|
أول مرة تمر علي هالمشكلة
آنا متزوجة من أكثر من 9 سنين وعندي 3 أبناء ( بنت و وليدين ) والرابع على وشك الوصول خلال هالشهر . أثق في زوجي ثقة عمياء من ناحية البنات ، أدري إن ماعنده خرابيط مع البنات ، يمكن يكون في شي ثاني بس بنات أشهد بالله ما عنده والزوجة من خلال عشرتها مع زوجها تعرف عنه كل شي ، فجأة ، يوم الخميس اللي طاف وقبل الغداء في بيت أبوي قامت حريجة بسبة الخدم ، واحدة منهم فجرت قنبلة وقالت إن زوجي ينام مع شغالتي وإن شغالتي هي بنفسها قالت حق شغالة بيت أبوي ، وهذي من القهر اللي فيها لأن أبوي قال لها شوفي لج بيت ثاني عشان آنا ماأبيج أو إذا تبين تسافرين كيفج ،، من الحرة اللي فيها فجرت هذي القنبلة . وثاني يوم ( يوم الجمعة ) قلت حق زوجي هذي الخدامة ما أبيها سفرها علماً بأن خدامتي صار لها الحين 4 سنوات ( ف ) وين ما أسافر تسافر معاي وايد مريحتني . قال لي ليش ما تبينها شايفة شي عليها قولي لأني طالبة واحدة الحين تو الناس على وصولها الفيزا بعدها ما خلصت . قلت له من غير ما أشوف كافي إني سمعت عنها قال لي ماراح تسافر لو شيصير لما توصل الخدامة اليديدة ،،آنا أصرخ وهو يصرخ ليش ما أدري ،،، قمت اتصلت على أخوه الكبير ( حلال المشاكل ) وقلت له تعال لنا الحين آنا في ورطة ، قال لي حاضر 10 دقايق وآنا عندكم ، وفعلا بس وصل قلت له هذي الخدامة آنا ما أبيها وأخوك مو راضي يفج عنها لأني بصراحة ما أثق فيها وسمعت كذا وكذا كذا يوم الخميس عنها ...أخو زوجي طارت عيونه مرة يطالعني ومرة يطالع أخوه ويسأله صج الكلام اللي قالته زوجتك يا فلان قال له لأ لألأ شنو خلصوا البنات اللي في الديرة ما أنام إلا مع الخدامة وين قاعدين رد حماي وقال لي يا فلانة انتي بنت حمولة واحنا أهل حمولة ما نرضاها حق ولدنا يحط عينه على خدامة وانتي اشلون تفكرين هالتفكير والخدامة بلاها اليوم تسافر وبالعنة خدامة بدالها ألف خدامة رد زوجي الشريف قال له اشلون تسافر وهي حامل واليهال راح يداومون بعد اسبوعين وما تقدر تشيل ثقل البيت بروحها قالت له مو شغلك راح آخذ اليهال كلهم وأروح بيت أبوي وكل 3 أو 4 أيام أييب مسترجعات لين أولد قال له حماي خوش حل وانت مالك شغل فيها دام مرتك شكت فيك معناها شايفة شي ومن حقها تشك لأن انت يومك كله يا تاكل يا تنام يا دواوين بنت الناس ما تشوفك يحق بها تشك ( جزاه الله خير واااايد رفع معنوياتي ) ويوم السبت آنا حجزت حق الخدامة تذكرة عشان تسافر يوم الأربعاء المغرب ..........واليوم صليت الفجر آنا وزوجي وحطيت المصحف على فراشه قلت له احلف إنك ما لمستها قال لي روحي الله يرضى عليج طفي الليتات خليني أنام خلصت الديرة ما فيها بنات إلا خدامتج عشان أنام وياها ،،، واال حاسة إني ضايعة بالطوشة ،،، للعلم واجهت زوجي وأخوه والخدامة قامت تصرخ وتبكي وتقول انت شفتي زوجك في يوم من الأيام كلمني ولا فهمت منه شي ( الأخ ما يعرف كلمة انجليزي ) قلت لها هالحركات مو محتاجة لغة ............. اشرايكم باللي صار هل آنا على صواب باللي سويته ولا آنا غلطانة ؟؟؟ |
طبعا انت على صواب وكان الحل الامثل انك تسفريها
لكن ماتفتحي هدا الموضوع تاني مره لزوجك مو محتاج انت تقولي انك واثقه فيه خلص سكري الموضوع حتى لاتعكري حياتكوا |
الباب التي تأتيك منها الريح سكرها و ستريح
اتخلصي منها دام وجودها فتنه بلبيت بس لا تظلمينها اذا انتي مو متاكده يعني اذا هيه محتاجه لهلشغل شغليها غير مكان لا تسدين باب الرزق عليها |
كان الله في عونك ،ويا حبذا أختي لو تكتبين بالعربي بدلا من العامي وشكرا لك
|
الله يعينج أختي.. والله أنا مرات تطري علي هذي الشكوك.. ياليت حد يعلمنا كيف نتأكد أذا الزوج له علاقة مع الخدامة ولا لا..
بالنسبة لي أنا سلمتها لله.. ودعيت انه اذا كانت له سالفة ويا الخدامه ان الله يكشفه.. ولا راح أتعب نفسي وراقبه!! شو رايج انتي؟!! انتي سفريها وانسي الموضوع .. وفذمته! |
لاحوله ولاقوه الابالله
كان الله في عونك اختي وانشاءالله خيره لك انك سفرتيها |
شكراً لكم جميعاً على تفاعلكم معي ،، آنا لم أقل له إني أثق فيك حتى لا يصدق ويعطي لنفسه الثقة بأنه غير غلطان بحقي وهو إلى الآن لم يعطني مبرر لهذه المشكلة حتى أقل شي لم يفعله وهو الحلف على المصحف لدرجة أنه رفض وقال لي بالحرف الواحد وبأسلوب بارد يشككني فيه ( روحي نامي خلصت الديرة من البنات عشان أنام ويا الخدامة ) يحاول يبعد الشك بس مو قادر . وللعلم حفاظاً على كرامته ولا أريد أحد أن يشمت فيه من أهله أنني لم أقل لأحد منهم حتى لا تكبر المشكلة ومع هذا صار لي يومين أنام على الكنبة الموجودة في غرفة نومي حاسة إنه موبوء لدرجة إني كارهة السرير بوجوده وحتى لا يرانا الأطفال منعزلين في الفراش أنتظر نومهم ثم أنام على الكنبة فما العمل حتى أبعد الشك عن راسي للأسف لا أستطيع ....... |
الله يرضى عليكم ردوا علي لا تخلوني بروحي والله العظيم أحس إني ضايعة في هالدنيا .......................
|
والله الخدامات اللى يشوفهم يقول مساكين ويحزنوا لابسين ومغطيين
وتلاقيها تغطي راساها يمنديل وياما تحت السواهي دواهي الله يعينك يااختي وسفريها احسن وريحي وارتاحي |
والله حاسين بمعاناتج.. خلي عنج وسوسة الشيطان وتخيلي لو كان كلامه صحيح راح تكونين تعبتي نفسج وقلبج عالفاضي.. أنا زوجي قالي نفس الكلام لما مارضيت أخليها عندي بسبب غباءها الزايد وانه ماعندها دراية بالأطفال فبعد ماراحت تم كل يوم يحن ويزن على راسي وهي كانت زينه وانتي حاطة دوبج ودوبها وخلاني أتلعوز بروحي في الشغل غياظ فيني بس ولا كان يساعدني بأي شي.. وانا كنت حامل في الشهور الأخيرة وعندي طفل عمره أقل عن سنه وأداوم .. فتخيلي كنت أشل بنتي عمرها 3 سنوات وولدي كل صبح وليل لبيت أمي وأنا في الشهر الثامن أو التاسع ماأذكر والله.. ولا كان يساعدني غياظ فيني بس عشان روحتها.. وفي النهايه عطيته كاش فوجهه قلت له ليش ماتقدر تستغنى عنها أكيد عطتك شي .. سكت ولا رد علي.. تخيلي كيف كلتني الوساوس وكنت أفكر بأي طريقة أكشفه فيها بس بدون فايدة
في الأخير سلمت أمري لله.. تقربي لله أحسن هو العالم بكل شي.. والله يهدي نفسج ويريحج |
أنا ضد احضار خدامة و مبيتها في البيت 24 ساعة.. ويأتون ونتقدون الإختلاط في بلاد الشام و عن سلبياته؟؟؟ و هاد شو اسمو مش اختلاط و في بيت واحد؟
أنا برأي المرأه التي تحضر إمرأه أخرى بغض النظر ما هي طبيعة عملها.. و يسمح لها بالمبيت مع نفس البيت الذي هو زوجها في الأساس موجود فيه.. غلط على كل حال المرأه هي سيدة وملكة البيت و لا مانع من أن تحضر وحدة تساعدها بالبيت بس تروح بعد ما تنظف مشضروري تنام المعذرة هذا هو رأي الشخصي |
شكراً لك أختي ELYAZEYA على ردك بس والله حاسة بعد السفر راح أتم أفكر هذا الشي راح يتكرر مع الخدامة الجديدة ولا لأ ،، بالي مو معاي تفكير ي شارد صار لي 4 أيام مو قادرة آكل شي في البيت معدتي مو قادرة تتقبل الأكل ،،، حتى الحين آنا في الدوام وزوجي نايم قفلت عليه الأبواب وطلعت والخدامة صاحية من الفجر اليوم لأني طلبت منها تجهز لي أغراض القهوة عشان أسويها حق دوامي لقيتها صاحية قبلي ومجهزة الشغل وآنا كملته بس لما لبست ملابسي إبليس يقول لي يالله طلعي خليها تشوف شغلها وياه انتي مسكره عليهم والله العظيم الشيطان قاعد يوسوس لي بهالطريقة ... حتى أختي قلت لها ردت علي بلا وسواس لأن خدامتج ما تستجري تسوي جذيه ما توصل لهالدرجة ...... glade لاتلوموني آنا أشتغل بالقطاع الخاص وانتوا أدرى بطبيعة العمل من الساعة 7.5 إلى الساعة 3 أوصل البيت الساعة 3.15 تقريباً يعني إذا في شي بينهم ما راح أصيده لو شيصير 8 ساعات تكفي يأخذون راحتهم فيها من يمسك عيالي ويريقهم ويلبسهم ويغسل لهم خلال الفترة اللي أكون فيها بالدوام ،،، ترى والله صعبة علي أتقبل هالشغلة كأني قاعدة أكذب على نفسي إذا قلت لكم آنا ما قمت أشك في زوجي ....... |
المصرية تدعى لكى
توكلى على الله فهو خير وكيل وكمان ياختى لو زوجك راجل متدين مستحيل يغضب رب العالمين اعتبرى هذا درس للزوجات لكى لاتبيت غريبه فى المنزل لا اله الا انت سيحانك انى كنت من الظالمين ارجوكى اهدئى لان قلبى يقولى ان زوجك مظلوم وان هذا من تدبير الشيطان ربنا يفرك كربك وكرب المسلمين:) :) :) :) :) :) :22: :22: :22:
|
شكراً لك اختي المصرية على الرد وكافي علي إنكم تدعون لزوجي بالهداية ولي بالصبر والبعد عن وسوسة
الشيطان ........... |
بسم الله الرحمن الرحيم أختي الفاضله ،، أعذريني لو وجهت لكِ اللوم بشكل كبير وضعتِ البنزين بجوار النار ثم تريدين ألا تحدث الكارثه ؟؟؟؟؟ سبحان الله ،،، والله أعجب كل العجب من المرأه العامله والتي تصر على الخروج والعمل بداع أو بدون داع وفي سبيل ذلك تضحي بصحتها ورعاية أولادها وزوجها وتهمل بيتها ثم في حال إكتشافها علاقة زوجها بأخرى ( بغض النظر لو كانت خادمه أو حتى بائعة هوى ) تبدأ بالمعاناه والإنهيار ؟؟؟؟ وأين كنتِ أختي الفاضله قبل أن تصل الأمور لهذه المواصيل ؟؟؟؟؟؟؟ ولماذا سمحتِ للشك بالدخول إلى قبلك أساساً مع دخول الخادمه إلى حياتك ؟؟؟؟ لعى أية حال ،،، أبعدي هذا الخادمه عن منزلك بسرعه وبدلاً من الإستماته لجعل زوجك يعترف لكِ بالخيانه ( هذا لو كان قد فعلها فعلاً ) فإنسي الموضوع وحاولي التقرب لزوجك إذ كيف تسمحين لخادمه بالتفوق عليكِ وسرقة زوجكِ منكِ ؟؟؟؟؟ أين دلالك ورقتك التي إختارك زوجك على أساسها من بين نساء الأرض ؟؟؟؟؟؟ لماذا إبتعدتي عنه وتركتيه فريسه لغيرك؟؟؟؟؟؟ ألم تعلمي بغريزة الأنثى لديكِ أن الرجل يريد ( الأنثى ) من زوجته ولا يريد إمرأه تتركه طوال النهار وتعود منهكه ليلاً بالكاد تستطيع القيام بما تبقى لها من دور الأمومه أختي برأيي ( وأسمحيلي على قسوتي ) أن حاجتك لإعتراف زوجك بعلاقته هي لإراحة ضميرك من عذابك النفسي لشعورك بذنب غيابك روحياً عنه وعن بيتك !!!؟؟؟ أعذريني على كلماتي ،،، ولكن هذا ما أراه أسأل الله لكِ ولزوجك الهدايه ،، وأن يعينكِ على حياتك أخوكم مُقبل |
رح اقولك شي يطمنك
على حد قولك الخدامة لها عندك اربع سنوات يعني المدة مو قليلة وزوجك لو هو يبي الخدامة او عينه طرفت عليها هذا الكلام بيكون من اول ما جت عندك الخدامة مو بعد ما يمر عليها اربع سنوات عندك مو معقول يقعد زوجك اربع سنوات ينقع بل الخدامة انها اتنام معه وبعد هل المده كلها ست الحسن والدلال اتوافق الي يبي هذا الشي ما يعجز عنة خلال اربع ايام مو اربع سنين والشغلة الثانية معروف انو الخدامات بيحبو يتباهوا بان5فسهم عند بعض والخيانة مو قليلة وانتي اجبتي 3 عيال على قولك يعني لو انتي مو مليه عين زوجك كان ما خلف منك كل هل العيال ونصيحتي الك لا تخلي الاوهام تدخل بيتك ترى بتوقعي بدوامه ما لها اول من اخر |
شكراً لك أخي المقبل على ردك صحيح جارح بس والله الزمن حدني أشتغل لأن زوجي راتبه ما يعين ولايقدر يعيل أسرة بحالها + أطفال وطلباتهم ،،، ولعلمك لولا راتبي المركب ما يمشي ،،، مو ذنبي إذا وافقت على رجل قالوا إنه من البيت للمسجد ومن المسجد للبيت والكل يمدح فيه وبعد عشرة عمر تطلع منه هالبلاوي والله أعلم وهل هي صحيحة أم مجرد شكوك وأوهام ....... شكراً لك أخت أحلام على ردك ولكن آنا ما أعرف علاقتهم مع بعض هل كانت قديمة أم جديدة ،،، حتى آنا لما واجهتهم بوجود أخو زوجي الكبير الخدامة قامت تبكي وتصرخ إنها ما عملت معاه شي وإن هذا الكلام من فلانة وفلانة ( شغالة أمي وشغالة أختي ) وفعلاً كان هذا الكلام منهم ،،،لأن خدامتي ما توصل بيت أمي صار لها فترة سببت لي مشاكل مع الخدم وقطعت رجليها من هناك فقاموا وتبلوا عليها بهالطريقة يبون ياخذون بثارهم منها بس آنا مالي ذنب عشان اوصل حق هالمرحلة لدرجة إن زوجي لما حلفته ما يبي يحلف ولا يبي يلمس المصحف حتى ويرد علي رد بارد ( إنتي لو عندج مخ ما يوصل تفكيرج لهالدرجة ) بس آنا كزوجة من حقي أغار صح ولا لأ .... وبعدين لو كانت علاقتهم من زمان معقولة مايزلون ولا يغلطون جدامي أو حتى جدام اليهال آنا حاسة إن الموضوع فيه إن........... |
| الساعة الآن 04:09 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©