|
هل فقدت جاذبيتي ام انه تغير
يمكن تشوفون موضوعي ما يستاهل او انه مب مشكله كبيره بس و الله انا حاسه بقهر و كلما احاول انام ما اقدر و يصيدني ضيق تنفس و قلبي يدق بسرعه من الحره و القهر و الكتم (مرات احس اني بموت و انا مقتهره)
انا متزوجه من 3 سنين و نص و الحمد لله عندي بنت 2 و نص و ولد سنه و نص و بيبي بوي شهرين السالفه ان زوجي متغير علي من فتره بسبب مشكله بسيطه و سخيفه المهم من بعد هالمشكله يمكن قعدت معاه اسبوع احاول انسيه المشكله و اكلمه بالكلام الحلو و اتعدل له و ابوسه الخ الخ بس ما في فايده يقعد يعيد السالفه مليوووون مره و يمنعني من اشياء بسبب هالمشكله يعني اشياء مالها علاقه بالمشكله (بس يبي يقهرني و يشوف اذا اسمع الكلام و لا لا اقول ان شا الله و لا لا ) يعني يختبرني في اشياء تقهرني يمكن ما فهمتوا ببين لكم المشكله الاساسيه: مره كنت رايحه مكان و قال لي لا تودين بنتج معاج و حاولت معاه بشتى الطرق بس ما في فايده المهم قلت له اوكي ما بوديها و انا ما وديتها معاي بس امي ودتها لانها قعدت تصيح (تبكي) ( و هو مع امي علاقتهم مش اوكي من اول ما تزوجت عشان جي كبر الموضوع) و قال انتي تكسرين كلامي مع اني ما لي علاقه بالموضوع هالسالفه صارت تقريبا من 3 اسابيع و تأسفت له مليووون مره المهم الحين اشوفه كللللش ما يعطيني ويه ما ادري شفيه يعني ما نسولف مع بعض الا اذا كنا مع عيالنا اما انه يكلمني انا مستحيل كل اللي يقوله سوي عشا حطي الغدا يبي حطي بسسسسس لا غير انا بصراحه اشتقت له و ودي يلمني مثل قيل ودي يلمسني قبل حتى و انا اسوي له العشا يقعد معاي في المطبخ بسولف و يضحك و يسوي حركات انا ابي علاقتنا تستمر مثل قبل ما ابيها اتغير احسه ما صار ينجذب لي مع ان مب ناقصني شي الحمد لله صج اني توني والده من شهرين بس الحمد لله جسمي حلو حتى كرشتي صغيييره ما تبين (في بنات مب متزوجين كروشهم اكبر من كرشتي) و الحمد لله انا حلوه و فوق هاي كل يوم اتعدل له احط مكياج خفيف او كحل و غلوس و اتعطر اتعب مع عيالي و اسهر الليل و النهار مع البيبي يعني في اليوم ما انام الا 3-4 ساعات و مع هاي اتعدل له و اقابله بابتسامه (انا اصلا دايما مبتسمه الحمد لله) و مع كل هاي ما يقولي كلمه حلوه و لا يبتسم و لا يسوي شي كللللللش قبل شوي لما دخل البيت كنت واقفه اول ما شفته ابتسمت له ( و الله اني كنت اشوفه بعيون مشتاقه ) مر جنبي و مسكت يده برقه (اتدلع عليه) شسوى؟ قال لي: شفيييييييج؟!!! شفته بنظرة حب و ابتسمت له قال: هديني (اتركيني) انبطت جبدي و افتشلت بس ما بينت له و غيرت السالفه و قلت له عيونك حمره بس حطيت له العشا و راح ينام ألحين انا ميته من التعب ودي انام بس مقتهره و الله عيالي كلهم نايمين و زوجي نايم و عندي وقت انام بس مب قادره 24 ساعه افكر ليش يعاملني هالشكل؟ ليش ما ينجذب لي؟ اذا عندكم طرق قولوا لي عنها ملاحظه1: انا من بعد الولاده لحد الحين ما وقف عني الدم لاني خذت حبوب ما تناسبني فمن بعد الولاده ما صار شي بيننا الحين انا كنسلت الحبوب و اتفقت مع زوجي اني اخذ الحبوب من بعد ما اخلص الرضاعه يعني بعد شهر او شهرين و هو قال خلاص ما راح يصير بيننا شي خلال الشهرين الجايين بصراحه استغربت منه لان في وساثل منع حمل بس هو رافضها و الحبوب ما اقدر اخذها الا بعد ما يوقف الحليب يعني هل ممكن يصبر 4 شهور بدون جماع؟و من غير الـ4 شهور اللي قبل الولاده (ما صار شي فيها الا مره) ملاحظه 2: زوجي كذا مره لقيت بنات يتصلون له ودايما له اسرار حاط باسوورد عالكمبيوتر و عالتلفون و وايد يسافر و البنات اللي يتصلون له مب من البلاد كلها مكالمات خارجيه ملاحظه3: انا عمري 24 و هو 28 |
الله يعينك اخيتي عيوني ممكن تركزين وتعرفين تحديدا متى تغير عليك انت تقولين من 3أسابيع هل متاكده من هالشي او انه متغير من قبل وماشعرتي بذلك ولقاها فرصه هالزعله وتعلق بها واين كانت ولادتك واين قضيتي الاربعين؟ |
هلا اختي و الله هو متغير من فتره بس على خفيف
هالمره بزياه يعني قبل كان يجاملني شوي بابتسامه و يسولف معاي و يضحك و التغير صار من شهر 6 او 7 لما سافر احدى الدول العربيه المعروفه بالبنات و السوالف القذره من بعد هالسفره زادت مكالمات انصاف الليالي و مرتين شفت الاتصالات اللي تجيه و كانت مكالمات خارجيه من هالبلاد و رديت عالثنتين و كانوا بنات و كل وحده غير عن الثانيه عن سؤالج قعدت في المستشفى 5 ايام وبعدين ولدت و قعدت بيت ابوي 23 يوم و زوجي كان مصر اني ابقى هناك اسبوع واحد فقط بس انا حاولت معاه و خلاني اطول |
بس الواحد يكون امامه قمر
يحسب انو كل الناس قمر مثل زوجتو ويحسب انو كل البنات كلامها مثل زوجتو صدقيني وجدها حجه ليخاصمك ثم اللي اعرفو انو الرجل ما يقدر يصبر اسبوع كيف هو صبر اربعة اشهر قبل الولاده وشهرين بعدها ثم هناك حبوب لمنع الحمل تناسب الرضاعه |
انا بعد اقول المشكله مب لهالدرجه كبيره (و هو يقول حتى لو امه خذت بنته معاها بدون اذنه بيسوي مشكله معاها، بس و الله امه تاخذ البنت وتوديها كل مكان بدون ما تستأذن مني او منه حتى انا احسبها معاهم في البيت و لما يرجعونها اشوفها شاريه اغراض و ألعاب و اعرف انها طلعت)
و عن الحبوب انا خذت حبوب رضاعه بس ما ناسبتني و لحد الحين ما وقف الدم تقول لي الدكتوره ان الدم من هالحبوب قلت لها تكتب لي غيرها قالت ما في الا نوعين في بلادنا (حبوب رضاعه) و كلهم نفس الشي فأنا انتظر اوقف الرضاعه عشان اخذ الحبوب العاديه |
اختي السالفه اللي صارت بينكم ماكانت تستدعي ابد هو اخذها حجه وقال جت من الله مايغير الرجل الا امرأه الان عليك بالتعقل والحكمه وان لاتبالين بردود فعله تجاهك ابقي كما انت تلك الباسمه المنتعشه التي تنعش من حولها شوفيلك حل ياقلبي بهاالنزيف واخلقي جو رومانسيه وحركات لاتجهلينها ونسيه كل البات اللي شافهم لميه ياقلبي وانثري الحب والفرح في ارجاء بيتك ولاتنسين اهم شي الا وهو الدعاء ان يصرفه الله تعالى عن بنات الحرام وان يجعلك قرة عين له وان يثبته على الحق ويهديه ويصلحه واحذري يا اختي من التجسس عليه الله يخدم غفلتك ويعينك يارب ومهما طار مصيره يرجع لعشه وحضنك |
انا ابي اوقف هالنزيف بس عشان هالمشكله ابيه يرد لي
بس هو يقول حتى لو وقف الدم ما بيصير شي الا بعد ما يوقف الحليب (هو يقول: هالشي عشانج مب انتي تقولين تخافين تحملين خلينا بعاد لين ما يوقف الحليب و تاخذين الحبوب) و انا صج اخاف احمل لان عيالي جبتهم ورا بعض و تعبت وااااااايد الحليب في صدري خف و قررت اني اخذ الحبوب من اول دوره تجيني من بعد ما يوقف النزيف بس هو يقول حاولي تزيدين الحليب في صدرج مب اتعمدين انه يخف و مره كنت في المركز الصحي مخلصه و قاعده انتظره الا يتصل لي و يقولي اتشوفين البنت الواقفه عالباب مع امها قولي لامها ابي اخطب بنتج لزوجي و الله اني توقعته يتغشمر او انه يقصد بنوته صغيره يوم شفت الا اشوف وحده مرتكزه عالباب و ويهها طالع و لابسه نظاره شمسيه و الشعر طالع من جدام انبطت جبدي و القهر انها مب حلوه بس النظاره معطيتها شكل |
ياقلبي انت ترضعين ؟ الرضاعه الطبيعيه اذا كانت بنسبة ميه بالميه فهي مانع للحمل
واذا قالك ماراح يصير شي قولي مو بكيفي كلم قلبي اللي مشتاق لك واساليه معقوله مااشتقت لك ياروحي؟ |
[warning]
الاشراف: يرجى من الأعضاء الالتزام بالبند التالي من بنود الكتابة في المنتدى: 2) المواضيع التي تتعرض لمجتمعات أو بلدان أو جنسيات أو قبائل أو أقاليم أو دول أو حكومات معينة, وكذلك التعرض لأنظمة تلك الدول وكذلك المقارنة بين رجال ونساء الدول سواء بالذم او المدح [/warning] |
اختي انا رضاعتي مب 100% طبيعيه ما في الا قطرات من الحليب بس ارضع عشان زوجي ما يسوي لي سالفه و يقول انتي متعمده ما ترضعين
و انا قلت له لازم يصير شي بينا لان هاي حقي اذا هو ما يبي انا ابي (انا ما احب الجماع بس قلت له هالكلام عشان ما يبعد عني اكثر) .... |
| الساعة الآن 12:53 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©