منتدى عالم الأسرة والمجتمع

منتدى عالم الأسرة والمجتمع (http://www.66n.com/forums/index.php)
-   المتزوجين (http://www.66n.com/forums/forumdisplay.php?f=6)
-   -   زوجي ضربني (http://www.66n.com/forums/showthread.php?t=229380)

خيـــــال 21-10-2011 02:28 AM

زوجي ضربني
 
السلام عليكم
اول شي انا مالي بالمقدمات وخصوصا اللحين

انا انسانه قدر الله عليها وتزوجت ولد عمها
عمري ثلاثين سنه وزوجي سبعه وثلاثين
تزوجت وانا عمري 23 سنه سكنت فوق اهله وكانو حموله
كنت اكل معهم ويكون علي يوم كامل اطبخ فيه
ويكون فيه مشاكل وكنت صغيره واكبر اخواني وماكنت اعرف شي
كنت اعاني من ضغوط الشغل وضغوط المشاكل
وماكنت اطلع واتمشى مثل اي وحده متزوجه اذا قلت له خلنى نطلع قال موب فاضي
واذا اهله يبون يطلعون قال يالله مشينا
قلت ليه كذا مالي خصوصيه معك قال وش فيها اذا طلعنى مع بعض
المهم كنت احط حرتي بولدي الله ياخذني
حملت ببنتي وانقطعت عن اهله واستقليت عنهم
المهم ان زوجي عند اي مشكله يتلفظ علي الفاظ وسخه
مثل يانعال ياحماره وغيره كثيررررررر
كنت ارد عليه وكان يمد يده علي وكنت اسكت
وبرضو يرجع ويمد اقول ليه يقول لاتردين علي اذا قلت شي اسكتي
يعني الشيخ يبيني اصير عبده عنده
المهم مرت السنين وكبرو عيالي وكان هو هادي وحبوب
ومرح
احيان لمن يتكلم علي لو بمزح يهاوشونه عيالي مع انهم صغار الا انهم يهاوشوونه
مع انه يدللهم اكثر مني
وكنت دايم انبهه خلنا محترمين قدام عيالنا عيييييب هالكلام حتى لو مززح
راحت السنين
وقبل كم يوم كنت ببيتي وطق الباب الساعه ثنتين ونص
جيت لقيت ولد اخوه قلت وش تبي قال وين عمي قلت عمك نايم مقدر اصحيه لان عنده مشوار الساعه خمس الفجر
قال طيب عمي فلان يبي ؟؟؟
للمعلوميه عمه اللي مرسله عطال بطال الحرمه عنده مثل الخدامه
رحت ورجعت قلت مالقيت بجيبه وهو نايم
الغرض موجود بس ماقدر اعطيه لان زوجي دايم يقول لاتعطين شي من جيبي الا بامري
خذيت ربع ساعه وطق الباب قلت نعم قال عطينا المفتاح السياره الغرض فيه ونبيه
هنا انا انحشررررت
رحت لزوجي اصحيه قلت قم وانا مقصره صوتي خفت الولد يسمعني ويعرف اني انا اكذب
المهم هو خاف مني وانا مقصره صووتي
قال وش قلت كلمه استغفر الله اقصد فيها ولد اخووه
وبعدها قال منهو قلت اخوك
قال اخوي تقولين كذا عنه ودفني
وراح لباب ورجع لي قال ليه ماعطيتيه قلت انت بنهاووشني
قال لا انتي متعمده
المهم. عطا الولد الغرض
ورجع للغرفه ورحت انا لغرفه عيالي اكمل شغلي
مادريت الا يوم رجع ومسكني مع رقبتي قال ليه تقولين هالكلمه
قلت اول شي انا اقصد ولد اخوك قال كذابه
قلت انت كنت دايم تقولها لي وماعرفت معناها الا اللحين
كلمه مني كلمه منه مد يده وكنت ارجع وامسك يده وادفه وارفع صوووتي
قلت انت ماعندك غيره على زوجتك ينطق الباب هاللوقت
واللي يطق ولد بالثانوي سمعته زباله واللي يبيه منك شي خايس
كان يقول قصري صوتك لايسمع اخوي
قلت ماني مقصره صوتي ولا علي من اخوك
ومد يده ثاني مره وراح للغرفه ولحقته
انا هنا انجيت تهاوشت معه وبرضو رجع يمد يده بخيزرانه
مسكتها وكسرررتها
قلت عيب عليك انا ام عيالك رد وقال الله يهديتتس

تخيلوووو بجاحه الموقف
قلت الله بيهديني وبتشوف شي عمرك ماشفته
اخوااني الاعضا
سبق ان اخوي حذره على مده اليد وقال ان عدتها ما اح اسكت
وايضا ابوي الله يرحمه كان عارف انه يضربني وكان ينتضر مني اقوله يتدخل
وللمعلوميه ايضا الغرض اللي يبيه
دخـــــان

انا اللحين كرهته وماني طايقه اشوفه
ولو كلمت اخويي بيجي ياخذني بدون عيالي
وبتكبر السالفه

انتضرررر. رايكم*

(( معتز )) 21-10-2011 02:36 AM

الله يصلح اللي بينكم عاجلا غير آجلا .

في هذا المنتدى من الخبرات واصحاب الراي الصادق بعد توفيق الله .

كل ما انصحك به ان تدعي الله سبحانه وتكثري من الاستغفار .

% قلبي حنون % 21-10-2011 03:30 AM

لا حول ولا قوة إلا بالله

عزيزتي..

الله يفرج همك ويفك ضيقتك..

حاولي تحطي حد للموضوع.. وقوليله انا ما أسمحلك تمد ايدك عليا
واذا حاول .. هدديه انك حتقولي لأهله أو لأخوكي ..

انتِ قلتي انه السنين الي عدت ماسوالك شي ..
فرضا انه سوء تفاهم وكان معصب ودوبه صاحي من النوم..
اتفقي معاه على اسلوب معيين تتناقشو بيه وقت الغضب بعيد عن العنف..

الله يهّدي سركم..

ميثاا بعد 21-10-2011 03:37 AM

لما سالك ليه ما عطيتيه كان ردك انت بتهاوشني كان قلتي الصدق
خفتك تزعل...بعدها تأثيرها أجمل في نفس زوجتك
يا حريم انتم محتاجات حبتين دلاال ودلع ولسان حلو
....
لو من مسك ع رقبتك عضيتيه من قلب
.......
الحين روحي عند اهلك زيارة ع اساس انك زعلاانه منه ويفضل ما تاخذين عيالك
اذا هم فوق3سنين
.......
وحاوالي في لحظة غضب زوجك انك ما تستفزي شكله واهله مالك خص فيهم
تنتقدي اخلاقهم جدامه غلط
وبعدين هو شكله متسامح لما دعا لك بالهدايه

خيـــــال 21-10-2011 03:40 AM

حاوولت احط حد
ومافي فايده وكنت ازعل منه وانا ببيتي ماكنت اشتكي لابوي
لاني منحرجه وش اقول
اقول يسبك ويسبني ورديت ومد يده

اما من ناحيه ادخل اهله مسسستحيل
انا عند اخو عن عشرره رجال
وامي دايم تقول هذا بيتي وبينت بناتي وانا مارد بناتي ولا اعيفهم
وهو عارف اني اقدر استغني عنه واستغنى عن اي رجال

اللي قاهررني
ان اخوه هذا ماطيقه وهو مايطيقني وقليل ادب
كم مره يرسل احد لزوجي باخر الليل على شي تافهه

المشكله عمتي ام زوجي قد اشتكيت لها وقالت الحرمه تصبر
وهاووشتني قالت اصبري
عمتي يشهد الله ماتكرهني بس هي دايم منحاززه لزوج حتى لو بنتها مكاني قالت اصبرري



ياناسسسسسس كرهته وربي
وزياده على كذا مسوي نفسه زعلان

ام ثامر الهاشمي 21-10-2011 03:42 AM

الله المستعان حبيبتي موضوعك قهرني جدا لاكن مالي غير اقدم لك كم نصيحه يمكن تنفعك
الاولى صلي اخر الليل وادعي ربك انه يهديه
الثانيه اجلسي معه وكلميه يمكن يسمع لك بس باسلوب حلو لاتنفخين او تسبين >>انا ماخليت وسيله مع زوجي وللاسف من اسوء لاسوء بس حاولي يمكن زوجك يتفاعل معك<<
الثالثه قولي له انا زوجه مو خدامه احترمني اعطيك عيوني غير كذا اهلي يتفاهمون وقتها معك..
الرابعه لاتبينين له ان اولادك نقطة ضعفك انتبهي خليهم عادي عندك ان كرمتك فوق كل شي..
الخامسه:اسلوبك غيريه شكلك اهتمي فيه ملابسك كل يوم لبس ..
بعد الله سبحانه اتوقع تنفع معك .. الله يعينك ويسخره لك الله يهديه ويصلحه ويجعلك قرت عينه ولن انساك من دعواتي
اختك ام ثامر

خيـــــال 21-10-2011 03:42 AM

ميثا

انا قلت له الصدق
قال كذابه انتي تعاندين اخوي

للعلم اخوه عمره 22
ومساله اخلي عيالي مسسستحيل
قولي خلي عيونك اقول يمكن اما عيالي لالا

خيـــــال 21-10-2011 03:47 AM

ام ثامر

كل اللي قلتيه سوويته
البيت نضيف 24 ساعه حتى عياله
الاكل ماعمره اشتكى من طبخي بالعكس معجبه ويفتخر فيه
اللبس ماقصرت فيه
اهتم بنفسي وهو ملاحظ هالشي

احيان لاصار مزنوق اتقضى لي ولعيالي بفلووسي
اسدد جزء من دينه من زكاه اموالي

كل هذا وش بقى

ام ثامر الهاشمي 21-10-2011 03:51 AM

كلمي اهلك مايفع هالوضع انا بصراحه كلمت ابويه واتمنى تمرين ع مشكلتي الي كتبتها وقالي اصبري شهر اذا ماتعدل انا اتفاهم
معه وانا عن نفسي اقولها لك لو ماتعدل زوجي وربي لاارمي له الي ببطني واطلب الطلاق لاني ما اتحمل اهانات منه ..<< اعذريني تحمست بس من القهر الي عايشته ..

"ام سفيان" 21-10-2011 06:59 AM

الله يصلح ما بينكم ..
لكن فعلاً الامر لا يستحق الضرب ..!

لا اعرف شخصية زوجك ،، لكن حاولي التفاهم معه
او تركه فترة ..

لكن إياك الصمت على التعدي ..


الساعة الآن 05:49 AM.

Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©