![]() |
أرشدووني كيف أتصرف ؟؟ أحتاج مساعدتكم..
السلام عليكم ورحمة الله وبركاته..
أتقدم بالشكر الجزيل لكل من اطلع على موضوعي وأتمنى الرد عليه ولو بدعوة .. فأنا فعلا حائرة ولا أعرف كيف أتصرف وهل الموضوع يستحق قلقي واهتمامي أم أنها مجرد وساوس وأفكااارمن الشيطان لكن ياجماعة ذبحني التفكير والقلق .... المهم ما أطول عليكم .... مشكلتي بأني حاسة ان خطيبي مايثق فيني ويشك فيني وبتصرفاتي,,,مع اني والله ولا أزكي نفسي بنت عفيفة وشريفة ومالي أي علاقات سابقة وهو أول رجل في حياتي,, وغير كذا كنت دائما تفكيري محصور بدراستي وبتحقيق أهدافي وطموحاتي .. وما احب اشغل نفسي بتوافه وبسواليف بطالية ..وحتى بفارس الأحلام مافكرت ولا حلمت وتخيلت مثل البنات لأن هدفي كان دراستي وتعليمي وحتى الزواج كان حدوثه بشكل مفاجيء وسريع ... طبعا الحين بس (ملكة ) الزواج لسى ماصار ... يمكن طلعت عن الموضوع بس اعذروني أفكاري مشوشة شوي... المهم ان الشي اللي زرع فيني هالإحساس ان مرة وخلال زيارته لي في البيت كنا لوحدنا في المجلس واضطريت أطلع عنه وأروح للمطبخ وتركت جوالي عنده على الطاولة ,,وأخذت وقت الين رجعت ,, ولما رجعت لاحظت إن جوالي متغير وضعه عن قبل ؟؟ !! يعني أحد محركه فشكيت انه مفتش الجوال لكن ما حبيت أظلمه وأظن فيه ظن السوء فمشيت الموضوع عادي... غير كذا هو يعرف عنوان البريد الالكتروني الخاص فيني (الإيميل) وكذا مرة حصلت إضافات من أشخاص ما أعرفهم وواضح انهم شباب ... طبعا أنا على طول شكيت انه يبغى يختبرني من خلال الإيميل... مع العلم ان الأشخاص المضافين عندي بالإيميل محدودين وأعرفهم شخصيا وما سبق وجتني إضافة من شخص مجهول إلا بعد حصول خطيبي على عنوان إيميلي ,,, هذا اللي خلاني أربط الأحداث ببعضها ... وايضا دائما يحقق معاي بموضوع الطلعات اللي اطلعها مع أهلي ويكثر من الأسئلة والتحقيقات.... وغيره وغيره مواقف تحصل تأكد لي انه مايثق فيني ثقة تااامة ... أنا الحين محتااااااااااارة كيف أتصرف معاه أحيانا أفكر بالانفصال عنه لأني خايفة من مصيري معاه ؟؟؟؟وأخاف شكوكه تزيد بعد الزوااج وينكد علي عيشتي... ملاحظة << عندما استشرت صديقة لي بموضوعي قالت لي يمكن كان عنده علاقات سابقة وتجارب وصار ماعنده ثقة بالبنات ومايضمن أحد ؟؟؟ انتم وش رايكم؟؟؟؟ تكفوووووووووووووون ريحوني ارشدوني انصحوني لاتبخلون على أخت لكم في الله محتاجة لكم.... |
أولا بارك الله لك وبارك عليك وجمع بينكما في خير .. أنا في بداية زواجي كنت مثل زوجك ولكني لم امر بفضل الله بتجارب مع بنات كما تظن صديقتك وأقول تظن لأن كلامها لو أخذ عن يقين ستتدمر حياتك وليتها لم تنطق بهذا الكلام لانه باختصار يزيد الطين بله .. كل شخص في بداية مشواره يجب أن يرتاح قلبه للشخص الي معه .. أنا كذلك كنت أفتش في جوال زوجتي وكانت تتضايق وتقولي أنا ما احبك تفتش هذا الشيء جعلني أشك بها أكثر .. ولكني كنت أتعمد أفتش وأمامها وفي المقابل أدعها تفتش في جوالي .. فالنصيحة الاولى عادي أن زوجك يفتش والمثل يقول لاتبوق لاتخاف .. وبعدين مسألة الشك في المرأة مسألة وقتية في الملكة وبعدين راح تزول إذا تمت المخالطة التامة .. الأهم أنك لاتفعلين أشياء تثير الشك حولك مثلا إذا خرجت مع اهلك واتصل عليكي ومارديتي هذا يثير الشك صح أن الشك هنا خطأ من الرجل ولكنك تبحثين عن حل .. كذلك أنك أنتي تتصلين عليه إذا خرجتي هذا يزيد ثقته بك .. أما عن الإيميل فأفضل طريقة أراها أنك تخبريه أن هناك ايميلات جديدة تضيفك واجعليه على اطلاع بالموضوع وان كان هو المدبر فهنا سيزول الشك باذن الله .. فكرة الانفصال شيليها من رأسك لان الأسباب تافهة وهي مسألة وقت .. أسأل الله أن يؤلف بين قلوبكم ويسعدكم في الدنيا والآخرة .. |
اقتباس:
الله يجزاك خير يا أخوي بصراحة ماني عارفة كيف اشكرك فعلا كلامك ريحيني وطمني لأن هالمسألة مضايقتني لأبعد الحدود .. وفكرة الانفصال دائما تراودني... ولكن بصراحة كنت مقتنعة بكلام صديقتي لأن المتعارف عليه ان الرجل الشكاك يكون صاحب تجارب سابقة ولكن تفاجأت ان الشك قد يكون صفة واردة عند بعض الرجال ؟؟ ومالها علاقة بالتجارب السابقة... الله يوفقك مع زوجتك ويصلح ذريتكم ...ويرزقك من حيث لاتحتسب .. |
|
اقتباس:
فعلا مثل ماذكرت يا اخوي هو تقدم لخطبتي فجأة ومالي اي علاقة فيه ولاحتى معرفة سابقة... وهذا اللي محيرني المفروض خطبني واختارني شريكة لحيااته يكون واثق فيني ثقة كاملة,, ولأ ماني جريئة بالعكس خجووووولة ,,,:o لكن يا اخي انا مو مقتنعة بردك تماما يعني الحين تم عقد القران بينّا واصبحت زوجته كيف أسأل عنه بعد الملكة؟؟؟؟ أهلي سألوا عنه وبحثوا قبل الملكة ولكن هذي الأشياء اكتشفتها فيه بعد الملكة وأنا محتاااااااااارة جدا .. الله يقدم اللي فيه خير للجميع.. الله يجزاك خير على الرد ويرزقك من حيث لاتحتسب.. |
المثل ييقول كل يرى الناس بعين طبعه..... والشك اذا دخل بالحياة الزوجيه قولي عليها السلام
انا مااحب ظن السوء بس دايما اللي يسوي شي غلط يتوقع الناس مثله انا اقول خلي اخوانك يستفسروا عن دينه واخلاقه اكثر .. وخليك حذره وحريصه فتره الملكه الهدف منها الواحد يعرف الانسان اللي بيرتبط فيه مناسب ولا لا ولازم تتاكدي من تصرفاته وما تتسرعي بالتوفيق |
لا تستعجلين بالحكم كثير من الشباب يكون مخزن بعقله انه لازم يختبر زوجته ولازم يعرف ويعرف قبل يتزوجها ويتورط يعني سخافات مقتنعين فيها اعتقد فتره وكم حركه يسويها تثبتين فيها انك شريفه عفيفه ويبطلها..
شوفي يا اختي هو سأل عنك وجا وخطبك وهو مايعرف عنك شخصيا شي يعني عادي انه يسوي كم اختبار بزعمه بيتأكد منك ويريح خاطره قبل يتم الزواج.. انا اشوف بعد ما تخلص حركاته ويتم الزواج ويختلط معاك ويعاشرك اكثر واكثر ويعرفك كويس رح يثق فيك تماما ويحتقر حركاته اللي كان يسويها.. لا تلومينه عزيزتي تلقين كل ربعه واللي حوله مقنعينه انه لازم يسوي هالكم حركه ويختبرك عشان يكون متأكد ومتطمن.. هذا رأيي لحد ماوصلتو له الان وطبعا لازم تنبهينه على سالفة الايميل قولي وش السالفه طول عمري محد يعرف ايميلي والحين فجأة كل يومين والثاني ضايفني شاب شكلي لازم اغيره.. يعني خليك اذكى منه وطمنيه.. لكن لو استمر وسوا حركات اقوا من كذا ساعتها فكري بجدية بس ابدا لا تبينين انك مهتمه لحركاته الحين وخليك قمة الثقه بالنفس.. |
أيضاعليك بالأستخارة ، وقولي (اللهم إن هذا الزواج خيرا لي فيسره وتممه وإن غير ذلك فعسره ويسر لي خير منه) وربي يكتب اللي فيه لك وله
|
شوفي حبيبتي لا تلومينه حتى لو ماله علاقات ترى الشاب من كثر مايشوف ويسمع عن البنات المستهترات صار يخاف ويشك ويبي يتاكد انك لست منهم
اشوفه شي عاااادي وبعد مايعرفك زين ويتاكد من اخلاقك رح يبطل ويمل |
الغاليه استخيري
والايام كفيله انها تثبت لخطيبج انج عفيفه وشريفه |
الساعة الآن 12:02 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©