السلام عليكم ورحمة الله وبركاتة
أتمنى بأن يكون الجميع بأتم الصحه والعافيه

اخواني / اخواتي

مشكلتي مع خطيبتي (( مملك عليها )) عباية الكتف !!
اولاً : موضوع العباية لن اتكلم فيه عن اخلاق البنات أو عن تصرفاتهم
ولا عن هي شينه أو زينه (( لن اتكلم في اعراض الناس عامة ))

ثانياً :سبب رفضي لعباية الكتف لأنها ملفته للنظر وقد تؤدي الى فتنه والعلم عند الله , وفيها تشبه بالرجال لأنها تضع على الكتف , وأنا ماني بقايل أنها حرام ولكن لا تجوز والعلم عند الله.

اتوقع كلامي واضح .... يعني لا أحد يجيني ويقولي هذي مجرد عباية أنت عليك بالمضمون
ولا أحد يجيني ويقولي فيه بنات كثير تلبس عباية على الرأس ولكن اخلاقهم سيئه , ولا أحد يجيني دام أن عباية الكتف ماهي مخصره ولا هي مزخرفه واسعه فضفاضه مافيها شي.

فـ اتوقع سبب رفضي لتلك العباية واضح ولا فيه تجريح أو اسأئه لأحـد .


خطيبتي رافضه تلك العبايه ( عباية الراس )
سبب رفضها تقولي أنها ماتعودت على عباية الراس , وأنها من صغرها تلبس عباية الكتف
اقولها طيب تعودي من الحين ألبس عباية الراس تقولي لا , ما اقدر وما احب
اقولها يابنت الحلال هذي عاده وليس طبع بالانسان صعب انه يغيره تقولي لا
انا ما اقدر اغيرها وما احب عباية الراس




طبعاً كلامنا بـ الموضوع هذا على عدة مكالمات بينا , يعني من فتره لـ فتره ينفتح هالموضوع بينا .

نرجع نفتح هالموضوع ..

المشكله انها ماهي معطيتني سبب مقنع للرفض , اقولها اقنعيني بسبب رفضك لها
تقــولي العبايه ستر وأنا عبايتي ساتره والحمدلله
اقولها أنا ما اتكلم عن ستر ولكن عباية الراس استر من الكتف لأنها تخفي قوام جسدك وبالاخص الكتوف
اقولها احب اشوفك بعباية الراس , شكلك بالنسبه لي أحلى وأجمل وأشيك , واشوفك ملكه بالدنيا وأنتي لابستها
بعد رافضه هالشي .
تقــولي شي ما يخصك ولا أنت اللي تلبسه
اقولها بس أنتي زوجتي وشريكة حياتي تهميني
تقول أدري بس ما ابي اغيرها


ونـــرجع نفتح الموضوع من جديد

تقولي عباية الراس ما راح ألبسها حتى لو أمي طلبتني هالطلب , وانا لازم اكون صريحه معك من البدايه أني ما راح ألبسها ولأني ما أبغى تكون من بداية زواجنا مشاكل
اقولها الله لا يجيب المشاكل ان شاءالله
تقولي كذا وحده اعرفها تطلقت بسبب هالموضوع
اقولها ان شاءالله حنا مو مثلهم ان شاءالله ينحل هالموضوع بتراضي منا حنا الاثنين
تقولي انا علمتك بالصراحه
واقولها أنا هذا اللي عندي هالعباية ماتعجبني وبينت لها اسباب رفضي لها , أذا انتي ماتبيني اصير سعيد معك سوي اللي براسك واللي تشوفيه صح.
وتقولي ليش ما سألت عني من بدري عن موضوع العبايه.
وتقولي عباية الكتف عمرها ما كانت دليل على اخلاق البنت
اقولها أدري وانا ما عندي شك فيكي ولا جزء من واحد بالميه




طبـــــعاً تعرفون مثل هالموضوع ومايدور حوله من نقاش , انا وهي نتكلم فيه من فتره لـ فتره , وكلن على رأيه.


والله يا اخوان ويا اخوات .. الله العالم أني ماقصرت معها بشي ( طبعاً بأمور كثيره )
ودائماً احسسها بأني زوجها اللي يخاف عليها ويغار عليها .. بالطيب والحنان والحب والرومانسيه
واحيان اخذ رائيها بأمور تخص سكنا , وش تبي وش ماتبين .. من بويه وأثاث .

طبعاً لا افراط ولا تفريط
أشــد وأرخـــي

وموضوع العبايه طلبتها طلبه وتمني وليس بأمر أو اجبار أو اغصاب ( هو من حقي أني أمرها فيها )

جيتها بهالموضوع من جميع النواحي والأتجاهات :
بالذوق كلمتها , بحنيه عاملتها , بطيبه اوضح وجهة نظري , ابين لها غيرتي عليها , أوضح لها بأن فيها شكوك والعلم عند الله فـ أبعدي عن هالشكوك , اقولها تلفت نظري هـ العبايه .
ماكـــو فايده

وش الحــــل يا جماعه
للعلم فقط : -
خطيبتي يعلم الله انها طيبه وحبيبه ومسيكينه وما شاءالله عليها تخاف الله تصوم اثنين وخميس احياناً تصلي الوتر ( يعني البنت ما عليها كلام )

لكن سبب رفضها وتعلقها بعباية الكتف شي غريب , وكلامها عن زميلاتها اللي تطلقو بـ هالشي اغرب لأنها عادتو كذا مره.

وصراحه أنا بديت اخذ الموضوع عناد , احيان افكر اني اقولها كلمه وحده تبيني وأنتي بـ عباية راس حياك الله , وأذا ما تبين الله يستر عليكي , بس اللي رادني بتفكيري بفكرة الطلاق أهلها وابوها ونعم الرجل ( خايف على مشاعر أهلها ) , وللأمانه البنت انا ابيها .
(( طبعاً فكرة الطلاق لم تأتي من فراغ لكن من كلامها لي ))

فـ أفيدوني بحل الله يجزاكم خير , والمعذره على الأطاله