|
حبه بدا يقل انقذوني
السلام عليكم
بدخل على طول بالموضوع انا توني املكة لي شهر ونص , من شخص محترم و متعلم وخدوم لاهله واخلاقه الكل يشكر فيه يعني رجال ولله الحمد والنعم منه ومن اطباعه هو الهدووووء جدااا هااادي لدرجة , وانا العكس احب الفرفشة والصداقات ولي معارف كثيرة هو العكس بصراحة من اول مكالمة كلامة جدا عادي مثل ( كيف الحال ؟ ش الاخبار ؟ شلونكم ) يعني ماكنه يسأل عني ومافيه كلمة حلوة الا وحده بس ( يابعد عمري ) قالها لي بثلاث مكالمات الاولى فقط ومانطول بمكالماتنا بس مره وحده باليوم وهي بالليل كانت بالاول ساعتين ونص ومع الايام بدت تقل كثير لدرجة ان البارح وصلت الى نص ساعة فقط وصار اغلب الاوقات ساكت او يعلق تعليق طويل على سالفة بحجة انه تكلم وسولف فجلست انا افتح مواضيع اشيل الملل وابادر لكن بدون جدوى وتعبت وانا اقوله كلام حلو يفرح بالكلام لكن مايقولي مثل مااقول له ارسل له رسايل ومارد الا بثلاث رسايل فقط وهو كل اعذارة بانه مشغول بالبيت مع الوالد وبره البيت ومايزورني زارني بس 3 مرات وبالفترة الاخيرة من قبل كم يوم قلت له تعال قال انا ماحب هالسؤال وماني بجاي لو بجي بقولك ودايم يقول انا مو شايفك الا بيوم الزواج والله هالشي يحز بخاطري حييل لدرجة اني ماحب احد يسألني عنه وبيني وبينكم انا مو مبسوطة معه واحس كل يوم حبه يقل مو يزيد اللي مضايقني منه ( هدوءه ، برود مشاعرة ) بس ولا الباقي كل صفاته حلوة ولله الحمد بس ماحبه تكفوون ابي نصيحتكم ومشورتكم |
الله يسهلها عليك والله ما ادري وش اقولك
ولا ودي احكم من عندي وينهضم حق احد الطرفين بس بقولك شغله حياه الملكه مو سهله زي ماكنت افكرها بالعكس والزياراات انا بقولك شي يهون عليك .. متملكه من سنه ونص وخطيبي مازارني الا مره وحده بس والحمدالله راضيه جدا جدا واقول خيره صح في البدايه كنت اتذمر ومو عاجبني لكن الان جدا مرتاحه عشان يتشوق اكثر واكثر خصوصي انه ماشافني الا في الملكه والزياره والله يسعدكم ويا بعص |
امممن يارب ويسعد انتي كذالك
لكن ياختي والله مو حاسه باني مخطوبة ومو حاسة بالحب كلش تعبت منه بس مقرره باني اقفل جوالي ولا عاد ارد على مكالماته واريح نفسي وانساه >> حدي مخوقة |
الموضوع سهل إن شاء الله ، الهدوء ميزاته أكثر من سلبياته ، وإن شاء الله تقدرين تغيرين فيه ،،
أحس أنه قريب من شخصيتي ، أنا هادئ جدا وأحس أني إذا كلمت أحد كثير أمل منه ، أفضل أني ما أكلمه إلا قليل ،، وانتي المفروض أنه يزيد حبك له إذا كان ما يكلمك كثير ، وأعتقد أنه بدري على الكلام العمييق ، ما يناسب من المكالمات الأولى أنه يعبر عن شعوره .. لكن الحل مع مثل هذي الشخصيات أنك تحاولي تشوقيه لك أكثر ، وبتشوفين اشلون يطاردك .. والله يوفقك |
مااشوف الموضوع ازمه لهدرجه ..!
مو معقوله بتخلينه كربونه مثلك .. انتِ شخصيه وهو شخصيه .. فيه ناس ماتجي الا بالعيد فقط مو قلة حب وشوق لا ..لكن طبع فيهم .. هدي من نفسك ولا تندفعي بزياده .. وازني مشاعرك .. انا لما كنت مخطوبه اول المكالمات كانت ساعتين واكثر بعدين بدت تخف وصارت ماتتعدى ربع ساعه .. نسولف ونضحك ونتطمن على بعض .. ولما يقولي مشغول اليوم اقدرموقف ولا اكدر خاطري .. الله يوفقك يارب ويسعدك وياه .. |
اخوي مبحاث تحليلك جدااا جا بالصميم وهو قالي بانه يمل بسرعة
بس حبيت تعطيني مثال كيف اشوقة لي ؟ |
لاتظلمونة
انا اللي مخوفني بالسالفة بانه يتعود على كذا ويبطل يكلمني وياخذ على برودة هذي كل الحكاية |
اقتباس:
آسف على التأخر في الرد ، لكن بالنسبة لسؤالك فأنتم _ معشر البنات _ هذي شغلتكم هههههه أقصد انتم اللي تعرفون اشلون تشوقون ، يعني مثلا تتكلمين معه في سالفة يحبها وإذا شفتي أنه استانس اقطعي السالفة فجأة كأنك انشغلتي وقولي له أكمل بعدين ، وطنشيه وشوفي كيف يشغلك بالاتصالات والرسايل .. حاولي تثيريه بس بطريقة ما يعتبرك بها جريئة خصوصا أنه توكم في البداية ، يعني تثيريه بتعمد وتسوين أنك ما تدرين ، يعني تسوين أنك بريئة .. وإذا جاكم زيارة وجلس معك ادلعي عليه وبعدين فجأة اقطعي عليه وناسته و خلي أمك أو أحد من أخوانك يجي يجلس معكم إلين يروح عشان ما يأخذ راحته ويقعد يتعذب هههههه وهكذا .. والأخوات يفيدونك أكثر في طريقة التعذيب !! لأنه ما يناسب أني أتكلم فيها .. وبالمناسبة ، ركزي على ايجابيات الهدوء في زوجك ، ترى شيء جميل أنه يكون الزواج هادئ ، تكون قراراته ما فيها استعجال وطيش ، ويكون لك وحدك ولا تخافين عليه ، وغير مؤذي ، وأشياء كثيرة .. ركزي عليها ، وترى الكلام اللي تقوليه عن زوجك الحمدلله ما يعتبر مشكلة . |
السلام عليكم اختي Maio نصيحتي لج يا اختي Maio , انـــج تقللين اتصالات ولين اتصل لا تردين ولا تكثـــرين من الكـــلام الحلو وشوفي ردة فعله , هل بيهتم او ما بيهتم هل بخاف عليج وله لا .. ولا تقولين له تعال البيت خلي اهوا يقول لج انا بجي .. او صارحيه بالموضوع وقولي له بشنو تحسين يمكن اغير من طبعه ,, مع تحياتــــــــي الـــــوردة ’’ |
اخوي مبحاث الله يعلم بانك بردت قلبي بردك لانك رجال وتفهم بطبيعة الرجل اكثر مني
اتنمى تكون متابع التطورات اللي بتحصل لاني بنفذ كلامك بالحرف الواحد |
| الساعة الآن 06:13 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©