|
زوجي سافر للعمره مع اهله و تركني!!
مازلت في شهر العسل ( أي عسل الله بستر ) يعني هذا رابع اسبوع على زواجي وام زوجي قالت لزوجي تعال ودينا العمرة انا وخواتك ( ترا عندها4 أولاد مش متزوجين عزابيه يعني ) أنا قلت لزوجي بتتركني وبتسير العمره ونحن تونا متزوجين ، قالي لا باخذج معاي اكيد بس ياتني الدورة الله يعزكم المهم كنت وايد تعبانه وامس صرت بخير والدورة خلصت عني ( على اساس ان اليوم زوجي بيسير ويا اهله العمره بالبر طبعا ) قلت له امس خلاص بسير وياك العمره باكر صرت بخير قالي وين بتركبين ما شيء مكان في السياره ( ياتني صدمه عصبيه ) اهو عنده ستيشن يعني 3 سيتات ، قلت له السياره كبيرة وخواتك 3 وامك الرابعه يعني ماشيء مكان لي ، قالي يوم بنفتح آخر سيت وين بنحط الشنط ، المهم طنشت الموضوع وضغطت على اعصابي وسويت عمري مو مهتمه ، اللي جتلني قهر أنه طول الليل ما قالي ها بتسيرين والا لا ، يعني بالعربي طنشني ، المهم اليوم الصبح كنت سايره اودعه عد الباب كان اشوفه فاتح السيت الثالث قلتله ليش فاتح آخر سيت قالي آختي من أبوي بتيي ويانا( الحين أخته من أبوه لها مكان في السياره وانا مالي مكان) حرك سيارته وطلع برا البيت سرت قفلت الباب وحتى ما حطيت عيني في عينه وهو مروح ، وسرت غرفتي مغتصه قمت الظهر رتبت أغراضي وييت بيت أبوووي أيلس عندهم أوسع صدري ، (أمي بس في البيت و خواتي وخواني كلهم سايرين يصيفون في ماليزيا وأنا اللي توني عرووس يالسه في البلاد ) هذا مب شيء يقهر ويرفع الضغط .. من سار زوجي العمره الصبح ما اتصل فيني الا توه قبل اشوووي بس ما رديت عليه أحس اني ما ابي اسمع صوووته ..مرتفع ضغطي منه ومن امه اللي في شهر العسل خذته وسارت العمرة
خبروني كيف اتصرف .. |
:d الحمد لله الذي بفضله تتم الصالحات وبعد ألف مبروك أختي وإن شاء الله ايامكم كلها عسل مو بس شهر العسر اللي سواه زوجك خطأ ومستغرب منه هالتصرف لكن اللي حصل حصل فقدامك خيارين الأول إنك تزعلي وتزعلينه وتسير مشكله ببدايه حياتكم وهذا اللي ما اتمنى انك تسوينه الثاني اتصلي فيه واتطمني عليه هو وخواته وأمه وقولي له انك ولهتي عليه وكنتي تتمنين انك تكوني معهم بهالرحله ولا اوصيك على الرسايل الزينه اللي تخليه يرجع مشتاق لك وندمان انه ما شالك معاه ولما يرجع بالسلامه ان شاء الله لا تسوين انك زعلانه وتقابلينه بتكشيره لااااااااا قابليه بسعادة لنه رجع لك بالسلامه وبعد فتره لمحي له ان اللي سواه خطأ وانك كنتي تتمنين تكونين معاه وبدون زعل ونكد هاه |
ليه ليه ليه مضايقة نفسك كذه بس ؟....
حبيبتي انتي مكبرة الموضوع مرة ... هذا زوجك وهذا امه ... حتى لو عرووس ايش فيها لو اتنازلتي شوية ؟... ترى الرجال يحب الحرمة اللي تحب اهله تحترمهم وتسوي اللي يطلبووه .. ترى والله يحطك في عينه ... استهدي بالله .. وصلي ركعتين واتصلي على زوجك ... الموضوع مايستاهل كل هذا الزعل ... انتي لما يرجع اتكلمي معاه يكون افضل وخلي هذا الشئ خلاص شئ اساسي بحياتك ( الصراااااااااحة ) عشان تعيشوا مرتاحين وماتشيلوا على بعض ... مو شرط تسافري الحييين سافري في اي وقت لسه الايام قدامكم طويلة الله يسعدكم ويهنيكم ... حتى لما يرجع لاتسوي مشكلة وليش ما اخذتني والكلام اللي يزعل انسيه وارميه ورى ظهرك ... واتناقشي معاه افضل هذا كل اللي عندي ياقلبي .. ان شاء الله احد يفيدك غيري بالتوفييق ياعرووسة مبروووك عليكي >>> متاخر بس معليه :14: |
الله يعينك حبيبتي..
بصراحة قمة القهر.. لازم تقولين له ماخذتني عشان ماتفتح السيت الثالث.. وبعدين خذت أختك وخليتني.. زوجي أتوقعه يسوي فيني نفس الحركة.. دايما إذا أقول له ودني العمرة.. يقول لي يمكن آخذ أمي معاي لأنها عمرها ماراحت..( ولا زوجي راح) أقول له أنزين باروح معاكم.. أنا أعرف مكة زين واعرف أشلون تعتمرون بتحتاجوني هناك.. يقول: وعيالج؟ قلت له باخليهم عند أمي.. يقول إحنا بنطلع مباشرة من هني ( ديرته ).. يعني مايصير نروح ديرة هلك عشان ننزل اليهال.. لكن أنا مصرة.. إذا عزم يروح ماخليه يروح بدوني.. أنا من تزوجت وأنا أحن عليه.. أخرتها يروح ويخليني..؟؟ والله حسيت فيك.. لأنه أحيانا يروح الامارات مع امه وماياخذني.. |
يا عمري المفروض فيك نقاشتيه لما قال لك عن الشنط وقلتي له ان الشنط أهم مني أهم من انك تكسب أجرفي وبعدين اذا ما روحت معك مع مين رح أروح وانه انت ما تقدري على بعدك عنه ايام وما تركتيه حتى تخذي الموافقه بالذهاب معه او وعد بأن تذهبي انت وإياه ولوحدكم في أي اول إجازه قادمه بس اللي صار صار بس يلا استفيدي في المرات القادمه
وبس يجي من السفر عاتبيه بطريقه مؤدبه وبيني اشتياقك له وقولي له ان هذه اول وآخر مره تذهب من دوني لاني لا أقدر على فراقك ولا تنسي من غير عصبيه او زعل بل بكل حب وحنان تحدثي معه |
لا تزعلي حالك ولا شي ========= لانك بعد ما شفتي شي ممكن هاي اهون شي رح تشوفيه المهم كوني مستعده وتوقعي كل شيء منه
ونصيحه لا دققي على شي وطنشي اكثر الامور ------------- بس مو معناته تتنازلي عن حقوقك وهالدقائق اللي بتتعلق باهله اذا وقفتي عليها صدقيني ما بظل دقائق بتكبر وبتصير سبب في فشل علاقتك المهم انتي اكسبي زوجك لصفك ---------- وهو واجب عليه يودي امووخواتوا وحتى لو في غيرو بس ممكن هو افطنهم واحسنهم لامه ما تزعلي بس لازم يعوضك بشيء مقابل ولا تنسي لسه العشرة بينكم ايام يعني لا يحتر ولا يشعر بثقلك ولا بزعلك الا بعد السنه استني وطولي بالك الدنيا ما تستاهل يا عمري ========== ومثل ما قال الاخ فارس كثري من المسجات الي فيها دلع وله وشوق حتى يرجعلك مثل الطير موفقه حبيبتي والله يهنيكي |
الصراحة كلامكم ريحني وااايد وهدا أعصااابي
بس بصراحة انا يوم ييت بيت ابووي اليوم قلت لامي السالفه قالتلي مالت عليج هذيل خوانج كلهم ساروا ماليزيا يتمشوون وانتي عرووس تركج ريلج وسار ويا امه وخواته بصراحه انقهرت ... وابوووي يوم شافني العصر وقلت له ان زوجي سار العمره قالي وليش ما سرتي وياه استحيت اقووله انه ما اخذني وقلت له تعبانه شوووو ي. الحمد الله ان خواتي مسافرات والا كان تطنزواعلي والله احس اني خلاص بصيح يالسه اروووحي في حجرتي الجديمه في بيت ابووي ولا كني تزوجت ولا شيء وريلي اتصلي خمس مرات يمكن ولا رديت عليه احس اذا رديت عليه بضارب وياه ... والله احس اني كارهتنه |
حبيبتى ..
لاتزعلى روجك الدنيا ماتستاهل .. ايش يدريكي شو رب كاتبلك لمن يرجع .. ممكن عاملك مفاجأه .. او ان عاملك سفره عمرة لك بروحك معاه راح تكون السفره ولا احلى ... هدول اهله وهو ابنهم ممكن ما اخذك علشان ما يبغاك تتضايقي او هما يضايقوكى في حاجة .. انا حاسه ان بعد فترة راح تنزلى موضوووووووووووع رائع عن مفاجأه زوجك ليكي بسفره او عمره ليكي انتى خاصه وتكونى انتى الملكه فيها يارب دام الله سعادتك حبيبتى وترا الدنيا ماتسوى لازم تكسري حسابات ولاتاخدى في خاطرك من اول شهر زواج ومضاربه اتركيها لرب العالمين ربي يوفقك يارب بـــــــــتول |
الله يعينك انا ما احب احط البانزين على النار بس والله زين سويتي وما رديتي على التلفون بصراحة شيء رائع انه اخذ امه و جزاه الله الف خير بس انت اولى من خواته و خاصة الاخيرة
المشكلة انت مازلت في بداية زواجك و بعدك ما عرفت طبع زوجك زين فما اقدر انصحك لان في نوع من الرجال الي العند و التعصيب ما ينفع معهم و في لا يفييييييييييدج جدا االله يوفقك يا رب ويسهل امرك ويهدي زوجك عليك |
:19: :19:
هذا في شهر العسل اجل وش بيسوي بعيدين الله يعينك اذا هذي سواة امه واخواته من البدايه كيف اصلا يرضون يروحون وما يقولون لك ودك تجين؟؟ مدري شقول الله يعينك |
أتفق مع الأخت الفلوجة 100 بالمية
|
أقول لاتكبري الموضوع ، نعم هو ارتكب خطأ ، ولكن لعلّه يظنُّ أنّ ما فعله صحيح أنا اتفق مع الفارس قابليه بالإحسان مادام حصل الذي حصل ثم بعد ذلك أي بعد زمن من عودته ذكريه بأنّ هذا الذي فعل أثر في نفسك ولكنك تحملت من أجله ، نسأل الله أن يصلح حالكما وحال جميع المسلمين 0
|
اقتباس:
لو كانت صارت معي رح امووووت بس بعد الخبرة توكلي على الله و يمكن زي ماحكت بتول مخبي مفاجآة تكوني فيها الملكة لا تزعلي ابدا و تضيعي احلى ايام و الله ىعوضك باذن الله انتي اتصلي عليه و سمعي صوتك الحلو الدلوع...وعاتبيه شوي شوي بدلال لما يرجع بعد ما تكوني جهزتي احلى سهرة و جلسة لحبيبك و زوجك ... عديها هاي المرة و خليها نقطة في صفك |
بعيدا عن المثاليات الموضوع لو كان تم زي ما كتبتيه فهو يزعل جد
لكن العصبية ما راح تفيدك الان حاولي تهدي شوي وتعوذي من الشيطان في كل لحظة ولا تتركينه يكبر المشكلة في بالك ويفرح فيك اعوذ بالله من الشيطان الرجيم اذا اتصل فيك ردي عليه عادي على الاقل تتطمنين عليه ويطمن عليك مهما كان هو في سفر واذا رجع بالسلامة باذن واحد احد اجلسي معاه وناقشيه في الي حصل وقوليله كل الي زعلك من تصرفه يمكن يكون لديه تبرير معين لما فعله معك مو يمكن تكوني مزعلته انتي قبل؟؟؟!!!! وصدقيني لو كان غلطان فاكيد راح يراضيك وخليك متذكره يا قمر ان الي ما فيه خير لاهله ما راح يكون فيه خير لك الموضوع ما يحتاج منك الا شوية تعقل وزي ما وصيتك لا تخلي الشيطان يفرح فيك بل بالعكس ادحريه بحسن تصرفك جعله الف مبروك يا عروستنا الحلوة اولا واخيرا |
مو مشكله حبيبتي لا تزعلي حالك
انتي وشطارتك رجعيه لعندك وهو دايب من الشوق ليكي وساعتها ما رح يكررها الله يوفقك ويهنيكي |
حبيبتي خلاص انسي الموضوع وفريه ورى ظهرج.. حراام عليج ردي على تليفوناته اتلاقينه الحين يحاتيج وحالته لله.. يالله عااد لا اتعاندين ولا شي .. ما يسوى كل هذا اللي اتسووينه.. |
اعوذ بالله بعض الرجال يا شين طباعهم :29:
بس لا تستعجلين يمكن ما يبيك تنحرجين من اهله وناوي لك على سفره حلوة الرجال توه جديد عليك وما تعرفين نواياه .. اصبري حتى تشوفي ربنا معاك |
عزيزتي..
ألحين هو اتصل 5 مرات ومارديتي.. قومي ألحين اتصلي به وقولي له إن الجوال كان على الصامت.. أو ناسيته ببيتك.. أنا ما أساعدك على الكذب.. لكن لو قلتي له إنك تعمدتي ماتردين ممكن تكبر السالفة.. خليه يشوف إنك مشتاقة له بس في نفس الوقت حاطة بخاطرك عليه لأنك ودك تروحين العمرة معاه.. وقولي له إنك من زمان تبغين تتصلين بس خايفة يكون مشغول.. أو للحين ماخلص عمرته.. وبعد اسأليه عن حال الوالدة والأخوات وخليه يوصل لهم سلامك.. المهم إنك ماتعاتبينه في التلفون كثير.. مجرد إنك تبينين له شوقك لهالسفرة.. ولما يرجع كلميه بهدوء.. وقولي له صح تصرفك وموقفك ذاك اليوم؟؟ بس لا تشدين بكلامك ولا تطولينها معاه.. وأقول لك شي من واقع تجربة.. مهما حصل بين الزوجين.. غالبا الزوجة هي اللي تتنازل وترخي.. ويضيع حقها.. ولو ماتنازلت بتكبر المسألة كثير.. وعندي ملاحظة صغيرة.. تقولين ودك تصيحين؟؟ ياحبيبتي.. صيحي وفضفضي وبترتاحين.. إذا خليتيها بخاطرك راح تتعبين.. لما قريت مشكلتك قلت أكيد صاحت وخلصت.. مادريت أنك للحين كاتمتها فديت عمرك.. |
صراحة البنت مسكينه وانا رحمتها واللي يقول لها خلك عادي ولاتزعلين نفسك مع احترامي ماعنده سالفه
لك حق تزعلين واذا حسيتي ان لك رغبة في البكاء ابكي فالبكاء يخفف الضغط وليس عيب خصوصا للنساء ولكن خلك انسانه حكيمه أقصد بعد رجوعه يعني المفروض يعرف خطاه بدون مايصير فيه مشكلة كبيرة فالخطا لا يقابل بالخطأ لأن الحياة قدامكم طويله ويبلها صبر وتحمل ومداراة من الطرفين لابد يعرف خطأه ولكن بأسلوب هادي طيب وانا أتوقع اذا هو شخص عادي وما عنده مشاكل لابد يحس بندم وإن لم يظهر لك هالشي وزي ما قالوا اللي قبلي عليك بالصراحة في حياتك الزوجيه يعني موضوع كدرك لابد توضحين له ان هالشي على الأقل في نفس اليوم ولكن بعدما يروح الانفعال ونؤكد على الاسلوب الهادي الرزين اللي يحل المشكلة ما يعقدها وفق الله الجميع لما يحب ويرضى |
مشكووورين على كلامكم الحلووو والله يوفقكم فديتكم
الساعه 9 يلس يتصل بطريقة متواصلة كان ارد عليه الصراحه ماكنت ناويه افتح الموضوع الحين بس هو يلس يقولي شو فيج شو صايرلج شو بلاج وانا اقوووله ما شيء مضايجه بس ما في فايده اللين طحت فيه وقلت له السالفه وعاد انا صوتي عالي والله لا يراويكم ... كان يقولي انتي يوم قلتيلي تبين تيين انا اتحسبج تتغشمرين ( اهني رفعلي الضغط ) لاني امس يوم كنت اقوله بسير وياكم العمره ما كنت اضحك اساسا وهو رد علي باسلوووب جاف يوم قالي وين بتيلسين مافي مكان .. وين الغشمرة عاد .. المهم انتهت المكالمه بانه قالي ( يلابسير ارقد تعبان ) قلت له مع الف سلامة وقفلت الخط ... عقب ساعه ونص هديت شوووي قلت اتصل اكلمه كان يسكر الخط في ويهي مرتين وبعدين كان يطرشلي مسج اخته اللي كاتبته تقوول انه راقد وهاااي السالفه كلها والحين امي راقده والبيت فاضي وانا يالسه على المنتدى ما اتصووور ايلس اسبوع بهالطريقه لين يرجع بموووووت |
اختي الغاليه بحر الاحزان
اول شي الف مبروك شوفي انا مالومك لاني جربت وضعك انا في اول ايام زواجي زوجي كان يبي يروح العمره مع امه وابوه وقالي روحي معانا وكانت حالتي مثلك عزكم الله كانت علي العاده وماقدرت وقلت له روح لاني ما اقدر اروح وفعلا راح وكان يتصل علي من العمره الله يجزاه خير وكنت مشتاقه له وكان بعد اهو مشتاق لي لكن مابينت له اني متضايقه لانه خلاص اهو راح ليش اخليه يتعكر مزاجه ويوم رد من السفر علي طول اخذني من اهلي وكان جايب لي هديه من العمره الله يخليه لي ذاكرني انتي هدي بالك واكسبي زوجك انا ما اقول ان الشي مايقهر لكن قسمه ونصيب والله مو كاتب لك تروحين ويمكن خيره لك لانك اذا رحتي مع اهله يمكن بيصير بينكم شي وانتي اهناك ادعي له عسي الله يهديه ويسخره لك وهذا الدعاء قوليه (اللهم ملكني قلب من احوجتني اليه) ولاتبين له انك متضايقه والحين اهو خلاص راح مابيدك شي وخليه يشتاق لك ومايصير متضايق منك لانه اذا دق عليك وانتي بس متضايقه ما راح يتصل عليك لانك بتنكدين عليه واهو مايبي ها الشي تعوذي من الشيطان وتوكلي علي الله وردي عليه وكانه ماصار شي وتمنياتي لك بالسعاده والتوفيق |
اظن انه هالفكرة كلها من تخطيط امه .. تبي تصير لج خاله من الحين ..
بس تحملي و خليج الاحسن منهم كلهم ( ياجبل مايهزك ريح ) :d |
السلام عليكم ورحمة الله وبركاته
شدني هالموضوع جدا جدا لأنه ذكرني بنفس اللي صار عندي لكن الفرق بيني و بينك شاسع أنت سافر عنك و أنا خلاني بروحي يوم الصبحية عشان ياخذ خالته للمستشفى وجلست بروحي أكثر من ساعتين و من المفترض اني عروس صدقيني يا عزيزتي انقهرت ومش قادرة أنسى هالموقف مع انه صار عندي بنت عمرها سنتين بس كل ما اتذكر الموقف يرتف ضغطي لكم مع كذا لما رجع من برا ما بينت له مشاعري .. و ما خليته يحس أيدا اني تضايقت للموقف اللي صار واقولك عزيزتي لا تختلقي المشاكل من البداية بالعكس حاولي تظهرين عكس مشاعرك و توضحين له انك سعيدة لانه بار بأمه وأهله و بتكبري في عيونه باذن الله والله يديم السعادة عليكم.... |
الصبر
ما تعملين مشاكل اهدى خلى اعصابك بالبراد لحين تعرفى طبيعة زوجك مبارك زواجكم ان شاء الله |
اختي اتوقع انه يريد لك سفرة معه بروحكم 0000 بعد ما يطيح اللي براس امه وخواته 000
ثم هناك نقطة أساسية 000 هذي أمه وخواته طول عمره معاهم وماثرين عليه 0000 انت توه عرفك يعني حتى عشرة مافيه بينكم 000 يعني اكيد بيصير بصفهم 000 اصبري 000 وبعد العشرة والانجاب 000 راح يميل لك أكثر منهم 000 فنصيحة لاتحطين نفسك بمقارنة معاهن 0000 لانه مافيه مجال مقارنة عشرة عمر 000 مع عشرة يومين |
الفصل الأخير ( حدث قبل 3 ساعات )
يلست أتصل على موبايل زوجي وهو ما يرد ( كان راقد ) المهم يلست أحاول اللين قااام ( زوجي نووومه ثقيل سبحان اللي قومه ) يلست اقووله شخبارك كان خاطري اسمع صووتك وهو معصب من اللي قلت له اياه ... ما ادري شوو اللي خلاني فجأة أبكي ... عاد هو حساااس وأتأثر وااااايد وااايد ... قالي ليش تبكين .. قلت له اتولهت عليك ومن الكلام اللي تعرفووونه واعتذرت له عن الكلام اللي قلته وعن اني زاعجت عليه قالي لا عادي خذي راحتج افاااا بس انا فدوووة لج .. طبعا انا كنت ارمس وانا ابكي بعدين قلت له خلاص سير كمل رقادك حرااام وراااك تعب باجر ... قالي افاااا لا والله ما اسير ارقد اللين اشبع منج ويلسنا انسوولف اللين حسيت انه خلاااص تعبان ومنتهي وساار رقد وقالي باجر انش من الرقاااد واتصلج على طوول قبل لا اظهر ... احس الحينه اني مرتاحه لاني قلت له اللي في صدري اولا وثانيا اننا تصافينا ... شكرا لكل من عطاني فكره وساااهم معااي في حل |
اقتباس:
والله شكلها تسوويلي اختبارات عيل ليش نقت ريلي تاخذه وياها من بين خوانه العزابيه بس بيني وبينج احس ان عمتي طيبه بس عليها حركات غريبه ملاحظة : ضحكني تعليقج واايد |
الحمد لله إن المياه عادت لمجاريها
عاد خلاص قفلي الموضوع ولا تزعليه لمن يوصل ولمن يوصل سويله ليلة رومنسية تعبريله عن حبج له وعشان يدري إنج ما تكرهي أهله والله يوفقج |
ما شااء الله.. هذا الكلام الحلو والتصرف الصح يا قلبي.. دام جيه السالفه يباله حفله حلوه وليله كششخه يوم رجعته ان شاء الله.. بالتوفيييييق عيوني ^^ |
الحمد لله دام القلوب تصافت.. :14: أهم شي اول ما يرجعون باركي لهم بالعمره و لا تبيني لهم انك كنتي متضايقه خصوصاً امه وان شاء الله الجايات اكثر و تروحي معاهم |
ماودي اشيشك على زوجك بس صج صج مو ريال وامه حسبي الله عليها
دام عقله هالكبر عامليه بالمثل انتهزي اي فرصه اجتماعيه مثلا عيد ميلاد اخوك ييبيله هدايا وسويله حفله وزوجك طنشيه وقوليله نسيت ان اليوم عيد ميلادك |
نصيحة مستقبلية
السلام عليكم ورحمة الله وبركاته: اختي الكريمة: لقد جانبت كثير من الردود الحق والحقيقة مع خالص احترامي لهم. اخوتي امتثلوا لقول حبيبنا عليه الصلاة والسلام : قل خيرا أو اصمت. تذكري اختي ان الجنة تحت اقدام الامهات وتذكري ان اللي ما فيه خير لاهلة ما فيه خير لاهل بيته ( كما تدين تدان ) يا اختي والله ان رعايته لامه لهي دليل جيد لتزويجه. لكن الحقيقة ان معظم فتياتنا للاسف تكون لديهم شحنات وحساسية تجاة اي تصرف يبدر من اهلة وخاصة امه واخواته( العمات) ياختي احسني النية يرزقك رب العباد. ( بمعني ان تصرف زوجك له مئات من الاعذار) تحليلي لمشكلتك شعور التملك ناحية الزوج خلاص تزوجته يعني ملكي وهذا خطأ شائع في مجتمعاتنا العربية للاسف ... الله يرحم زمان اول .قرر يسافر الله يحفظه، كلمك وما رديت حلو ( اللبيب بالاشارة يفهم... يعني فهم انك زعلانه) تردين وتصرخين في وجهة = خربتي تجاهلك لمكالماته، يزعل منك ثم تلاحقينه باتصالاتك صرتي مثل ضربني وبكي وسبقني واشتكى. النصيحة ياأختي تكون شعرة معاوية شدي وارخي حسب الحاجة . ولاتنسي حسن التبعل لزوجك فرضاه سبب لدخولك جنة ربك. خلى الامور طبيعية الموضوع تم نقاشه وانتهي ولكن للمستقبل اجعلي العقل والصبر حليفك والله لن تخيبي بحول الله وقوته واياك ومشورة من لا عقل له . وفقك الله لما يحب ويرضي وايانا |
ترىى عادي يودي اهله للعمره
صدقووني عادي اشفيهاا وهي ماقررت الا في الاخيرر شفيكم بعض الردود تخلي الواحد ينقهر احمدي ربك رايح بامه واهله ماقال تزوجت ماعلي منهم حتى لو كان توه هذا يدل على ان فيه خير لاهله ولا موديهم للعمره ماشاء الله ترى اللي فيه خير لامه واهله فيه خير لزوجته يمكن بيعوووضك ان شاء الله بس لاتعصبين من اي شيء هذا زوجك كلميه وكلمي امه وخواته وتطمني عليهم وتمني لهم السعاده من قلبك عيشي حيااتك معهم مثل اهلك الدنيا ماتسووى الزعل والهوشاااااااات الله ييسر امررررك |
اقتباس:
:22: :22: :22: |
اقتباس:
شكرا اختي على كلامك الرائع جدا غضبي وحزني لي سببه انه ذهب الى العمره فقط مع اهله وتركني بل بسبب التوقيت الخطأ يا عزيزتي امه تعلم بأنه عريس جديد ... والعروس في هذه الفترات تشتاق لزوجها وتأمل يأن تخرج برفقته خصوصا أن اجازته ستنتهي حالما يعود من العمره واجازتي تنتهي بعده باسبوووووع ... لو لم يكن لديها غيره من الابناء سنقوول مضطرة ولكن لديها 4 ابناءما شاء الله شباب غير متزوجين هذا غير زوجها فهو يتمتع بصحه جيدة .. مع اني راضيه الان واصبحت العلاقة بيني وبين زوجي جيده ولكنني احس بالوحده الشديدة بسبب سفر اخوتي هذا اولا .. ثانيا نحن في مجتمعات خليجيه لا استطيع الخروج او الدخوول على راحتي .. اي انني ساضطر للجلووس في هذا المنزل لا هم لي سوى انتظار زوجي الغائب .. شكرا لكل من وهبني كلاما جميلا اسعدني جدا في لحظات الانتظار |
معليه ماقريت ردك الاخير الله يوفقكم ويسخره لك باين عليه يحبك ومشتاقلك الله يوفقكم
|
الصبر ياغالية على ما اعتقد ان ما قام به زوجك اختبار لك ولمدىتحملك ، بده يعرف معدنك كيف ، هل راح تنكدي عليه ، هل راح تتحملي هل راح تكرهي اهله لانه فضلهم عليكي
لا تكبري الامور ، ربنا يريح قلبك ويرده لك سالم ، المهم لا تفتحي معه الموضوع ، وفي ايام صافية تقولي له ياريت كنت اخذتني معك كان نفس اعتمر وانا معك وبحمايتك دمت بخير وسعادة |
الحمد لله يا أختي إن القلوب تصافت..
أحب أبين للأخوة إنها مازعلت لأنه أخذ أمه العمرة.. هي زعلانة لأنها بغت تروح معاه ومارضى.. وأيضا لأنه راح وتركها وهم توهم بشهر العسل.. هذا للتوضيح فقط.. لأن بعض الأعضاء توقعوا إنك غيرانة من أمه وماتحبين لها الخير.. |
اقتباس:
تسلمين على التوضيح حبوبه فديتج والله |
الحمد لله تصالحتو وتصافيتو و ان شاء الله ما يعيدها (تأكدي انت من ذالك) و يارب الاجازة الجاية تقضيها مع زوجك لحالكم باحسن دولة
|
| الساعة الآن 06:12 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©