|
لم يتم عقد القران وبيننا مكالمات ورسائل
السلام عليكم ورحمة الله وبركاته
بصراحه انا سجلت بالمنتدى مخصوص لاشراك في هذا القسم واتمنى الاقي عندكم الردود الي تريحني مشكلتي اتوقع انها انطرحت من قبل من اخوات لي بهالمنتدى انا مخطوبه لولد عمي وخالتي بنفس الوقت طبعا خطبه يعني بدون عقد بس مجرد كلام المشكله ان بيننا مكالمات ورسايل المهم ان فيني احساس فظيع بالذنب انا احبه وهو يعشقني لدرجة الجنوووون انا واثقه من ذا الشي بس انا خايفه من غضب ربي علينا وخايفه من اثر الذنب هذا علينا بعد الزواج واكثر من مره احاول اتركه بس ما اقدر اكثرها يومين وارجع له ولمن اقوله والله يجلس يترجاني ما اخليه ويوعدني ان بيخفف مكالمات بس مايقدر يقطعها مره وحده بس نرجع نكلم بعض وعادي انا تعبت والله مو مرتاحه وخايفه من ربي ادري بتقولون اشغلي نفسك بأي شي بس ماعندي دراسه ولا وظيفه ولا اي شي ممكن انشغل عنه فيه فكرت احفظ قران بس برضو ماقدرت اخليه ومن ناحية انه بيشك فيني بعد الزواج هذا الشي انا ضامنه انه مستحيل لاني اعرف تفكيره وعقليته ومستحيل يضرني لاني بنت عمه ولان هو اصلا يحبني حب خيالي المشكله تتلخص في تعودي عليه صار هو شي ضروري عشان اعيش حياتي بشكل طبيعي تعودت عليه لدرجة اني مستحيل ابعد عنه والملكه بتكون بعد سنتين او خلالها لا اقل انا اعرف ربي زين عشان كذا انا خايفه |
وعليكم السلام ورحمة الله وبركاته
بكل اختصار إذا كان صادق بالخطبة خليه يملك عليك ولو تتزوجون بعد 80 سنة :) وبعد الملكة سوي الي تبينه أنت وإياه |
ليش الملكة بعد هذه المدة الطولية
اعقدوا قرانكم الحين وتزوجوا وقت تتيسر الأمور بترتاحين من تأنيب الضمير لأنك عارفة اللي يصير مو صح وبعد ما تملكون تقدرون تكلمون بعض على راحتكم |
اقتباس:
ذكرتيني بوحدة من قريباتنا الله يستر عليها يحبها ولد عمها ويموت فيها وياما نصحوها قريباتها تزوجي وتقول لا بستناه الان عمرها 46 سنه وجالسه عند امها وابوها وكل خواتها واخوانها متزوجين وهي جالسه سبحان الله كأنك تقولين السالفه نفسها بس تنتظرين نفس المصير وحتى الوالده الله يحفظها لي تقول فلانه متكلم ولد عمها انه يبيها وجوها خطاب وهي تحبه وهو يحبها ووقتها يتقابلون بالصدفه ويتراسلون رسايل ولما بغى يتزوج تزوج ثانيه الله يلطف بحالك بس والله حاس انك بتصيرين مثلها ما تصدق اخوانها واخواتها يزورونهم يطلون على امهم الا تتعلق فيهم تحس انها عايشه مع ناس ولما يروح كل واحد بيته تعظ اصابع الندم الله يستر عليها وعلينا ويستر عليك بس كانت واثقه ومتأكده وولد عمي موب ضارني يمكن ما يضرك بالعلاقه انه يتمادى فيها لكن راح يضرك نفسياً ويضرك بقراره الاخير يمكن يهون اذا هون بيضرك وبكيفك علينا النصح لك ولك القرار |
صدقووا اخواتي اكتبو كتابكم ولو ماتتزوجو الا عقب مليون سنه
المهم انه يكون مالك عليك وتكوني زوجته وحلال عليك مو حرام لاتكلميه اقطعيه لمن يملك عليك نصيحه من اخت تكفين ترى بعدين تندمين الله يستر علي وعليك وعلى بنات المسلمين اجمعين |
اذا يحبك ويخاااااااااف عليك 0يملك عليك ويصون سمعتك والزواج ماعليه اذا تيسر
|
اختي الانسان حكيم نفسه
ان كان ملكتك وياه بعد فتره طويله .. لا تكلمينه كثير ولكن ان كانت ملكتكم قريبه او لها وقت محدد فحاولي تتعرفين عليه اكثر واذا كان مصر على مكالمتك و يترجاك لازم اهلك و اهله يكونوا عندهم خبر .. |
راح تتعبين يا أختي كثير
اقطعي المكالمات الحين حتى إذا جاءت الملكة ما يكون جاه ملل منك لأنه تعود عليك قوليله أنا أقدرك وأحترمك وإن شاء الله بعد الملكة نتكلم براحتنا حتى نرضي ربنا الرجل يا أختي يحب المرأة اللي تحافظ على نفسها الله يسعدكم |
جزاكم الله خير ياجماعه انا مقتنعه بكلامكم الي قلتوه وكنت محتاجه احد يعطيني القوه واليوم كلمته وقلت له خلينا نخفف مكالمات وتدريجيا نقطعها لان مستحيل نقطع فجأه بس هو زعل وعصب وجلس يقول ان هو نيته صافيه وربي عالم بذا الشي يعني الي نسويه موحرام لان انا خطيبك واحبك وربي يحاسب الاعمال ع حسب النيات وانا مافي نيتي الا الزواج وقال انه بيشدحيله في الدراسه عشان الملكه تكون اقرب وانا جلست مصممه ع موقفي بس بعدين قام يتهمني اني مليت منه واني اكذب في مشاعري تجاهه وخلاني الحين وانا والله نفسيتي بالارض وش اسوي بالاخير قال خلاص ما نكلم بعض بس يكون بيننا رسايل وربي ان حالتي صعبه انا متعلقه فيه وهو بعد وش الحل |
لو ان اهلك و اهله يعرفون انكم تكلمون بعض .. انا اشوف ما فيها شي
بالعكس انا خطيبتي تعرفت عليها اكثر لاني كنت قريب لها و اكملها وقت الخطبه والحمدلله تحمست واملكت عليها بسرعه |
| الساعة الآن 07:28 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©