مشكله محيرتني
 

سلام على كل الاخوان والاخوات هذه أول مشاركه وحقيقه ما أشتركت في هذا المنتدى إلا بمشوره من أحد الاخوان وأتمنى أن أجد عندكم حل لمشكلتي أنا طالب في أخر سنه في الجامعه وعلى وشك أن أخطب بس محتار بين كل اللي عرضوا علي فيهم أقارب وفيهم غير ذلك بس أحس إن قلبي ما مال لأحد منهم لا أعلم ما هي المشكله بحق أكون معكم صريحا للغايه سبق في بداية دخولي للجامعه أن تعرفت على فتاة والله شاهد علي أنها بمحض الصدفه لأني لست من هوات حركات المسخره المهم إني عشت مع البنت حياه كانت أسعد أيام حياتي حبيتها حب جنوني وهي كذلك حتى إني نويت أخطبها لتكون بنت الحلال اللي أحس إني بعيش كل السعاده معها صراحة أمي في البدايه أنا ما أخفيكم إنها حققت معي كيف عرفتها وقات لها الصدق بكل قوه وجداره قالت أشوف وأرد لك من أبوك المهم قالت لأبوي وهي تقوم القيامه ويعمل أكبر مشكله ومع كذا وقفت في وجه من أجل حبي ومن أجل عيونها حتى صار يقولي لا أنا أبوك ولا أعرفك المهم تحطمت وتأخرت بسبب ذلك في دراستي الجامعيه وصرت عصبي المزاج ما أقبل من أحد كلمه وحده والبنت تنتظر مني رد ولا أدري وش أقول لها وقفت مع نفسي يوم وقلت بصمد وأقول لها اتصلت عليها وعلمتها بكل شيء وقلت يا ....... انسيني قلتها ودموعي على خدي حتى نفس الحكايه كان أقسى يوم مرعلينا إحنا الاثنين بعدها أنهيت معاها المكالمه وتصبرت لمدة ثلاثه أيام ما كلمتها وتدق ولا أرد وقسما بالله من أجل مصلحتها وبعدها بكم يوم جاني رقم غريب ما رديت أول مره وأخذ معي في الاتصال وأخيرا رديت عليه طلعت بنت خالتها وتتكلم وتوعد وتقول انت ما تخاف الله البنت منجنه عليك أنا أدري إنها تحبني موت وأنا كمان أحبها والله تمر علي الليالي من فراقها مثل الجبال بس وش أسوي طولت عليكم الموضوع وما فيه إن الوالد الله يحفظها تذكرلي بنات كثير تبي تخطبهم لي بس أنا قلبي عند ............ ما في أمل يروح منه أبد فكرت أخربها مع أهلي وأتزوج وبعدها بكيفهم بس هي قالت أبوها ما راح يوافق بالله عليكم وش هي حلولكم تروني في أزمه نفسيه تصوروا صرت حديث العيله حتى أخواتي وأخواني يعرفون الموضوع لدرجة إنهم يعلقون علي بس صراحه ما وقف مع إلا زوجة أخوي الله يوفقها من جد تحاول في أبوي بس ما نفع عاد لا تلوموني في البنت صراحه بنت خياليه وقليل في المملكه مثلها طيبه اخلاق جمال بس ليش الفكره اللي في رؤوسنا اللي تتعرف على انسان تعتبر .................. حقيقه الحب إذا كان نظيف أكيد بينجح ويشهد الله ما بيني وبينها إلا كل خير وهذا اللي يخليني أتمسك فيها أكثر ........... أخوكم أسير الاحزان ................ أرجو الرد بعقلانيه وتجنب التجريح

قطعك للحديث معها هو أساس الصحة , ولايجوز لك بأي حال من الأحال لأنك لست محرم لها 0
أما عن حبك لها فقد قال صلى الله عليه وسلم ( لم ير للمتحابين مثل النكاح ) 0
وأنا أنصحك بالدعاء في جوف الليل الآخر أن ييسر لك الزواج , ويا اخي
لن تزول الدنيا اذا لم تتزوجها , فأنت رجل وراك ما هو أهم من لك , وراك أمة تنتظر مد يد العون
لتنقذها من العدو الصليبي وأنت غرقان في الغرام 0

ياخوي ويش اقولك:طاعة الوالدين فوق كل شي
نصيحتي ما تتزوج الحين لين تهدأ الظروف وخذ مع الوالد باللين وسويله اللي يبي.....................
وصدقيني اذا البنت مايعيبها شي لا فيها ولا في اهلها....................
اكيد ابوك رايح يشوف مصلحتك.............
وبعدين كلم احد كبير في العائله................يكلم الوالدويتناقش معه ويتعاطف معك
وادعي واستخير......................زوالخيرة فيما اختاره ربي.
(عسى ان تكرهوا شيئا وهو خير لكم وعسى ان تحبوا شيئا وهو شر لكم)
اجمل كلمة قيلت في الحب....................................
قول الرب(يحبهم ويحبونه)

قلبي معاك واحي فيك إخلاصك لهالبنت وحبك الشريف لها واللي مثلك قليل
وانصحك
1- استخير
2- لا تخطب اي احد الحين وانتظر
3- لا تعاند ابوك او امك وخذهم بالحسنى وقل لهم انك ماتفكر تتزوج الآن
4- حاول تكلم امك بينك وبينها على اللي في قلبك وانك راح تكون سعيد معاها بس بشرط تختار الوقت المناسب تكون فيه رايقه وسالفه ابوك مره عليها وقت

5- حاول تصارح البنت اللي تحبها باللي راح تسويها وقول لها انك راح تصبر عشان يهدا الجو
وقول لها لو كانت بمكانك وش تسوي؟؟ وانها لازم تعذرك !!
وتصبر عليك زي ما انت صابر وتحاول مع أهلك
6- حاول تخلي احد يتوسط بينكم !! واحد او وحده تمون على ابوك وامك
7- بالنهاية كل شي قسمة ونصيب

الله يوفقك :) وعسى ان تحبو شيا وهو شر لكم

اخي هيء لنفسك كل مستلزمات ومتطلبات الحياة لا تستعجل اترك الامور حتى تتخرج وتشتغل وتفتح بيت ولا تنس حق اهلك عليك وحق والديك عليك ما وصلت للذي وصلت له الا بتوفيق من الله وتعب وسهر والديك وهم يريدوا لك الافضل والاحسن بنظرهم فإختلاف وجهات النظر لا تجعلها سبب في مخالفة والديك واثارة المشاكل ولا تأخذ قرار في هذا الموضوع انصحك ان تذهب لوالدك وتستسمحه وتقول له الي تبيه والي تشوفه انا موافق عليه وارجو منك ان تسامحني وضع ذلك الهدف بأنك لسة عندك وقت طويل حتى تتخرج وتشتغل وتفتح بيت يعني سنتين اذا مش اكثر او اقل وهذه المدة تكفي لتتغير امور كثيرة في حياتك او حياة والديك وقراراتهم اصبر واستعن بالله واترك البنت ولا تتشبث بها كثير او ابعد مسافة الاتصال بينكم حتى يتحقق المراد والتوفيق من الله

بصراحه كان الله في عونك ،،، لقد مررت بهذه التجربة من قبل !!!!!!!!!!
ولم يتم النصيب ،،،، وكل شيء مر بسلام ( بعد عذاب مر ) والحمد لله رزقت بزوجة صالحة
أحببتها وتحبني ورزقنا بالأطفال ،،،، وكل شئ تمام والحمد لله

جزاك الله خير ياخوي جمر

يا اخـي ماوضحت سبب رفض ابوك لهذه البنت ؟

السلام عليكم ..

اخوي اسير الاحزان ..

انا راح اقول شي ويعلم الله انه اول مره اقوله او ان احد يعلم بهذا الشيء سواء اختي الكبرى .. ولكن بعد ان رئيت انه مشكلتك قريبه من مشكلتي حبيت اقولها لك واسال اللي عينه ما تنام انه يكون في عونك..

في البدايه احب اقول لك اني سبق ومريت في تجربه مثل تجربتك ولكن لم اخبر اهلي بهذا الشيء لاني كنت متاكد انه سوف يتم رفض الفكره ..

واحب اقول لك اني الان خاطب ومملك من فتاه اعتقد بل اجزم انها اجمل من تلك التي احببتها من قبل وكانت حياتي معها في جحيم لانه لا استطيع ان افعل اي شي لاجل حبها وكذلك هي كانت تحبني لدرجه والله ما اقدر اوصفها او ان فيه احد يستطيع ان يتخيلها .. تعرفت على البنت هذي عن طريق الانترنت بالصدقه وضلت علاقتي معها لاكثر من سنتين ولم يحدث وانت تحدثت معي على الهاتف سوا مره واحد لانني اجريت عمليه وانقطعت عنها لمده اسبوع فجن جنونها خوفا علي .. طبعا فتحنا موضوع الزواج ولكن كان العائق الوحيد هو العادات والتقاليد .. في احد الايام اخبرتني انه قد اتى اليهم شاب لخطبتها لكي افعل اي شي ومع ذلك اخبرت اختي وتحدثت معها هاتفيا وكذلك ذهبت لزيارتها .. في الحقيقه اختي ابدت اعجابها بالبنت مما زاد علاقتي بها ولكن لم يكن هناك اي جراءه مني او من اختي لفتح هذا الموضوع للاهل ..

مرت الايام وكل يوم تقول لي البنت ان اهلها سوف يزوجوها من ذلك الشاب من غير رضاها .. وقد زوجوها ..

سوف اوصف لك ماذا حصل عندما عرفت خبر زواجها ..

يكون في علمك انه جائني حاله انه لا اساتسيغ الاكل وفي ظرف اسبوع خسرت من وزني (11) كيلوا .. وجلست بعدها اربع سنوات لا اريد ان ارى اي احد من افراد عائلتي .. مع انهم في تلك الفتره كانوا يقومون بزيارتي ولم اقم بزيارتهم فيها تعذرا لانه عندي مشكله مع شخص في المدينه التي هم فيها .. وفي كل مره يقومون بزيارتي فيها يحاولون ان يزوجوني وكنت ارفض فكره الزواج ...

مرت خمس سنوات على هذا الحال حتى تعرفت على احد الكتاب في احد المنتديات (اسال الله انه يعطيه العافيه ويطول بعمره) كان السبب في اقناعي بنسيان تلك الفتاه التي كنت افكر فيها وان افعل ما يوده لي اهلي .. اخذت بنصيحته ويعلم الله انه كان محق في جميع ما قال ..

واحب اقولك انه من اول نظره نظرت فيها الى الفتاه التي هي زوجتي وعقدت قراني عليها انني نسيت تلك الفتاه وزالت ذكراها كان لم تكن موجوده من الاصل ..

وصدق سبحانه حين قال ( .. عسى ان تحبوا شيء .... ) الايه ..

يعمل الله اني كنت مخطاء في تصرفي مع البنت الاولى واني نادم على ضياع تلك السنين من عمري من اجل ( وَهَمَ ) لا وجود له ..

فابدلني الله بفتاه غايه في الجمال والاخلاق .. الله لا يحرمني منها .. فتاه مهما قلت وكتبت في وصف حسنها لم اوفها حقها ..

لذلك انصحك اخي ان تذهب مع ما يراه اهلك خير لك ...

وصدقني ان اهلك ما يريدوا لك الا كل خير وكل شيء في صلاح لك ..

واسئل مجرب ولا تسئل طبيب .. وان شاء الله راح يجي اليوم اللي تتذكر وش اللي قال لك اخوك .. استفسار ..

في النهايه اتمنى ان لا اكون قد اطلت عليك .. واتمنى لك التوفيق والسداد وان يكون الله في عونك في تخطي محنتك اللتي تعيش اصعب مراحلها في هذه الايام لاني سبق ومررت بها .. والله اني اعلم انها صعبه ولكن الانسان المؤمن صادق الايمان يكون اقوى في مثل هذه المواقف .. وفي هذه المواقف تتضح شجاعة الرجل في تحدي المصاعب التي تواجهه ..

اخوك
استفسار