|
آرائكم في مشكلة عدم إمكاني رؤية خطيبتي
السلام عليكم و رحمة الله و بركاته ,,,
منتداكم أكثر من رائع و اللي اروع الأعضاء اللي فيه ,, الله يسعد ايامكم اجمعين .... موضوعي بكل بساطة اني خطبت بنت من اهلنا لكن من بعيد(بنت ابن عم جدي) ,,, و اللي أشار لي عليهم اختي ,,, و أنا أعجبت بأخلاقها و مدح اختي لها ,,, بس هم ساكنين في الامارات و أنا في جدة و لكن حاليا ادرس خارج المملكة ,,, مبدئيا ابويا كلم أبو البنت و وافق و ابويا حتى قرأ الفاتحة معاه حتى قبل ما اشوفهم ,,, بس ما في مشكلة لأنو أصلا البنات نزلوا مكة صدفة و أمي و اختي استغلوا الفرصة علشان يروحوا يصوروا البنت .... مع انو ابوها كان رافض ( المشكلة هو من النوع المتمسك بالعادات القديمة و مو مقتنع بشي اسمو خطوبة علشان كذا قرأ الفاتحة عل التلفون و قال لأبويا خلاص البنت محجوزة لولدك و ابويا قال يعني ما في داعي ننزل الامارات و نخطب رسمي ،، و أبو البنت قال لا ما في أي داعي ) المهم في نهاية الموضوع اختي صورت خطيبتي و شفت الصورة على أساس انها الرؤية الشرعية لأنو وقتها كنت مسافر ،،، و برضوا أبو البنت كان راح يحس بالحرج انو هو اللي جاب بنتو من الامارات للملكة علشان أنا اخطبها ..... (لأنو زي ما تعرفوا الاصول انو أنا لازم اروح للخطيبة و ليس العكس ) خلاصة الأمر .... أولا الحمد لله أنا أعجبت بالبنت ،،، و لكن الموضوع الحالي انو البنت أنا حتى الآن ما شفتها شخصيا ما عدا من الصور ،، و ترى برضوا مو دي هي المشكلة ،،، أولا أنا مشغول و ادرس خارج المملكة ،، و الملكة راح تكون بعد سنة ان شاء الله ،،، و حاليا صعب انو اسافر عل الامارات و أقابل البنت و ألبسها خاتم الخطوبة ،،، على العلم انو أبو البنت قال انو عادي و ما في داعي للرسميات و قال نحنا أهل ،،، بس أنا حاس بالخجل من زوجتي المستقبلية ،،، انو كيف اخليها تنتظرني سنة و نصف تقريبا من غير ما اعطيها اي شيء ،،، فكرت انو أرسل لها الخاتم عل الامارات مع شوية هدايا بس أمي تقول عيب ترسل خاتم يستقبلوه بالبريد ،، و أنا أعتقد انو كلامها صحيح ،، احس انو الخاتم راح يفقد بهاذي الطريقة رمزيتها ،،، أبويا و أمي يقولوا خلاص طنش ،،، البنت محجوزة لك و ابوك قرأ الفاتحة مع ابوها ،، و ابوها مو طالب منك أي شئ ،، (على فكرة ترى ابويا تكفل بجميع مصاريف سكنهم في مكة حيث أبو البنت متزوج اثنين ، و كمان ابوي ذبح ذبيحة لهم) ،،، فسؤالي انو ما دام أبو البنت ما طلب شي هل معناها انو خلاص أطنش خطيبتي على رأي أبويا و أمي ؟ و لا ايش تشوروا عليا ،،، هل معقولة اخلي البنت كذا من غير شئ مني خطيبها ؟؟ و اسف جدا عل الإطالة و الله يوفق الجميع إلى الخير ..... |
اقتباس:
اولا الف مبروك على الخطوبة، ثانيا، انت ما ملكت لسى... معناها ما تكلف نفسك بشئ لأنها، و لو قال ابوها حجزناها، انتبه! قد لا تكون من نصيبك و الله اعلم. اذا هو متشدد معناها يمكن يطلعلك بقصص لا مثيل لها و تفركها من عندهم..... فانت لا تكلف نفسك زيادة ... و لكن،،،،،انت تسأل انو الوالد و اهلك ووو يقولون لا يهمك و طنش... طيب ما علينا منهم كلهم... انت ماذا تحب ان تفعل؟ تبعث لها هدية ام لا؟ شو رأيك انت؟ هذه حياتك و خطوبتك و ليس اهلك... ليكونوا دقة قديمة؟ فانت ليس بالشرط انك تسمع كلام الآخرين... انت قم بالقرار و افعله... خليك رجال و سوي اللي انت تبيه... اذا خطبت و رح تملك بعد سنة قرار مثل هذا خليك انت تحكم فيه...ليس بالضرورة تسمع لكل حركة يحكوها اهلك او اهلها... هذه حياتك و انت تتصرف انا لو محلك اكييييد سابعث هدية ليست بالثقيلة و لا بالخفيفة... و اكييد سؤأجل اي خواتم و خرابيط الى الملكة حتى لا سمح الله اذا انفصلتوا... طنش الخاتم و لكن لا تطنش الهدية... فهذه اول و ان شاء الله آخر مرة تخطب و الخطوبة تستحق هدية للعروس و لو للذكرة فقط... ام انا غلطان يا اعضاء:26: ثالثا اما موضوع النظرة فاقول لك كذا الخطوبة عال اما العقد لا تعقد الا حتى تراها و تجلس معها و تفهمها شوي... شوفها بعينيك الاثنييييييين! و على السريع حتى ما تلعب مع بنات الناس تخطبها و تغير رأيك بعد ما تنظر اليها... هذا زواج مو لعبة.. يستحق زيارة لعندهم.. و الله يوفقك |
طيب الوالد و الوالد مايقدروا يروحوا للامارت على سبيل السياحة
و يزرزوهم؟؟؟ اذا كان ممكن .. ارسل معهم خاتم او هدية بسيطة و اذا موممكن يسافروا.. استني .. يمكن يجووا هم لمكة عمرة او شي و ساعتها اعطيها اللي تبي .. الله يوفقكم و يسعدكم |
اذا ما تقدر انت تروح طرش احد من اهلك يودي لها الخاتم و الهدية
|
اقتباس:
أنا فكرت بنفس الطريقة برضوا .... الله يعطيك العافية |
و شكرا يا نورة و أم ملك ....
الفكرة ما انو أهلي قابلوهم في مكة بالصدفة و هم كانوا جايين عمرة .... و أنا وقتها كنت مسافر .... و دحين صعب أحد يروح الامارات من الاهل ... و لكن شكرا على اقتراحكما... . |
ارسل هديه بالبريد
وايضا ارسل اهلك زياره عشان قلب البنت يدق وتفرح وتحس انك شاريها ويوصل لها شعورك من غير كلام كل مده ارسل هديه ولول ورده ناشفه بظرف مع كلمات رقيقه توصل الموده لان سنه ونصف كثير من غير هدايا مره اهلك ينزلو ومره تعزموهم للعمره يعنيي يزيد التواصل عن طريق الاهل اي خاتم ارسل الا خاتم الخطوبه واريل لها عبارة الخاتم من يدي ليدك البسك اياه صدقني يكون له طعم آخر من يدك خاتم الخطوبه بالتوفيق وتمر السنه بسرعه وتجتمع بالعروس |
مشكور يا حبيبي غرين على اقتراحاتك الجميلة ....
|
اخوي رأي من رأي اختي غرين
ارسل لها كل فتره هدايا لو بسيطة لكن اياك ترسل خاتم الخطوبة لان عن نفسي لو صار هالموقف وخطيبي ارسل لي الخاتم ابدا مارح اكون مبسوطة وفعلا الختام منك لها على طول له احساس ثاني وربي يسعدك ويوفقك ان شاء الله |
راي من راي الاخت عاشقة الغالي
اياك ان ترسل لها الخاتم ارسل لها هديه بسيطة وبس تقدر اتشوفها اعطيها الخاتم لك التوفيق |
| الساعة الآن 09:14 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©