السلام عليكم ورحمة الله وبركاته

موضوع أود التناقش حوله مع قرب موسم الزواجات
ملكة أختي قربت عقبال عندكم :14:

بس في موضوع مزعجنا ومسوي لنا قلق وهو اصطحاب الأطفال :24:
خصوصاً أن الخاطب من عائلة أخرى ونبغى حفلنا مرتب كنا نبغاها بالبيت بس ما يكفي رجال وحريم وبنسويها في صالة حفلات

طبعاً حفل الملكة تكاليفه علينا عشان كذا مو عارفين نتصرف في هذه الجزئية :30: ( مصغرة بس أهلنا وأهله فقط )

أنا أقول لأهلي أقرب المقربين نعزم أطفالهم يعني خالاتي عماتي
لأنه في زواجاتنا يصير زعل وناس ما تحضر وين تودي عيالها ؟ وأطفالنا أكثر منا ( وش الحل ) صار الحفل لهم :17:

وأكيد تعرفون عبث الأطفال وركضهم بعضهم يقطعون الورد ويكبون العصيرات وهجوم على الشوكولاتة والقائمة تطول

والله أنا أخذت بنتي وهي صغيرة 3 سنوات زواج قريبي بس تندمت بس ألحق وراها وما حسيت بالزواج
بس وين أحطها إذا كل أهلي وأهل زوجي حاضرين
بصراحة ما له داعي الأطفال لو في أحد يمسكهم هذا من تجربتي على الأقل أتهنى بالروحة

وكذا زواج تخيلوا جدات يزعلون ليه ما حسبتوا حفيدي أو حفيدتي :29: المشكلة الأمهات راضيات بس الجدات زعلوا

نرجع لملكة أختي :14:

أمس أحصينا عدد الأطفال طلعوا أكثر من 20 هذا مختصرين طبعاً بس بنات :15:
وأهل الخاطب قالوا بس يبغون أقل من 5 بطاقات :15:

المشكلة أقاربنا شكلهم استعدوا قالوا بنت خالنا أو عمنا أكيد بيعزمون أطفالنا وتجهزوا وهذا مأزق مو عارفين نطلع منه :29:

الوالد يقول احسبوهم خلوهم يفرحون بس ما يدري وش يطلع من وراء حضورهم
حاولنا نضيق الدائرة ما في مجال :24:

وأخيراً صدر فرمان في البيت ممنوع اصطحاب الأطفال :15: إلا أطفالي طبعاً

المشكلة اللي راح تصادفنا ومتأكدين من حصولها بعض الإتصالات مثل الله يخليكم بنتي تصيح تبي تحضر ولابسة فستانها ( تخيلوا الإحراج )
أو اعذروني بنات بنتي أو ولدي بيجلسون عندي وبيحضرون بناتي نيابة عني يا تعطونا لأطفالنا يا ما أحضر وننحرج ونوافق لها ومن بعدها الطوفان يعني بما إننا فتحنا مجال نتحمل ما يجينا

وبعضهم أحس فيهم قوة عين يقولون ليه بس بنات نبرات شعري يحضرون :15:
طيب هذه خالتهم وأنتم بعاد ما في مجال مقارنة يعني وين أودي بناتي ؟؟؟ وهذه حفلتنا

أعطوني حلول أنا ودي يحضرون عشان وجع الرأس والإحراج اللي ممكن يصير بس أهلي خلاص شافوا الأصلح عدم حضور الأطفال :15:
وأهلي يقولون خلاص في الزواج نعزمهم بس طبعاً حفل الزواج على الزوج يعني ما لنا أمر نقول أعطونا أكثر من 20 بطاقة أطفال :15:

ردك مضحك ويمثل واقع بعض الزواجات ( يقلبونها ملاهي الحكير أو الشلال ):30:

المسألة حتى لو بعضهم مؤدبين يكفي القلق والأطفال ما عليهم شرهة بيشوفون الوناسة بيركضون ويدمرون

أذكر بزواجي أحد الأطفال وقف على طرحتي قبل الزفة كانت طويلة وخلاص بأصعد المنصة وانفكت :29: وصديقتي وراي ثبتتها يعني وش أنتظر بعد كذا أنتظر يطيحوني مثلاً :d

أنا تنرفزت في زواج قريبي قطعوا الورد أنا انقهرت يعني الناس متخسرة في زواجهم والأم ولا تتحرك كأن المشهد عاجبها ويمكن تأخذ لزوجها صار الورد ببلاش

أنا أحدد العمر المناسب من أول ابتدائي يعني تفهم كلمة اجلسي عاقلة
أما أقل من كذا أحس الحفلة بتنقلب مظاهرات :30: وعمليات انتحارية :30:
يعني أطفال اجتمعوا وش نترجى من جمعتهم :15:

والله إنكِ صادقة في كل كلمة قلتيها عن أول ابتدائي

بس على الأقل مخرج من الصغار اللي أعمارهم 3 و 4 سنين ما يفهمون ولو كلمتيهم صاحوا :15:
والأم لا حياة لمن تنادي

أنا اللي ما يعجبني أجلسه غصب عليه وأمي مثل أمكِ تقول خل تقضي الليلة على خير :24:

لقيت حل

ليه الأمهات ما ينسقون مع أزواجهم يعني عشاء الرجال يخلص قبل الحريم يعني 10 مساءً خلص حفلهم
والحريم أصلاً ما يتجمعون إلا بعد 10 مساءً وأكثر

في هذه الحالة الأب يحضر ويعين خير وإذا خلص الحفل يمسك عياله وزوجته تحضر حفل الحريم ( التعاون حلو ) :29:
خصوصاً لو كان المعزومين من منطقة ثانية يعني لو حضروا ناس من مناطق بعيدة

مو معقولة بيتركون عيالهم هناك ( وهذا اللي حاصل عندنا ) معازيمنا من كل منطقة فهذا الحل مناسب لهم

وكفى الله المؤمنين شر القتال

هذا أفضل حل وإلا وش رأيكم