|
كيف اقنع اهلي بالموافقة على زواجي منها
السلام عليكم
يناس انا من الضيقه اللي فيني ودي انتحر ودي ارتاح كل شي معكوس بوجهي عجزت من حظي الردي بقولكم قصتي بس ادري بتقول عني خبل صحيح بس امانه لحد يلومني المهم انا حبيــت بنت تكون اخت من زملائي بالدوام زميلي صراحه اعزه واغليه من قبل ما أحب اخته المهم اني حبيتها اخته كنت المحها لركبت الباص لمريته الصبح علشان يداوم معي وواجهته مره بالسوق واهله معه بس الوكاد ان البنت حبيتها وشقيت علشانها سويت اشياء اعتقد اني سفيه لاني سويتها كنت احاول اني اهلي يتعرفون على اهلهم بس بس ما قدرت فقلتله مره امي تبي حليب معزى من عندكم راح وجابلي وما قصر طبعا امي ما تدري ولا تبي اصلا حليب ورحت انا وشريت قطع قماش وحلا وحركات وقلت هذي من امي كل لسبيل التقرب منهم وتعرف على ابوهم وعلى واخوانهم واسير عليهم وضابط نفسي معهم بخلاقي وبكلامي وبهدوئي يعني صارو يعزوني معزه ويغلوني غلا مو بطبيعي وهو والله مو من شانهم من شان بنتهم بس المهم اني ابي البنت وكلمت امي علشانها وقالتلي <تبي ابوك يزعل انت تختار بنفسك صاحي انت> قالت تبي فلانه او فلانه قلت لا ابيها هي قالتلي<والله ما تاخذها> تخلي القريب وتروح للبعيد وابوي ما اقدر اكلمه لاني بصـــراحه استحي منه وانا من النوع استحي من طاري الزواج قدام ابوي تخيلو كل يوم اترجى امي فيها تكلم ابوي ويوم كلمت ابوي عنهم قال< يا جعله ما يتزوج اصلا يبي بنت فلان او فلان ما عندي مشاكل اوما ياخذله وحده مهي من بنات عمه لا> لانهم هم من قبيله غير قبيلتنا وابوي من الناس اللي متحجر حييل وامي مهي بعيده عنه بعد كل شي سويته بكل كلمة رجاء ترجيت امي فيها ولرحت لبوي ابي افاتحه بالموضوع اتلعثم واسكت مدري شسوي طفشان وتعبان حت بالجن سويت نفسي مجنون ولا نفع ابيها البنت يناس تكفون ابيها حياتي بنيتها معها وامالي بنيتها معها بالخيال ابي خيالي يكون صحيح وانا ولله الحمد مو ناقصني شي كل شي يتمنونه بالرجل يلقونه فيني بسسس حظي خايس مع والديني وابي بنفس الوقت رضاء والديني اهم شي ابي حت لو بيخطبولياها الا وهم راضين بأتم الرضا عني ابي حل تكفون لاني حالف اذ ما صارت من نصيبي لترك الديره بكبرها وبهلها |
الله يجعلها من نصيبك ..
أكثر من الاستغفار ... الاستغفار يفتح الأقفال يقول ابن تيميه أن المساله لتغلق علي فاستغفر الله الف مره او اكثر فيفتحها الله علي ماهنا شي على الله عسير ... الله يجمعك به |
السلام عليكم ورحمة الله
الله يهدي سرك امين اخوي اولا ماهو السبب اللي خلاك تحبها ؟؟ انت ماشفتها الا بعبايتها بس !! ومااتوقع صاحبك من النوع اللي يتكلم في اخته قدامك ؟؟ احس انك بس حطيتها في بالك وقمت تنسج احلام وردية وحبييتها من خلال خيالك فقط فماله داعي هالتعلق الكبيييييييييييييير .. لكن هذا ماينفي احقيتك في اختيار شريكة حياتك يعني انا ضد اهلك لما وقفوا ضدك .. لكن يااخوي الرجل يختلف عن المراة وانت قلها بالفم المليان انا ماراح آخذ الا فلانة ... لا تكون ضعيف قدام اهلك خصوصا انك لم تطالب بمعصية .. الله يفرج همك وييسر امرك ويحقق اللي في بالك |
وعليكم السلآم ..
وآلله مآأدري وش أقدم من كلآم .. مشكله العادآت اللي تسبب عوآئق بطريق الزوآج .. حآول تتجرأ وتكلم أبوك بخصوص هالبنت وامدح خويك واهله وقوله لاتحكم ع الناس اجلس معهم وانت اللي بتناسبهم .. وإذا مصممين ع رايهم أتركها لله وانسآها والله يعوضك خير .. |
قلب الماما< كلامك صحيح واكيد اني ما شفتها الا بعبايتها بس العايله ماشاء الله عليهم معروفين بالزين وبالدين
وناس بسيطين وعلى قد حالهم يعني لاكن تصدق ان البنت اعرف عن كل شي عنها اسمها ومدرستها وعمرها ومن زينها ومن شينها لا تقولي كيف لاني سويت المستحيل والمشكله لو اني بسن المراهقه يمكن اقول خيال ومدري ايش بس انا عمري 22 يعني تعديت المرحله اما من ناحية ابوي فأبوي صعب صعب صعب حيل ابوي لا يراعي مشاعر ولا ااحاسيس احد ابوي واعرفه زين |
كان الله في عونك يا ابني .. فانت في سن ابني ربي يحفظكم ..
اذا اهلك مو موافقين على البنت لانها من قبيله غير قبيلتكم هل انت متأكد ان اهل البنت ما عندهم نفس الفكره .. يعني ممكن انهم يرفضونك لانك من غير قبيلتهم ؟؟ و في الاونه الاخيره قرأنا الكثير عن مشاكل الزواج من قبائل مختلفه و تم تطليق الزوجين و مشاكل كثيره حصلت بين القبائل بسبب هذه النوعيه من الزواج .. يا ابني لا اريد ان اقول لك تمرّد على هذه العادات الباليه لانك لا تستطيع ان تواجه كل المجتمع بنفسك فالكثره مثل ما يقولون تغلب الشجاعه .. عندي سؤال هل احد من اهلك المقربين يعرف انك تريد البنت مثل خالك او عمك او اخوك الكبير و يكون له تأثير على والدك و ممكن يقنعه بالموافقه على البنت ؟؟ هل احد من جماعتكم متزوج من قبيله اخرى و مستقر في حياته و القبيله لم تعترض على زواجه ؟؟ بانتظار اجابتك يا ابني .. |
وعسى أن تكرهوا شيئا وهو خير لكم
والله ماتدري اذا اخذت هالبنت بتصير سعيد او لا مشكلتنا ننظر للمدى القريب ماننظر نظره بعيده ننظر لبكره وكيف بتصير حياتنا مع شريك حياتنا في ظل رفض المجتمع المحيط لهذا الارتباط يعني هل الزواج زوجه وزوج وبيت وعيال ولا علاقة تمتد للاسر والمجتمع أخي الكريم انظر لبعيد واستخر في كل امر تقوم به ترى هالبنت مراح تعيش معك لوحدك راح تتعايش مع اسره ولازم تتاقلم معهم ولازم قبل كل شي اهلك يكونوا موافقين الزواج وراضين به ليتبارك وتعيش في انسجام معها مجرد رأي |
وعليكم السلام ورحمة الله وبركاته
اخي الفاضل كم عمر بنات عمك الاتي رشحهن والدك ؟ هل هن جاهزات للزواج ام ستنتظرهم لبعض الوقت ؟ كيف علاقتك بأولاد عمك ؟ لو كانوا البنات صغيرات قل للوالد انا اريد الزواج الان ولا اريد الانتظار اما لو كانوا بسن مناسب للزواج في الوقت الحالي فحاول ان تتقرب لأولاد عمك وتلمح لهم ان اخواتهم كاخواتك بالضبط طبعاً تلميح حتى تصلهم الرسالة انك لا ترغب بهم كزوجات او لمح بذلك لأعمامك انفسهم وتكلم امامهم بصفة عامة ان العادات التي تجبر على تزويج الاقارب لبعض فيها ظلم للطرفين فربما يتقدم لبناتهم خطاب وهم يرفضون لانهم ينتظرونك مثلا . وحاول مع والدك ولا تيأس وقل له لو تزوجت ابنة عمي لن استطيع ان اسعدها وانا لا احبها وربما تصل للطلاق وهنا علاقتكم بعمكم ستتأثر وتحصل مشاكل وخلافات بين العائلتين وهذا مالا يرضاه والدك وقل لأمك ان تقول هذا الكلام لوالدك وتقول له غداً لو تزوج ابنة عمه فربما ذهبت تشكي لوالدها ان ابننا غير سعيد معها ولا يحبها ويعاملها بقسوة وابوها لن يسكت ويقول طالما لا يريدها لما اجبرتوه على ابنتنا دعها تقول له ذلك وحاول انك تدخل ناس او شيخ يكلم والدك انه لا يجوز ان يجبرك على الزواج بمن لا تريدها وتصدق بنية تسهيل زواجك وادعوا الله . |
جمعك الله معها وابعدك عن شر هذا الطريق لكن اذا كانت البنت محجوزه لأحد اولاد عمها وانت تقدمت لها ورفضوا راح تتغير نظرتك لصديقك وممكن تحصل مشاكل وافضل حل مني او من غيري هو الاستخاره اذا كانت العلاقه راح تستمر لنهايه العمر ع خير او تنتهي في نص المشوار وتأكد بعد هذا كلوا مشيئت الله فوق كل شي وعليك بالاستغفار فهو مفتاح الاقفال ومايرد القضاء الا الدعاء
|
اقتباس:
الله يعين الجميع يا رب ايه ايه عمتي تدري بس انها صغيره ولا لها قدره بشي اما من جماعتي القريبين لا محد متزوج من برى قبيلتنا لاكن عندنا شيبان ماشين على العصر القديم وبالعربي الفصيح بنات جماعتان القريبين واجد وخايفين انهن ينشبن بحلوقهن ولا يعرسن يعني يبون يخلصون منهن كل اللي اعرسو من قرايبهم محد طلع والله يعين |
| الساعة الآن 12:15 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©