|
الزوجه السنعه والزوجه المهمله
السلام عليكم ورحمة الله وبركاته
انا تعقدت وصار عندي وسواس واكيد اغلب الحريم حسو بهذا الشعور عندي سؤال للرجال ليه الحرمه اللي تكون سنعه وتبيض الوجه وطيبه وماعليها قصور زوجها يفرط فيها ليه حظها مع الرجال طايح انا الحمدلله مو ناقصني شي وزوجي طيييب ومبسوط مني ماشاء الله لاقوة الابالله وحياتنا ماشاء الله مستقره بس خايفه انزرع هذا الخوف فيني من المنتديات انا قاعده اساعد زوجي واوفر معاه قيمة سياره وبيت والحمدلله الضروريات مايقصر ابد فيها يمشيني ويقضي للبيت اللي خاطري فيه بس اقصر من ناحية الملابس والمصروف والعطور والاشياء هذي احاول ماضغط عليه واقول بنفسي عسى فرج قريب واوقات تساعدني امي واشتري كل اللي في خاطري بس خايفه خاااااااايفه من جد تعبي مع زوجي يضيع ويدور غيري تطلع عينه اوقات اتمنى اني رفله ولا اعرف اسوي شي لاني اشوف هنا رجال صابرين ومعاملين حريمهم بالحسناء رغم انهم على حسب وصفهم سيئات مو عارفه وين الغلط هل فعلا اللي سنعه وتوفر لزوجها لمستقبلهم خاصة انها موموظفه وتصبر على عصبيته اوقات هي اللي تخسر في النهايه والا بس حالات فرديه |
ومن قال ان المرأة اللي توفر فلوس وتساعد زوجها ماديا تعتبر سنعة
الشي الثاني اللي يخاف من الغول يجيله تركي عنج هالهواجس اللي مالها داعي وفكري بنفسج وهو الملزوم شرعا ان يوفر لج السكن مؤ العكس مشكلتنا إحنا يالحريم ان نعطي الاشياء اللي المفروض نأخذها حبيبتي نصيحة لوجه الله حبي نفسج واستعدي نفسج بعدين فكري فيه واسعديه الله يوفقج ويفتح عليج |
فهمتيني غلط اختي موهبه انا ماقصدت اني اعطيه حق المسكن لا انا اقلل طلباتي يعني اوقات يكون نفسي بشنطه اقول بلاش هالشهر بخليه الشهر الجاي
وفي يوم طلبت منه مبلغ واعطاني خليته معاي بس اخر الشهر جو ضيوف واعطيته عشان يقوم بضيافتهم وبيرجعه لي وهكذا |
وعليك السلام ورحمة الله وبركاته
حسستيني يا أختي إن نحن الرجال مافينا خير وأننا ماراح يعجبنا شئ من زوجاتنا مهما فعلوا لنا ..!! ياأختي .. مايضيعكم أنتوا يالحريم غير كثرة القيل والقال والخوف إللي ماله داعي وإللي يكبر في رؤوسكم ليتحول إلى حقيقة مخيفة دائماً أحمدي الله على كل شئ إن كان زوجك طيب معك وحياتك مسقرة وهنية فاكثري من الدعاء وشكر الله على التوفيق فما أصابك لمن يكن ليخطأك .. وما أخطأك لم يكن ليصيبك . أعانك الله |
اذا جذي انتي الله يهديج مكبرة الامور
واذا حاسة ان زوجج يستأهل فهو يستأهل بس تركي عنج هالهواجس واحمدي ربج على كل حال الله يسعدج دنيا وآخرة |
:* حبيبتي عيشي اللحظة وتعاملي مع الناس بأخلاقك أنتِ مو بأخلاقهم يعني إذا أنتِ معدنك أصيل وبنت عالم وناس وواقفه مع زوجك لأنك إلى الآن ماشفتي منه إلا الطيب فلا تجلسين تفكرين بكره وش بيسوي فيك وإلا كيف بيجازيك أنتِ كل هالي تسوينه مريحك ومسعدك مع زوجك شريطة لا أفراط ولاتفريط ياعيوني كلنا نتساعد مع أزواجنا ونتعاون معهم مو هبالة منا لا لأننا ماشفنا منهم إلا الطيب ومدام الرجال طيب إلى الآن معي يبشر بالأطيب وكله بالإخير راجع لي ولعيالي وإذا بعدين تنكر لك فهو رفس النعمة برجولة وبيجرب إلي تخليه يعض أصابعه ندم عيشي يومك ولحظتك مع شريك حياتك بس لا تقصرين مرة على نفسك وتقدمين تضحيات مبالغ فيها يعني كوني متزنة ووسط وحافظة لحقوقك ولاتسلبين الرجل دورة القيادي في النفقة وإدارة شؤونكم مو عيب الوحدة تساعد زوجها إذا شايفه أنه معها طيب ومقدرها وحاطها بعيونه العيب أن زوجك يكون طيب معك وتكوني معه العكس العيب أنك تجازي الإحسان بالإساءة :* يعني بالله عليك لو صرتي رفلا وقشرى بتكوني سعيدة.؟! أو زوجك بيكون سعيد معك.؟ وعلى فكرة مو كل رجل يتحمل الرفالة وقلة السنع وياكثرهن إلي تطلقن من أول شهور الزواج لقلة سنعهم ترى هالي صابرين يعتبرون قلة ومو كل الرجال يتحملون وبعدين سنعك في بيتك وتعاملك الرآقي وتعاونك مع زوجك هذا نابع من أحترامك لنفسك ولأنه جزء من مبادئك في الحياة يعني المفروض هالأمور تكون قناعات شخصية وجزء من كينونتك أنتِ نظافتك وأهتمامك ببيتك شيء نابع من أحترامك لذاتك مو عشان زوجك عشان أنتِ تحترمين نفسك وماتبغين تحتقرينها ولأنك ماتسمحين لأياً كان أنه يلقى فيك عيب أو يقول أنها طالعة من بيت ماعرف يربي :* |
عزيزتي الزوج ليس ملزم بأن يوفر لزوجته كماليات ليست مهمه فهو لايعمل 6 ساعات في اليوم أو أكثر حتى يشتري لزوجته شنط وملابس وعطور، الزوج ليس بنكا متنقلا. وقد لاحظت أن الزوجة غير الموظفة لا توفر الكثير لزوجها ودائما تطلبه المال لتضيعه على أشياء ليست مهمه واعتقد أنها تفعل هذا لأنها لاتشعر بقيمة المال فمن لايعمل لايشعر بقيمة المال.
أما بالنسبة لسنعة ورفلة، عزيزتي لا يوجد امرأة طبيعية تتمنى أنها مهملة وكسولة لأن اهمالها سيعود عليها وعلى من تحب بالضرر ومن تهمل زوجها حتما هي مهملة بالاصل لنفسها والمرأة السنعة سنعة لنفسها قبل أن تكون لزوجها. ونصيحة لاتفكري بالمستقبل بطريقة سلبية لأن هذا التفكير حتما سوف يؤثر تأثير سلبي على حياتك في الوقت الحاضر. ودعي الأمور تسير كما كتب الله لها. |
سلمى1 لا والله الرجل غير ملزم بكماليات الزوجةمثل شنطة ؟؟؟ وعطور ؟؟ اجل وش ملزوم فية؟؟؟؟
ملزوم انة يطلب منها فلوس وتشتري لة بيت ؟؟ ولا تصرف بدالة؟؟؟؟ القوامة مين للرجل؟؟ ولا للمرأة؟؟ عجييييييييييييييب والله صارت الشنطة والعطور كماليييييييييييييات ؟؟؟؟ اختي صاحبة الموضوع والله كل انسانة ونصيبها بعض الرجال يقدرون الحرمة اللي تساعدهم وبعض الرجال ياخذون فلوس الحرمة ويتزوجون عليها اقول لك الكلام ذا لاني شفت بعيني الله يسير لك امرك يارب تحيااتي |
تذكررررررري ..
( السعيد من وعظ بغيره ) الثقة المبالغ فيها مع اي شخص مذمووومة ... احفظي حقك ، الدنيا دواره ... و فيها حياة وموت و ورث و اهل و غيره .. السنع مو معناه توفري سيارة و بيت ، إلا اذا كانت موثقة رسمياً بإسمك و الحق حق ، سواء زوج او غيره .. أنا ما اخرب بينك وبين زوجك ، لكن ياختي القانون لا يحمي المغفلين .. الرجل ما تظمني ما يتغير مهما كانت اخلاقه ، بكره تلقينه متزوج ببتك أو ينكر حقك أو اي امر آخر .. ما اقول لا تثقي فيه ، لكن احفظي حقوقك و بعدين ثقي فيه .. |
اللي فهمته من الأخت
انها غير موظفة و تساعد زوجها بالتوفير و ليس بالدفع عنه من مالها إذا خطأ صححي لي,, طيب عزيزتي انت أعرف بحالة زوجك المادية و استمري هكذا مدام انه طيب و يتسوق معك و يرفه عنك و لم يضغط عليك بطلب منه أن لا تشتري ,, بالعكس اشوف تصرفك سنع و زوجك مرضيك إنما الوساوس تتقلب برأسك لأنك بطبيعتك كأنثى تحبين التزين الزائد و فطرتك ترغب بذلك و تخافين أن تظهري بمظهر غير لائق و يتجه زوجك لغيرك أقول لك مدام زوجك عارف معدنك فلا يهمك غير ذلك امسكي العصا من النص و لا تقصري على نفسك و اشتري على حسب الوضع يعني اشتري شهر شيء عليه القيمة و الشهر اللي بعده شيء خفيف و حافظي على أشياءك و نظافتك و ترتبي من ناحية الأهتمام بالجسم و الشعر و حلو الكلام راح يشوفك أحلى وحدة حتى لو كنت حاطة لابيللو و قاعدة معاه بشلحة بيت موفقة و ربي يرزقكم من نعيمه دنيا و آخرة |
| الساعة الآن 10:11 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©