|
زوجتي وأهلها حرموني رؤية أبني(حُلت و لله الحمد)
السلام عليكم ورحمة الله وبركاته
كل عام وانتم بخير لقد مضت 4 أشهر لم ارى فيها ابني الصغير ابني البكر اول اطفالي لم أره يحبو على الأرض ولم ارى أسنانه وهي تشق ولم ارى ابتسامته الجميله التي اعتدت ان اراها قبل فترة زوجتي خرجت من بيتي الى بيت اهلها طلبت الإنفصال مع اني لم اقصر معها بما استطيع لكنها تطلب ما يفوق طاقاتي وما لا استطيع توفيره لها ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــ سأحكي لكم وضعنا واتمنى ان ترشدوني الى الحل الأمثل فكما سمعت ان هنا اعضاء يملكون الحكمة للنصح والإرشاد مضى على زواجنا 2 سنتين فقط تقريباً اول سنة زواج كانت رافضة لفكرة الحمل لكن ماذا افعل غلطة وقدر الله لها ان تحمل هل نجهضه والعياذ بالله ؟ لا توجد مشاكل بيننا الا انها تنظر وتقارن بيننا وبين اختها وزوجها انا موظف بسيط راتبي بالقوة يكفي مصاريف البيت + اجار الشقة + قسط السيارة + قسط البنك = الراتب طار كله تريد اغلى الشنط وتريد ان تشتري ما تشاء وان قلت لا بدأت تبحث في الحساب ووين يروح راتبك ولد ابني الصغير واحببته حباً جماً احببته اكثر من نفسي والله 4 اشهر لم اره الا مره واحده حتى انه بكى ولا يعرفني وانا احتضنه بالقوة وهو يبكي لا يريدني واخذه مني ابوها ورجعه عند الحريم وجلسنا نتفاهم بالمجلس لعلنا نصل الى حل قد يكون الموضوع غير مرتب لكن والله من هول ما اواجه ومن الألم في قلبي المفطور على ولدي بدأت المشكله وهي تافهه جداً جداً بنظري لكن بنظرها هي مصيبة كبرى تريد الدخول في جمعية مدتها سنه وتريد ان تستلم هذه الجمعية ونسافر للخارج ؟؟ سبحان الله قلت لها زوجك يصارع الأمرين في سبيل تجزئة راتبه وانتي تريدين السفر لا يبقى من راتبي الا بضع مئات من الريالات قد تكفينا وقد لا تكفي استيقظ بركانها وبدات بالصياح والنواح وبدات بتهدأتها ان الشركة ستصرف مكافأه للموظفين فأصبري فقط قمت بتهدات بركانها الغضبان ولدت اختها ولأن اختها متزوجه من رجل مقتدر مادياً فعل العجائب جهز المنزل بالكامل للزوار واغلى المأكولات واشهاها وانا نفسي رأيت القمامه وقطط الشوارع تختار منها ما تشاء وما تأكله القطط اكثر مما يأكله البشر وعندما عدنا بدأت بالإذلالي العيشه معاك ذل اختي سوت وسوت وسوت وانت ما سويت لولدك شئ كنت هادئ جداً معها حتى وصلنا وحين هممنا بالنوم اقتربت منها وقلت لها حبيبتي اهم شئ ننام مرتاحين وما نمد يدينا لأحد وولدنا نوفر له كل اللي يحتاجه قاطعتني اووووف ولدنا ولدنا انت بتحرمنا من متعة الحياة علشان ولدنا ماحد بيموت من الجوع ؟؟؟ هل هذا رد ؟ قلت لها انتي واهلك رضيتوا بالعيشه هذي وانا قلت لكم راتبي كم ووضعي كيف وابوك بلسانه قال نشتري رجال فأخطأت بأكبر كلمة يحتملها رجل قالت نشتري رجال وانت مانت رجال ؟؟؟؟ :29: قلت لها هذا انا وهذي عيشتي تبين اهلا وسهلا ما تبين الله معاك والله يستر عليك خرجت للعمل اليوم الثاني وعندما عدت لم اجدها بالمنزل فتحت الدواليب لايوجد ملابس خرجت لبيت اهلها كلمت والدها قال لي انني انا الذي طردتها وانا اللي قلت لها مابي اشوفك لما ارجع من الدوام ؟؟ شرحت له ما قلت بالحرف الواحد قال لا انت طردتها وماله داعي تعذب البنت معاك تبي مهرك نرده لك ولاتذل بنتنا ما ادري صراحه وش قالت لهم وش عذبتها فيه ؟ عمري ما مديت يدي عليها في اصعب المواقف وبأكبر اخطائها معي انتظرت اسبوع واخذت والدي ومررنا عليهم بعد ان اخذنا موعد مع ابوها وشرحنا الوضع كامل لكن كان ردها انا ما اقدر استحمل العيشه معاك حاولنا الوصول الى حل وسط مافيه تبي تعيش عيشة اختها وهذا شئ مستحيل اوفره لها حالياً وانا اضافة الى كل هذه المصاريف اكمل دراستي في جامعة الملك عبدالعزيز انتساب وقالت اترك الدراسه مالها فايده واشتغل بالتجاره مثل زوج اختي كل ما قلنا شئ قالت سوي مثل زوج اختي انا لله وانا اليه راجعون قالت طلقني ولك وعد تشوف ولدك متى ما تبي فكرت بولدي وانا مابيه يعيش بعيد عني ما اقدر اعيش دونه ابداً والله ما اقدر احبه يا ناس افهموني مستعد ابيع ثوبي اللي انا لابسه ولا انحرم منه قلت لها اذكري الله وان شاء الله الامور تنحل ووجدت عمل مسائي براتب 3 الاف ريال اضافة لراتبي وعادت الى البيت فترة شهرين فقط ثم بدات المشاكل من جديد اننا ما نشوفك وانت كل وقت شغل الصبح والعصر شغل وما ترجع الا الساعه 10 بالليل طيب وش اسوي ؟؟ كثير بيقولون ياخي انت حنون وشخصيتك ضعيفه لا والله لولا ان الله قدر ان يكون بيننا طفل لطلقتها من زماااااان عادت لبيت اهلها ونحن بالطريق قلت لها ولدي قالت بتشوفه متى ما تبي قلت لها وعد قالت والله وعد ومن يومها ما شفت ولدي الا مره واحده حاولت معاها ما قدرت ابيها ترجع ما قدرت في بالها مستوى معيشه تبي توصل له وانا ما اقدر اوفره لها قلت لها ابي اشوف ولدي احنا الى الان متزوجين قالت لو تتصل مره ثانيه ماراح ارد وما عندك ولد هذا ولدي انا انت تقدر تتزوج ثانيه وتجيب بداله 10 اولاد طيب انا مابي 10 اولاد ولا 100 ولد ابي ولدي بس والله احس بموت 4 شهور والله كل يومين او 3 احلم فيه واصحى من النوم ما اقدر ارجع انام احياننا الفجر ادعي عليها انها تموت والحضانة تصير لي واخذ ولدي كرهتها ماعاد اطيقها لانها لوت ذراعي بحبي لولدي كرهتها لانها حرمتني منه ولدي ماعاد يعرفني ياناس والله حرام فكرت بالطلاق لانه بعد الطلاق بيحكمون لي اني اشوفه يوم او يومين بالاسبوع بس هل ولدي راح يتقبلني بعد ما نساني ؟؟ احد عنده علم بخصوص المحاكم وحق الحضانه هل اقدر اخلي ولدي ينام عندي وعند اهلي ؟؟ يوم بالأسبوع ماعاد فيه امل للرجعه على ما اعتقد افيدوني جزاكم الله خير ملاحظة ابوها غير موافق على ما يحصل من ابنته لكنه ضعيف شخصية وام زوجتي هي الآمر والناهي في بيتهم واتوقع والله اعلم انها تسير زوجتي على هواها لاني كلما حصلت مشكله مع زوجتي انظر الى كاشف الرقم اجد رقم بيت اهلها اخر مكالمه والله اعلم مجرد استنتاج يحتمل الخطأ ويحتمل الصواب واي سؤال او استفسار انا حاضر الأهم ان ولدي يرجع لي واشوفه كل يوم جزاكم الله خير |
نصيحتي راح تكون قويه ولكن ان كان ماقلته صحيح فأنصحك
اخوي العين الحمرا زينه مع بعض الناس انت كنت طيب فتره طويله خيرها بين امرين ياترجع وتتعوذ من ابليس ولا فيه تفاهم ثاني رح ياخوي للمحاكم حنا مو عايشين بغابه وبعدين وين الرجال ببيت اهل زوجتك ليه مالهم صوت !! يتدخلون وولدك على الاقل يكون معك يوم بالاسبوع شوف على ما اضن ان المحاوله هي انها تلوي ذراعك بالولد ولكن صدقني حياتك مع امرأه ثانيه حتى لو ماكانت الحضانه معك اريح لك ولولدك ولا تخاف الولد يكبر ويفهم عالعموم الان تفاهم مع الرجال بعائلة زوجتك اذا ماتجاوبو معك روح للمحاكم وراح يجون هم عند بيتك ويطلبون التفاهم اخر زمن !! |
اولا ربي يعنك ويجمعك بولدك عن قريب
فعلا لازم تاخدو موقف لان من حقك تشوف ولدك خذ احد كبير وروحو تفاهمو مع والدها على حل لانو هي شايفتك حنون صارت تقول انك مارح تقدر تسوي شي الله يعينك |
والله انا اشوف انك تحاول واذا قالو طلق قل ان شاءالله بس لاتطلق خلها ثمـ اسحب عليها شهر او شهرين بترجع تحن لك وبتمـل مـن الجلسه بدونك انت اثقل عليها وقوي قلبك شوي تحمـل فراق ولدك شهر او شهرين واظنها بترجع لاتبيّن ان ودك فيها والولد .. سبب الطلاق مـو مـقنع ابداا بالذات انهمـ عارفين وضعك واذا شفت السالفه طولت روح لواحد كبير مـن عائلتها جدها او عمـها الكبير وقوله كل شي ربي يعينك |
اقتباس:
المحكمة جدياً افكر فيها الان الرجال في بيت اهل زوجتي يوجد والدها فقط وشخصيته ضعيفه كل ما تكلمنا معاه قال بروح اسألها القرار لها وهذا هو موالنا معاهم اخوها في الثانويه ولا ينفع الحديث معاه فمازال صغيراً ولدي ماراح يضيع وبيفهم لما يكبر هنا المشكله انا ما اتحمل اعيش دونه فما بالك يكبر وهو بعيد عن عيني ما اتحمل الفكره بالأساس احبه حب ما اقدر اوصفه ابداً وابن آدم مفطور على الرحمة فما بالك بطفلك ياخي والله فيه يوم احسست بصداع في رأسي ما ادري كيف بدأ لكن في اليوم التالي علمت انه سقط على رأسه والله احس بإحساسه اسناني تؤلمني وعلمت ان اسنانه تشق وتزعجه والله احس فيه وهو بعيد لكني احتاجه قريب مني ياخي الكريم شكراً لردك وشكرا لمرورك |
اقتباس:
اخذنا موقف ولما نروح لأهلها كل شوي ابوها يقول نسألها هي صاحبة القرار والله طفشت ولا ودي اغلط على ابوها واقوله ياخي انت ماعندك قرار ما تبي تحق الحق وحقي ان اراهـ لكن لما يقولون تعالوا بكره تشوفونه او تعالوا بكره خذوه نجد ان البيت شبه مهجور لا حياة ولا صوت ونتصل ما يردون |
اقتباس:
انا لي 4 شهور وانا احاول اتصبر وهي عند اهلها ولا شفت الولد الا مره وحده بس انا والله مقوي قلبي لكن فيه قدرة عند البشر وتختلف من شخص الى شخص انا ما يمر يومين الا احس بدمي يفور على هالولد ابي اشوفه بس اقسى شوي وانام واحلم فيه جدها الله يعينه من مستشفى الى مستشفى الله يشافيه ويعافيه عمها ما اعتقد بيأثر بشي لان ابوها اكبر واحد بين اخوانه والله يعين شكرا لردك اخي الكريم |
أخوي
ماحد له حق يحرمك من ولدك ، عندك المحاكم و غصب عنهم تشوف ولدك و معليه ، المرأة اللي بتفكير زوجتك راح تتعبك طووووووووووووووول حياتك أخوي ، زوج أختي مليونير ماشاء الله و رجل أعمال لكن عمري ما قارنت بينه و بين زوجي ، مع إنه الشيطان يحاول يدخل من هنا و هنا لكن المرأة العاقلة هي اللي توقف مع زوجها و تقدر ظروفه مو اللي تكون هي و الظروف ضد زوجها مو قالوا لك طلقها و يرجعوا لك المهر و تشوف ولدك ؟ خلاص ، اعمل لهم اللي يبغوه و خليها تشوف نصيبها و اللي عيونه جوعانة ما راح يشبع أبدا و ولدك ما راح يكرهك إذا كبر ، و الله يرده لك |
اقتباس:
سو زياره مره اخيره لأبوها وقل البنت ماتهمني ابي الولد نتفق على يوم بالاسبوع يجي عندي ومن بكرا اجيبه لكم بنفس الوقت وضح عدم اهتمامك بالبنت وانك جاي عشان الولد ولا تخاف انك تكون صريح بالموضوع قل ياعم انا ولدي باخذه يوم او يومين بالاسبوع هذا الكلام بيصير ولكن الطريقه بيدك انت اذا منعتوني عن ولدي الحمد لله فيه محاكم تجيب لي حقي ولكن انا ماودي الامور توصل كذا وصدقني جمل مثل كن قويا تحترم وان لم تكن ذئبا اكلتك الذئاب هالنوعيه من الامثال صحيحه جدا خصوصا بالزمن هذا |
تعاطفت معك أخي الكريم وأكتب لك ودموعي تسبق يدي في التعبير كان الله في عونك ويجمعك بطفلك دائما وأبدا والله يهدي زوجتك
أظن أن زوجتك صغيرة لهذا لا تقدر مصلحتها وعواقب الأمور أرى أن تتحدث مع والدها للمرة الأخيرة وبدون آستجداء بأنك تريد إرجاع زوجتك وإن رفض وقال لك أنها تريد الطلاق قل له أنك ستمرعليه غدا لتسمعها منها مباشرة وأنك إن سمعتها منها فستطلقها حالا لأنك لن تعيش مع واحدة لن تريدك أتوقع أنها ستلين وتعرف أنك جدي في كلامك الله يهديها ويجمع شملكم تدري أخي الدنيا فيها من الغرائب مايجعلنا عاجزين عن فهمها ففي الوقت الذي أدعو الله صبحا و مساء سرا وجهارا ليحنن قلب طليقي ليطلب رؤية صغاره أجدك تقول لا أصبر على ولدي إنسانيتك ستغلب إن شاء الله وتأكد أن دعائي من الآن سيكون مقرون بالدعاء لك أن يرد لك ولدك عاجلا |
| الساعة الآن 09:25 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©