|
احس ان الزواج بيحرمني ان اعيش جوي بالشكل اللي ابيه
السلام عليكم ورحمة الله و بركاته ..
صباح / مساء الخير للجميع ,, اتمنى الجميع بخير ,,, ما خاب من استشار وانا ابي استشيركم ,, عمري 25 و على مشارف الـ 26 ,, اخواني و اخواتي كلهم متزوجين وانا الكبير بالبيت " عزوبي ", المهم امي و ابوي ازعجوني عشان موضوع الزواج . استخرت اكثر من 20 مرة و ماحسيت بااي شي , المهم انا كنت عاطل عن العمل وابوي قالي ماعليك ووووو الخ . فكرت وقررت ابدأ بالخطوات الاولى بحثنا عن لبنت ولقيناها , وبعد مالقيناها خطبناها , وبعد ماخطبناها ( وافقوا !! ) البنت واهلها مو افقين وهالشي صدمني ,, بعد الخطبة تقريبا بيومين ولله الحمد توظفت . وانا على رأس العمل في الوقت الراهن . الا انا في لحظة الحيرة هل استمر بخطواتي او لا , بالرغم من انه امي و ابوي مرة طايرين من الفرحة وابوي مرة عاجبينه اهل البنت ( متواضعين , متوسطين الحاله المادية ) وابوي احسه يبيهم بقوة حتى اكثر مني وكذلك امي وخواتي . لكن انا ( انا ) احس اني مابي احس باقي ماني متحمس او بالاصح ماني مصدق الموضوع عشان كذا مااهتميت له . واحس بتردد رهيب وبكل صلاة ادعي ربي بتيسير كل ماهو خير لي وللبنت وللمسلمين , مدري احس باقي مابي اتزوج . بالرغم من اني رجل ( بيتوتي , بمعنى الكلمة ) يعني بيت و كتاب << من عشاق الكتب . وغير كذا ماني من الشباب اللي يسهر ويسافر ووو الخ متعتي لما قراء رواية او كتاب سياسي ووو الخ . واحس انه الزواج بيحرمني كل هالمتعه وبيحرمني اني اماارس طقوسي براحتي ااو اعيش جوي بالشكل اللي ابيه . احس انه الزواج لازم تطلع وترو وتجي ومشاوير وووو الخ .. وانا اكرهـ كل هالحاجات مشاويري ( بقاله , دوام , المكتبة " جرير , العبيكان , الوطنية " ) وبس غير ماكو اي شيء . المهم انه اكيد لبنت فرحانه ومختبه وووو الخ وبعد يومين انا بشوفها وهي بتشوفني على اساس بعدها نكتب الكتاب ويكون الموضوع نهائي . لانه الموافقه جت كبدايه من كلام نسوان بعدين خطبة وكلام رجال بعدين موافقه وباقي اخر خطوتين هي الشوفه الشرعيه و الملاك . وانا محتار وخايف واحس اني ابي ومابي ووووووووووو الخ وغالبا احس اني ماابي ,, شاركوني رايكم |
يا اخي اذا انك شايف ان نفسيتك غير متقبله للزواج
باقي او تحس بتررد كبير او لست مستعد لتحمل المسؤليه بعد فلا توهق نفسك ولا توهق البنت معك الا اذا كنت من النوع اللي يقدر يتحمل المسؤليه والضغط وانت شوف البنت وكرر الاستخاره وما تدري يمكن اللحين متررد وبعد ما تشوفها تقدم وانت مرتاح وبالتوفيق |
وليه ما تحسب أنه بعد الزواج يصير جوك أحلى وأحلى :) وتلاقي من تشاركك القراءة وتتناقشوا باللي قريتوه ... الانسان ربنا خلقه اجتماعي يحب الونس .. حتى لو كان بيتوتي حلو يكون معاك أحد بالبيت يونسك ويشيل عنك . وتحكي له همك . وتشاركه فرحتك .
المهم أن تحسن الإختيار ... بيوم الشوفة كلم البنت وقلها نبذة عن نفسك وانك تحب القراءة وشوف ردة فعلها . انت عملت خطوة ناجحة جدا وهي الاستخارة وتأكد انه ما ربنا كتب لك ويسر لك إلا لأنه خير . فتوكل على الله وكمل طريقتك استخارة وتقدم بالخطوات ربي يهنيك ويسعدك |
ليه بس يا خوي و الله الف شاب يتمنى تتسهل معه الامور مثلك الزواج نصف الدين توكل على الله انت مع الخطوة الاولى جابلك الله رزق و توظفت عسى يكون هدا الزواج زيادة و بركة في الرزق و مع وجود العيال غدا يزيد الرزق اكثر و تعف نفسك و نسأل الله ان تكون البنت عون لك على امور الدنيا و المعاش و عاقبة الامور
استشير و استخير و لن تخيب ابدا بحول الله |
وأنا أخوك قبل ما أوصيك أنا وصاك المصطفى صلى الله علية وسلم حيث قال " يامعشر الشباب من أستطاع منكم الباءة فليتزوج فانة أغض للبصر وأحفظ للفرج " ...
الله يرزقك ببنت الحلال |
انت أكبر منّي بسنة ولي نفس توجّهاتك السياسيه والبوليسيّه ابي اسالك ماتحسّ ان مخّك تعب من كثر ماتتعب وتفهم بالسياسه والحياه وتعرف إن السياسه مافي أوسخ منها ,بعض الأحيان أحك رأسي بعد ماكنت أثق كليّة برأيي وأعتبر نفسي ذو رؤية صحيحه تماماً ولايمكن أن اخطأ بهذه الامور وبإمكاني اختيار الصحيح
,بعض الأحيان اقف موقف العاجز ولأول مرّه لاأعرف الصح في السياسة طبعاً أحس اني شطحت بك لكن قول أنّي أفكر بصوت عالي ع العموم انا بيتوتي ومثلك خطبت وحللّت والنظره الشرعيّه بعد يومين أوّل ماخطبت حسيت اني ندمت وتسرّعت خاصّه وانا كنت أخطط لسفره للدول إلإسكندنافيّه التي لاأعرف عنها إلا ماقرأته في ويكيبديا وبعدها شوي وأحس اني خلاص ودّي اكنسل شوي بديت اتقبل الفكره وخلاص احسّه شي عادي أكثر اللي اعرفهم يقولون مع النظره بيتغيّر رأيك 180درجة وراح تكون موافق ومستعجل وفعلآ احس بدأت بوادر اني خلاص قمت أحسب وودي اعجّل بالزواج وهذا وانا ماشفت شي الخلاصه إنّك راح تخاف اول يومين او 3 وبعدها وضعك يظبط وبتستانس واصل ياخوّي |
اقتباس:
اشكر مرورك ,, مشكلتي مع الاحساس |
اقتباس:
وهالشي يدور بخاطري انه يمكن بس المشكلة لو طلع العكس أأأأأأأأأأأأأأأه يالقهر |
اقتباس:
|
اقتباس:
كلام المصطفى لاغبار عليه ,, اللهم صلي وسلم عليه وجمعنا معه في جنة الفردوس الاعلى اللهم امين |
| الساعة الآن 11:14 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©