|
ما هي ترتيبات يوم الملكة " حفلة الخطوبة "
السلام عليكم ملكتي بعد شهر بالضبط ان شاء الله .. بس مو عارفه ايش اسوي اتفقت مع خطيبي ان العقد يكون بعد 3 اسابيع والحفله الاسبوع اللي بعده .. بدأت أدور فستان للملكه .. لكن الحفله نفسها مو عارفه ايش اعمل من تجهيزات هل لازم كوشه صغيره او زفه او ايش اسوي :( رح اجيب مصوره ورح اعمل شعري والميك اب في الصالون .. الحفلة عائلية .. بليز أحد يساعدني مره محتاره .. |
الله يوفقج يارب
ان شا الله المتزوجات يفيدونج |
عزيزتي..
لا أحبذ التكلف في حفل عقد القران. أعتقد أن الفستان يكفي مع الإشارة إلى أن يكون بسيطاً وغير مكلف كثيراً .. واطلبي من إحدى شقيقاتكِ أو قريباتكِ أن تتولى مهمة التصوير .. حتى لو تطلب الأمر شراء كاميرا فيديو (بالتاكيد ستحتاجينها في المستقبل وهناك بالطبع كاميرات تحتوي على ميزة التصوير الفوتوغرافي وتصوير الفيديو في آن واحد) أما الكوشة والزفة والتصوير الاحترافي وغيرها من ترتيبات فاتركيها ليوم الزفاف إن شاء الله. وفي كل الأحوال احرصي يا عزيزتي على عدم الإسراف والبذخ المبالغ فيه. |
تقدري تسوووين حفله ينقال لها سفرة الخضرا او سفر الملكه
تكون عباره عن قماش حرير اخضر وتكوني مجهزه انواع من العشا وطبعا الاهل راح يكونون معكم رتبيها ع القماش الاخضر مع قليل من الشموع والورد المجفف ولازم يكون جنبكم صحن به عسل وملعقه وحده بس انتي تعطينه العسل بيدك وهو كمان يعطيك العسل بيده ربي يهنيكم |
ماشاء الله تبارك الله
الله يسعدك ويسخرلك ويتمم عليكم ويجمعكم على خير قبل كل شي افهم من كلامك ان حفل عقد القرآن في شهر رمضان ؟ ام في العيد ان شا ءالله عموما اذا كان الحفل في العيد فحلو يصير العيد عيدين ان شاء الله:17::14: بس انتبهي خلصي ترتيباتك من بدري حتى ماتنشغلي في العشر الأواخر من رمضان الله يبلغنا اجمعين اختي الكريمه وعروستنا الجميله بإذن الله بما انه حفل عائلي بسيط وهذا من اجمل مايكون نصيحتي لك 1\\ اختيار فستان جميل وبألوان جميله مفرحه وابتعدي عن الابيض:29: لأني صايره الاحظ البنات في الملكه يلبسون ابيض:( المهم 2\\ حجز الصالون للمكياج والشعر واختاري المكياج الناعم اللي يحليك من غير مايغير ملامحك الجميله واختاري التسريحه (( نقطه مهمه لاتقولي لهم في الصالون انها ملكه لانهم راح يرفعوا السعر عليك قولي لهم حفله خاصه ومهمه وحابه اطلع فيها من احسن مايكون وبما انه الصالون موثوق فلاتخافي بإذن الله)) لكن في الزواج ان شاء الله لازم تقولي لهم حتى يثبتوا لك الطرحه :14: 3\\ من رأي الشخصي جميل ان تحجزي عند مصوره محترفه بسعر معقول حتى تأخذ لكم الصور التذكاريه التي تبقى معاك على مر السنين فأكيد لها متعة اخرى:) 4\\ احجزي للجاتو من طبقتين بسعر معقول من مكان تثقي بطعم الكيك عنده 5\\ لاتنسي تنوري البيت من الخارج بعقود الأنور فهذي لوحدها لها فرحتها للكبار قبل الصغار :) 6\\ العشاء ايضا معقول من دون تبذير اتفقي مع احد المطاعم اللي يجهزوا لك بوفيه على عدد الاشخاص الحاضرين ومن نفس المطعم يجهز لك الطاولات ويجي على الموعد المحدد يحضر العشاء 7\\ ابحثي في الانتر نت عن زفات عرايس بدون موسيقى هناك اشياء رائعه اختاري مجموعه وجهزيها لوقت الزفه والله يوفقك ويسعدك اهم شي صلاة الاستخاره والدعاء والبعد عن التبذير والله يجمعكم على خير |
مررره شكرا بنات .. الملكه ودي تكون مميزة لأن الزواج مطول كثيير الين اخلص الجامعه تقريبا سنتين او اكثر .. فستاني لونه ذهبي نفس هذا وش رايكم ؟ ................. ........... الاشراف: يمنع وضع صور غير مغطى الوجه واجزاء الجسم هل يصير زفه أنا لحالي طبعا صح؟ بعدين التلبيسه بعدين جلسة التصوير والا قبل التصوير بعدين يلبسني الشبكه ؟ ما ادري كيف يصير حتى العشاء متى يكون ؟ هو وامه وخواته رح يجون .. أنا اول وحده في العايلة تتزوج وهو نفس الشي فـ مره محتاسين مو عارفين بالضبط وش مفروض يصير :21: |
ماشاء الله تبارك الله
الله ييسر امركم يارب ومن حقك تفرحي وتنبسطي هذي اجمل الايام الله يديمها عليكم يارب بالنسبه للون الفستان ذهبي حلو بالنسبه للتصوير اكيد المصوره اللي راح تاخذ لك الصور راح تحضر معاها خلفيات وإضائه وطبعا راح تكوني محدده عدد الصور يعني راح تقولك ( 40 صور بسعر &&&) الله اعلم او حسب المهم هي راح تاخذ يمكن 200 لقطه من الصور وبعدين انت تختاري 40 صوره او 30 صور حسب الاتفاق بينكم فجهزي مكان خاص للتصوير بعد ماتجهزي من المكياج والتسريحه وترجعي للبيت خليها تاخذ لك مجموعه من الصور لوحدك بحركات مختلفه وتصوري مع اخواتك وامك واهلك ثم في هذه الاثناء اهلك يكونوا مجهزين العشاء لأهل العريس يتعشون ويتعشوا الرجال بعد مايخلصوا يجيك العريس وتاخذوا لكم كم لقطه مع بعض :o ومع اخوانك وابوك ثم تبدأ زفتك انت وزوجك عريسك :14: مادام مافي احد غير اهلك واهله وين المشكله انزفي معاه وخلي المصوره تاخذ لكم لقطات اثناء الزفه ثم يبدأ يلبسك الشبكه ونبهي المصوره انها تاخذ لقطات لهذا اللحظات الجميله وبعدين قطعوا الجاتوه مع بعض وقدام اهلك او اشربوا عصير وبعدين هو يروح مع الرجال وانت انبسطي مع اهلك واهله .. أكيد بتقولي انا ( جوعانا ماتعشيت):d طبعا ياعروسه مستحيل تتعشي لانك اصلا مالك نفس للأكل حاولي تاكلي كويس قبل لاتبدأي بالمكياج وباقي الوقت اللي يخلي العصيرات وانتبهي ان تأكلي شيء يظهر منك رائحه في فمك بصل ولا ثوم:29: انتبهي حذرتك:22: وبعدين اذا عندك اهلك عادي تجلسي انت وزوجك في غرفه مع بعض ممكن انك تنتقلي انت وهو الي الغرفه الثانيه تجلسوا مع بعض شوي يعني نوع من التقارب بينكم وكسر الحواجز وبس ياعروسه نومه سعيده ان شاء الله هذا إذا نومتي ليلتها:d الله يتمم لكم على خير يارب ويرزق بنات المسلمين وشباب المسلمين |
روح الغالي تسلمييييين لغااليك .. سهلتي على الموضوع كثيير لأني مو عارفه ههههه واكيد مارح اكل وقتها :26: |
هلاء اقولك نصيحة مهمه لايصير ثوبك زي ثوب ((
خالتك)) يعني ام العريس |
| الساعة الآن 03:45 AM. |
Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©