|
زواج الأقارب
زواج الأقارب
الكثير من الناس يتهربون من الأرتباط من نفس العائلة لأسباب يرونها قد تكون سلبية على حياة الزوجين و كذلك هذا الفكر متوارث من أيام الأجداد و أيضاً لبعض القصص التي يسمعونها عن نهاية زواج الأقارب!! قد يكون هذا الكلام صحيح زمان و لكن في هذه الأيام زواج الأقارب ومن وجهة نظر شخصية هو الأنسب (و عائلة تعرفها أفضل من عائلة لا تعلم عنها شيئاً) خصوصاً مع إنتشار الأمراض الوراثية و كذلك إختلاف المستويات الفكرية والمادية بين العائلات وهذا شي طبيعي في المجتمعات ، ولا يخفى على الجميع أن الزواج في المجتمعات العربية خصوصاً (أنت لا تترتبط بشخص واحد فقط و إنما ترتبط بعائلة كاملة) وهذا بالتالي له أثر كبير على العلاقة بين الزوجين كما نعرف ، لأجل ذلك أنا من المؤيدين لزواج الأقارب حالياً برغم بعض السلبيات لكني أرى الإيجابيات فيه كثيرة !! الأختلاف في وجهات النظر لا يفسد للود قضية .. |
صــــــــــــــــراحه والله ما أأيـد زواج الاقارب
يخــوك كله مشــاكل بمشاكل ان تهاوشت انت وياها تهاوشت معك العايله كلها وان قصرت عليها انفضحت عند العايله كلها يعني اشوفه مش كويس احسسن شي يكون من دون الاقارب لان يكون بين لزوج واهل الزوجه احترام و موده وحياء ( وجهة نظر فقط) |
انا ضد زواج الاقارب تماااما ..
بصرف النظر عن الامراض التي قد تلحق الزواج وصرف النظر عن مشاكل العائلتين في المستقبل لاسمح الله وغيرها من الامور المتعارف عليها من زواج الاقارب .. فأنه لايوجد أي اضافه جديدة في حياتك ... فانت ستتزوج بتلك الفتاة التي رافقتها منذو صغرك لعبا ومرحا ووحديثا وووو فأين الجديد في ذلك .. حلو الواحد تكون حياته شوي غامضه في العائلة مو كل شي مشرع ومكشوف .. والمثل الشعبي يقووول ( الي يعرفك صغير يحقرك كبير ) اعلم اني اتكلم من زاويه ضيقه في الموضوع .. فقط احببت اضافة وجهة نظري المتواضعه ^ـ^ |
زواج الاقارب ناجح بكل المقاييس ولكن له عيب واحد قوي وهو في حالة صار مشاكل او طلاق بين الزوجين لا قدر الله احتمال تكبر المشاكل بين العائلتين كبير..
بالنسبه للفضايح ممكن تكون بين العائلتين اللي مايقربون لبعض اكبر! يعتمد على شخصية الزوجين وطريقتهم بحل مشاكلهم ! بالنسبه للزوج كم سمعنا قصص عن المصائب والاشياء اللي تكتشفها الزوجة او الزوج بشريكه بعد الزواج؟ يعني العائله ميزتها انك عارفه بالضبط كيف الولد تربى وكيف عاش وكيف وصل للي هو فيه.. يعني ممكن تتزوجين رجال سمعتي عنه كل خير وبعدين يطلع معقد ويضرب نتيجة لانه تعقد بطفولته وكان ينضرب.. مع الاقارب انتي تعرفين من اللي يضرب عياله ومن اللي مهتم بعياله ومن العائله المحترمه الراقيه ومن العائله اللي ما تفضلين تعيشين معهم.. انا من ناحيتي متزوجة قريب لي واختي متزوجة واحد من خارج العائله.. الحمدلله كلنا مستقرات ومبسوطات بس فتره الخطبة انا كنت مرتاحه اكثر منها لاني عارفه الولد كويس واهلي كانو متطمنين.. اما اختي لين تزوجت وقعدت سنه مع زوجها وهم على اعصابهم يبون يتأكدون ان كل شي تمام.. طبعا احنا في عائلتنا مافيه اختلاط يعني تزوجت قريبي وانا ماقد جلست معاه وتجربتي في الزواج ما تختلف عن اختي كثير في استكشاف الرجل والتأقلم معاه يعني مو متربين سوا زي ما تقولون .. لكن اعرف ام زوجي زين واعرف ابو زوجي زين ومتزوجته وانا مرتاحة ومو شايله هم اهله يطلعون مصيبة زي ما بعض الناس واجهو.. وفيه ناس باقاربي مثلا لو يخطبوني لا يمكن اتزوجهم لاني عارفه كيف تربو وكيف تعامل اهلهم مع الناس زين.. وبالنسبه للمثل اللي يقول اللي يعرفك صغير يحقرك كبير انا ضده تماما في موضوع الزواج.. زوجي يكون ولد خالي والحمدلله ما قد صار مشاكل بيينا بس اتخيل لو صار مشكلة كبيرة ممكن يحسب حساب لعمته ويمكن ابوه مايرضا له يفشله قدام العائله مثلا يعني القرابه هنا نفعت وخدمت .. يعني القرابه تفرض احترامها احيانا.. انا احترم ابو زوجي اكثر من غيري لانه خالي الكبير قبل يكون ابو زوجي.. احس القرابة خلتنا نحترم بعض ونحسب حساب لبعض اكثر.. |
ونسيت اتكلم عن الامراض الوراثيه.. اثبتت احدث الدراسات ان زواج الاقارب ما يسبب امراض وراثيه بشكل مختلف عن زواج غير الاقارب.. ولو تتزوجين غريب لانك خايفه من الامراض الوراثيه ممكن يكونون اهله عندهم مرض وراثي وما علمو احد وماجاكم خبر قبل الزواج..
|
| الساعة الآن 03:59 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©