|
ابني وابن عمته... وتخاصمنا
السلام عليكم ورحمة الله وبركاته
ياللعجب حصل لي موضوع غرييييب او يمكن انا كبرت الموضوع حبتين ولدي عمره 4 سنوات وضربه ولد عمته وديم يكررها وولدي مستحيل يدافع عن نفسه يقول ماقدر حبيت افهمه يتعود ياخذ حقه فمسكت ولد عمته وقلت له ياخذ حقه ويضربه نفس مااضربه المهم طرشت لامه مسج بإن ولدي ضرب ولدها المهم هي حمقت واتصلت ترفع صوتها وتقولي مالك خص بعيالي ودايم يشتكون ان انا اضربهم وقلت لها عادي عيالك عم عيالي المهم انا ماارضى عليها ولاارضى تزعل مني لاني من جد احبها هي تقرب لي قبل ماتكون اخت زوجي ورحت لها البيت على طول اول ماسكرت الخط وضميتها وجلست اصيح قلت لها ان مب جهال يسوون حساسيات بينا وانا وانتي اكبر من هالشي وتمت تصيح وتقول والله انتي احسن مني. مادري التصرف اللي سويته صح والا المفروض ماجيتها البيت لأن ولدها هو اللي غلط على ولدي وضره ضرب بين بجسمه بس مارضيت ان نتخاصم عشان صغار يتضاربون شوي ويتراضون. |
اللي سويتيه عين العقل
الصراحه انتي كسرتيها بطيبتك ماشاء الله عليك |
وعليكم السلام ورحمة الله وبركاته
والله انا اشوف انك لو اساسا ماارسلتيلها المسج كان افضل ..ومرة ثانية لو ضرب ابنك كلمي الطفل نفسه واعرفي ليش ضربه وقولي له انت ترضى ان احد يضربك وانصحيه وخليهم يتسامحون وانهي المسألة بينهم بالحب ..الأفضل ان الأطفال يتعلمون التسامح |
اقتباس:
انا مع سابرينا تصرفك سليم عزيزتي :17::22: |
اقتباس:
خلاص اخذ حقه ولدك وانتهينا والافضل ماتخلون الاطفال يفرقونكم لانهم ساعه ويرضون وزين ماسويتي مع عمتكم |
تصرفك الأول غير صحيح لما مسكتي ولد عمته ولما طرشتي الماسج ولكن صلحتي خطاك لما رحتي لها وخيركم من يبدأ بالسلام وعندنا مثل شعبي يقول (الصغار يتصالحون والكبار يتفاضحون)
|
[grade="00008B FF6347 008000 4B0082"]
وعليكم السلام ورحمة الله وبركاته بصراحة ولاتزعلي من ردي أنتِ أخطأتي من البداية بأن مسكتي الولد وطلبتي من ولدك يضربه هذا أكبر خطأ لأنه أولاً بيكره ولدك أكثر وبيكرهك أنتِ وبيصير يضرب ولدك دائماً وبصراحة لا تزعلي من كلامي لاتحطي عقلك بعقل الصغار أبداااااااااااااااااا ولا تخافين بيكبر ولدك ويتعلم يدافع عن نفسه بنفسه بقولك شيء نحن في عائلتنا مانزعل من مضاربات اولادنا أبداااا نتركهم يتضاربوا ويتراضوا بنفسهم وإذا وحدة فينا من الحريم تدخلت في المضاربة فهي ياإما تضربهم كلهم يا إما تتركهم كلهم وإذا أحد اشتكى من أولادنا نقلهم أنتم أخوان تسامحوا والحمد لله كبروا اولادنا متحابيين ومثل الأخوة والأن مايتضاربوا كانت وحدة فقط منّا أسلوبها مختلف وكانت تضرب اولادنا وتتدخل وتشتكي لنا من أولادنا وكل مايشتكي لها أحد من أولادها تقول له روح أضربه لاتخاف وتروح معاه وصرنا نكره جلستها معانا وأولادنا يكرهونها من قلبهم ويكرهون أولادها ويضربونهم بس بعدين ولله الحمد عرفت إنها شاذة بيننا ورجعت عدلت من أسلوبها وصارت زينا ولله الحمد ورجعوا أولادنا يحبوا أولادها وارتاح الجميع وأنتِ حلو منك إنك رجعتي وتسامحتي وعدلتي غلطك بس رجاء حار لاتعيدينها ترى إنتِ الخسرانة ياما عوائل تقاطعت بسبب أطفال والاطفال رجعوا يلعبوا مع بعض والأسر مازالت متقاطعة ولا تخافي بينضرب ولدك مرة واثنين وعشرة بس بعدها بيتعلم من نفسه لما يكبر يدافع ويصير مثلهم بس انتبهي لاتقولي له روح أضرب وتنمي فيه روح الحقد وأخذ الثأر... .وماأجمل أن تعلميه التسامح فهذا ماسينفعه دنيا ودين بإذن الله[/grade] |
أشكرك من صميم قلبي على دررك ومعاك حق بكل كلمه قلتيها بس قلب الأم مايتحمل لهذا تصرفت هالتصرف
|
| الساعة الآن 11:01 AM. |
Powered by vBulletin® Version 3.8.12 by vBS
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©