|
والدي حطمني(المستجدات بالرد 50)
السلام عليكم ورحمة الله وبركاته أنا من المتابعين لهذا المنتدى من مدة بس الان قررت الاشتراك وكتابة معاناتي اتمنى ان تعتبروني كاخت لكم . أدخل في الموضوع أنا متزوجه تقريبا بكمل سنة وعمري 23 سنة وريلي ولد عمي وعمره 29 المهم انا بشرح لكم ليش أخترت هذا العنوان والدي ( مع أن هذا المصطلح لم أعرف معناه ولا يوم في حياتي ) رجل غني عنده شركات والملايين ولكن للأسف لم يعرف كيف يأسس أسره صحيحة والدي طلق أمي ( هي مجرد اسم تكون أمي ) وعمري 4 سنوات من ذلك اليوم لم أعرف شي عنها ولم تحاول أن تتواصل معي ولكن جدتي والدة والدي هي من ربتني طبعا انا عشت في قصر فيه العشرات من الأجنحة والغرف ( يا ريت هذا القصر عبارة عن غرفة واحده يمكن كانت فيه حياة ) طبعا اللي كانت مسؤلة عني هي الخدامة مثل لبسي واكلي كل شي يخصني وجدتي تشرف عليها نسيت أقولكم زوجة والدي الله يخليها تعيش في هذه المقبرة هي وأولادها هم أكبر مني بكثير لكنهم طيبين حتى أمهم ساعات أحسدهم عليها المهم وأنا صغيرة لم أفكر في شي أهم شي كان عندي لعب وطلعات لم أسال ليش والدي طلق أمي وهي فينها أو ليش أبوي ما يحبني أختلط في أحد لدرجه انه دخلني مدارس خاصة وكل ما اساله فين أمي يجلس يصارخ عليا يقولي انسيها أعتبريها ماتتتتتتتتتتتتتتتتتتتتتتتتت أنا موفرلج كل شي وعشان ينسيني يسفرني وياه المهم أني انسى الموضوع لغاية ما وصلت 16 سنة صاروا خواتي وأخواني يتزوجون يعني يطلعون من هذي المقبرة لغاية ما قررت أمهم تسكن عندهم وأنااااااااااااااا بروحي حاولت تاخذني بس أبوي منعها لدرجة أنه هددها بطلاق طبعا المسكينة سكتت وصارت كل يوم تيجي تزورني وجدتي رفضت تطلع عند أعمامي وقالت هذه البنت أمانه عندي لغاية ما تزوج أنا في هذه الفتره تعرفت شلت بنات وللأسف بديت أطلع وياهم وبديت أسهر معاهم يعني في بيوتهم ساعات للفجر وساعات أبات عندهم طبعا ماحد يسالني وجدتي المسكينه مب عارفه بشي والاب المحترم أهم حاجه عنده أول شهر يتصل عشان يتاكد أنه نزل في حسابي مصروفي اللي يتجاوز ساعات 10000 واذا جاء البيت ما أحب أشوفه هو علاقاته أوكيه بأعمامي وبأهله بس أنا ما أحبه وفي هذه الفترة بديت انخطب بس هو كان يرفض يقول بعدها صغيره أكثر شي من عيال عمي لغاية ما جاء يوم أخوي الكبير جاء البيت يبغ يشوفني وما حصلني وانصدم يوم خبره سواق دايما جذي اسهر برع هو جن جنونه وجلس يتصل عليا لغاية ما رديت البيت وضربني طبعا أنا سبيته وسبيت أبوي وأمي كلهم كرهتهم ( بس هو وايد طيب وملتزم بس أبوي ما رضى أني أعيش وياه أبوي خايف أني أروح لامي ) أخوي كلم أبوي وتهاوش وياه وبعدها قرر الوالد المحترم تزويجي من ولد عمي ( المسكين ضحيه ) لانه هو كان اخر واحد يخطبني فكلمه ابوي وانهى الموضوع وكأنه الموضوع ما يخصني في هذه الفترة تعبت الغاليه جدتي وتوفت ( انتهت معاها حياتي ) خسرتها في لحظه كنت محتاجتها تكون وياي ولكن راحت وخلتني وتزوجت ( بس ما أقدر أكمل اسمحولي أحس اعصابي تعبت وتذكرت أشياء ما أحب أتذكرها سامحوووووووووووني على الاطاله . |
أختي الكريمة لجين كان الله في عونك و صدقيني أنا و جميع أخواني و أخواتي هنا في هذا المنتدى عدنا رغبة المساعدة متي حسيتي أنك تبين تكملين و عندك استفساراتك ....أن كونت تصور عن وضعك لكن في انتظار اكمالك لقصتك و لاتيأسي!
|
كملي قصتك بانتظارك ..
|
اتمنى ان تتحملوني وأشكر اللي ردوا
تدرون عندي الرغبة في تغيير ذاتي بس داخلي حقد وكره مب قادره يخليني أتحرك من مكاني مع أن علاقتي بخواتي وأخواني قمة في الاحترام وعمري ما غلطت على أحد فيهم ( لاني أحس أصلا في داخلهم نوع من العطف ) وهم بعد ما يغلطون عليا وخاصة انه جدتي ( الله يرحمها ) كانت تزعل من اللي يزعلني بس انا ما حاولت أتقرب لهم يعني علاقتي فيهم سطحية وخاصة خواتي يوم اسالهم عن اللي تسمى أمي يسكتون دايمن عندي احساس أنهم يعرفون أشياء عنها بس يخافون من أبوي ( أبوي انسان صارم بس يحبنا بس أنا لا عمره ما رفض لأحد فيهم طلب حتى أمهم الله يخليها ساعات يعصب عليها أبوي بالعكس يوم أسالها زعلتي ترد هذا طبعه بس داخله شي ثاني هو يحب سفر واايد ) ساعات يمر أسبوع او أكثر ما أشوفه بس مستحيل ما يتصل ويسال الخدامه عني أو جدتي بس في خاطري يقوووووووووووووولي ليش طلقها أو هي ليش ما تسال وين أهلها ليش ما يسالون عني تدرون مره سالت جدتي حلفتها تجاوبني ردت ( أبوج وضعه الاجتماعي ما خلاه يخلي أمج وأشياء ثاني صارت بينهم منعتهم أنهم يستمرون فأمج اختارت الطلاق جلست أحلفها طب فينها ليش ما تسال ردت وقالت انسيها تخيلوووووووووووووووا بكل هدوءءءءءءء انسيها بس أنا مب قارده ) عندي صديقات بس مب وااايد بس للأسف مب مرتاحه وياهم بس احاول أجاملهم لاني لو قطعت علاقتي فيهم أحس أني راح اكون وحييده وأنا مب من النوع اللي أتعرف على أحد بسرعه . تصدقون عندنا في المقبرة هذي خدم وايد وسواقين وعلاقتي فيهم اوكيه بس مب مرتاحتلهم حتى خدامتي الخاصة أشوفها في مواقف مب اوكيه بس أقول برايها لانها طيبه وياي ما أبغي أبوي يطره اذا درا فيها. ريلي انسان طييييييييب وملتزم بس علاقتنا شبه منتهيه وانا سبب . تعبت من هذي الحياة |
آممم ما اعرف شو اقولج !!
بس الله يكون في هونج فديتج ، آممم بما انه زوجج طييب وياج حاولي تكسبينه خلي يكون صديق مش زوج بشوفين حياتج تكون احسن ان شاء الله بما انج تقولين انج وحيده قربي زووجج منج هو الوحيد اللي بدوملج وان شاء الله ربج بـ يرزقج بـ الذريه الصالحه وبتملي حياتج :) الله يوفقج ويسعدج يآرب |
طيب خلينا نبدأ من النهاية ليش أنتي السبب في أن علاقتك غير جيدة مع زوجتك؟؟ و أيش تقصدين بكلمة منتهية؟
|
ابدي حياه جديده مع زوجك وانسي كل شي
وكل زوجك كل اهتمامك ودام رحتي من المقبره اللي كنتي فيه ليه تفكرين ترجعين لها دام زوجك طيب حبيه واحتويه |
احتوي زوجك وصدقيني راح يحتويك حااااسه فيك بس نصيحه لاتطيرين اللي بيدك على شيء أساسآ ماتقدرين توصلين له خلي تقربي من زوجك وخليه يعوضك الحنان وأعرف كثييير مشابهين لقصتك تدرين مين ساعدهم على لقى أمهاتهم رجالهم بعد ماتزوجو لاتخربين حياتك يمكن أمك كونت أسره وعيال وعاشت حياتها هذا مو معناه ناسيتك لاء بس انتي كمان لاترجعين للوراء على حساب مستقبلك نصيحه أكسبي زوجك وأبدأي بالبحث بكل هدوء وعندي إحساس راح تلقين طرف للمو ضوع حتى لو من حريم أعمامك بس بطريقه ذكيه يمكن يخافون يقولون لك ويوصل كلامهم عند أبوك وخبرينا جديدك وعلى فكره بدون إحراج بس انتي من أي دوله يمكن أقدر أساعدك
|
الان مشكلتك هي والدتك..ودك تعرفين من هي وليش اختفت وتركتك وأين هي الان..
طيب بما ان والدك طلق امك وانتي بعمر4سنوات,...اكيد تذكرين مواقف ماتذكرين اشياء حصلت قبل الطلاق يعني موقف...او تذكرين شي عن امك شكلها مثلا..حضنها.هل كنتي متعلقه بها.هل تاثرتي بغيابها ...اختي احتمال كبير...ان امك اجنبيه..يعني من بلد آخر واعتقد كانت زوجة والدك الثانيه..كثير اطفال ضحايا هذا الزواج ..قبل فتره ابن خالتي انفصل عن زوجته الاجنبيه وسافرت بلدها تاركه وراها 3 اطفال ولدين وبنت عمرها 5 سنوات.. الزوج يطلق زوجته الي من غير بلده وطبعا الزوجه تسافر بلا رجعه...وتترك اطفالها ...وبما انها من بلد اخر بعيد صعب عليها تشوفهم مره ثانيه اسالي ام زوجك عنها...او اسالي اي احد غير اهلك القريبين منك...اكيد يعرفوا تفاصيل القصه اسالي زوجك...يمكن يكون عارف شي.. وامك ان كانت عايشه لاتصدقين انها تركتك من بمزاجها اكيد تفكر فيك مستحيل تنساك لكن مؤكد ان ظروفها لاتسمح لها بالتواصل معك..خصوصا لو كانت بلد آخر..هي اكيد بتفكر فيك مثل ماانتي تفكرين فيها غلطت اهلك انهم ماقالوا لك انها توفت حتى ترتاحي من التفكيروالهم.. هم على بالهم انك ماراح تهتمين لانها تركتك صغيره..بس على الاقل يخبرونك وين مكانها ايش سبب طلاقها ليش ابوك مايخليها تزورك وتشوفك .ودام انك مستقره في حياتك ومع زوجك..واشكري الله لان عندك اخوان واخوات..ولاتوصفين منزلكم بالمقبره..هل تتوقعين ان كنتي في منزل غرفه واحده بتكون حياتك غير؟ |
أشكركم جميعا أول شي أنا من الامارات وأمي بعد ولكن أي تفاصيل ثانية عنها ما أعرفها بالعكس أذكر اني ما تأثرت وااايد لاني كنت متعلقة واااايد بيدتي بس اذكر موقف وااحد لها مع أبوي مستحيييييييييييييل انساه شفته مره يضربها مثل المجنون ليش مادري بس أول ما شافني حضني وجلس يبكي وهي مبتسمه هذا الموقف لغاية لحين مب قادره انساه. طبعا عقب ما تزوجت خاولت مع ريلي في البدايه كان يقول الموضوع ما يخصني وانساه أحسن لغاية مره رد من الدوام وحصلني ويا امه أترجاها تجاوبني هو انصدم لانه حصل أمه بعد تبكي فسحبني ودخلني الحجره وجلس يترجاني اني انسى الموضوع وجلس يقولي لو عرفتي تراج راح تكرهينها اكثر ولي عرفته بعد منه انه أهلها ما يقدرون يتواصلون وياي بعد اللي سوته أمي ولكن مركز أبوي كبير قدر يمنعهم حتى من تليفون وجلس يقولي أنه أبوي ما ظلمها أبدا تعرفون بعد ما سمعت هذا الكلام حسيت بشعور غريب ومن بعدها ما فتحت الموضوع ( حتى هو حلفني ما أخبر أبوي ) |
| الساعة الآن 12:06 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©