متردده اكمل والا لا
 

السسسلام عليكم ورحمه الله وبركاته

ببدا بالسالفه من اول شيء ..

عمري 24 تقريبا لي 5شهور مخطوبه ومن واحد يقرب لنا وعمره اتوقع 26

الولد كنت متردده فيه لانه يقرب لي وفيه مشاكل بين اقاربنا .. وماكنت متقبلته ..

بس قالوا لي احد تعرفينه احسن من برى والاقارب ماعليك منهم ..

وذا اللفتره شاء الله وملكنا بس من عقب الملكه احس ترددي زاد انا من البدايه مو متقبلته
وهو الله يهديه ماقال الا كلمتين ولبسني الشبكه وطلع على طول يقول انه يستحي مع ان اهلي كانوا متحمسين ومافيه احد غريب بس اهله واهلي ..


علمآ اني من انخطبت وانا اصلي الاستخاره لحد اللحين بس مافيه ذيك الراحه والاقتناع التام له .. مع انو محد سبه لي ابد وهذا اللي مخليني اكمل لحد اللحين ..

يقولون خلوق .. يصلي .. هادى .. بس يدخن واحسه شخصيته سلبيه شوي

احس اني تعبتتت مو قادرره ارد على مكالماته واتضايق ولا اتخيله زوجي .. مو لعيب فيه بس لتردد مني ..

اخاف اكمل معه واظلمه واظلم نفسي لاني ادري انو القبول والاقتناع من شروط الزواج الناجح
واخاف انسحب واتحسف على شغله الصلاه والاخلاق ..

مدري شعوري ذا طبيعي والا استخير ويكفي وان شاء الله ربي يعوضه احسن مني ويعوضني خير

أختى :
كثيرا من هم فى مثل حالتك فى بداية فترة الخطوبة ... يشعرون بمثل هذه المشاعر من القلق والحيرة وتضخيم الأخطاء .. والعيوب ..إلخ

الحل الوحيد فى رأيى لقطع الشك باليقين ... هو الإستخارة والتقرب إلى الله عزوجل بالصلاة والدعاء الكثير ...
حتى يتبين لك الأمر جيدا ...
وأحذرى من التسرع بإتخاذ القرار .. والسماح للمحيطين بك ِ بالتأثير على قرارك ... فأنت فى هذه الفترة لماتمرين به من حيرة قد تكونى فى أضعف حالاتك ...
كونى مع الله ... وإن شاء الله يبين لك الصح من الخطأ ...
هذه خلاصة تجربتى الأليمة ... فقد مررت بنفس التجربة وفضلت الإنسحاب ...
أقدمها لك على طبق من ذهب أتمنى ان تستفيدى من تجربتى وكلامى...
تحياتى,,
أخوكمm.s

صبااح الخير

استخيري ثم استخيري ثم استخيري بعدين عطي قرارك الاخير

لان الزوااج اولا القبول ثم الود ثم الاحترام ثم الحب اذا اختل القبول اختلت باقي الشرووط من ود واحترام وحب

اذا ماكنتي مرتاحه مارايح تنامين عدل وتحسين بضيقه وخنقه وتحسين ان الحيااه وقفت محلها

لا تستعجلين بالزواج قرري وانتي بوقت الملكه لان اذا دخلتي عالم الزوجيه وانتي ماعندك قبوله له رايحه تظلمين نفسك وتظلمينه ورايحه تشووفين كل الي يسوويه خطاااء ولا تتقبلين منه حتى النصاايح منه

انا كنت في نفس حالتك لاكن قلت هذا من الشيطان يوسوس لي وهو بالاصل مافيه قبوول للطرف الثااني لاكن اكملت مشواري بالزواج احترام للبنت واهلها مابي اجرحها بانفصالي لها لاكن مانفعني المجامل

الى الان وانا اعيش في صراع داخلي مع نفسي ولا اعرف انام جنبها

واحاول اني اتقبلها لاكن النفس رافضه رفض تاام بعض الاحياان مايجين قبول اني اجاامعها

فانا اقولك عن واقع تجربه لا تظلمي نفسك الحيااه الزوجيه رااحه وقبووول وحب وفله لاكن لا تحرمي نفسك من هذا من شان ماتزعلي احد وتعيشين دوامة لوم النفس

وماعليك من النااس وكلامهم لانك انتي الي بتعيشين هذي الحياااه وانتي الي بتفرحين وانتي الي بتتالمين يعني خلي قرارك باقتناع داخلي من نفسك

الله يوفقك يارب ويسعدك ويستر عليك ويكتب الي لك فيه خير بالدنيا والاخره

الله يوفقك

بس سؤال ليش ما رفضتي قبل الملكه

احسها صعبه الوحده تملك ما تكمل شهر و تتطلق

عموما اترك الساحة لغيري يبدي نصيحته سبق تكلمت و زعلو الاعضاء

الله يوفقك و يختار لك الخير

m.s & الوزن الثقيل
بصصدق تجربتكم ساعدتني على توضيح الصوره شوي ..
واحس تخيلت نفسي في كل الردين ..
ان شاء الله ربي يعوضني ويعوضه خير
والله لايحرمكم الاجر وينولكم زي اللي تبون بالدنيا والاخره ..


قلبي حنون
فيه شيء داخلي احس مو مريحني بس وشو بالضبط مو عآرفه
وآمييين يارب .. وربي يسسعدك



غنيه باخلاقي
الله يكتب لي وله الخيره .. ربي يجزاك كل الخير


حنونه
تقدرين تقولين مكتوب لي
لو ادري بيصير لي كذا ماكان ملكت ..



سيده الموقف
ردك استوقفني كثثير ومع اني كنت متردده انو انزل الموضوع
بس صددق التجارب والردود اللي كتبتوها احسها وآستني كثثير .. وع الاقل صرت متاكده من شعوري اللحين ..


وربي يوفقكم ويجزاكم كل الخير ووييسر لي ماآهمني

معليه اسمحي لي اختي

انتي تقولي من قبل الملكه ما حسيتي بذيك الراحه

ليش كملتي و ورطتي نفسك و الآن اذا انسحبتي بتحملي لقب مطلقه

ما كان استعجلتي مدام الاستخاره بينت معاك عدم الراحه

عموما الله يعينك و اذا قررتي الطلاق الله يصبرك و يعوضك