|
مشكلتي حساسه - اهلي واهل زوجي وزوجي !!!
السلام عليكم ورحمة الله وبركاته بصراحه شفت هالمنتدى واعجبني جدا لأن اللي فيه نااااس ماشاء الله راقيه بالحكي عكس المنتديات الثانيه راح اقولكم مشكلتي وياليت تفهموني وتحطون انفسكم بمحلي انا متزوجه من 3 سنوات من قريب لي بصراحه اوقات الراحه والاستقرار في بيتي انا وزوجي قليله بمعنى انه اهله اذا زارو المدينه اللي احنا فيها يجون لعندنا فتره مع العلم انه عندهم مكان خاص فيهم - شقه مرتبه وكانو يجون لها قبل زواجي من ولدهم- لكن بعد الزواج تغير كل شيء ! لو ينسد عندهم حمام اخذو اغراضهم وجوو لعندي بالاسبوعين واكثر لو ينقص عندهم فنجان من المطبخ قالو ماعندنا اغراض للطبخ ويجون لعندي احس شقتي موب لي لو اروح لأهلي وادق على زوجي يقول انه اهله جالسين في بيتي وانه اخواته المتزوجات جايين وراح ينامون كم يوم في بيتي ! طيب ما شاء الله هم عندهم شقه حلوه ايش معنى شقتي؟ في رمضان حدث ولا حرج ياناس رمضان وقت عباده صار بالنسبه لي وقت كرف في المطبخ وبس يجون يفطرون عندي يوميا تصدقون من ثلاث سنوات بس رمضان اللي فات جلست فيه انا وزوجي 6 ايام لوحدنا كانت من احلى الايام وباقي الرماضانات ممنوع علي اعيش مرتاحه واذا كانو موب موجودين يرسلون اولادهم الكبار يفطرون عندي المشكله أسأل زوجي انتم كيف كنتم عايشين قبلي! معقوله هالوضع اللي يصير لي ! مع العلم انه لما تزوجت سافرو اهل زوجي معاي لشهر العسل << من جد الوضع مو طبيعي بصراحه النفس من تالي عايفتهم مع اني احبهم لأنهم اقاربي بس خلااص ماعاد اتحمل انا ماتزوجت علشا اكرف واجامل الشـــــــــــيء الثاني اهــــــــــــــلي ساكنين بمنطقه ثانيه ويجون بالعطل لمنطقتي ويسون نفس حركة اهل زوجي يجلسون عندي في البدايه كنت افرح فيهم بس من تالي خلاص طفشت وزوجي طفش من وضعنا صحيح اهلي مايطولون عندنا يقعدون من اسبوع الى اسبوعين بس شقتي صغييره واهلي كثير واللي قاهرني انهم يستخسرون انهم يستأجرون شقه لهم ! ليش طيب مو من حقي انا وزوجي نرتاح واللي قاهرني ابوي اللي متخلي عن اهلي يجي يرميهم عندنا ولا عاد نشوفه وتعالو شوفو المشاوير اللي على زوجي مره امي تبغى اختها مره خواتي يبغون السووق !!!! اهل زوجي واهلي ماقصرو فيني انا وزوجي ماخلونا نعيش مرتاحين انا منحرجه من زوجي بالنسبه لأهلي وهو منحرج مني بالنسبه لأهله بتقولون اهلك واهله وعليكم حق بس الشقه صغيره وزوجي يضطر يكون برا البيت طول الوقت ومايرجع مسكين الا بالليل وقت النوم لأنه ماله مكان بالشقه! وبعدين زيارات اهله واهلي كثيير اذا راحو هذولي ورفعنا روسنا جونا الثانين والمشكله نحبهم مره ومانبغى نجرحهم بنص كلمه بس تصدقون وضع اهل زوجي متأزم اكثر من اهلي لأنه هم غير عندهم شقه ليش يجون لعندنا؟؟ تدرون حتى اذا صارت عندهم عزيمه او بيجيهم احد يعزمونه على شقتي؟؟ ابو زوجي مايحب القهوه والشاي الا من زوجة ولده اللي هي انا اسوي القهوه والشاي وارسلها لهم بالصينيه والفناجين يعني حتى اغراض المطبخ لازم تطلع من بيتي وشوفو نهاية كل عطله ايش ينقص من مطبخي! ويضطر زوجي يروح يتقضى للمطبخ مسكين الحاله الماديه بصراحه ماتسمح بهالاشياء كل الطرفين اذا جونا يبغا لهم مصرف والله يضيق صدري على زوجي وعلى وضعنا اقترحت عليه ننقل لمكان ابعد بس في نفس المنطقه بس يكووووون بعييييييييد بحيث يستثقلون انهم يجونا لكن الوضع المادي ما يسمح حاليا والمشكله حتى نظام حياتنا تغيير جدا جدا اذا جونا - الطرفين - يزعلون لو يشوفوني منشغله مع زوجي عنهم ويزعلون لو انام بدري وما اسهر ... قولو لي ايش الحل مقبلين على عطله وخالتي الله يهديها رمت كل مواعين مطبخها على قولتها يبغى لها تجديد!<<< من كثر الاستخدام على كذا راح يجون عندي لأنهم ماشرو المواعين الجديده واهلي راح يجون اسبوعين وزوجي يقول الجيب يصفر ونفسيتنا مندمره انا ويااه كرهنا المجاملات وكرهنا عدم الاستقرار حتى مفتاح شقتي صاير مع الكل ومع اخوات زوجي طلبو من زوجي المفاتيح لأنهم يمكن يحتاجون للشقه اذا كنا مسافرين وبصراحه زعلت من زوجي مررره - كيف يعطي خواته المفتاح وهم متزوجات وازواجهم موب محارم لي وهالزمن يخوف يعني المفاتيح عندهم ويعرفون انها لشقتي صرت اقعد بشقتي وانا خايفه انه يدخل علي احد >> لا تقولون موسوسه لااا ارجوكم انا اخاف على عمري قلت لزوجي غير القفل بس مو راضي المهم ابغاكم تعلموني بالضبط كيف احد من هالزيارات اللي سببت لي حووسه في حياتي طبعا باسلوب ما يجرح اهلي واهله خلاص انا ابغى ابدأ حياة جديده بزيارات معقوووله ارجووكم قولو ايش الاسلوب اللي لازم اتخذه انا زوجي مع تحيــــــــــــاتي كــ ــ ــاندي |
وعليكم السلام الشيء إن زاد عن حده انقلب ضده .... صراحة الوضع لا يطاق وخاصة لما يأخذون نسخة من مفتاح شقتكم ..... عليك بالمقابل ان تجلسي مع زوجك وتصارحيه بالذي في نفسك !!!! وتتفاهموا مع بعض حول هذه الوضع .... وأرجو أنه ما يتحول الحوار بينكم إلى خلاف وسوء تفاهم لأنكم مشتركين في الضرر وتبحثون عن حل مناسب الله يعينكم عزوبي بس رجل |
مالكم الا ان تنتقلوا الي مكان بعيد
علشان مثل ماقلتين يستثقلون يجون |
لو مكانكم ننقل لمدينة صغيرة
لأنه يبدو لي انكم بمدينة هامة اللي يبي مستشفى والا سوق والا طلعات يجي لكم وبالنسبة لرمضان يمكن انتي من النوع اللي يحب كل شيء توب فتمدين السفرة من الى وهم اكيد بيعجبهم الوضع فانصحك هالسنة خليها على تمر وقهوة وماء فطور وكبسة وشوربة عشاء بس لاجل مايحصلون عندك شيء زيادة أما أهلك فالله يعينك لو مكانك بينت لهم انه صعبة زوجي يكون سواق وبما انه برا البيت طول الوقت فأكيد ينشغل بأشياء ثانية بصراحة مهما كان هذي حياتك ومن حقك تستمتعين فيها مثلهم تنامين بدري والا تجلسين مع زوجك لايهمك أحد صدقيني إن ماتداركتي الوضع حياتك بتضيع خصوصا ان زوجك متضايق قريبي كان مثلكم تماما خصوصا ان بيته بمصيف الحين غير المفاتيح لأنه كان موزعها وصار يتحجج منا والا منا إذا طلب احد بيته والكل محترم رأيه الا قليل الذوق تفاهموا على هالوضع لأنه صعب عليكم كلكم |
عزوبي بس رجل >> الله يسلمك اخوي وموضوع المفاتيح الما اللحين بقلبي وانا قلت لزوجي ماراح ارتاح الا لما يغيره
|
لوجينا >>> ياليت بس الحاله الماديه ماتسمح حاليا للأسف يااارب تكتب لنا اللي فيه الخير
|
نبض الدان >> تسلمين حبيبتي بس صدقيني في رمضان ما اسوي ازود من اللي تقولينه بس لأنهم جماعه ومنقسمين حريم ورجال فصار الوضع صعب جدا بالنسبه للكرف وانا اعرفهم ما يجون لي الا علشان يرتاحون
وبالنسبه للنقل لمدينه صغيره صعبه عمل زوجي هنا واصدقائه وانا ودراستي وبعدين مانحب المدن الصغيره واهلي انا بينت لهم مبدأيا يستأجرون لهم سواق اذا جوني لأنه زوجي مشغوول فسكتو وماقالو شي وان شاء الله يعملون اللي قلته |
الله يعينك وربي حسيت بمعاناتك
أنا ما أدري يتحرك إحساس إحترام الخصوصيات عند هالناس وترى كثير زيك يعانون نفس المشكله أنا من رأيي إنك تشوفيلك حل بأسرع وقت وتناقشين المشكله مع شخص فاهم وعاقل يعي أمور الحياه أتمنالك حياه سعيده تقبلي تحياتي |
اقتباس:
اقترح أول الخطوات أن زوجك يكلم أزواج خواته؛ كل واحد على حده ويشرح لهم الأمر .... علشان يخففوا من زيارات زوجاتهم (خواته)، والزوجة تطيع زوجها ولا تروح لمشوار حتى تستأذن منها وتأخذ موافقته عزوبي بس رجل |
انتي ليش تسكتين طيب ..
خليك قوووويه وتكلمي بوجيههم ..هذا لا تجريح ولا قله ادب ولا حراام الا بالنسبه لوالدينك ووالدينه بس(عشان البر وااجب) ..لازم تتفاهمووون ماتسكتوون خصوصا ان زوجك مضايق مثلك .. ماعاد تنفع المجاملات الزمن هذا صدقيني اذا استمريتي على الوضع هذا بتضيع اسعد اياام حيااتك وتندمين وتقولي ياليت ياليت .. زوجك وان كان مضايق مثلك ومعك بكلامك مصيره بيدور له مكان يرتاااح فيه يحس فيه بالراااحه يحس انه مستقر ..لا تضيعين بيتك بايديك خليكــــــــي قوووويه عمر السكوووت والمجاملات مانفعت ...شي يقهر والله ...ايش فايده الزواج نوم وبس وين الخصوصيه وين الراحه وين الاستقراار .. انتم فاتحين بيت اسره مو فندق وليموزينات وخدماات سيرفرز .. الله يهديهم ياختي والله اتضااايقت وتمنيت اني لك صله عشاان اقدر اوقفهم عند حدهم .. ارجوووكي لا تسكتين ربنااا يسعدكم ويزيل همكم ..ويهديكم الصواب والرشد .. |
| الساعة الآن 05:43 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©