله يسعدك
اهم شي نوبة الضحك الي جاتك دايم تجي اذا الدماغ تفرمت والا دخلتي صدمه واعصابك في حاله استرخاء اهم شي اخوك مايتعقد ويبطل يعزمك في كوفي ههههههه |
رد: موقف محرج مضحك
لا حول ول ال قوة الا بالله
اتوقعت بتقولي الهيئئة سليمة ان شاء الله ما صبرت على الكوفي التركي كله منها |
رد: موقف محرج مضحك
توقعت الهيئه لان قببل كم سنه مر موقف مشابه لوحده في المول الله يستر عليها جروها هي واللي معها من قَبَل الهيئه ...
ربك ستر متفائله مامتي بين يديه 😅 |
رد: موقف محرج مضحك
لا حول ولا قوة الا بالله حسبنا الله ونعم الوكيل فيه السبب ان الرجل اعتقد انك قريبة اليس كذلك هذا حظ سىء جداً ولكن العقل يقول انه كان يجب ان يتآكد اولاً مثلا يقول فلانه او هل انتى فلانه لم ينظر الى وجهك لكى يتآكد قبل هذا الهجوم الغادر الغاشم بصراحة حزنت جدا من آجلك آختى الكريمة وخصوصاً لظروفك الصحية ... ماذا نقول الا قدر الله وما شاء فعل فى ميزان اعمالك آختى الكريمة وكما نقول نحن علقة تفوت ولا حد يموت |
رد: موقف محرج مضحك
روح الطير ؛ ياويلي لو كانو الهيئه كانت فضيحتي أكبر😑 عارفه الرجال قعد يبوس راس أخويه لما عرف أنه غلطان وقاله هات رقمك وأعتذر لك في بيتك ههه ع أساس إنه اخويه النتفه زوجي😂
مهره : إن شاء الله تفوت حلفت أخويه مايقول لأحد وأول مادخلنا البيت قال لأمي شوفي بنتك شعرها مسك في لعبه وبالقوه فكيناه 😒 ليلة رحيل ؛ أنا الي تعقدت ماعاد بروح معاه إلا لما يصبغ لحيته بأسود 😅 شوق اللقاء ؛ هههه مااتخيل إني بدخل المول مره تانيه أماالكوفي لو ع موتي ماأروح رح أتذكر الي حصل لي🙈 وأقول تبهدلت في دا المكان 😅 سموره : تخيلي عاد أموت ع يده استغفر الله هههه بس والله شديت ع نفسي وأكلي كله فواكه وسلطات أمس واليوم وبلعت في حبوب الحديد والفيتامينات ع الأقل لو تكرر أدافع عن نفسي 😢 أبو مريم ؛ إيوه ع كلامه لأخويه أنه عنده السكر مرتفع ومايشوف كويس وصح المفروض تأكد مني وسأل مو يهاجم الله يسامحه وأنا مو كاشفه متنقبه الحمدلله ع كل حال هههههه ان شاء الله في ميزان حسناتي والله يسامحه زعلت ع نفسي أكثر أني مو مهتمه بصحتي شكراً لكم واسيتوني 🙈 |
رد: موقف محرج مضحك
لا حول ولاقوة إلا بالله
عوافي أختي .. والحمدلله على سلامتك .. والرجل الله يصلحه ويهديه أستعجل المفروض يتأكد ... تعلمي لك شوي تايكوندو والا كاراتيه عشان تقدرين تفكين نفسك من المسكات الصعبه 😆 ي الله عوافي .. |
رد: موقف محرج مضحك
تدرين انا حزينة ع الرجال عاش شعورين سيئين اول مره لما شك في بنته و ثاني مره لما تفشل
و الا انتي و اخوك ع قولتك موقف مضحك 😂😂 يللا الحمدلله ع سلامة الجميع |
| الساعة الآن 10:43 AM. |
Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©