أشعر انه تزوجني فقط من أجل الانجاب
 

السلام عليكم و رحمة الله و بركاته

بالنسبة لموضوعي يمكن البعض راح يشوفه بسيط و يمكن البعض الاخر بيقول انه مشكلة
فانا عرست من شهر تقريبا و زوجي كان متزوج من قبل بس الله ما عطاه عيال مع زوجته الاولية
و في فترة خطوبتنا كان اكبره همه اليهال بسمي ولدي كذا و بسمي بنتي كذا طبعا يقول ان شاء الله
لكن انا من خلال كلامه حسيت ان سببه الاول في زواجه الثاني هو العيال انسان شغوف جدا انه يكون اب
يموت على عيال اخوانه يسال عنهم بالتلفون اكثر ما يسال عني..ووو المهم في خلال هالاسبوع اخير من هذا الشهر قام تظهر على اعراض ما قبل الدورة الشهرية و انتو بكرامة بس هو يقول لا يمكن هالاعراض هي اعراض ما قبل الحمل و كل يوم على هذا الموال يقول ان شاء الله تكون اعراض اللي في بالي و اليوم الصبح و هو في دوامه اتصلت فيه و قلت له فلان الاعراض اللي فيني مو مال اللي في بالك لان الدورة يتني :( سكت شوي و قالي اوكي يله مع السلامة الحين....:( مع العلم اني انا ايضا حلمي مثل حلم اي بنت اني اكون ام ان شاء الله
بس هل انتو تشوفو ان زوجي تزوجني بس عشان اييب له عيال ولا تزوجني لانه حبني مثل ما يقول
ترى انقهر يوم احس انه يعتبرني وسيلة للانجاب بس مثل اي حيوان والله احس بالقهر :(((((

الله يهديك يا اختي ما تخلي هالتفكير يسيطر عليك تري كل الرجال يحبو العيال و يسمونهم بعد قبل لا يتزوجون
طيب انت معاملته لك خارج كلامكم عن العيال هل تحسي بحبه لك لو كان نعم فهدا يعني انه يحبك
صدقيني في الحياة الزوجية هناك بعض التفاصيل او الامور التي يجب ان تتناسي حتي تستمر الحياة
و ادعو الله لك ولزوجك بالتوفيق و ان يرزقكما الله بالذرية الصالحة قريبا ان شاء الله

لاتحطي ببالك وتهودجسي بشي من خيالك
شي حلو منة رغبتة انك تكوني حامل وانتي ام اولادة
ماتوقعت هالشي يزعل
بالعككككككككككككككككككس ملكتي الدنيا برغبتة وحبة لك
اسال الله ان يرزقني بزوج يكون حب الاطفال بقلبة ورغبتة بهم مثل زوجك واكثر
دعواتك ...
والله يسعدك مع زوجك يارب

مشكوووورين يالغلا على مروركم و اراءكم
و انشاالله يا احساس عمري يرزقج بالزوج الصالح يارب

الله يفرجها عليك مع اول مولود ان شاء الله بيزيد غلاك اكثر

لا يااختي لا تخلي الشيطان يوسوس لك
وهو لو مايحبك ماكان يبغى اطفال منك بس يمكن هو يحب الاطفال مرة
ربي يرزقكم بالذرية الصالخة