![]() |
خطيبي يؤجل زواجنا.
السلام عليكم انا عضوه جديده عندكم اتمنى منكم مساعدتي و التوصل معي الى حل انا بنت عمري 20 سنه انخطبت و عمري 18 سنه من شاب فيه كل المواصفات اللي تحلم فيها كل بنت و بعد هو مبتعث بامريكا كنت استخير و استخير لمدة شهر لكن ما كنت احس ب ولا شي اتجاهه! قررت اني اوافق و بعد فتره تمت الخطوبه و شافني و مرره طار و اعجب فيني المهم حددنا الملكه تكون في شهر شوال وجا الشهر و اعتذر بحجة دراسته ورجعنا حددنا الزواج و هالاشياء وقلنا انه راح تكون الملكه و بعدها بفتره بسيطه الزواج وراح تكون في السنه الجايه في شهر شوال و اتفقنا على كل شي و صرت اتجهز و كذا وقبل موعد الملكه بشهر اتصلوا اهله يعتذرون ان الولد ما يقدر يجي من امريكا عشان واجد صعوبات و كذا هناك المهم قلنا مو مشكله حددنا الزواج مره ثانيه في السنه الجايه و نفس الشهر و مرت الايام و بعد اعتذر عشان جاته دوره مفاجأه للماجستير و ما يقدر ينسحب منها انا هنا قلت ما عاد ابيه خلاص بفسخ الخطوبه و كلمنا اهله و ما رضوا بحجة انه يحبني و متعلق فيني و كذا و كلام كثير لين اقنعوني و رجعت وافقت و حددنا الزواج السنه الجايه و بنفس الشهر و مرت الايام و اعتذر بعد بحجه انه باقي له سنه بس و يخلص الماجستير فبعد الماجستير يتم الزواج افضل بحيث انه ياخذ راحته اكثر لما يتزوج و ينتظرني اخلص دراستي و نسافر مع بعض للدكتوراه و انا بعد رفضت لانه صار باقي بس كم شهر و يصيرلي 4 سنوات مخطوبه و الناس صارت تتكلم و كل ما قابلت احد سألني و كثير خطاب تقدمولي و رفضنا بحجة اني مخطوبه! كلمنا اهله و رفضوا بعد عشانه يحبني و صاروا ايام يحاولون فيني و جوالي ما هدأ من الاتصالات و كذا , ماني عارفه وش اسوي السنوات تمر بسرعه و العمر يجري ماني عارفه اتخذ قرار مع ان ابوي مو راضي افسخ الخطوبه و مقتنع بهالولد! اعطوني حل نفسيتي تدمرت والله و استخير كثير لكن ما يجيني شعور ابد بس لما نكلم اهله اني ابي افسخ الخطوبه يجيني شعور بضيق اني مابي افسخ مدري هو خوف انه محد عاد بيخطبني او شي ثاني ! وش اسوي وش تنصحوني فيه كل اللي حولي يقولون لي افسخي بس كل ما جيت بفسخ ما يتم ! و زواجي بعد ما يتم ! انصحوني gfg |
رد: خطيبي يؤجل زواجنا.
أنا الي ابي افهمه ليش يخطب ويعلق 4سنين من عمرش وهو مو فاضي للزواج ولا مستعد !!
على الاقل يقدم على خطوة الملكه ويثبت العلاقات بينه وبين اهلش ... مو كلمه رماها وتوكل هو حجز سياره ولا بيت ؟! اقدمي على موقف حازم يا ينزل ويملك ,,, ما بينقص من عمره شي او ينتهي كل شي |
رد: خطيبي يؤجل زواجنا.
كذاب هوو وأهله .. قضبيهم الباب وشوفي نصيبك مع ناس شارينك وشارين أهلك .. مو هذولا مو عاملين لكم أدنى قيمة !
والغريب أبوك متمسك فيهم ! على وشو يا حسرة |
رد: خطيبي يؤجل زواجنا.
استخيري..
لو متملكة قلنا معليش.. اللي بينكم لحد الحين يعتبر كلام فقط افرضي قعد سنتين ولا ثلاثة وفجاة جوكم وقالوا مافي نصيب... وش بتسوين ساعتها؟ هل هم يقربون لكم؟ الحكي كله هذا جاي من الولد؟ يعني مافي تواصل مباشر معاه ؟ هل كل هذا حكي عنه وهو مو بالصورة؟ هل هو شافك وخلاص ولا فعلا مرتبط فيك عاطفيا؟ اذا مجرد شوفة وخطبة الكلام مو واقعي وكل اللي قاعد يصير من اهله قلة تقدير.. ذكرتيني بالنظام القديم حق فلانة محجوزة لفلان وعقب كم سنة البنت تتعشم وترسم وترفض خطاب وفجاة الولد خاطب ومتزوج.. كلمي ابوك بالموضوع.. اذا فعلا يحبك مثل مايقولون خل يثبت لك قولي يا نملك ولا كل واحد بطريقه ويبان اذا يحبك ولالا.. اما فلان يحبك بالهوا كلام بدون فعل ماينفع تكتشفين بعد كم سنة خطوبة.. |
رد: خطيبي يؤجل زواجنا.
سبحان الله ضربة بالرأس واحدة تكفي ناهيك ثلاث مرات وكلها إعتذار
صدقين لو في احد عندك حكيم كان ماترك معلقة هكذا وجود خطاب لك وترفضين اللي جاهز ومستعد وتتمسكون باللي مشغول وربما متردد ،،،،، والله واضحة بالاعتذار الثلاثة ،،،،،يعني لو انا مكان أمه ما اعتذر ثلاث مرات لان مالي وجه امام الناس ،،،،،،بس ثلاث مرات وكلها اعتذر ،،،،اعتبره ليس اعتذار بقدر ماهو تردد او شيء من هذا القبيل ،،،،،،ًانت صرت تحسي وتفهمي اكثر من اهلك |
رد: خطيبي يؤجل زواجنا.
ممكن اسلوب تمطيط عشان تطفشون خاصه بعد الاعتذار الثاني جاء الثالث
|
رد: خطيبي يؤجل زواجنا.
الولد نفسه يتواصل معكم ولا لا !
اذكر وحده من صديقاتي صار لها مثلك وتخرجت وبعد تخرجها بسنتين او ثلاث تزوجو وكله معلقه له انا اقول خلي الكلام لرجال من ابوك للولد .. يعني يا تخلين ابوك يكلمه لان الحريم ماش منها ترتاحين ولا تتحسفين بعدين والله يكتب لك اللي فيه الخير ويرزقك زي ما تتمنين واكثر |
رد: خطيبي يؤجل زواجنا.
شوفي هالقصص تصير ..
زميلتي بالدوام ظلت متملكة 5 سنوات و اخرى أيضاً سنتين طبعا هالشي ما يمر على البنت عادي و كانت نفسياتهم مدمرة و سعوا لفسخ الملكة ف انا اعرف ان وضعك مو سهل و لا نفسيتك مرتاحة و حقيقة عندي نصيحة انه يوكل احد يعقد بداله / و هذا اجازوه المشايخ او انه يعقد عن بعد زي ما شفنا بالفترة الاخيرة لكن لا تسكتين و ترضخين لوضع انك معلقة و بفترة خطبة . |
رد: خطيبي يؤجل زواجنا.
اقتباس:
راحت من عمرك 5 سنوات معلقه معقوله 4 سنوات مازار اهله مارجع ابد للسعودية ؟؟ خلاص يايحدد الاجازة الجاية زواج وياخذك معاه يا انفصلي والله يرزقك باللي افضل منه |
رد: خطيبي يؤجل زواجنا.
وش يمنع الملكهً
نقول الزواج يتاجل ونبلعها بس الملكه ليه لازم ابوك ياخذ موقف منه عموما هالسنه خليها اخر سنه وشوفي اخرتها معاهم |
الساعة الآن 03:40 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©