|
صديقتي أخطأت في حقي
السلام عليكم ورحمة الله وبركاته
كيفكم ياأخواتي :) ابغى اعرض عليكم موقف حصل بيني وبين وحده من صديقاتي وحابه اشوف آرائكم واستأنس بها صديقتي اسلوبها جاف في التعامل وعندها ظروف تضطرها الى ترك اولادها في البيت كل اسبوعين لمدة 7ساعات وطلبت مني ان استضيف اولادها عندي في هذي الفتره وفعلا كل اسبوعين تجيبهم عندي من الصباح الى الظهر انا اسوي الغداء واغدي اولادها ولما ترجع هي تتغدى معايا وتجلس عندي للمغرب او العشاء بعدين تروح بيتها المهم ,امس جابتهم كالعاده وبعد ماتغدينا سويت قهوه وحطيتها في الصاله وكانوا اولادها يلعبوا في الصاله وولدي جالس يكلمني ويصر في الكلام وازعجني ((عمره 11سنه)) هي كانت تقول لولدي اطلعوا العبوا في الحوش خلونا نتقهوى وهو مايرد عليها مشغول بالكلام معايا وفجأة........... ثااااااااااااارت وقامت وتركت القهوه وصرخت في ولدي اللي انفجع من تصرفها وقالت لي انا احسن لي اقوم اسولف مع منى احسن منك ودخلت المطبخ ورجعت قالت طلعي كل هذول اللي هنا بعدين اجي وصارت تتكلم وتصارخ علي وترفع صوتها ((مع انو كل الازعاج كان من اولادها لانهم صغار)) انا ضحكت وقلت لها اش فيك انت انجنيت تعالي تقهوي قالت ما ابغى ورجعت جلست في الصاله وهي زعلانه مرررررررره ومعصبه انا صبيت لها قهوه ومديت لها رفضت تاخدها تركتها وشغلت اللاب توب وجلست العب اولادي واولادها عليه هي دقت على السواق وطلعت تنتظر في الحوش وانا سبتها ولاكلمتها ولما جاء السواق دخلت وقالت مع السلامه وراحت وانا ماوقفت معاها ولاشئ انا يابنات زعلت مررررررره منها كيف ترفع صوتها علي كدا وبدون سبب وانا ماسكه اولادها من الصباح ومستقبلتها في بيتي وهي عالعموم اسلوبها مره جاف حتى مع اولادي مع اني احب اولادها ودايما اجاملهم لما رجعت بيتها صارت تدق وترسل رسايل .ليه ماتردي؟؟؟؟؟ كأنه ماصار شئ وفي اخر الليل ارسلت تقول اذا كنت زعلت انا اسفه وانا احبك وياحياتي .......الخ............. اش رايكم يابنات اش الاسلوب الصحيح في التعامل معاها؟اقطع علاقتي بها؟او انسى الموضوع؟ الله يجزاكم خير:) |
السلام عليكم ...
أختي لاتقطعي العلاقة فالصداقة كنز ومامنا الكامل ... وربما مع طبيعتها الجافة ربما لديها ظروف ضغطت على اعصابها وادت بها الى الانفجار ... وولدك لم يكن السبب ولكن كان كالأبرة التي فجرت البالون المنتفخ اصلا ... فأعذريها وعاتبيها برفق حتى لا تعتاد على معاملتك بهذه الطريقة والله لا يفرق لكم شمل |
وعليكم السلام ورحمة الله ما توصل لقطع العلاقة بعد هالموقف لأنه موقف لحظة له سبب معين بفترة معينة ممكن كانت تعبانة ومرهقة من مشوارها فمع الضغوط وصراخ الأطفال حولها ما تحملت وتصرفت هذا التصرف الذي قد يقع مني ومن أي شخص أخر إذا مر بظروف مثل ما مرت فالأمر عادي جداً ..... وتظل صديقتك عزوبي بس رجل |
ونتي الله يهديك بأتفه سبب قلتي اقطع الصداقه اعتبريها اختك ماهي صديقه
وياختي هي ما تحملت ازعاج ولدك ونتي ما تحملتي ردة فعلها وين الصبر وين الصداقه وثاني التمسي لها عذر يمكن المره فيه شئ مضايقها وهذا كيد وصديقتك ما قصرة قامت تدق عليك ونتي طنشتيها وارسلت رسالة اعتذار وتظهر لك محبتها يعني صافي يالبن كلن تجيه ضغوط ما يتحمل نفسه واولاده الصديق لازم يتحمل صديقه والا وش فائدة اصداقه اذا كانت ما فيه تضحيات وغفر زلات |
يااختي يمكن كان عندها موضوع ضروري تريد الحديث معك عنه
والظاهر انه ماخده غليك بماانها اغتذرلك فلا داعي للزعل من وجهة نظري |
شكلها ماخذة عليك بالمرررررررة
إنت لا تقطعيها ، بس طنشيها شوي لحد ما تحس بقيمتك |
اعذري صديقتك
وهي لو مو معتبرتك مثل اختها ما كانت صارخت وفضفت وزي ما شفتي غلطاتها تذكري حسناتها ولا تنسي ايضا انها قد اعتذرت فقبلي اعتذارها ولا عاد تفتحي الموضوع وصدقيني مافي احلا من ان الانسان ينام وهو مسامح كل من اخطي في حقه فراحه البال لا تقدر بثمن |
اختي الفاضله
التمسي لصديقتك العذر والصداقة كنز لا يفنى واذا الصديق ماتحمل صديقه لحظة غضب ليش يكون صديق من اصله ... رجعي علاقتك بها وفي نفس الوقت افهميها انك ماحبيتي تصرفها واسأليها عن السبب بدافع ان يمكن يكون في شي مضايقها وربي يدوم محبتكم |
لوكنت مكانك اكيد رح ازعل
بس بما انها اعتذرت خلص انسي الموضوع |
:dجزاكم الله خير الجزاء جميعا على تفاعلكم وردودكم
وانا شايفه انو الجميع تقريبا رايهم واحد لكن انا حاولت احط نفسي في مكانها واتخيل الوضع ماقدرت والله لايمكن ارفع صوتي على وحده من صديقاتي في بيتها مهما تكون الضغوط اللي انا فيها حتى لو كانت اختي يعني انا اشوف انو عيب ارفع صوتي على احد الا على اولادي بس:15:هما اللي افش غلي فيهم اما بقية الناس احسو عيب يانتناقش بهدوء او نسكت وانا ماسبق وتعرضت لمثل هذا الموقف انو احد يصارخ علي وقدام اولادي بهذا الشكل وبدون سبب منطقي حتى من امي وانا مارديت عليها لأني تعبت منها ومن سوء اخلاقها وتعاملها الجاف معي وحابه انها تراجع نفسها وتحس بغلطتهاعشان مايتكرر منها هذا الموقف لأني مااقدر اتحمل الناس الغلاظ في التعامل ابدا وشكرا جزيلا لكم مره ثانيه الله يسعدكم |
| الساعة الآن 02:35 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©