|
العيب في من أبي... أم زوجي..؟؟؟؟؟
بسم الله الرحمن الرحيم... السلام عليكم أعضاء المنتدى.. في بداية كلامي مابي أصير في صف زوجي أو صف أبوي.. بس الشي اللي مضايقني من أبوي ان ما أحس انه مرتاح لزوجي مع ان الكل حب زوجي وارتاح منه (( عمامي وعماتي،، خوالي وخالاتي،، أمي )) العايلة كلها تحترمه وتقدره والكل يقوم له لمن يدخل مكانهم الكبير قبل الصغير... بصراحه ما أمدح في زوجي الله يحفظه بس عشان أحطكم بالصورة بس زوجي كريم ووصول وخلوووق مع الكل..الحمدلله مريحني عالآخر..ماتصير جمعه إلا وأهوا معاهم...المهم إن أبوي ماادري شفيه دايم يقول انه يتظاهر وان كل هذا عشان يطلع أحسن واحد وعشان محد ينتقده أو شي ،،، بس هذا كله طبعا زوجي مايعرف عنه أي شي وابوي مايلمح عن أي شي وانه مب مرتاح منه بالعكس من يحضر البيت يحترمه ويسولف معاه وضحك ووناسة،، وماخذ عنه فكرة انه عصبي ومايتقبل النصح من أحد مع ان زوجي عكس هالشي تماما...وصار موقف قبل جم يوم ضايقني كلش وهو ان بالصدفه ان زوجي انشغل يوم الجمعه وهو اليوم اللي يتجمعون فيه أهلي زوجي انشغل مع ربعه وماقدر يحضر يتفطر معاهم بعد الفطور قعد معاهم.. المهم يوم الاثنين تفطرنا ببيت أبوي..المهم عمي زارنا يوم الثلاثاء وآنه كنت موجوده ويقول لي ريلج مايا تفطر معانا قلت له انشغل مع ربعه شويه.. عاد تعرفون أبوي شقال يقول خلاص حنا مب من مستواه وألحين مايتنزل يي عندنا..(( وقبلها بيوم متفطرين عنده )) واللي قهرني زوود انه يقوول هذا حال الملتزمين بياعين حجي ومظاهر ومادري شنو وحنا لو مزوجينها من صايع أحسن... :( على الرغم من إن ابوي قلبه كبير وحنون وملتزم واااااااااااااايد وااااااااااااااااااااايد ومثقف ومب عجوز بالعكس شباب ويفهم (( أبوي ماتعدى ال 45 )) بس هالشي وايد مضايقني صج زوجي مايعرف عنه شي بس هم آنه أتضايق لمن أسمع هالشي من أبوي... بشنو تفسرون كل هذا؟؟؟ وسامحوني على أفكاري الرقيقه آعرف انه مو مرتبه.. ومشكوورين.. |
أهم شي أنك مرتاحه مع زوجك وأبوك أيضاً يعامله معاملة طيبة ..
أما بالنسبة لكلام أبوك لاتلتفين له وحاولي تبينين لأبوك أن زوجك يحبه ويقدره... |
ينقل للثقافة و التوجيهات ..
|
يمكن أبوك شاف تعلقك بزوجك
فخاف من إنك تفضليه عليه أو إن محاسن زوجك تطغوا على محاسن والدك يعني الموضوع والله أعلم فيه غيرة.. أو عدم الرغبه في ظهور شخص آخر أفضل منه بين العائله .. الحل برأيي تكثري من نقل تصرفات وأقوال زوجك التي يمدح فيها والدك واختلقي الكثييير منها .. " فالكذب جائز في هذه الحاله " وكذلك العكس بالنسبه لزوجك ....... بالاضافه الى أن تغدقي على والدك بكلمات الشكر والامتنان والثنااااااء .......... حتى يطمئن على أن مكانته عند الجميع كما هي . الله يهدي سركم يارب ........ تقبلي تحيااااااااااتي ....... |
مشكورين كل الغلا وحنونه على مرووركم وردكم الشافي...
وبالنسبة للغيرة آنه سولفت مع أختي قالت لي نفس الشي بس أبوي مب ياهل عشان يغار من ريل بنته المفروض انه يستانس إذا مدحوا ريل بنته.... وآنه ما أقصر في المدح وغيره وبصراحه ريلي وااايد واايد مرتاح من أبوي بس الكلام اللي من ابوي يجرحني واايد لأن زوجي مايستاهل ينقال عنه جذي :( أشكركم مرة ثانية |
حبيت أنبهك ياغاليه
انه مهما كان الزوج طيب وحنون لا يعطيك الحق أبدا في وصف أباك بأنه طفل صغير أو ما شابهها من ألفاظ فهو والدك الذي لن تنقطع صلته بك أبد الدهر أما الزوج فبكلمه ينتهي كل شيء .......... واعلمي الانسان بطبعه يغاااار سواء كان رجل أو امرأة صغير أم كبير ولا تنقص من قدره شيء اذا كانت في حدود المعقول ................. أسعدك الله غاليتي ..... تقبلي تحياااااااتي ..... |
حبيبتي في كثير اباء يغارون من ازواج بناتهم بالذات اذا كنتي الكبيره
فأنتي حاولي دايماً عند ابوك تمدحينه على لسان زوجك وانا هذا اللي اتوقعه لإني شفت هالشيء بعيني |
حنونه حبيبتي انتي فهمتيني غلط.. آنه ماقلت عن أبوي ياهل أو طفل.. آنه كل قصدي إن أبوبي أكبر من هالشي
وأبوي على عيني وراسي طال الزمن ولاقصر مرادي له ومالي غنى عنه... أم مهدي مشكورة على مرورج... وفعلا آنه الكبيرة والأولى وخصوصا إني كنت متعلقه فيه واايد..وحتى ألحين متعلقه فيه.. ومشكورين مرة ثانيه... |
هذا شي طبيعي يحدث
ولازم تضايقين منه حبيبتي انتي لا توقفين مع هذا ولا مع هذا و الأمور خذيها ببساطه عشان اذا صار موقف ما تاخذين بخاطرج من ابوك ولا من زوجك وحاولي انج اتفهمين ابووج بطريقه حلوووه وبدون قساوه في الكلام اذا مرثانيه قال ابووك اي شي عن زوجك مثلا اتقولين لا يابوووي زوجي دوووم يحب جلساتكم ويتوله عليكم ويسأل عنكم وما يجيب طاريكم الا بل خير حببيهم في بعض واتحملي اتقولين اي شي لزوجك اتحملي وصدقيني فديتج ازمه واتعدي يمكن ابوج يغار يمكن ... ولا تشيلين هم والله يفرجها عليج ان شاء الله واهم شي رضي الطرفين |
|
| الساعة الآن 12:57 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©