|
مشكلتي اني خايف من هالمشكله !
السلام عليكم ورحمة الله وبركاته
اخوكم ابراهيم توه جديد بقراطيسه بمنتداكم الللي سمعته ماشاءلله مزعجه جيرانكم بالمنتديات الثانيه وماسجلت عندكم اللي وانا كلي عشم فيكم بعلاج الوسواس اللي يدور بداخلي مشكلتي سلمكم الله اني خايف من هالمشكله ! انا طول الله في اعماركم في مقتبل العمر وعمري 23 سنه وعرسي مابقى عليه غير ثلاث شهور وكاتب كتابي علي بنت حلال من قرايبنا المهم بعد ( الملكه) صارت بينا علاقه محد يدري عنها لان عاداتنا وتقاليدنا نظام امسح واربح ! لاتشوفها ولا تشوفك اللي يوم الدخله ( طبعا اللهم صور ماصور للأوراق الرسميه ) المهم بعد ماتعرفت علي البنيه وصار بينا اخذ وعطى وميانه والخ... صار في حب والبنيه ماشاءلله عليها ماعليها قصور وعاجبتني حيييييييل واتوقع ماراح احصل وحده نفسها !! اقصد انه هذا هو النظام اللي ابيه من البنات واللي كنت اتمنااه :) ولله الحمد واشكر ربي لليل نهار وربي علي النعمه هاذي الزبده مو هذا هو موضوعنا موضوعنا هو يدور حول موضوع الماما ( امي ) انا مااقول حالي حال اي زوج صاحب طلبات كثيره او معقده او غير مقبوله لا ولله مو مدح بنفسي ولا شيء والله العالم بذلك انا رجال ابي وحده تعامل امي بأفضل مايكون وانها تخدمها بأمور المنزل ولو بشكل نسبي بسيط جداً وهذا من حقي اطلبه اذا كانت الوالده محتاجه او غير محتاجه حتى ! بغض النظر اللي اقوله صح او خطاء هذا هو طبعي اللي مايخدم امي مابيه يخدمني بالعربي ! مابي تفكيركم يروح بعيييد وتقولون هذا جايبها عشان يخليها شغاله بالبيت والخ... لا وربي اتمنى اني اكون مظلوم وله ظالم المهم حبايبي وانا كنت قاعد اسولف معها في يوم من الأيام سئلتني عن الطبخ مالطبخ قلتلها انا بيض شكشوكه كافي علي تراني ماني راعي طبخات وهالخرابيط :) قالت ليتك علي الشكشوكه وبس :) كان زين ... قالتها عن ضحك قلت افا يالغاليه ولو قلتلك تكفييييييين شيلي العشى عن امي اليوم شبتقولين !! سكتت !!! و قالت انت لاتقولها خلي زوجتي تسوي العشى عنك عشان انا ماقولك شي ! يعني لاتوهقني مع امك ! سكت انا وقلت بخاطري هاذي هي اللي كنت احلم فيها ! واحمد ربي عليها ! حتى مجامله ماجاملتني ! قلت بصبر يمكن راح تقول شيء ثاني ولا كأنها قاااااااالت شيء ابد وعندي احساس والله اعلم انه قصدها مالي شغل في امك ابد ! انا مااظلمها بالعكس هي اخلاق من احسن مايكون وتستحي من ظلها اللي يمشي معاها وهذا هو اللي يعرفونه الناس عنها ولا لها بالمشاكل وعوار الراس ابد وانا واثق ان اسلوبها راح يكون مع اهلي من احسن مايكون لان ماعندنا مشاكل في بيوتنا مثل اللي نسمعها عن الناس ولله الحمد لكن اللي ضايقني هو موضوع خدمة الوالده خايف اني اتزوج واكون بيت واخرتها لو اقولها سوي حق إمي كذا بتكشر بوجهي او ترد علي برد ماودي اسمعه ! عاد ذيك الساعه راح تضيق علي البيبان كلها ولا اشوف كل الصفاة الحلوه فيها ابد ! وتقلب حياتي جحيم من بعد النعيم !! وانا بصريح العباره ماعندي جراءه اني اقولها ابيك تخدمين امي وكذا كذا لان مابيها تفهم قصدي غلط وعبالها جايبها شغاله عند امي ! شلون اوصل المعلومه هاذي لها ! وتكون بطريقه مقبوله وغير مباشره ارجوكم ساعدوني تراني رجال راعي وسوسه واحسب للشغله الف حساب |
الله يوفقك ياأخوي لاتكبر المشكله إذا زوجتك ان شاءالله تحبك أمورك تمام ياارب
بس حاول بأسلوب رااقي تفهمها وشلون تبيها تعامل أمك بدون مشاكل ولاتقط بقوه يعني لاتجيبها صريح خلها تلميحات يعني مثلا قول لها أنا من عرفتك عجبتني أخلاقك أحس فعلا أنك رائعه بتعاملك مع أهلك عشان كذا مابخاف على أمي إذا صرتي ويانا وقول لها داايم أمي مووووووووووت تحبك وتمدحك وتمدح أخلاقك وتدعيلك خلها تحب أمك مثلك وأن شاءالله ربك يسهلها............دعواتك |
السلام عليكم
أخي الكريم أنت مؤمن لا تدع الوسواس الخناس ان يوسوس في رأسك لأن لا احد يعلم ماذا سوف يحصل غدآ إذا كنت تقول ان الفتاة كل الصفات الحميدة موجودة عندها فهي تعرف امور دينها وليس عيب او حرام إذا دارت بالها على امك فهي مؤمنه وكل ما تفعله لها أجرها عند الله فعندما تمر الايام وهي تكبر سيحصل معها نفس الشئ فبلنهاية مثلم تعامل تعامل . |
اخي ابعد عنك الوسواس
الله يوفقك ويسعدك انت حاول تلمح لها بالموضوع مثلا قول لها ان كل شي فيك رائع ومن خلال معرفتي لكي حاس انك راح تعاملي والدتي مثل ماتعاملي والدتك اتمنى اني افدتك اختك:الحائــــرة |
نصيحه من اخت لأخوها 00 خلي عنك هالكلام 00 امي وامي 00 الله يخليها لك 00 كلنا نحب امهاتنا
والكل يتمنى الافضل بزوجه المستقبل 00 لكن خلى عنك الحوارات اللي تخص هالموضوع خاصه وقت الملكه وستمتع بحياتك بالفتره 00 اما من ناحيه امك 00 لاتشيل هم اذا انت متأكد من اخلاقها وانها بنت حموله 00 واهم شي حابتك وراغبه فيك 00 صدقني تبي تشيل امك واهلك والحموله كلها لأجل اعيونك 00 والكلام مايقدم ولا يأخر 00 ماغير وجع راس ويهد الاعصاب 00 اهم شي الافعال وهي لسه ماشمرت عن ذراعه 00 اصبر وبكره تشوف 00 واذاحصل مستقبلا اقصور منها كل شي يجي بالتفاهم ولين الكلام وسعه الخاطر00 ومبروك مقدما |
هلا فيك اخوي
الف مبروك اولآ ثانيأ لا تجعل الشيطان يدخل بينكم وانت يالله الهادي لاتظن امكن قالت الكلمة زلة لسان على مايقولون وصدقني اذا عاشت معاك ومع الوالده وحصلت التفاهم والحب راح يتغير كلامها .. لكن اذا كانت البنت صغيره اولديها خادمه في بيت اهلها يبيلك اطول بالك عليها والله يعينك ويوفقك ويكتب لك الخير والصلاح تحيتي اختك ام البراء |
شف أخوي أنا راح أقولك من واقع تجربة شي عشته وشي شفته أنا الوالدة الله يحفظها ماأرتاحت الأ لما أفتكت من أخواني وحريمهم سوي ماسوي ولله أنها طلبت من كل واحد يطلع ويستقل عنها والله يخلي الخدامات أخوي بنات هالوقت مايخدمن أمهاتهن الابعد الطق والطقيق وأنت جاي تطلب من وحده بنت ناس وتفرض عليها خدمت أمك شف لاتفكر بهذا الموضوع من هالحين لأن والله إذا زوجتك ماخدمت أمك من نفسهاوطيب خاطرها ماراح أنت تجبرها بعض بنات هالوقت تكون ملغمه بنصائح من قريباتها من النساء كأنها رايحه تواجه عدوه مو أم زوجها على العموم لاتصير موسوس ولاتشغل بالك وأحسن الظن فيها ولاتحط بالك الكمال وتفائل خير وعش أيام الملكة بجمالها وأدعى الله أن تكون دخلتها خير عليك ومبروك مقدما
|
السلام عليكم.....ألف مبروووووك ياأخوى....و بالنسبه لقصة الوالدة و الزوجة ترى هذى بكل بيت....أقصد أن هالجيل ألحييين ما فيه وحده تخدم خالتها بالعكس الخاله هى ألى تقوم بالجناين و تخدمهم و تطبخ لهم و تحسب لهم ألف حساب و هذا كله علشان خاطر ولدها ما تبى تضيق خلقة و تسبب له مشاكل....عالعموم كل الخالات ألحين يقولون ما نبى شئ بس نبى ولدنا ينزل من غرفته و يطل علينا و مالنا شغل بأحد....ووو بتشششوووووف...........نصيحة شيل هالافكار من راسك علشان ترتاح ماكوا بهالزمن زوجات يخدمون خالاتهم......هذا الواقع و عن تجربه....................بالتوفيق:14:
|
أنا أأيد رفيجتي بالدوام white chocleteصح لسانج
|
جزاكم الله الف الف خير اخواني علي هالمبادره الطيبه منكم
وكل واحد فيكم يسعى قدر مستطاعه عشان يساعدني وانا بصراحه ثلج صدري لما شفت كثرت الردود ولو ان مشكلتي مهي مشكله كبيره بصراحه تغيرت معالم وافكار كثيره كانت في مخيلتي بالأولى كلام اختي عبير العلي بصراحه هو عين المنطق في أغلب الأحيان اذا ماكان كل الأحيان ولايهنون الاخوات والاخوان الثانيين عساكم ذخر ان شاءلله ويجعلها الله شفاعه لكم يوم القيامه آمين يارب العالمين وانا مثل ماقلتو حضرتكم بطنش بالموضوع هذا وبشيل سالفة امي علي صوب خصوصاً مع بنات هاليوم اذا مو هي بنفسها اللي تبادر بالشيء هذا فماراح يكون فيه خير اذا كان آمر عليها والميه تكذب الغطاس :) اكرر شكري لكم جميعاًَ اخواني |
| الساعة الآن 03:46 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©