|
انا في مصيبه
السلام عليكم ورحمة الله وبركاته
انا الحين في فترة الملكه . زوجتي لها يومين تقريباً متغيره بس ماتوقعت أن فيه مشكله ورى هالتغير قلت ممكن البنت تمر في أوقات صعبه و ضغوطات نفسيه ومن الكلام ذا . المهم تكلمت معاها قبل شويه سلام كيف الحال طيبين الا و البنت مره صوتها مو عاجبني أبد قلت في نفسي بسألها يمكن تحتاجني في شي ولا شي . قلت خير وش فيك ياغلاتي لك يومين وضعك مو عاجبني قالت مافيه شي وبعد إصرار مني قالت لي السالفه والله شي قهرني وخلاني أموت قهر لدرجة شوي و أبكي من القهر . انا قبل ماعقد القران ع بنت عمتي هذي وقبل ماتوظف كانو يقولون لي انت لفلانه بنت عمتي الثانيه بس بصراحه قلبي ماكان يحس بشي تجاه هذيك البنت أبد ويعلم الله ماكنت أعتبرها الا زي أختي الصغيره المهم توظفت وظيفه حلوه والحمدلله وبعد ماتوظفت جاني الوالد قال يالله جهز نفسك نبغى نفرح فيك قلت خلاص ماعندي مانع انا كلمت أختي وقلت لها مابغى الا بنت عمتي اللي الحين ماخذها لأن من زمان وانا أحبها وكنت أحس إنها تحبني قالت أختي خلاص ولا يهمك المهم رجعت كلمت الوالد وفهمته أني مابغى الا فلانه قام و زعل وتنرفز وماهي من عادة الوالد الله يطول بعمره قال لا أبد أحنا أعطينا الناس كلمه ولازم نكون عند كلمتنا المهم انا تعبت مع الوالد ومابغى اكون عاق له ويعلم الله طاوعته وانا ببكي من القهر مابغى الا فلانه رحت وخطبت اللي مجبور عليها وحتى والله ماطلبت الشوفه الشرعيه قلت مايحتاج أعرفها وانا والله ناسي شكلها بس من القهر و الهم اللي فيني مرت الايام وكنت أزورهم وفي كل مره ازورهم يتقطع قلبي والله يـ أخوان أني ساعات أرجع سيارتي أجلس أقراء المعوذات لين تهدى نفسي المهم في كل مره ازورهم اشوف اللي ماينشاف عمتي مره تطلبني أسدد جوالها ومره يطلبوني أجيب لهم أعطار من عند الوالد يعني إستغلال حتى الغبي يعرف أنه استغلال . مشيت عشان الوالد مابغى يصير فيه شي و أكون السبب وانا أحب الوالد حب مايعلم فيه الا ربي المهم بعد فتره زرتهم زياره عادي دخلت ومافي يدي شي قلت بسلم وبمشي الا عمتي تقول خير وش فيك من البدايه صرت بخيل طلع فلوسك مابتدخل معاك القبر ( ملاحظه : يمكن قيمة الهدايا اللي جبتها لهم تقريباً بـ 10000ريال ) انا ماتحملت بصراحه الاهانه هذي . رحت للوالد وانا ماسك نفسي احترام له وعلمته بالسالفه من بدايتها لين نهايتها و الوالد يعرفني و يعرف طبعي وماكنت بخير وقتها . المهم الوالد جلس فتره مايتكلم معايه وبعدها أرسلت لي بنت عمتي رساله وتقول جوال امي أنفصلت عنه الخدمه بالله سدده . انا اخذت الجوال عند الوالد وقلت شوووف يابويه بعينك اخذ الجوال الوالد وشاف الرساله طالع فيني ندمان ومامسكت نفسي والله مقهور وقلت شوووف يابويه كلمتك وش سوت فيني خلتني عبد عندهم و أنواع الاستغلال وانا صابر يابويه عشان مابغى أكون عاصي لك ولا يخيب رجاك فيني شفت يابويه قام وحضني وسلم ع راسي وقال والله ماتجلس في ذمتك دقيقه وفصخت الخطوبه ع طوول وانا حزين و فرحان . المهم بعد فتره وبعد ماتغلبت ع الضغط النفسي اللي جاني واللي شفته رجعت وكلمت اختي وقلت باقي فيه أمل ولا خلاص أجلس بحسرتي و أبكي حظي . قالت ماعليك أصبر وان شاء الله يصير الخير والحمدلله جلست استخير الله لدرجة بعض المرات توصل 5 مرات . تيسرت أموري وخطبت اللي أحبها وكنت أتمناها من كل قلبي وعشت أجمل ايام حياتي وربي معاها وانا باقي مملك عليها حتى مادخلت بيتي والحمدلله ع نعمه وفضله . الحين اللي كنت خاطبها جالسين يهدمون حياتي ويشوهون سمعتي ويحطون فيني كل العيوب عند اهل زوجتي وتقول زوجتي أنهم قالو أني أخذتها مجبور عليها و غصب عني ويقولون أني مغزلجي وحق بنات وكل يوم رايح جاي من البحر خلوني بـ أبشع صوره زوجتي تقول الكلام هذا وهي تبكي مسكينه قطعت قلبي وربي وتجيها رسائل بكلام جارح حتى عيال الشوارع يستحون يقولون مثله وانا والله احترت و مقهور ثاني مره في حياتي ماعرف كيف أتصرف تعبت نفسيتي وربي قمت صليت ركعتين والحمدلله خفيت شوي بس والله كل ماتذكر اللي صار ببكي ياناس قهر الزواج قسمه و نصيب وانا عمري ما أذيتهم بالعكس مدري وش أسوي اخاف أروح أسوي مشكله ويتعب الوالد و لا نفسي بصراحه أطلع اللي بقلبي بس وربي ماسك نفسي عشان الوالد وكلمت زوجتي وفهمتها أنهم مجرد حاقدين وجلست أحلف لها والله مدري ايش اسوي أحترت أحس كل شي انتهاء وبخسر زوجتي مدري وين أروح وش اسوي وش أقول والله مدري سامحوني ماحب أرمي همي ع أحد ولكن مجبور يعلم الله |
الله يصلح الحال والاحوال
الزم الاستغفار اخي الكريم للاسف اصعب ماعلى النفس انه يكون الاذى من اقرب الاقربين عمتك وبنتها ربي يهديهم ويكفيك شرهم يارب مخطئين والمشكلة ماتقدر تقاطع عمتك وصعبة تكلم الوالد لانه بتصير مشكلة بينه وبين اخته بس لابد انت تحتوي زوجتك وتطيب خاطرها وتخلي اختك تكلمها وتفهمها السالفة حتى تقتنع بالمعلومة من اكثر من مصدر والله يكفيك شر كل ذي شر ويسخرلك زوجتك ويجمعكم على خير يارب |
لما كنت مع خطيبتك الأولى أكــرمتهآ وأكرمت أهلهــآ رغم إستغلالهم لك
احترمت أبوك وقدرته عشان مآتزعله عليك و لما تركت الأولى قدرت تكسب ابوك بصفك وتفهم وضعك و تملكت على البنت إللي تتمنــآها مو بس كذآ ..كانت نعم البنت وعشت معـآها أجمل ايــآمك هآذي الإنجــآزات تفتخر فيهـآ مـآشاء الله وكيف قدرت توصل للي تبغـآه بدون ماتسبب مشاكل كبيرة بين العوآيل وبدون مآتزعل ابوك علييك ..هاذا شيء كبير يبغاله كفاح وإنتا حققته بــآقي لك الخطوة الأخيرة تحمي زوجتك وتعزز ثقتهـآ فيك أهم شيء زوجتك اسمع لهـآ دايم واسمع شكــآويها ولآ تنقهر ابد دامك واثق من نفسك وعلى صح ووضح لها إن كل كـلآمهم خطأ قلها بكل ثقة اسألي عني وأنتي بتعرفين . ولما يطمن قلبها.. وتصير إنتا وهيا شيء واحد لآيهمك هي راح تدافع عنك عند أهلهـآ وماراح تسمح لأحد يتكلم عليك لآ تيأس الله يسعدك كلهــآ ايآم وتصير عريس (= |
اقتباس:
والله مو مقصر مع زوجتي في شي انا مافكرت في عمتي تفكيري كله كيف أقدر أحمي نفسي و زوجتي منهم وربي أنا اذا مانفعتهم ما أضرهم اقتباس:
والله صبرت وكنت كل يوم أتخيل حياتي الجايه وكيف بقدر أتكيف معاها واعيشها انا والله ماكافحت عشان أشوف طريقه أتخلص من اللي خطبتها أول مره الا والله احتسبتها عند ربي وكنت أدعي ان الله يعوضني خير وتقولي ماصارت مشاكل للحين عمتي و الوالد مايكلمون بعض بس انا وش ذنبي الزواج قسمه ونصيب صدقيني اشياء كثييييييييييير ماقلتها ولا ابغى اقولها قلت معاناتي القديمه بإختصار ماهمني كل هذا اللي يهمني زوجتي والله انا ضايع مدري وين أروح أحس بالظلم وربي ابغى احط حد للي يصير ياليت أحد يقدر يساعدني وش اسوي مع هذولا الناس ماحب أكون ضعيف قدام أحد وماحب اللي يستغلني ابغى اعرف كيف اتخلص من شر هذولا الناس |
اخوي توكل ع الله ودايم كرر اللهم اجعل كيدهم بنحرهم والله يكفيني شرهم
انت كلم زوجتك وفهمها عن كل شي وكلم اختك وفهمها لازم زوجتك تحتفظ بالرسائل ولا عاد ترد ع اتصالاتهم او مسجاتهم تتركهم لانهم حاقديين وبصراحه أخاف بعد يتبلون بزوجتك علشان كذا خلك حذر منهم وخلها حذر منها وكلم عمتك وكلم أبوها وفهمه وقول لها انا شاري بنتهم وانا ماابي اي شي ياثر علينا او يخرب علاقتنا وانت لازم تحط حد لهم بصراحه وخل المسجات عندك علشان يكون فيه دليل لك واذا اضطر انك تحكي لابوك قوله البنت كذا راح تمر وتقدم ع الخطوه وهي حاطه يدها بقلبها وخايفه ان يصير شي أخاف لدوامك يسوون شي وهي تنزف ولا يخربون الزواج عاد حرام هذي ليلتكم انا ماابي اخوفك بس انا لازم أحذرك من هالاشكال ونصيحه وقولها لزوجتك قل ماابيهم بعدين يدخلون شقتنا أخاف يبلونكم بشي اهم شي ان زوجتك وأهلها تفهمهم وتفهم احد من اهلك او أبوك علشان اذا تكلموا عنها ولا شوهوا سمعتها يكونون اهلك عارفيين قل لأهلك انا قلت لكم وعطيت خبر لكم لانهم قريبين لنا مره ويمكن يسوون لي اي شي الحين او بعد الزواج انت ادع ربي يزوج بنت عمتك ويلهيها عنك وعن زوجتك وخلك واثق منها وخلها واثقه منك والله يبعدهم عنك ويلهيهم عنك يارب |
مافيك الا العافيه الله يبعد عنك المصايب وعنآ اجمعين بالتوفيق
|
لا تكبرهااااا مو مصيبة .... خوفتني
عندي وعندك خير هذا رابط اول مشكله لي http://www.66n.com/forums/showthread.php?t=233423 |
السلآم عليكم
اخووي آنآ رآيي تخبر ابووك بالكلآم اللي يوصل زوجتك قوله انا ماحبيت اتصرف بدون علمك (وعلمه السالفه) بس الحين عندك خبر وآنو مآتقدر تشوف احد يخرب بيتك وتسكت انا صرآحه لي الحق ادافع نفسي وعن زوجتي وبيتي مآنصحك تسكت اببببدًآ , لآنو لو سكت رآح يتمآدون اكثثر وآكثر والله يوفقكم ويحميكم من كل ششر |
السلام عليكم ورحمة الله وبركاته
أبشركم الحمدلله أنحلت المشكله بالنسبه لي اليوم أرسلت لي زوجتي رساله فيها كلام كثير بس بإختصار قالت فيها أن عمرها ماراح تشك فيني في يوم و أنها تعرفني زين من قبل ماكون من نصيبها و طبعاً أرسلت لها اني خفت انك صدقتي كلامهم لما شفتك تبكي و متغيره . فرجعت ارسلت انها مابكت الا من حبها لي و حزينه عشان أن الناس هذولا يأذوني وانا ماسويت لهم شي وكلام كثيييييير بصراحه دار بيننا . المهم أن قلبي أرتاح وهدا تفكيري . وكلمت الوالد وفهمته بالموضوع كامل وقال هدي بالك ويصير خير إن شاء الله وربي يسهل الأمور . أمس بصراحه نفسيتي تعبت بشكل غير طبيعي و كنت أتصل ع أختي وماترد ذبحني التفكير و الوسواس أعوذ بالله من الشيطان سامحوني أخذت من وقتكم وكبرت السالفه و ازعجتكم وتعبتكم معايه . الله يسعدكم كلكم ويحرم وجيهكم عن النار ويجمعكم بمن تحبون نيوتيلا . سما . مجنونه . عاشق الاروى . مجموعة إنسان . أنفاس أنثى شكراً لكم من الأعماق و السموحه منكم الله يسعدكم أعتذر لكم لأني مارديت عليكم الرد المناسب لكم مني بإذن الله دعوه في ظهر الغيب الله يكثر من أمثالكم ولا يحرمكم الأجر ودي و تقديري يـ اخواني / |
اخوي عاشق الله يخليلك زوجتك ويسخركم حق بعض يارب
ويبعد عنكم الناس الحاسده يارب اهم شي أنكم تفاهمتوا وتحطون حد لهشي |
| الساعة الآن 05:19 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©