راتب الزوجه في مجتمعي مالي فيه نصيب
 

السلام عليكم

بقول لكم قصه اغرب من الخيال والمصيبه انها واقع مر

بمجتمعي الرجل هو اللي عليه جميع الالتزامات الماديه حتى لو كانت زوجته موظفه ما تساعده ولا تشاركه باي شي نهائيًا نهائيًا نهائياً

من تكاليف العرس الى الخدامه والسواق وايجار الشقه والاثاث ويعطيها مصروف شهري وهي موظفه ويوفر الاكل والتعليم للابناء ويوديها مستشفيات خاصه حتى ولادتها تكون على حسابه !!

وهي تلعب براتبها عالفاضي وتشتري لبس وحلويات علشان تلبس وتكشخ لصديقاتها بالعمل !! يعني راتبها ماراح يكفيها وتضطر تطلب من زوجها وان ما عطاها زياده قالت فيه كلام ما ينقال وزعلت

يعني انا رضيت انك توظفتي وما اخذت منك شي المفروض تعوضيني فترة غيابك تعوضيني بوجبة الافطار والغدا اللي غالبًا راح تطوفني لانشغالك يعني الخدامه تكون عليك

وفلوس السواق اللي يوصل لعملك المفروض يكون عليك

فاستغرب لما اشوف رجال الزوجات تدفع لهم ماشاءالله وتتشارك مع زوجها عندنا مستحيل
اقصد( بعندنا )بجامعتنا ومعارفنا
وبنفس الوقت اعرف بدو الزوجه تدفع لهم ولكن بذكاء وتحايل من الزوج او من وقاحته ويستغل طيبة الزوجه

وماشاءالله على اصحابنا الحظر يتشاركون بكل شي مع زوجاتهم


المهم شنو اللي ابي اوصل له بالموضوع ؟
اللي بوصل له اننا غير متشابهين يعني بعض النصايح تناسب البعض مننا وبعضه ما تناسب الاخر نتيجة اختلافنا وهذي سنة الحياة

هل تشوفون وضعي طبيعي او لازم اشرك زوجتي ببعض المسؤوليات ؟
البعض ما يعطيها مصرف بيدها بحجة انها موظفه ؟

طبعًا انا اميل ان كل شي على الرجل بس اشفايده ان المره تتوظف بالعكس اتضرر من هالشي ولا احس بالاستقرار الاسري وبنفس الوقت مافيه فايده ماليه وفلوسها طايره على مظهرها !! يعني تعب مع خساره

الموضوع للنقاش واتمنى محد يزعل :)

رد : راتب الزوجه في مجتمعي مالي فيه نصيب
 

يكفي انها تصرف على نفسها وتسدد فاتورة جوالها .. وتشتري من راتبها لبسها ومكياجها وعطوراتها واحيانا تساهم في اغراض اطفالها ... صديقاتي الموظفات وحتى اختي متشركين مع ازواجهم في كل شي .. اما الموظفه اللي ترفض تدفع ريال وفوقها تطلب مصروف من زوجها فهذه صراحه لا تعليق ..

رد : راتب الزوجه في مجتمعي مالي فيه نصيب
 

انا موظفة فلوسي كلها على نفسي اما بنتي والبيت على زوجي

اتوقع لازم اتفاق

رد : راتب الزوجه في مجتمعي مالي فيه نصيب
 

انا موظفه اصرف على نفسي وعلى اطفالي وعلى زوجي كونه فقير حتى البنزين ادفعه ومع ذلك محرومه من السفرات والتمشيات والنزهات بصحبته وان كانت على حسابي !!..

ما تعليقك ؟

رد : راتب الزوجه في مجتمعي مالي فيه نصيب
 

مو هذي النوعيه اللي اتكلم عنها

حتى جوالها علي ومصرفها علي وغير لبس العيد والشتاء والصيف

اجل ليه موظفه الاخت :(

رد : راتب الزوجه في مجتمعي مالي فيه نصيب
 

الاتفاق جميل بس انتي شايله نفسك عكس اللي عندي

رد : راتب الزوجه في مجتمعي مالي فيه نصيب
 

الله يجزاك خير ويرزقكم

كونه ما يبي يسافر على حسابك يمكن ما يبي يثقل عليك تقصدين او ايش بالضبط

رد : راتب الزوجه في مجتمعي مالي فيه نصيب
 

أخي الفاضل..

مسألة الزوجة الموظفة ومشاركتها المادية لزوجها ليست بالقضية الجديدة .. سبق أن طُرحِت كثيراً .. وللبعض رأيٌ فيها أن الزوجة يفترض أن تشارك زوجها في الالتزامات المادية .. سواءً من باب المساعدة إن كان زوجها غير مقتدر مادياً .. أو من باب التعويض عن ساعات غيابها عن بيتها.

والبعض يرى أن هذا واجب وإلزامي عليها .. والبعض الآخر يرى أنها يفترض أن تبادر بهذا من باب الذوق والتعاون.

ولكن من ناحية أخرى أنت بنفسك قلت إن المجتمعات تختلف .. وأن السائد عند جماعتك ومعارفك أن الرجل يتحمل المسؤولية المادية كاملة حتى لو كانت الزوجة موظفة.

لذلك لا أفهم سبب طرحك للموضوع .. وما الفائدة التي ستجنيها من إعادة طرحه ونقاشه؟ .. هل ستطالب زوجتك بالمشاركة المادية معك وتخرق العرف السائد في مجتمعك مثلاً؟

أنت أجبت بالفعل على هذا السؤال ونفيته وقلت إنك تميل لأن يكون كل شيء على الرجل.

إذاً ما المطلوب؟ .. متحسف على البيزتين اللي بيدخلون جيبها؟! .. إذاً لماذا أخذت الموظفة منذ البداية؟!!



أما سؤالك: هل وضعك طبيعي أم لا؟

فأقول .. ما دام الله منعم عليك فنعم وضعك طبيعي .. وطبيعي جداً أن تتحمل كل شيء حتى لو كانت زوجتك موظفة.

رد : راتب الزوجه في مجتمعي مالي فيه نصيب
 

رد : راتب الزوجه في مجتمعي مالي فيه نصيب
 

ماتت الرجاله اللي ينضحك عليها مفيش حد بالسذاجة دي في وقتنا الحاضر.

السائد في عرفنا ان الموظفة تشيل مصروفها و سواقها و خدامتها

دام خرجت تتحمل مصاريف عملها و غيابها من البيت

لكن في المناسبات و الأعياد يزيدها مصروف

اما هذول الناس اللي تحكي عنهم ماعمري شفتهم الا اللي عندهم فائض مالي

من وجهة نظري ان الرجل يتفق مع زوجته قبل كل شيء على تقسيم الراتب

يتشاركون كلن حسب راتبه و معليش يعني غبي اللي يتحمل مصاريف حرمته الموظفة كاملة

و اللي ترضى على نفسها ماعندها عزة نفس وﻻ حشيمة

بعدين يااخي مو كل شي تنسبه للبدو ترانا وش حليلنا ميزاتنا فخر .