مشكلة في المبادرة
 

السلام عليكم

انا حائر في مشكلتي ومني قادر افتح الموضوع لأحد .. وقلت ما في غير المنتدى .. ونستشير العقول البصيرة والخبيرة اللي فيها ..

انا يا جماعة خاطب ليا 6 شهور .. من فتاة اكبر مني بسنتين .. انا 23 وهيا 25

مشكلتي يا جماعة .. انا زمان كنت مهمل خطيبتي وكنت ما اكلمها كتير وكنت مقصر بحقها جدا ..ويس سارت مشكلة وبعدها انتبهت للموضوع .. والحمد لله قدرت اعدل من نفسي .. وسرت اهتم بيها واحاول اسوي كل شي عشان ارضيها ..

بس بعدها لاحظت اني دايما سرت انا اللي ابادر بالكلام .. هيا ما تكلمني .. وانا اللي ارسل وهيا ما تتجاوب معايا ابدا الا لو انا بدأت .. وكانت احيانا تسير مشاكل .. اني انشغل والله .. وهيا تحسبني رجعت زي ما كنت مهملها .. وكانت تزعل زعل قوي .. وما ترضى اني اصالحها حتى ! وكنت اتفاهم معاها وابررلها واقولها .. بس ما كان يفيد .. كانت جدا عنيدة .. كنت اقولها انا جاي اصالحك ليه ما تبغي الصلح ؟ تقولي ايش الفايدة مدام انك حتعيدها ؟ قلتلها والله مو بالقصد وما حعيد شي .. وكانت ترضى بطلوع الروح


فبعدها اتعدلت يعني انا وسرت مععطيها كل حقوقها .. بس برضو موضوع المبادرة لازال مني انا فقط وهيا ما كانت تساعدني ابدا .. حاولت اكلمها على دا الموضوع وقلتلها لازم تهتمي بيا زي ما اهتم بيكي .. وسارت مشكلة بيننا .. خطيبتي من النوع العنيد جدا .. واللي عمرو ما يعترف بالخطأ .. المهم رمت الخطأ عليا .. واتزاعلنا لـ فترة كبيرة .. لدرجة تخيلو يا جماعة انها تقولي انا ما ادري انا ليش معاك !

وقالتلي كلام يجرح كتير بالفترة دي .. لاني مرة صرخت عليها فالتلفون بسبب انها استفزتني باسلوب جدا طفولي ..

فلما صرخت بكيت وقالتلي بعدها ما عاش اللي يصرخ عليا .. قلتلها عيب عليكي كلميني باحترامك .. قالتلي طيب الاحترام انك ما تصرخ عليا .. انا ابويا ما صرخ عليا تجي انت تصرخ ؟ .. انا بصراحة حسيت اني مخفة يعني من الكلمة دي يعني احس كانها شايفة نفسها عشانها اكبر مني مثلا محد يتحكم فيها !

قلتلها اسمعي يا بنت الناس .. لو تغلطي مو بس اصرخ عليكي الا اعطيكي على وجهك !

وبصراحة لأول مرة انفعل عليها كدا وقلت كلام شوية جارح .. بس لاني كنت ابغاها تحس .. لانها كانت تقولي كلام يجرح اكتر !

وبعدها زعلت وكلمت اخوها وابوها وقدرت اراضيها ..

المهم انا صراحة بعد اخر مشكلة حسيت في فجوة كبييييييييييرة بيننا ..بس برضو يعني الحمد لله بعدها بفترة حسيت في حاجات كتير رجعت زي ما كانت واحلى .. بس برضو احس اني فقدت كتير من احترامي ليها ..

وكمان هيا لازالت على موضوع المبادرة الى الان برضو مني انا .. وانا بحاول امشي عشان ما اسوي مشاكل ..

وحاولت المحلها بس ما في فايدة .. احس بتسير مشكلة تانية كبيرة ..

قولولي يا جماعة كيف افهمها اني احتاج اهتمامها كمان انا ؟ وكيف اقدر اخليها تسوي حاجات من نفسها من غير ما اقولها ؟
ابغاها تسأل عني دايم وتتصل وترسل
الحال دا مرة تاعبني :(

قولولي نصايحكم الله يسعدكم

انا جربت فترة اسوي زي كدا .. ووللأسف .. ما استحمل وارجعلها تاني .. لاني احس اني احتاجها من جد .. ولما ارجع انا اللي اتهزأ برضو .. تقولي انتا الي طنشت وانا طنشت معاك .. يعني تحول الغلط عليا بكل بساطة وهيا ولا كانها سوت شي ! وتستمر على رأيها

وعن سؤالك لو كانت عنيدة .. هيا عنيدة فالحاجات اللي تخصها بس يعني اما الباقي يكون عادي يعني ما تسوي مشاكل عليه ..

والحمد لله كل امورنا طيبة .. يعني لما نكون مع بعض من جد بننبسط .. بس مشكلتي ابغاها تدور على سعادتي زي ما انا بأدور على سعادتها ..

نفسي احس بالاحساس دا .. لانو بصراحة مع كل اللحظات الحلوة اللي بتمر بيننا .. احس في شي ناقص بسبب الموضوع دا

فـ ايش ممكن اسوي عشان اخليها تفهمني وتفهم ايش اللي ابغاه منها ؟

طيب ماجربت تحكي لها عن مشاكلك الخاصة ومواقفك الحزينة وتشكي لها وتعبر عن مشاعرك الحقيقية بشفافية

اتوقع لو هي حست انك شخص حساس ومحتاج لاحد يفهمك ويهتم فيك ,,, اكيد انها راح تتعاطف معك وتبطل التمنع والدلع الزايد وتحن عليك اكثر


بس اغلب ظني والله اعلم انها تحبك وتموت عليك بس خايفة انها تحط ثقتها فيك وبعدين تنصدم انا اشوف ان هذا اغلب حال البنات يعني تمتنع عن المصارحة بالحب والكلام الحلو لانها تخاف اذا عطتك وجه زيادة ممكن انك تتغير معاها ,,, وانها اذا تمنعت عليك بتظل تلحقها وتهتم فيها ,,,, هذا توقعي انا والله اعلم

كل الاسامي

هيا المشكلة مو اننا لما نتكلم .. بالعكس لما نتكلم نكون عادي وما في احلى مننا ..

بس المشكلة انه مين يبدأ الكلام .. انا هنا مشكلتي .. اني انا دايما سرت ابادر وهيا لو قعدت بالايام ما تكلمني !

ابغا اعالج مشكلة المبادرة .. لانو الحمد لله مشكلة كلامنا مع بعض قدرت احلها ..


أعمق المشاعر

ايش الفايدة لو قلتلها ابغاكي تسوي كدا وتسوي كدا ؟ محا احس ان الشي اللي بتسويه طالع منها هيا .. يعني المفروض تسوي اللي ابغاه بدون ما اقولها .. لانو في شي يربطنا يعني وشي قوي ..

ما ابغا احس انها بتشفق عليا .. ابغاها تسويه من نفسها ..

وانا والله بسوي كل اللي اقدر عليه عشان تطمن من ناحيتي واني محا ارجع زي اول .. وبجتهد كثير حتى هيا مدحت الشي دا اول ..


رجل حليم

يا اخي جزاك الله خير بس لا تحكم من غير دليل ..

الحمد لله البنت متدينة وتخاف ربها .. بس الطبع شوية يغلب عالواحد احيانا

وانت صادق في اني احبها بجنون .. وعشان كدا ودي اعوضهاا عن الي فات .. بس هيا ما بتساعدني ..

يعني احس كاني انا اللي لوحدي باسوي كل شي .. هيا لأ

ابغاها تشاركني وتساعدني ..

اعطونا ارائكم ومشكورين على تفاعلكم

ياخوي فترة الملكة حسبب علمي إنه الرجل يلاحق زوجته

و بعد الزواج ، العكس :D

اخوي اختار وقت ومكان مناسب وبكل هدوء اشرح لخطيبتك انك مدايق من تصرفها وبينلها انك كنت مقصر والحين انت تعدلت بس مدايق منها عشان انو هي ماتهتم فيك وقول كل الي بخاطرك واطلب منها انو تقلك كل شي كمان وكونو صريحين دايما مع بعض
واذا مامشي الحل خلط على طبيعتك ولاتتعب حالك وشوف ايش ممكن يصير
ربي يفرج همك ويوفقك ويسعدك