|
انا إنسان طموح وأبي خطيبتي تكون طموحه
السلام عليكم وكيف الحال بدخل في صلب الموضوع اخواني انا ملكت قبل شهرين ولله الحمد المهم ايام الخطبة طلبت من والد زوجتي اني اكلمها قبل ما نرتبط في بعض وتصير مشاكل طبعا وافق فقمت وبدوري بينت لزوجتي ان الحياة صعبة ووضحت لها امور الحياة والي وصى في الله سبحانة وتعالى ورسولة الكريم من صلة رحم والتسامح والمحبة والصدق وحبة الغير وعدم الحقد ... واشياء كثيرة وان شاء الله اني وصلت لو 45 في الماية من توضيح الحياة الزوجية فطلبت منها انها تفكر وترد علي هل تقدر تغير حياتها السابقة و تعيش معاي بنفس ماطلبت منها او لا فردت بالموافقة وطلبت منها مرة ثانية ان تفكر وتستخير الله وانا الحياة مو مثل الدلع الي عايشته مع اهلها في ايام حلوة وايام صعبه وبعدها باسبوع ردت بالموافقة وطلبت منها للمرة الثالثة والاخيرة تستشير الي اكبر منها في سن مع انها انسان كبيرة وفاهمه وطالبة كلية فوافقت بالتغير وتغير حياتها المهم اتممنا على خير والحمدلله و تم عقد القران ولكن لاحظت تغير كبير عن اللي اتفقنا عليه قبل الملكة وان مافيه اهتمام اتجاهي وانا حياتها يتحكمون فيها اهلها وصلت لها الصورة الصحيحة بان انا وهي نحل مشاكلنا مع بعض ولا نسمح لحد يدخل في حياتنا فكانت في كل مرة تقولي فهمت الصورة لدرجة كل ما صار بينا مشكلة انا اجي اعتذر منها مع ان مو انا الغلطان علشان ماتبدا حياتنا بالمشاكل والدين يوصينا بالتسامح و الرحمه بين الناس المهم كل يوم استغرب انا بينا هواش والسبة اخوات زوجتي في كل سالفة لازم يكون لهم نصيب من السوالف اذا طلبت من زوجتي انها تتصل بالي اكبر منهم من عماني وعماتي علشان صلة الرحم ال امرنا فيها الله عزوجل والرسول صلى الله عليه وسلم ترفض تقول انا ماحب ادق على احد على حساب غيري واذا انا مريت من احد اشقائها بالصدفة ونسيت اسلم رجعت تذكرني بصلة الرحم اذا طلبت انها تسأل عن المرضى و اذكرها ان الدين فهمنا ان الي يزور المريض له اجر ترفض وكل مرة تقولي انا بتغير اذا جيت عندك في البيت فاذكرها انا هاذ الشي لازم يكون فينا سوائ جيتب عندي في البيت او بيت اهلك او الاقارب لان الله سبحان وتعالى ورسوله صلى الله عليه وسلم وصو بهذا الشي فبرضوة تصر على رايها وترفض ولا حظ ما تحب تتعتمد على نفسها و اذا سولفت معاها ماعندها شغلة الا اهلها وش سوو ولا الناس وش قالو ولا تكلم عن صديقاتها اقولها خلينا نتكلم عن حياتنا ولا طموحنا ما لنا دخل في الناس ما فية ودايم تقولي انها تسولف كثير مع خواتها والناس بس معي دايم اشوفها ساكت بس انا الي اتكلم واسولف ماني عارف السبب اجيب لها كتب عن الحياة الزوجية كيفية احترام الزوجين رافضة انها تقرها واذا سالتها عن السبب جمبع اعذاراها نسيت او مالي خلق يعني شهرين احس انها سنتين لدرجة انا احاول الطف الجوء اذا كلمتها واجيب لها امثله على عمل الخير وكيف الاجر من الله سبحانة وتعالى ما شوف اي تغير احس ان اهم شي في حياتها كيف ترضي اخواتها وصديقاتها وغرورها وبس فمادري من الكلام الي كتبت لكم هل انا على خطاء او اني ظلمتها في تصرفتها بما اني جديد على الحياة الزوجية توني فريش او ان تفكيري شوي فيه نوع من الغلط او ايش معان اذا هي حست انا قعدت يومين ما اكلمها او ثلاثة ايام ترسلي رسالي جوال ابيك توعدني انك ماتتركني انا خايف الزمن ياخذك مني خايف الناس يخربون بينا انت انسان حساس زيادة على اللزوم لا تخلي طيبتك تخرب بينا احس انا قاعد كل يوم اقرا المثل الي يقول اشوف كلامك اتعجب واطالع افعالك استغرب ارجو من الجميع مساعدتي في هذا الشي برائي او نصيحة او حاجة انا انسان طموح وابي زوجتي تكون طموحة علشان نربي اولادنا بالطريقة الصحية واترك لكم الرد ملاحظة المثل من تاليفي غير المثل الحقيقي |
عذراً نقل للقسم المناسب .. المقبلين على الزواج |
السلام عليكم ورحمة الله وبركاته
اخي الكريم اولا الف مبروك الزواج والله يبارك لك فيها ويبارك عليكم ويرزقكم الذرية الصالحة بارك الله في على التذكير والنصح لزوجتك وهذا واجبك تجاهها كزوج بكل تأكيد ولكن يا أخي لا تتوقع منها أن تتغير في ظرف شهرين من زواجكم ما تعودت عليه عشرين أو خمس وعشرين سنة من حياتها يعني كثرة النصائح والتوجيهات لا تجلب نتيجة برأيي ... اذا جات وعاشت معك وشافت طريقتك ستمتثل فيك كقدوة وتصبح أحسن منك بعمل الخير والتواصل باذن الله. خف عليها شوي .. واعطي النصيحة مرة واحدة واترك لها حرية اتخاذ قراراتها بعيدا عن كل ضغوط هذه ستصبح ربة بيتك وام اولادك باذن الله .. وتحتاج لأن تصقل تجربتها بنفسها الله يوفقكم |
أولا ألف مبروووووك على الملكه وعقبال حفل الزواج والأولاد
أخي الكريم أنا لاحظت في كلامك إنك تقول لها إنها تتصل على أعمامك وعماتك وتقول لها لازم تصلين الرحم أخوي أعمامك وعماتك ليسو من أرحام زوجتك بل إن أعمامك أجانب على زوجتك أيضا لا تتوقع ولا تتصور أن تتغير زوجتك في ظرف شهرين وتتصل على أرحامك وتسأل عنهم وعن حالهم فهي غريبه عليهم ولم تتعود والمرأه بطبعها خجوله فرحمها وقدر حالها ومشاعرها ولازم تتحملها هالفتره فهي ما زالت بحضن أهلها وأنت دخيل في حياتها يعني لاتتوقع إنك بتغيرها بهالسهوله وأيضا لا أنسى أن أقول لك لاتكرر النصيحه ولا تتبع زلاتها فإن كررت النصيحه وبكل غلطه غلطتها تقول لها وتنصحها بتقول في نفسها هذا ما همه إلا يدور زلاتي وما فيه إنسان معصوم من الخطأ ابحث عن محاسنها وعظمها وعن زلاتها وصغرها لتنعم بحياة ملؤها الحب وإن شاء الله إذا تزوجتو لكل حادث حديث وراح تتفهم الحياة الزوجيه وأسرار بيتها بس اصبر فإن بعد الصبر فرج وبعد الليل صباح الله يجمع بينكم على خير تقبل مروري |
مادري اخوي بس احس انها متزوجه مدرس دين ...
خف عليها ومثل ماقالو الاخوان مستحيل تتغير بطرف شهرين انت لا تكثر نصايح لانها بصراحه مزعجه خلها تتبعك بتصرفاتك مو بكلامك |
يا متاعبني قالت عين العقل خلها تتبعك بتصرفاتك مو بكلامك
بس عندي سوال وش شهاده زوجتك او مستواها |
سبحان الله ..
انا نفس حالتك من شهرين ملجت .. ولكن الى الان ما تكلمت لها بنصائح وتوجيهات الا فيما ندر .. تدري ليش .. علشان ما تحسسها انها على غلط .. وانك تبي تعيشهاا على مزاجك .. والنتيجة .. ما اطلب طلب الا تاتيني الموافقة علطول .. ولو كان طلب فيه اختلاف بيننا في الراي .. ولله الحمد والمنة. نصيحة .. الرجل يربي زوجته بافعاله .. لذلك تحبه وتسوي نفسه .. ولا يكثر طلبات فتضعف الطاعة وتقل .. اما كثير الكلام .. والنصائح والتوجيهات .. فنهايتهما صدقني سيئة جدا .. خف على البنت واجد مو شوي :) .. موفق |
اخوي .. تذكر دائما ان النصائح لها ثفل في القلب
|
وعليكم السلام ورحمه الله وبركاته، مبروك ما شاء الله، والله يتمم لكم على خير ان شاء الله... اخوي الكريم ما شاء الله نصائحك زينه ولا عندي تعليق عليها... لكن اخوي كثر الكلام للرجال مهوب زين، واللي اقصده في حالتك كثر النصائح والتوجيه... يعني بكل صراحة مسألة انك سألتها ثلاث مرات اذا كانت موافقة، يعني معليش اشوف انها شوي غريبة، يعني مرة وحدة تكفي، والظاهر انك حريص وما شاء الله زوجتك عاقلة واهلها اجاويد، ولا لو وحدة ثانيه كان قالت لك "تراك اشغلتنا" :29: بعدين اخوي ترا ما فيه احد فينا كامل وكلنا مليانين عيوب، وكلنا نحتاج للتوجيه والنصح، لكن مهم جدا بعد ان الواحد يختار الوقت المناسب، موب الواحد بس يمشي وينصح خلق الله، يعني انت بعد لا تصير قلق :25: وترا على فكرة كثر النصح يكره في الشخص نفسه، وانا اعرف ان الدين النصيحة لكن موب على كل وقت... يعني تخيل ان واحد من اصدقائك كل يوم جاي ينصحك بغض النظر وش ينصحك فيه، بعد فترة بصير معاد لك خلق لا تشوفه ولا تقابلة ولا تكلمه... بعدين اخوي الغالي النصح بالكلام ماله تأثير مثل النصح بالفعل، واحد الاخوان الله يعطيه العافيه ذكر هالنقطة، يعني بكرة ان شاء الله لين تزوجتوا وانت تكلمت عن صلة الارحام تقدر تطلب من زوجتك انها تجي معك لين جيت تروح تسلم على اهلك وجماعتك، ولا اظن بيصير عندها اي مانع على هالشي... لكن انك تعطيها توجيهات/اوامر والبنت عن اهلها ترا والله البنت تمل، وكلمتك معاد يصير لها قيمة... واتمنى ما تفهم كلامي غلط انت الان زوجها شرعا وكلمتك المفروض زوجتك تحترمها، لكن انت بعد قدر انكم للحين ما بعد تزوجتوا عرفا(منتوب ساكنين تحت سقف واحد)... على العموم اخوي الدين مهوب بس نصح ونصائح، الدين يشمل امور كثير، وكلنا مقصرين في جانب او في آخر... نصيحة لك اخوي الغالي انك تخفف نصائحك لزوجتك، ولو تقطعها هالفترة يكون احسن، وبكرة ان شاء الله ربي بيجمعكم في بيت واحد، وبعدين ذيك الساعة انصحها واطلب منها انها تسوي اللي انت تبيه... والله يوفقك ان شاء الله ياخوي... |
اقتباس:
والله داخله البنت لعبة قطار الموت قاعد تقول لها ترى الحياة صعبه انت موافقه لا وبعد تقول لها لازم تغيرين حياتك طيب لو ماكانت عاجبتك طريقة حياتها ليه تزوجتها اكيد هالسؤال تبادر لذهن البنت ماشاء الله عليها اللي وافقت صراحه تلقاها الحين متخوفة منك كل شي ياخوي يجي بالتدريج وانت قاعد تستبق الاحداث تبيها تصل الرحم وتزور المرضى اغلب البنات هذه الاشياء هي متعوده ان امها واخواتها المتزوجات هم اللي يسونها وعنده الامور هذه ثنائية لكن بعد الزواج راح تحس انها صارت حرمة لازم تقوم بهالاشياء وعلى فكرة بالنسبة للكتب اللي ماقرتها يمكن انها ماتحب تقرا وتحب تسمع مثلا يمكن نحب احد ينقل لها الثقافة انا مثلا افضل قراءة قصه على مشاهدتها بالتلفزيون والبعض بالعكس وبالنسبة للطموح هي ماوصلت للجامعه الا وهي طموحه لكنك الحين شيل من راسك كل افكار الاصلاح واستمتع بفترة الخطوبة وابعد عنك لافكار اللي ودك توصلها بالكلام لان افكارك هذه تجي عن طريق الممارسة وعن طريق افعالك انت واذا تبيها تتكلم معك عن حياتكم راح تتحسسها كذا انها داخله مصارعه مو زواج لاتقول لها خلينا نتكلم عن حياتنا تعطي الامر هيبة خل الكلام من خلال السواليف وخله تلقائي حتى شخصيتك وطريقتك خلها تفهمها من كلامك وسواليفك مو من خلال طرحها مباشرة انا احب كذا واكره كذا انا ابي كذا وماابي كذا لالالالا الحين خلها ترتاح اشبع عاطفتها بهالفترة واستغل هالفترة ولما هي تتعلق فيك راح تبحث بنفسها عن الاشياء اللي انت تحبها وراح تفكك من عناء طرح ارائك عليها وعلى فكرة ذكرتني بامي الا الان تذكر ابوي تقول واول يوم شافني قال لي ترى انا مااحب الحرمة تلبس كذا ولااحب الحرمة تطلع كثير ولا احب الحرمة اللي تطول لسانها ولا احب ولا احب تقول عطاني محاضرة قررت بعدها الانفصال لولا تدخل الاهل :30: |
| الساعة الآن 01:44 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©