|
ذهبت إلى ماليزيا ولم تعجبني
السلام عليكم ورحمة الله وبركاته لي أسبوعين ما شفتكم لأني كنت مسافره ماليزيا بصراحة ما عجبتني لأسباب كثيرة أول سبب الجو في كوالالمبور حار ولا نزل مطر لمدة أسبوعين, على الأقل جزيرة بينينج جوها أحلى لو في حر شوي ثانياً أهلها, كرهت ماليزيا والسبب الصينين وتعاملهم السيئ, شفت كم واحد ماليزي أصل وطيبين بس بنادر ما تشوفهم أما الهنود زينين, الصينين في كل مكان كأنهم تاتار ويلوعون بالجبد تلقى من يضحك في وجهك والسبب الفلوس وتلقى منهم ما همه ويعاملك معاملة ما أدري كيف في بلادنا نعاملهم كويس وفي بلادهم يحتقرونا لأن عرب ومسلمين قلت لزوجي لازم نعاملهم نفس الشيء صح أكلهم في بعض الأحيان يقدم بارد ما تسوقت في الجزيرة بس رحت السوق الليلي وتعبت من طوله بس أحلى شيء العربه والف في الشوارع أما التسوق في العاصمة ( سنتر تايمز سكوير مب حلو ولا يتشاهد بس أشترينا دهن عود من واحد يبيع في كشك وبسعر خيالي بس حلو, أما أحلى سنترين السنتر إلي تحت البرجين وميجا مول بس بعد تحت المستوى) زوجي يقول أن ماليزيا حلوة بس أسبوعين كثير عليها وقال المثل ( الدار لأهلها والغريب يملها) وقالي أنتي توحمتي على ماليزيا وكرهتيها لأنك حامل , انا ماأقول مب حلوة بس في أشياء ما عجبتني فيها وأشوف أسبوعين كثير عليها وحدها أسبوع مع أننا خططنا للسفرة قبل وما خلينا مكان ما زرناه يعني ما فوتنا أي مكان حدايق متحاف أسواق شوراع ومطاعم وشلالات ومنتجعات ومعابد ومصانع ألخ بس ما قلت لزوجي ما عجبتني بس قلت له أشتقت للبلاد وأهلي وشكرته على السفره وقلت له بصراحة كل شي حلو قالي السفره كانت لك وأنتي إلي أخترتي ماليزيا وأتمنى أني ما قصرت بينت له أني سعيدة بس زوجي يعرفني المهم أنا استقت للمنتدى واشتقت لكم والحمدلله إنا رجعنا لدارنا سالمين تحياتي |
مرحباا يلوووووو
اول شي الحمد لله على سلالالالالالالالالالامتك...:22: انا عكسك لما رحت ماليزيا استمتعت مررررررررررررره :22: و جلسنا تقريبا اسبوعين مثلكم بس لما رحنا كان العام الماضي في شهر سبتمبر وكان في امطار في كوالالمبور :21: وخصوصا جزيرة لنكاوي كل يوم تمطر علينا :22: :21: بس كلامك صحيح... الهنووود و الصينيين اوووووووه على كيف كيفك ماشاء الله وكان هم اكثر من الماليزيين... بس العشب الصيني لقينا منه تجاوب يعني كانو كويسين اما الهندي ماحبيتهم... اهم شي رجعتي لنا بالسلالالالالالالالامة.... يلا وين الهداياااا :d ؟؟ |
الحمد لله على السلامة أختي الكريمه
المنتدى افتقدك تحياتي |
الحمد لله على السلامه.. وإن شاء الله تعوضينها بسفرة ثانيه تتمتعين فيها وتكون أفضل من هذه ..
صراحه ماليزيا جناااااااااان .. وااااااو جمال وطبيعه عجيبه ..سحب وغيوووم ومطر كل يوم :21: وخضار ووروود وزهوووور أشكال والوان .. أكتب وكأني اتخيل هذيك اللحظات فعلا ماليزيا جنة الدنيا .. جلسنا فيها 24 يوم .. واتنقلنا بين كوالامبور >>> هذه ما عجبتني ..:( وبيننغ .. لنكاوي >>>>> يجننوا .....:22: والأخيره جنتنق منطقه جبليه بااااااااارده ...:24: >>>> كانت تطلع يدها من شباك الغرفه عشان تمسك الضباب .. والناس هناك كل واحد في حاله .. بس صراحه طيبين ما يتأخروا عن المساعده ..وأحلى ما فيهم ينامون بدري الساعه 9 تقريبا ويصحون بدري الساعه 6 :d .. ماشاء الله عندهم نشاط وهمه .. والإبتسامه على طول تشتغل :d سيارتهم صغيره على مقاسهم .. ودبباتهم أكثر من سياراتهم .. اذكر في فندق سكنا فيه في كولالمبور وكان في الفندق بار .. محل ديسكو .. المهم كنا جالسين في صالة الفندق وشويه ونسمع موسيقى غربيه وصوت عالى وزعيق ونهيق طالع من صاله داخليه .. طبعا اشتغلت اللقافه :25: عندي قلت لازم اشوف إيش هذا ... رحت وقفت عند الباب من برا وااااااااااااي شفت بلاوي حريم ورجال أعوذ بالله خمر ورقص ماصخ وناس تتمايل على بعض .. وناس تهذي بكلام مكسر .. قلت في قلبي الحمد لله على نعمة الدين والعقل .. نفسي :25: أخذ إجازة من أهلي :29: واروح اسكن هناك بسسسس سنه ... وارجع لهم بعد ما تنتهي السنه ياااااارب |
حمد لله على السلامه يالغاليه
اشتقنا لك وعودا حميدا وابنك انشالله مااتعبكم في السفره |
اقتباس:
بس والله أول ما نزلنا في جزيرة بيننج كان أول مره وآخر مره أشوف فيها المطر في ماليزيا هههه قال زوجي وجهنا نحس عليها بس كوالالمبور لا سحاب ولا مطر يعني متنا من الحر لو كان في سحاب بيكون حلو الشعب الصيني تجاوب معانا بس مرات للفلوس بصراحه لما كنا في الجزيرة كان معانا مرشد سياحي هندي وكان طيب بصراحه لي كم موقف مع الصينين هو إلي خلاني أحكم عليهم مع إني أقول لزوجي في منهم طيبين وراح أذكر المواقف الهدايا موجودة وأهمها دهن العود إلي يجنن بشهادة الجميع وسعره رخيص |
اقتباس:
الله يسلمك يا صاحب رأي سديد :22: , والله أنا إلي فتقدكم كلكم ومشكور على مرورك الكريم |
اقتباس:
اذا على تعويض السفره الحمدلله راح يعوضني وقالي راح أوديك مكة, فرحت كثير لأني أحب مكة ماليزيا جنه أدري بس جوها ما عجبني, بصراحة طبيعة تجنن وجنتنج برودة عجيبة وخاصة لما تنزلين من التلفريك تيار هوا قوي يقطعك من البرودة لدرجة أني أشتريت كوت لأبني والمنظر من التلفريك شي عجيب مع أني اخاف من المرتفعات بس شكل الخضار والغيوم شي خيالي بصراحة لو جو ماليزيا مثل جنتنج ما راح يكون عليها كلام تحياتي |
المهم الحمد لله على سلامتك
وربي يعطيك العافية وتبسطين في المرات القادمة |
حمدالله علي السلامه
بصراحه انا كنت ناويه اروح ماليزيا ومتحمسه حيل ولما شفت كلامك كسرتي فيني ومن كلامك انها مو ذاك المستوي باللي سمعته عنها |
اقتباس:
الله يسلمك من كل شر يا أختي العزيزة فيافي نجد والله ابني كان متعاون معانا لدرجة كبيرة المسكين الحمدلله ما تعبني في الطيارة لما كنا رايحين ولما رجعنا للبلاد لأن السفر كان في الليل ( يعني نام تقريبا طول السفرة) بس شوي تعبني لما طرنا من كوالالمبور لجزيرة بيننج لأن كان نهار بكى شوي وكانت مدة الطيران تقريبا 45 دقيقة بس الحمدلله كان هادي طول ما كنا في ماليزيا وعاجبنه الوضع بس آخر الأيام حسيت أنه مل من كثر الطلعات بس السفره علمته ياكل ويشرب الحليب الحمدلله يعني إلها فوايد وأخيراً أنا أشتقت لكم بعد وشكراً على مرورك |
اقتباس:
|
اقتباس:
يعني سافري وجربي يمكن تعجبك, كل أنسان وطبيعته أنا ما قلت أن ماليزيا مب حلوة, أهي حلوة بس جوها ما عجبني والصينين ما حبيتهم والأكل شوي تعبني لأن في بعض الأحيان يقدمون الأكل بارد في كم مطعم هندي عجبني في واحد موجود في السنتر إلي تحت البرجين يمكن أسمه سبايسي أوف أنديا وفي مطعم عربي ما أدري شو أسمه يمكن بخارى اذا بتروجين ماليزيا أنا أنصحك بالجزر أحلى من العاصمة, روحي بيننج 3 أيام ولنكاوي يومين وبعدين خلي كم يوم عشان العاصمة , جو جنتنج يجنن روحيلها يوم أو يومين بس ما فيها غير ألعاب ألكترونيه ومائية وسنتر ومطاعم , عجبتني حديقة الفراشات (butterfly garden )إلي في بيننج أكثر من إلي في العاصمة بس رطوبة لأنهم يرشون مويه خفيفة من فوق, منظر الشلالات إلي في بيننج حلو والبحيرة إلي مويتها عذبه حلو شكلها , حديقة التوابل (spice gaden) كانت حلوه بس كل تصعدين وتنزلين وفيها جرار يصعدك فوق وين الكوفي أنا ما ركبت لأنك بتنزلين مشي , صح راح يقولوك أنك ترشين عصير ليمون عليك قبل لا تدخلين أنا رفضت والحمدلله طلعنا وما قرصتناو لا ناموووسه حديقة الفواكه ما رحت لأن الرجل إلي معانا روانا الفواكه إلي في الشوارع حديقة القرود أو النباتات وفي أحد يسميها الزهور (monkey garden) كانت كويسه متحف الألعاب كان غريب مع الموسيقى الصينيه والأنارة يخوف ههههه بس حلو السوق الليلي أحلى ما فيه العربة بس الأغراض المقلدة عادي رحنا مصنع النسيج وشفت كيف يصبغون الملابس ورحت مصنع بصنعون فيه خواتم وسلاسل وأواني يقولون الخواتم من الزركوون يمكن في رحلة للجبل الأحمر ما رحت لأن كان طفل معاي منطقة الأغنياء ( منطقة حلوة) بيوتهم روعه هذا كله في بيننج أما في العاصمة الأسواق السوق ألي تحت البرجين وميجا مول كويسين أما تايمز سكوير لا شارع العرب يقول زوجي عادي ما رضى يوديني هناك لأنه قال ما راح أرتاح اذا رحت صن واي لاقون حلوة بس الواحد لازم يشيل معاه فوطه وملابس بحر وما تنفع للنساء في حديقة كلها أنوار وما تفتح إلا في الليل هذي احلى ما فيها الطرادات والأنوار نسيت أسمها جنتنج روعه وخيالية وجوها يجنن معبد باتو كيف غريب ويخوف شكله وهو في الجبل بس تحسين أنك في عالم ثاني لما تشوفينه المدينة الجديدة أو براجيا يمكن كذا أسمها مدينة مطورة كلها شركات و مكاتب حكومية شكل المسجد إلي فيها روعه والبحيرة قصر الملك حلو بس ما يدخلونك إلا في راس السنة الهجرية وعيد ميلاد الملك يمكن والله ما اذكر المناسبه الثانيه حديقة الفراشات عاديه احلى إلي في الجزيرة حديقة الطيور احلى ما فيها الطاؤوووس وعرض الطيور ( تشوفين طير يركب سيكل أو يتزحلق على الزحليقه ) الشلالات حلوة إلي في العاصمة, يمكن سبع شلالات تركبين ألهم بدرج والمسافة أتعب بس شلالات روعه بس رطوبه وحشرات تعبت من الكتابه بعدين راح أكمل بس يا أختي لا تنسد نفسك تراها خضرة ويمكن تعجبك كثير |
الحمد لله على سلامتك . ..
ماليزيا طبيعه سبحان الخالق والاشياء الثانيه عاديه وما جذبتني مثلا حديقة الطيور والفراشات والفواكه مادخلت مزاجي :14: حديقة التماسيح ... فيها عروض ممكن نقول عنها حلوه فراشات وقرود وفواكه مالها داعي ابدا ... واذا حصل ورجعت لماليزيا ما راح ازور {فراشات وقرود وفواكه } ولا اقبل يمها لأن مالها داعي الا للأطفال بس :25: |
الحمدلله على السلامه.....شي غريب أول مره أشوف أحد ماأعجبته ماليزيا أنا رحت لها صراحه روعه يكفي الطبيعه الي فيها كنت رايحه من كوالالمبور الى بينانغ بالباص المسافه بينهم تقريبا أربع ساعات ولامليت من الطريق عشان الطريق كله مناظر خلابه وتجنن,,,,وأشياء كثيره حلوه,,,,وأنا معك في أن الشعب الصيني نجس وحقود الكفره منهم,,,,
|
اقتباس:
صحيح كلامك أهي طبيعة تجنن بس جوها حار وحديقة القرود ما عجبتني أنا بعد ولا حديقة الطيور حتى أسواقهم مب شي, ما لقيت لبس حلو للأطفال ولا لي بس عندهم أثاث حلو وشغلات غريبة تتعلق على الجدران واذا بترجع يا غاية الحب ألها أنا شكلي ما راح أرجع إلها |
اقتباس:
الله يسلمك, ما أدري ليش مليت منها بسرعه يمكن لأنها كلها حدايق والخضار في كل مكان, والشعب الصيني اهو كان سبب في نفوري منها. بس التغيير مطلوب شفت مكان جديد وثقافة جديدة سبحان الله الناس اذواق |
طيب كيف جوها في نوفمبر واكتوبر ؟؟
نويت صلاله وخربتوا علي وقلتول بدائيه ... ولما عزمنا على ماليزيا جيتي وقلتي مو حلـــــــوه .... حرااام عليكم وين نرووح؟ |
اقتباس:
زوجي يقول حلوة وجوها مب حار بس رطوبة وأنا أقول حار يعني كل أنسان يشوف الشئ بنظرته اهلي لما شافوا الأشرطه قالوا حرام عليك تجنن جو ماليزيا دافي وممطر ((وتسود الأمطار الموسمية في المناطق الشمالية الشرقية من أكتوبر إلى فبراير ، وفي الجنوب الغربي من منتصف مايو إلى سبتمبر) أقتباس أنا ما قلت مو حلوة أنا قلت حارة وما عجبتني , أهي حلوة للي يحبون الطبيعة أنا أحب الطبيعة بس أحب الجو يكون حلو أنتي سافري وجربي وأن شاء الله يعجبك ألي ما عجبني وتروحين وترجعين بالسلامة |
نسيت ما أتكلم عن هضبة بينانج أو بوكيت بنديرا, لما رحنالها كانت زحمة ولما جينا ندخل القطار ما لقينا لنا مكان
في حد قاعد وحد واقف والشعب الصيني من الرجال ما عليه منك اذا كنتي مرأة أو رجل المهم يقعدون, قلت لزوجي خلنا ننزل وفعلاً نزلنا لأن العربة وهي مزحووومه شكلها يسد النفس, ولما تصعد وتنزل مره ثانيه يمكن يبغيلها نص ساعه وكان حر قلت له خلنا نرجع ما نبغي نركب ورجعنا هذا موقف من المواقف |
للأخت فرح ساكنة على بعد خطوات من المسجد النبوى و تبغى تروحى سنة لماليزيا
أنتى بأروع و أحلى بقعة فى الدنيا أرجوك لا تفكرين تروحى لأن هذا هو المكان اللى بيرح الأعصاب أنا أتمنى سنة جنبك لا بل العمر كله بسسسسسسسسسس |
عيل أنا ناويه اسافر ماليزيا بعد شهر مع زوجي
|
اقتباس:
يمكن لو سافرتي تكون سفرتك حلوة وما تتعرضين للمواقف الي تعرضت ألها , وسمعت أن بعد ما رجعنا الجو تحسن, يمكن وجوهنا كانت نحسه عليهم :25: بس زوجي يلين الحين مصر أن ماليزيا عجبته كثير يعني الناس أذواق |
في موقف ضايقني كثير صار مع سايق تاكسي
أتفق زوجي مع سايق التاكسي على أن يعطيه 300 رنجت على أساس يودينا جنتنج وينتظرنا يلين نرجع وبعدين يودينا منتجع بوكيت نتجي إلي حشرت زوجي عليه إلا أروحه لأن شكله على الطراز الفرنسي ويبعد عن جنتنج ساعه ونص تقريباً صعودا بالسيارة المهم بعد ما نزلنا من التلفريك بعد ما رجعنا من جنتنج قلنا للسايق ودنا بوكيت تنجي, قال يمكن الطريق مسدود بسبب حادث صاير في الطريق, أهو ما قال لزوجي لما كلمة وأحنا فوق أن صاير حادث عشان أنطول فوق, المهم مثل علينا أن يتكلم في الموبايل ويستفسر عن الحادث , قال الشارع مسدود ولما قال جذي أنسدت نفسي لأن ما بنقدر نرجع يوم ثاني لأن الدرب طويل وأنا ما فيني المهم قبل لا نوصل الفندق تكلم مع واحد بالأنجليزي وقاله أنا على الموعد الساعه أربعه, يعني السايق طلع كذاب وعنده موعد وما يريد يطول معانا, مع أننا متفقين قبلها بيوم وصلنا الفندق والأخ طلب 300 , قاله زوجي مالك غير 220 لأنك ما وصلتنا بوكيت نتجي, قال لا أبغي 300 والله سالفة بس زوجي قال اتفاقنا من الأول كان كذا شفتوا هذا موقف من مواقف كثيرة |
الف الحمدالله على السلامه ..
غريبه ... شهر 6 رحت ماليزيا ةاستانست وااااايد بعكس ماتوقعت قبل لا اروح .. والحمدالله المطر كان فيها ولا اروع :) صح العاصمه كانت حاره بس مش بذاك السوء .. ويمكن اللي ريحنا انا قبل لا نستقر في كوالالمبور زرنا قبلها بيننج على البحر وجنتنج روعه وبارده والغيوم مغطيه المنطقه .. والكاميرون هاي لاند كانت اكثر من روعه بااااارده ومطرها يجنن ةالخضره على مد النظر ... يمكن انت الحظ ما حالفج ها المره ... اتمنى انج تستانسين فيها المره اليايه ... تدرين عاد 3 من صديقاتي اللي شافو الصور غيرو مخططاتهم من اوروبا الى ماليزيا خصه بعد موجة الحر اللي ضربت اوروبا ها السنه :) :) :) |
الحمدلله على السلامة
و ان شاءالله تعوضينها بسفرات قادمة |
| الساعة الآن 01:36 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©